Isaias 50 - Chol de Tumbalá Bible

Jini israelob tsi' cʌyʌyob lac Yum

¹ Lac Yum woli' yʌl: ¿Chucoch tsa' majli Israel la' ña'? ¿Cha'an ba tsaj cʌyʌ? ¿Cha'an ba tsa cʌq'ue i juñilel divorcio? ¿Am ba c bet cha'an mic chon c tejclumob? Ma'anic. Tsa' la' choño la' bʌ ba'an yambʌ la' yum cha'an ti' caj la' mul. Tsa' pʌjyi majlel Israel la' ña' cha'an ti' caj tsa' la' ñusʌbeyon c mandar.

² Che' bʌ tsa' tiliyon, ¿chucoch ma'anic majch tsac taja? Che' bʌ tsac pʌyʌyetla, ¿chucoch ma'anic majch tsi' jac'ʌ? ¿Tutsul ba j c'ʌb cha'an mach c tajayeticla? ¿Mach ba anic c p'ʌtʌlel cha'an mij coltañetla, cha'an mi cʌq'uetla ti libre? Jasʌl mi cʌc' c t'an cha'an mi' laj tiquin jini colem ñajb. Ya' ti colem ja' tiquin lumix mi' majlel. Muq'uix i tuw'an chʌy cha'an ma'anix ja'. Woli' chʌmelob ti tiquin ti'.

³ Joñon mic mos panchan yic'ot i'ic' bʌ tocal che' bajche' mi' mos i bʌ meba' x'ixic woli bʌ ti uq'uel, che'en Dios.

I xuc'tilel i winic Dios che' an ti wocol

⁴ Lac Yum Dios tsi' yʌq'ueyon c ña'tʌbal cha'an mic ñuq'uesʌbeñob i pusic'al jini lujbo' bʌ. Mi' ñijcañon ch'ojyel ti jujump'ejl sʌc'ajel. Mi' jambeñon c chiquin cha'an mic wen ubin.

⁵ Lac Yum Dios tsi' pejcayon. Tsac ñich'tʌbe i t'an. Ma'anic mic sutq'uiben c pat. Mi cʌq'uen c wut.

⁶ Tsa cʌc'ʌ c pat ti jajts'el ti pʌchi. Tsa cʌc'ʌ c choj cha'an mi' bocbeñoñob c tsucti'. Ma'anic tsac mʌyʌ c wut che' bʌ tsi' ts'a'leyoñob. Tsi' p'ajayoñob che' bʌ tsi' tujbayoñob.

⁷ Lac Yum Dios jiñʌch Caj Coltaya. Jini cha'an ma'anic mic p'is tic wenta che' mi' p'ajoñob. Xuc'ul mi cajñel che' bajche' tsʌts bʌ xajlel. Cujil mi caj c mʌl ti' tojlel j contrajob.

⁸ Lʌc'ʌl an jini mu' bʌ i tsictesan toj bʌ c pusic'al. ¿Majqui yom i contrajiñon? La' i ñochtañon cha'an mic taj lojon c bʌ.

⁹ Lac Yum Dios mi' coltañon. ¿Majqui mi' pʌc'on ti mulil? Mach isujmic i t'an j contrajob. Mi caj i jilelob che' bajche' pisil. Jini ts'islum mi caj i c'uxob.

¹⁰ ¿Majqui mi' bʌc'ñan lac Yum? ¿Majqui mi' jac'ben i t'an jini X'e'tel i cha'an? Jini winic, anquese mi' ñumel ba' ic'yoch'an, ba' mach wisilic i sʌclel, cʌyʌl i pusic'al yic'ot i Dios.

¹¹ Pero p'ump'uñetla mu' bʌ la' xic' la' bajñel c'ajc che' mi la' ñijcan letsel i nich cha'an mi la' cha'len q'uix. Cha'lenixla xʌmbal ba' tsiquilix la' c'ajc tsa bʌ la' xiq'ui, come mach la' womic la' ñopon. Mi caj la' cʌytʌl ti la' wocol.