Exodo 39 - Chol de Tumbalá Bible

Tsi' melbeyob i pislel motomajob

¹ Tsi' c'ʌñʌyob jini yʌjyʌx bʌ pisil yic'ot chʌccojan bʌ, yic'ot chʌchʌc bʌ cha'an ti' melol jini bujcʌl tac mu' bʌ i c'ʌjñel ti e'tel ti Tabernáculo. Jiñʌch i pislel Aarón ja'el che' bajche' lac Yum tsi' yʌq'ue mandar Moisés.

² Jini i cha'lajmlel bujcʌl i c'aba' efod, yic'ot yʌjyʌx bʌ pisil yic'ot chʌccojan bʌ yic'ot chʌchʌc bʌ yic'ot wen jalbil bʌ lino.

³ Tsi' cujuyob jini oro cha'an mi' pech i bʌ. Che' pechelix tsi' bic'ti tsiliyob cha'an i wentajlel puy, cha'an mi' jalob jini yʌjyʌx bʌ pisil, yic'ot chʌccojan bʌ, yic'ot chʌchʌc bʌ yic'ot wen jalbil bʌ lino. Che'i tsi' laj ts'isbeyob ochel i sajl oro cha'an wen uts'atax mi' cʌytʌl.

^4-5 Tsi' meleyob ja'el cha't'ujm tirante cha'an mi' yajñel ti' quejlab ti' cha'wejlel. Tsi' cʌchʌyob i cʌjchil i ñʌc'. Che' ja'el i cʌjchil i ñʌc' ts'isbebil ochel oro ti yʌjyʌx bʌ pisil, yic'ot ti chʌccojan bʌ, yic'ot ti chʌchʌc bʌ, yic'ot ti wen jalbil bʌ lino. Che'ʌch bajche' lac Yum tsi' yʌq'ue mandar Moisés.

⁶ Tsi' chajpayob xajlel i c'aba' ónice. Tsi' yotsayob ti oro. Ya' ts'ijbubil i c'aba'ob i p'olbalob Israel.

⁷ Tsi' yʌc'ʌ jini xajlel ya' ti tirante am bʌ ti' quejlab ti jujunwejl cha'an mi' c'ajtesañob israelob che' bajche' lac Yum tsi' yʌq'ue mandar Moisés.

⁸ Che'ʌch bajche' jini bujcʌl i c'aba' efod, uts'at ja'el tsa' mejli i pislel i tajn. Tsi' mele ti oro yic'ot ti yʌjyʌx bʌ pisil, yic'ot chʌccojan bʌ, yic'ot chʌchʌc bʌ, wen jalbil bʌ lino.

⁹ Junlajal i ñuclel, juñajb ti' joytʌlel, che' bajche' jo'p'ejl i cha'c'al centímetro.

¹⁰ Tsi' yʌc'ʌyob chʌntsolom xajlel tac. Ti jini ñaxan bʌ i tsolom an sardio yic'ot topacio yic'ot carbunclo.

¹¹ Ya' ti' cha'tsolomlel bʌ an esmeralda yic'ot zafiro yic'ot diamante.

¹² Ya' ti' yuxtsolomlel an jacinto, yic'ot ágata yic'ot amatista.

¹³ Ya' ti' chʌntsolomlel an berilo, yic'ot ónice yic'ot jaspe. Ñotbil tac ti oro.

¹⁴ Chajpʌbil jini xajlel tac che' bajche' sello tac ba' ts'ijbubil i c'aba'ob jini lajchʌntiquilob i yalobilob Israel.

¹⁵ An cha't'ujm jaxbil bʌ ti puro oro che' bajche' lazo cha'an jini bujcʌl i c'aba' efod.

¹⁶ Tsi' meleyob cha'xojt xotol bʌ melbil bʌ ti oro cha'an mi' yʌc' jini tirante ti jujunwejl i pislel i tajn.

¹⁷ Tsi' yotsayob jini cha't'ujm cadena melbil bʌ ti oro ti jini cha'xojt xotol bʌ am bʌ ti jujunwejl bujcʌl.

¹⁸ Jini i cha'wejlel jini cadena tsi' cʌchʌyob ti' cha'wejlel i quejlab jini bujcʌl i c'aba' efod ya' ti tirante tac.

¹⁹ Tsi' meleyob yambʌ cha'xojt tsucu taq'uin melbil bʌ ti oro. Tsi' yʌc'ʌyob ti' yebal i pislel i tajn ba' lʌpʌl yic'ot jini bujcʌl i c'aba' efod.

²⁰ Tsi' cʌchʌyob yambʌ cha'xojt tsucu taq'uin melbil bʌ ti oro ya' ti yebal jini tirante am bʌ ti bujcʌl. Tsi' yʌc'ʌyob lʌc'ʌl ya' ba'an i cʌjchil i ñʌc'.

²¹ Che' jini tsi' cʌchʌyob jini xotol bʌ tsucu taq'uin cha'an i pislel i tajn yic'ot jini bujcʌl. Tsi' c'ʌñʌ yʌjyʌx bʌ i ch'ajñal. Che' jini ma'anic mi' tʌts' i bʌ i pislel i tajn ba'an jini bujcʌl. Che'ʌch lac Yum tsi' yʌq'ue mandar Moisés.

²² Yʌjyʌx jini bujcʌl i c'aba' efod, wen jalbil.

