Eclesiastes 9 - Chol de Tumbalá Bible

Jechojctic añonla ti pañimil

¹ Tsa' caji c wen ña'tan, añob ti' yumintel Dios pejtel jini tojo' bʌ año' bʌ i pusic'al yic'ot pejtel i melbalob. Mach wen tsiquilic mi c'uxbibilob ti Dios o mi ts'a'lebilob. Mach la cujilic chuqui mi' caj ti ujtel ti lac tojlel.

² Lajal jach chuqui mi lac taj bajche' jach añonla, mi uts'at lac pusic'al o mi jontolonla, mi woli lac jac'ben i t'an o mi woli lac ñusan, mi xuc'ulonla o mi to'ol jach añonla. Wen leco jini, come lajal chuqui tac mi lac taj ti yebal panchan, mi tojonla o mi an lac mul.

³ Jini cha'an ma'anic mi' cʌyob i jontolil winicob. Mi' bajñel ña'tañob chuqui yomob i mel anquese socol i bijlel. Yujilob mi' cajelob ti chʌmel.

⁴ Jini jach cuxulo' bʌ an i pijtaya. An i c'ʌjñibal jini ts'i' che' cuxul to, pero ¿chuqui i ye'tel bajlum che' chʌmenix?

⁵ Yujilob jini cuxulo' bʌ mi' cajelob ti chʌmel, pero ma'anix chuqui yujilob jini chʌmeñobix bʌ. Tsa'ix ñumi i yorajlel cha'an mi' sujbelob ti ñuc. Ma'anix mi' chʌn ña'tintelob.

⁶ Tsa'ix ñumi i yorajlel c'uxbiya, yic'ot i yorajlel ts'a'leya yic'ot pejtel tsa' bʌ i lon ña'tayob i mel che' cuxulob to. Mach chʌn sujticob ti pañimil cha'an mi' cha' tajob i tijicñʌyel ti yebal panchan.

⁷ Jini cha'an, cucu, cha'len we'el yic'ot uch'el yic'ot i tijicñʌyel a pusic'al. Come tsa'ix i q'uele Dios pejtel a melbal.

⁸ Lʌpʌ jini wen bʌ a bujc. Xiban a jol.

⁹ Yom tijicñayet a wic'ot a wijñam mu' bʌ a c'uxbin che' cuxulet tola ti yebal panchan, come jiñʌch wen ñuc bʌ mu' bʌ i yʌq'ueñet Dios cha'an mi' ñuc'an a pusic'al che' ma' lujb'an ti a we'tel, che' lolom jach ma' ñusan q'uin ti yebal panchan.

¹⁰ Ti pejtelel chuqui ma' mel, mele bajche' yom melol, come ma'anix e'tel ba' ma' majlel. Ma'anix chuqui ma' wis ña'tan a mel.

¹¹ Anto chuqui tsaj q'uele ti yebal panchan. Mach jinic wen yujil bʌ ajñel mu' bʌ i c'otel ñaxan. Mach jinic wen p'ʌtʌl bʌ mu' bʌ i mʌjlel i cha'an. Mach cha'anic i ña'tibal mi' taj i bʌl i ñʌc' jini cabʌl bʌ i pusic'al. Jini wen yujil bʌ e'tel mach ti pejtelic ora mi' taj i ñuclel ti' wut i pi'ʌlob. An mu' bʌ i tajob, an mach bʌ i tajayobic. Tijicña jini am bʌ i coltʌntel ti pejtelel chuqui yom i taj.

¹² Ma'anic majqui yujil baqui ora mi caj i chujquel ti wocol. Lajalonla bajche' chʌy mu' bʌ i chujquel ti chimo' chʌy yic'ot te'lemut mu' bʌ i chujquel ti yac. Che' ja'el mi lac bʌc' cajel ti wocol.

I ña'tʌbal ñumen ñuc bajche' i p'ʌtʌlel

¹³ Anto yambʌ tsa' bʌ j q'uele che' bʌ tsaj cʌñʌ majlel winicob.

¹⁴ Tsaj q'uele alʌ tejclum ba' ma'anic jaytiquil xchumtʌlob. Tsa' tili ñuc bʌ rey yic'ot bajc'ʌl soldadojob. Tsi' ñopo i jisan jini tejclum.

¹⁵ Ya' chumul juntiquil winic am bʌ cabʌl i pusic'al. Wen pobre jini winic, pero tsi' wen ña'ta bajche' yom melol cha'an mi' coltan jini tejclum. Ti' caj i cʌntesʌbal tsa' mʌjli i cha'añob. Che' coltʌbilix jini tejclum, ma'anix majch tsi' chʌn p'isi ti wenta i ye'tel jini winic.

¹⁶ Melel wen ñuc i ye'tel winicob cabʌl bʌ i pusic'al. Ñumen i c'ʌjñibal jini cabʌl bʌ i pusic'al bajche' jini cabʌl bʌ i p'ʌtʌlel i bʌc'tal. Pero mi pobre jini cabʌl bʌ i pusic'al, mi caj i ts'a'lentel. Ma'anic majch mi' p'is ti wenta.

¹⁷ Wen uts'at i t'an cha'tiquil uxtiquil año' bʌ i pusic'al mu' bʌ i mucul subob bajche' yom melol. Ñumen yom jac'ol i t'an bajche' i t'an capitán c'am bʌ mi' yʌc' mandar ti' tojlel bajc'ʌl winicob mach bʌ añobic i pusic'al.

¹⁸ Jini am bʌ i pusic'al ñumen an i c'ʌjñibal bajche' e'tijibʌl mu' bʌ laj c'ʌn ti guerra, pero juntiquil xmulil mi' lon ac' ti jilel cabʌl lac wenlel.