Exodo 20 - Chol de Tumbalá Bible

Jini lujump'ejl mandar

^1-2 Dios tsi' subu pejtel ili t'an: Joñon a Yumon a Dioson. Tsac pʌyʌyet loq'uel ti' lumal egiptojob, ya' ba' chucbilet ti majtan e'tel.

³ Mach a ñop yambʌ dios. Yom jach ma' ñopon.

⁴ Mach a bajñel mel a dios tac, mi i yejtal winic mi i yejtal bʌte'el am bʌ ti pañimil mi i yejtal mut am bʌ ti chan, mi i yejtal chʌy am bʌ ti ja'.

⁵ Mach a c'uchchocon a bʌ ti' tojlelob. Mach a diosiñob, come a Yumon a Dioson. Joñon jach a Dioson. Cujil mich'ajel che' ma'anic j c'uxbintel. Mi cʌq'ueñob i toj i mul winicob x'ixicob yic'ot i yalobilob c'ʌlʌl ti' yuxlajmlel yic'ot ti' chʌnlajmlel i yalobilob jini mu' bʌ i ts'a'leñoñob.

⁶ Mic pʌsbeñob i yutslel c pusic'al bajc'ʌlob mu' bʌ i c'uxbiñoñob mu' bʌ i jac'beñon c mandar.

⁷ Mach a lon tajben i c'aba' a Yum a Dios, come a Yum ma'anic mi caj i ñusʌben i mul jini mu' bʌ i lon tajben i c'aba'.

⁸ Yom ma' chʌn p'is ti a wenta i yorajlel c'aj o. Yom ma' q'uel ti ch'ujul jini q'uin.

⁹ Wʌcp'ejl q'uin yom ma' cha'len e'tel yic'ot pejtel chuqui yom melol.

¹⁰ I wucp'ejlel q'uin i yorajlelʌch c'aj o cha'an a Yum Dios. Ti ili q'uin mach a wis cha'len e'tel, mi jatet, mi ch'iton bʌ a walobil, mi xch'oc bʌ a walobil, mi a winic, mi a criada, mi a wʌlac' mi jini am bʌ ti a tojlel mach bʌ a pi'ʌlic,

¹¹ come ti wʌcp'ejl q'uin a Yum tsi' mele panchan yic'ot pañimil, jini ñajb, yic'ot pejtel i bʌl. Tsi' c'aja i yo che' ti wucp'ejlel q'uin. Jini cha'an a Yum tsi' yʌlʌ uts'at i q'uiñilel c'aj o. Tsi' q'uele ti ch'ujul.

¹² C'uxbin a tat a ña' cha'an ma' jalijel ti jini lum tsa' bʌ i yʌq'ueyet a Yum Dios.

¹³ Mach a cha'len tsʌnsa.

¹⁴ Mach a cha'len ts'i'lel.

¹⁵ Mach a cha'len xujch'.

¹⁶ Mach a cha'len jop't'an ti' contra a pi'ʌl.

¹⁷ Mach a mulʌben i yotot a pi'ʌl, mi i yijñam mi i winic, mi i criada, mi i wacax, mi i burro, mi yambʌ chuqui tac an i cha'an. Che' tsi' yʌlʌ Dios.

Jini winicob x'ixicob tsi' wen cha'leyob bʌq'uen

¹⁸ Pejtelel winicob x'ixicob tsi' q'ueleyob i xu'il chajc. Tomocña woli ti letsel i buts'il jini wits. Tsi' yubiyob i t'an chajc yic'ot i t'an trompeta. Tsiltsilñayob ti bʌq'uen che' bʌ tsi' q'ueleyob. Tsi' tʌts'ʌyob i bʌ. Ñajt tsa' wa'leyob.

¹⁹ Tsi' subeyob Moisés: Pejcañon lojon, mi caj c ñich'tʌbeñet a t'an. Pero mach comic mi' pejcañon lojon Dios ame chʌmicon lojon, che'ob.

²⁰ Moisés tsi' jac'beyob: Mach la' cha'len bʌq'uen. Tsa' tili Dios cha'an mi' q'uel la' pusic'al. Yom mi la' bʌc'ñan Dios cha'an ma'anic mi la' cha'len mulil, che'en.

²¹ Ñajt tsa' wa'leyob winicob x'ixicob. Moisés tsa' majli ba'an Dios ya' ba'an ic'ch'ipan bʌ.

Mandar cha'an pulʌntib

²² Lac Yum tsi' sube Moisés: Suben israelob: “Tsa'ix la' wubi che' bʌ tsac pejcayetla wʌ' ti panchan.

²³ Mach la' mel la' dios tac mi ti plata mi ti oro.

²⁴ Yom mi la' melbeñon pulʌntib ti pajc'. Ya' yom mi la' pulbeñon jini tsʌnsʌbil bʌ c majtan, yic'ot c majtan cha'an wocolix cʌlʌ yic'ot tiñʌme' yic'ot wacax. Ya' jach yom ba' mi cʌc' j C'aba' cha'an mic ña'tʌntel. Che' jini mi caj c tilel ba' añetla cha'an mi cʌq'ueñetla i tijicñʌyel la' pusic'al.

²⁵ Mi la' wom la melbeñon pulʌntib ti xajlel, mach mi la' tsep ti e'tʌjibʌl, come che' jini bibi' mij q'uel.

²⁶ Mach mi la' melben i quejb tac pulʌntib ame mi' tsictiyel i mal la' bujc”, che'en.