Isaias 6 - Chol de Tumbalá Bible

Lac Yum tsi' pʌyʌ Isaías

¹ Che' bʌ tsa' chʌmi jini rey Uzías, ti jini jach bʌ jab, tsaj q'uele lac Yum, buchul bʌ ti chan ti ñuc bʌ i ye'tel. I yoc jach i pislel tsi' laj but'u jini Templo.

² Ya' wa'alob serafiñob mu' bʌ i yajñelob yic'ot Dios ti panchan. Ti jujuntiquil añob wʌcp'ejl i wich'. Cha'p'ejl mi' c'ʌñob i mosob i wut, cha'p'ejl mi' c'ʌñob i mosob i yoc, cha'p'ejl mi' c'ʌñob ti wejlel.

³ Mi' jac'ob i bʌ ti c'ay: Ch'ujulet, wen Ch'ujulet Dios, i Yumet Panchan yic'ot Pañimil. But'ul pejtel pañimil ti a ñuclel, che'ob.

⁴ Ti jujuntiquil tsi' cha'leyob t'an. Ti jujunyajl tsa' ñijcuyi i ts'ajquil tac otot cha'an i t'an che' woli ti c'ay. Tsa' bujt'i i mal otot ti buts'.

⁵ Joñon tsa cʌlʌ: Obol jax c bʌ come sajtemon. Come tsa'ix j q'uele tic wut c Rey, i Yum Panchan yic'ot Pañimil. Xmulilon, bibi' c t'an, tem chumulon quic'ot winicob bibi' bʌ i t'an, cho'on.

⁶ Che' jini juntiquil serafín am bʌ tenaza ti' c'ʌb tsi' ch'ʌmʌ loq'uel i nich c'ajc ti pulʌntib. Tsa' wejli tilel ba' añon.

⁷ Tsi' tʌlbeyon quej jini nich c'ajc. Tsi' yʌlʌ: Tsa'ix i tʌlʌ a wej ili nich c'ajc. Loc'sʌbilix pejtel a jontolil. Ñusʌbilix pejtelel a mul, che'en.

⁸ Che' jini tsa cubibe i t'an lac Yum woli bʌ i yʌl: ¿Majqui mi caj c choc majlel ba'an c cha'año' bʌ? ¿Majqui yom majlel i sub c t'an? che'en. Joñon tsac jac'ʌ: Um ba' añon c Yum. Chocoyon majlel, cho'on.

⁹ Tsi' subeyon: Cucu suben c cha'año' bʌ: “Anquese cabʌl mi la' wubibeñon c t'an, ma'anic mi caj la' ch'ʌmben isujm. Anquese cabʌl mi la' q'uel i yejtal c p'ʌtʌlel, ma'anic mi caj la' ña'tʌben i sujmlel”, che'en.

¹⁰ Tsʌts'esʌbeñob i pusic'al ili winicob. Mʌcbeñob i chiquin. Mʌcbeñob i wut, ame c'otic i wut, ame mi' yubiñob c t'an, ame mi' ch'ʌmbeñob isujm cha'an mi' cʌyob i mul cha'an mic lajmesañob, che'en.

¹¹ Tsaj c'ajtibe: ¿Jala to, c Yum? cho'on. Tsi' jac'beyon: Jinto laj jembilix i tejclum tac. Che' jocholix mi' cʌytʌl i yototob yic'ot i wumilelob,

¹² che' bʌ tsa'ix c pʌyʌyob majlel ti ñajt bʌ tejclum tac, jochol mi caj i cʌytʌl i lumal Israel ti pejt ti pejt.

¹³ Mi tsa' cʌle junmojt loq'uem bʌ ti lujunmojt, muc'ʌch i sejq'uel jubel ja'el che' bajche' c'olol te'. Pero che' bajche' mi' cha' colel i xujc'unte'lel che' sec'bilix, che'ʌch ja'el jini ch'ujul bʌ tejclum, che'en.