Ester 1 - Chol de Tumbalá Bible

Vasti, i yijñam rey, mi' ñusʌben i t'an jini rey

¹ Che' bʌ tsi' cha'le yumʌntel Asuero, an ti' wenta wucp'ejl i wucc'al (127) colem tejclum tac c'ʌlʌl ti India c'ʌlʌl ti Etiopía.

² Che' buchul Asuero ti' ye'tel ya' ti Susa i tejclum rey,

³ tsi' cha'le q'uiñijel che' uxp'ejlix jab i yumʌntel. Tsi' pʌyʌ tilel jini ñuco' bʌ i ye'tel yic'ot i winicob yic'ot capitañob loq'uemo' bʌ ti Persia yic'ot ti Media. Che' bʌ ya' añob gobernadorob yic'ot wen chumulo' bʌ ti' tojlel,

⁴ jini rey tsi' pʌsbeyob i ñuclel i yumʌntel yic'ot bajche' c'amel an i chubʌ'an letsem bʌ i tojol yic'ot i t'ojol jax bʌ i bujc yic'ot pejtel i ñuclel. Tsi' cha'leyob q'uiñijel bolonc'al q'uin.

⁵ Che' ujtemix jini q'uiñijel, jini rey tsi' melbeyob q'uin cha'an pejtel chumulo' bʌ ti Susa, jini ñuc bʌ tejclum ya' ba'an i yotot rey. Tsi' laj pʌyʌ tilel jini wen chumulo' bʌ yic'ot p'ump'uño' bʌ. Wucp'ejl q'uin tsi' cha'leyob q'uiñijel ti pam i yotot rey ya' ba'an pʌc'ʌbʌl.

⁶ Ya' sʌts'ʌl lazo ba' liquil sʌsʌc bʌ pisil tʌc'ʌl yic'ot yʌjyʌx bʌ pisil i wenta lejchempat*. An pisil bʌ tsalʌl. Joc'ol pisil ti xotol tac bʌ plata jucbil bʌ ochel ya' ti lazo. Jini lazo jiñʌch bʌch'bil bʌ lino wen fino bʌ, ts'ajbil bʌ ti chʌccolan bʌ. I yoyel i yotot rey ya' ba' cʌchʌl lazo, jiñʌch i t'ojol jax bʌ xajlel, i c'aba' mármol. Q'uiy tʌsbil ya' ti lum an ts'ʌylaw bʌ xajlel ti chajp ti chajp: pórfido yic'ot mármol yic'ot perla yic'ot yan tac bʌ xajlel letsem bʌ i tojol. Ya' cotchocobil ch'ac melbil bʌ ti oro yic'ot ti plata.

⁷ Melbil ti oro jini taza tac ti chajp ti chajp. Ma'anic cha'p'ejl lajal bʌ. Mach p'isbilic tsi' yʌq'ueyob i jap vino jini rey, come cabʌlʌch jini vino.

⁸ Tsi' cha'le mandar jini rey. Tsi' subeyob pejtel año' bʌ i ye'tel cha'an ma'anic majch mi' wersa jap vino mi mach yomic. Jini yom bʌ i jap mi mejlel i jap che' bajche' c'amel yom i pusic'al, come jiñʌch i mandar rey.

⁹ Tsi' cha'le q'uiñijel ja'el Vasti, i yijñam rey. Parte ba' tempʌbilob x'ixicob ti jump'ejl i mal i yotot jini rey Asuero.

¹⁰ Ti' wucp'ejlel q'uin che' tijicñayix i pusic'al jini rey cha'an vino, tsi' pʌyʌ tilel wuctiquil eunucojob tsa' bʌ i cha'libeyob servir. I c'aba' eunucojob: Mehumán, Bizta, Harbona, Bigta, Abagta, Zetar yic'ot Carcas.

¹¹ Tsi' subeyob cha'an mi' pʌyob tilel Vasti, jini co'ʌl, che' c'ʌcʌl ti' jol jini corona, i ch'ʌjlib i yijñam rey, cha'an mi' q'uelob pejtel año' bʌ i ye'tel yic'ot pejtel xjula'ob come wen i t'ojol jax i yijñam.