²³ Ya' ti yojlil ti chan, mero ñuc i ti' ba' mi' yochel i jol. Joch'bil che' bajche' i bic' bujcʌl cha'an ma'anic mi' tsijlel.

²⁴ Ya' ti yebal, ti' joytʌlel jini tam bʌ bujcʌl, tsi' joc'chocobeyob i ch'ʌjlil che'ʌch bajche' ch'umac' yʌjyʌx bʌ yic'ot chʌccojan bʌ yic'ot chʌchʌc bʌ, yic'ot wen jalbil bʌ lino.

^25-26 An jump'ejl alʌ campana melbil bʌ ti oro yic'ot jump'ejl ch'umac', jump'ejl alʌ campana yic'ot jump'ejl ch'umac', che'i ti' joytʌlel ti' pejtelel i ti'. Aarón tsi' lʌpʌ ili bujcʌl che' bʌ tsi' mele i ye'tel ti' tojlel lac Yum che' bajche' lac Yum tsi' yʌlʌ.

^27-28 Che' ja'el tsi' melbeyob tam bʌ i pislel Aarón yic'ot i yalobilob melbil bʌ ti lino, wen jalbil bʌ. Tsi' c'ʌñʌ wen bʌ lino ti' melol i pislel i tajn, yic'ot chan bʌ i yit i pixol, yic'ot jini alʌ pixolʌl, yic'ot i borwex.

²⁹ Tsi' c'ʌñʌyob wen jalbil bʌ lino ti' melol i cʌjchil i ñʌc', yʌjyʌx bʌ, chʌccojan bʌ yic'ot chʌchʌc bʌ, joch'bil bʌ, che' bajche lac Yum tsi' yʌq'ue mandar Moisés.

³⁰ Tsi' c'ʌñʌyob puro oro ti' melol junq'uejl alʌ tsucu taq'uin cha'an mi' ts'ijbañob ya'i: Ch'ujul cha'an lac Yum, che'en.

³¹ Tsi' cʌchʌyob yʌjyʌx bʌ xelajʌl cha'an mi' cʌjchel jini alʌ tsucu taq'uin ya' ti alʌ pixolʌl che' bajche' lac Yum tsi' yʌq'ue mandar Moisés.

Tsa' ujti jini e'tel cha'an Tabernáculo

³² Tsa' ujti ti melol pejtelel jini e'tel cha'an Tabernáculo, jini otot ba' mi' tempañob i bʌ yic'ot Dios. Jini israelob tsa'ix i meleyob pejtelel che' bajche' lac Yum tsi' yʌq'ue mandar Moisés.

^33-34 Tsi' ch'ʌmbeyob tilel Tabernáculo, jini pisil bʌ i yotot Dios, ya' ba'an Moisés:

^35-41 Yic'ot pejtelel i bʌl, yic'ot i joc'lib tac, yic'ot i tablajlel tac, yic'ot i te'el tac, yic'ot i c'ʌclib tac, yic'ot i mʌjquil tac melbil bʌ ti' pʌchʌlel tat tiñʌme' ts'ajbil bʌ ti chʌchʌc bʌ ts'ajc, yic'ot i pʌchʌlel chivo, yic'ot jini joc'ol bʌ pisil, yic'ot jini Arca, yic'ot i barajlel tac, yic'ot ba' mi' ñusʌntel mulil, yic'ot jini mesa, yic'ot pejtelel chuqui tac yom c'ʌñol, yic'ot jini waj mu' bʌ i pʌsbentel Dios, yic'ot jini lámpara melbil bʌ ti oro, yic'ot pejtelel yom bʌ c'ʌñol, yic'ot aceite cha'an c'ajc, yic'ot jini pulʌntib melbil bʌ ti oro, yic'ot aceite cha'an bojñibʌl, yic'ot xojocña bʌ pom, yic'ot jini cortina cha'an i mʌjquil ba' mi' yochelob ti Tabernáculo, yic'ot jini pulʌntib melbil bʌ ti bronce, yic'ot jini chim melbil bʌ ti bronce yic'ot i barajlel tac, yic'ot mu' bʌ i c'ʌjñel tac, yic'ot i yajñib ja', yic'ot i buchlib, yic'ot jini cortina tac cha'an patio, yic'ot i te'el tac, yic'ot i c'ʌclib tac, yic'ot jini e'tijibʌl tac i wentajlel lawux, yic'ot pejtelel mu' bʌ i c'ʌjñel cha'an e'tel ti Tabernáculo ba' mi' tempañob i bʌ, yic'ot jalbil bʌ jini pislelʌl tac cha'an mi' c'ʌñob che' mi' melbeñob i ye'tel Dios ti Ch'ujul bʌ Ajñibʌl, yic'ot jini Ch'ujul bʌ i pislel Aarón jini motomaj, yic'ot i pislel ja'el i yalobilob cha'an mi' cha'leñob e'tel ti motomaj.

⁴² Jini israelob tsi' meleyob ti' pejtelel che' bajche' lac Yum tsi' yʌq'ue mandar Moisés.

⁴³ Tsi' q'uele Moisés jini e'tel. Che'ʌch tsi' meleyob ti' pejtelel che' bajche' tsi' yʌlʌ lac Yum. Che' jini Moisés tsi' yʌq'ueyob israelob i yutslel i t'an.