Hageo 1 - Chol de Tumbalá Bible

Tsa' subentiyob cha'an mi' melob Templo

¹ Che' ñumeñix jump'ejl jab woli' cha'len yumʌntel jini rey Darío, che' ti ñaxan bʌ tsic ti agosto, jini x'alt'an Hageo tsa' caji i sub i t'an lac Yum. Hageo tsa' caji i subeñob Zorobabel (i yalobil Salatiel), jini gobernador ti Judá, yic'ot Josué (i yalobil Josadac), jini ñuc bʌ motomaj.

² Tsi' yʌlʌ i Yum Panchan yic'ot Pañimil: Ili winicob x'ixicob woli' lon alob maxto i yorajlelic cha'an mi' melbeñon c Templo. Che' tsi yʌlʌ lac Yum.

³ Jini x'alt'an Hageo tsa' caji i sub i t'an lac Yum.

⁴ Lac Yum tsi' yʌlʌ: ¿I yorajlelix ba mi la' chumtʌl ti wen melbil bʌ la' wotot? Mach i yorajlelic, come jejmen to ili cotot, che'en.

⁵ Woli ti t'an i Yum Panchan yic'ot Pañimil: Ña'tanla bajche' añetla.

⁶ Wen on chuqui tsa' la' pʌc'ʌ. Ts'ita' jach tsa' la' c'aja. Mi la' cha'len we'el, pero ma'anic mi la' ñaj'an. Mi la' jap ja', pero ma'anic mi' lajmel la' tiquin ti'. Mi la' xoj la' pislel, pero ma'anic mi la' q'uixñan. Lolom jach mi la' cha'len ganar, come mi la' lon otsan i tojol la' we'tel ti tsijlem bʌ i yajñib la' taq'uin, che'en.

⁷ Tsi' yʌlʌ i Yum Panchan yic'ot Pañimil: Ña'tanla bajche' añetla.

⁸ Cucula ti letsel ti wits. Ch'ʌmʌla tilel te' tac. Cha' melela ili cotot cha'an tijicña mij q'uel, cha'an mi' tsictiyel c ñuclel, che'en lac Yum.

⁹ Mi la' lon ña'tan on mi caj la' lot la' chubʌ'an. Ts'ita' jach mi la' taj. Tsac wujta yilal cha'an mi' sʌc jilel chuqui tac tsa' la' ch'ʌmʌ tilel ti la' wotot. ¿Chucoch? che'en i Yum Panchan yic'ot Pañimil. Come jejmen ili cotot, anquese wen bʌxetla ti la' wotot ti jujuntiquiletla.

¹⁰ Jini cha'an jini tocal ma'anix mi' yʌq'ueñetla ja'al. Jini lum ma'anix mi' yʌc' ti colel pʌc'ʌbʌl.

¹¹ Tsa cʌc'ʌ jajmel ti pejtelel lum yic'ot ti pejtelel wits tac, cha'an ma'anic mi' colel trigo. Ma'anic i ya'lel ts'usub mi aceite. Mi' tiquin pejtelel pʌc'ʌbʌl tac. Jini cha'an mi' yubiñob wocol winicob x'ixicob yic'ot alʌc'ʌl. Mi' laj jilel pejtelel la' we'tel mu' bʌ la' mel, che'en lac Yum.

¹² Tsi' jac'beyob i t'an lac Yum Dios Zorobabel (i yalobil Salatiel) yic'ot Josué (i yalobil Josadac) jini ñuc bʌ motomaj, yic'ot pejtel yaño' bʌ. Tsi' jac'beyob i t'an Hageo jini x'alt'an, come lac Yum Dios tsi' choco tilel. Tsi' bʌc'ñayob Dios.

¹³ Hageo jini x'alt'an tsi' subeyob i t'an lac Yum: “Añon quic'otetla”. Che' tsi' yʌlʌ lac Yum, che'en Hageo.

¹⁴ Lac Yum tsi' ñijcʌbeyob i pusic'al Zorobabel jini gobernador ya' ti Judá, yic'ot Josué jini ñuc bʌ motomaj*, yic'ot pejtelel winicob x'ixicob ya' bʌ chumulob. Tsi' tempayob i bʌ cha'an mi' cha' melbeñob i yotot Dios, i Yum Panchan yic'ot Pañimil, jiñʌch lac Dios.

¹⁵ Tsa' tejchi ili e'tel che' ti' tejchibal septiembre ti' cha'p'ejl jab i yumʌntel jini rey Darío.