¹² Pero ma'anic tsi' jac'ʌ i pʌyol jini co'ʌl Vasti che' bʌ tsa' tiliyob jini eunucojob*. Ma'anic tsi' jac'be i mandar rey. Jini cha'an tsa' mich'a jini rey. Cʌlʌx jax i mich'ajel.

¹³ Jini rey tsi' pejca año' bʌ i ña'tibal, come i tilel ma'anic chuqui mi' mel che' maxto anic mi' pejcan jini yujilo' bʌ ley yic'ot yujilo' bʌ meloñel.

¹⁴ Wuctiquilob jini winicob buchulo' bʌ ti' t'ejl rey. Ch'oyolob ti Persia yic'ot Media. I c'aba'ob: Carsena, Setar, Admata, Tarsis, Meres, Marsena yic'ot Memucán. Tsa' mejli i q'uelbeñob i wut rey, come jiñobʌch ñuco' bʌ i ye'tel ti' yumʌntel.

¹⁵ Jini rey tsi' c'ajtibeyob: ¿Bajche' ts'ijbubil ti ley? ¿Bajche' mi caj i toj i mul jini co'ʌl Vasti cha'an ma'anic tsi' jac'be i mandar rey che' bʌ tsi' pʌyʌyob eunucojob? che'en Asuero.

¹⁶ Memucán tsa' caji' jac'ben ti' tojlel jini ñuco' bʌ i ye'tel. Tsi' yʌlʌ: Mach jinic jach ti' tojlel rey an i mul jini co'ʌl Vasti, pero ti' tojlel jini ñuco' bʌ i ye'tel yic'ot pejtel winicob ti jujump'ejl colem tejclum ba' woli ti yumʌntel jini rey Asuero,

¹⁷ come mi caj i cʌjñel ti pejtelel x'ixicob chuqui tac tsi' mele jini co'ʌl. Che' jini mi caj i ts'a'leñob i ñoxi'al, come mi caj i yʌlob: “Tsi' cha'le mandar jini rey Asuero cha'an mi' pʌjyel tilel jini co'ʌl Vasti pero ma'anic tsi' jac'ʌ”. Che' mi caj i yʌlob x'ixicob.

¹⁸ Ti ora jach lac pi'ʌlob, jini x'ixicob ch'oyolo' bʌ ti Persia yic'ot Media, mi caj i pam pucob jini t'an ti' tojlel pejtel ñuco' bʌ i ye'tel ti' yumʌntel rey. Che' jini mi caj c taj lojon c ts'a'lentel. Mi' caj ti p'ojlel mich'ajel.

¹⁹ Mi che'ʌch yom i pusic'al rey, la' i mel mandar. La' ts'ijbuntic che' bajche' i tilel mi' melob mandar jini persiajob yic'ot mediajob cha'an ma'anic mi mejlel ti jejmel che' jini. La' i yʌc' mandar jini rey Asuero cha'an ma'anix mi' chʌn tilel Vasti ti' tojlel rey ti pejtelel ora. La' i pʌy ti' yijñam yambʌ x'ixic ñumen uts'at bʌ cha'an mi' ch'ʌmben i ye'tel jini co'ʌl Vasti.

²⁰ Che' mi' pam pujquel i mandar rey ti pejtelel lum c'ʌlʌl ti' ñajtlel i yumʌntel rey, mi caj i c'uxbiñob i ñoxi'al pejtel x'ixicob, jini wen chumulo' bʌ yic'ot jini p'ump'uño' bʌ. Che' tsi' yʌlʌ Memucán.

²¹ Tijicña i pusic'al jini rey yic'ot jini ñuco' bʌ i ye'tel cha'an jini t'an. Tsi' yʌc'ʌ mandar jini rey che' bajche' tsi' yʌlʌ Memucán.

²² Tsi' choco majlel jun ti pejtelel i yumʌntel. Tsi' yʌc'ʌ ti ts'ijbuntel ti jujump'ejl tejclum che' bajche' yujilob ts'ijb. Tsi' cha'le mandar cha'an mi' yumʌntelob winicob ti' tojlel i pi'ʌlob año' bʌ ti' yotot. Tsi' yʌc'ʌ ti pam pujquel jini mandar ti jujunchajp bʌ i t'an winicob.