Ester 8 - Chol de Tumbalá Bible

Asuero mi' coltan judíojob

¹ Ti jini jach bʌ q'uin jini rey Asuero tsi' yʌc'ʌ ti' wenta Ester pejtel i pi'ʌlob Amán yic'ot i chubʌ'an Amán, i contra bʌ judíojob. Tsa' pʌjyi ochel Mardoqueo ti' tojlel rey, come tsa'ix i tsictesa Ester cha'an mero i pi'ʌlʌch jini tsa' bʌ i cosa.

² Cha' lʌpʌlix i cha'an rey i mʌtc'ʌb am bʌ i sello rey tsa' bʌ i yʌq'ue i lʌp Amán ti yambʌ ora. Tsi' loc'sa. Tsi' yʌq'ue Mardoqueo. Ester tsi' yotsa ti' wenta Mardoqueo pejtel i pi'ʌlob Amán yic'ot i chubʌ'an Amán.

³ Ester tsa' cha' caji' pejcan jini rey. Tsi' choco jubel i bʌ ti' yoc. Woli ti uq'uel che' bʌ tsi' c'ajtibe ti wocol t'an cha'an mi' mʌctan jini wocol tsa' bʌ i ña'ta i melbeñob Amán, i p'olbal bʌ Agag, che' bʌ tsi' yʌc'ʌ mandar cha'an mi' tsʌnsʌntelob jini judíojob.

^4-5 Jini rey tsi' sʌts'ʌ i c'ʌb, chucul bʌ i cha'an jini orote', cha'an mi' pʌsben Ester i yutslel i pusic'al. Tsa' ch'ojyi Ester. Ya' wa'al ti' tojlel rey tsa' caji ti t'an: Mi che'ʌch yom a pusic'al, c rey, mi tsa'ix c taja i yutslel a pusic'al, mi wola' q'uelon ti uts'at, a wocolic ts'ijban mandar cha'an mi' laj jilel jini jun tsa' bʌ i chajpa Amán i yalobil Hamedata i yalobil bʌ Agag ame jisʌnticob judíojob ti pejtelel lum ba' woliyet ti yumʌntel.

⁶ ¿Bajche' mi mejlel j cuch mi tsi' tajayob wocol c pi'ʌlob? Mach cujchic c cha'an mi tsa' jisʌntiyob c pi'ʌlob judíojob, che'en Ester.

⁷ Jini rey Asuero tsi' sube Ester i pi'ʌl yic'ot Mardoqueo jini judío: Awilan tsa'ix cʌc'ʌ ti' wenta Ester pejtel i pi'ʌlob Amán yic'ot i chubʌ'an. Tsa'ix jijch'i Amán ti jini wa'al bʌ te' come tsi' ñopo i jisan judíojob.

⁸ Mi mejlel la' mel jun ti' c'aba' rey bajche' jach yom la' pusic'al cha'an mi la' coltan jini judíojob. Otsʌbenla i sellojlel yic'ot c mʌtc'ʌb, che'en.

⁹ Jini rey tsi' pʌyʌ tilel sts'ijbayajob ti jini jach bʌ ora ti 23 de julio. Tsi' ts'ijbayob jini mandar che' bajche' tsi' subeyob Mardoqueo. Tsi' yʌc'ʌ ti' wenta año' bʌ i ye'tel cha'an mi' coltañob judíojob. I wentajʌch gobernadorob yic'ot yumʌlob ti jujumpejt colem tejclum c'ʌlʌl ti India c'ʌlʌl ti Etiopía, wucp'ejl i wucc'al (127) colem tejclum tac. Ts'ijbubil jini mandar ti jujunchajp t'an che' bajche' mi' cha'leñob t'an winicob cha'an mi' laj ch'ʌmbeñob isujm. Ts'ijbubil ti' t'an judíojob ja'el che' bajche' mi' cha'leñob ts'ijb.

¹⁰ Tsi' yotsʌbeyob i c'aba' jini rey Asuero yic'ot i sello ya' ti ts'ijbujel. Tsi' chocoyob majlel jun ti' wenta x'ac' juñob tsa' bʌ majliyob ti c'ʌchlib tac wen yujil bʌ ajñel. Jiñʌch i c'ʌchlib tac rey.

¹¹ Ya' ti jun jini rey tsi' yʌq'ueyob permiso jini judíojob ti jujump'ejl tejclum cha'an mi' tempañob i bʌ, cha'an mi' coltañob i bʌ. An permiso cha'an mi' jisañob i contrajob mi tsa' tiliyob ti' contra. An permiso cha'an mi' laj tsʌnsañob yic'ot i pi'ʌlob yic'ot i yalobilob, che' ja'el cha'an mi' laj ch'ʌmbeñob majlel i chubʌ'an.

¹² Cojach jump'ejl q'uin an permiso ti pejtelel colem tejclum tac ba' woli ti yumʌntel jini rey Asuero. Jini q'uin jiñʌch 28 de febrero.

¹³ Tsi' yʌc'ʌ ti melol yan tac bʌ jun, i pi'ʌl jini ts'ijbubil bʌ, cha'an mi' pam pujquel jini mandar ti jujump'ejl colem tejclum cha'an mi' yubiñob pejtel xchumtʌlob. Tsi' subeyob judíojob cha'an mi' chajpañob i bʌ cha'an mi' t'uchtañob i contrajob ti jini jump'ejl jach bʌ q'uin.

¹⁴ Jini x'ac juñob tsa' bʌc' majliyob c'ʌchʌlob ti caballo am bʌ ti' wenta rey. Wen yujilob ajñel i c'ʌchlib. Ti ajñel tsa' majliyob che' bajche' tsi' yʌc'ʌ mandar rey. Yaño' bʌ tsi' pucuyob jini mandar ti Susa i tejclum jini rey.

¹⁵ Tsa' loq'ui Mardoqueo ti' tojlel rey che' woliyob ti c'am bʌ t'an jini chumulo' bʌ ti Susa cha'an tijicñayob i pusic'al. Lʌpbil i cha'an Mardoqueo i pislel jini rey, jini sʌsʌc bʌ yic'ot jini yʌjyʌx bʌ. C'ʌcʌl ti' jol jini corona melbil bʌ ti oro. An i mosil i jol melbil bʌ ti lino, ts'ajbil ti chʌccolan bʌ.

¹⁶ Tsa' wen ñuc'ayob i pusic'al judíojob. Ma'anix i cuch yubil. Cha' tijicña pañimil. Añʌch i c'uxbintel.

¹⁷ Tsa' ñuc'ayob i pusic'al judíojob ti pejtelel colem tejclum tac yic'ot ti xchumtʌl tac baqui jach tsa' pujqui i mandar rey yic'ot i ts'ijbujel. Wen tijicñayob i pusic'al tsi' meleyob q'uin. Tsi' cʌyʌyob i ye'tel. Cabʌl chumulo' bʌ ti' joytilel tsi' sutq'uiyob i bʌ ti judío come tsa' ochi i bʌq'uen cha'an judíojob.