Daniel 8 - Chol de Tumbalá Bible

Daniel tsi' q'uele carnero yic'ot i tat chivo

¹ Che' ti' yuxp'ejlel jab che' woli ti yumʌntel jini rey Belsasar, tsac cha' q'uele bʌbʌq'uen bʌ che' bajche' ti ñaxan. Joñon Danielon.

² Tsaj q'uele che' bajche' ya' añon ti Susa, jiñʌch ñuc bʌ tejclum ti' yumʌntel Elam. Ya' añon ti' ti' jini ñoja' i c'aba' Ulai.

³ Che' bʌ tsac letsa c wut tsaj q'uele juncojt tat tiñʌme' ti' ti' jini ñoja'. An cha'ts'ijt i xulub, wen chan tac, pero ñumen chan junts'ijt bajche' yambʌ. I cha'ts'ijtlel bʌ tsa' bʌ pasi ti wi'il tsi' ñusʌbe i chanlel jini ñaxan bʌ.

⁴ Jini tat tiñʌme' tsi' pam cha'le lujchiya. Tsi' laj choco tac jini am bʌ ti' tojel i wut. Ma'anic majch tsa' mejli i jisan cha'an cabʌl i p'ʌtʌlel. Tsi' mele che' bajche' yom. Tsi' wen ñuq'uesa i bʌ.

⁵ Tsac cha'le tsic pusic'al cha'an ma'anic tsac ch'ʌmbe isujm. Ti ora tsa' tili tat chivo loq'uem bʌ ti' bʌjlibal q'uin. Tsa' tili ti ajñel. Ma'anic tsi' t'uchta lum yilal. An junts'ijt colem bʌ i xulub ya' ti' yojlil jini cha'p'ejl i wut.

⁶ Tsa' c'oti ti lʌc'ʌl ba'an jini tat tiñʌme' am bʌ cha'ts'ijt i xulub. Jiñʌch wa'al bʌ ya' ti' ñoja' tsa' bʌ j q'uele ti ñaxan. Ajñel tsa' tili tat chivo i contrajin jini tat tiñʌme' ti pejtelel i p'ʌtʌlel.

⁷ Wen mich' tsa' c'oti ti' tojlel tat tiñʌme'. Tsi' c'ʌsbe i xulub ti cha'ts'ijtlel. Ma'anix i p'ʌtʌlel jini tat tiñʌme' cha'an mi' coltan i bʌ. Jini tat chivo tsi' choco ti lum. Tsa' caji i t'uchtan. Ma'anic majch tsa' mejli i coltan jini tat tiñʌme'.

⁸ Tsa' utsi caji ti tsictiyel i ñuclel jini tat chivo. Che' cabʌlix i p'ʌtʌlel tsa' bʌc' c'ocbenti loq'uel jini chan bʌ xulub. Ya' ba' tsa' loq'ui junts'ijt tsa' pasi yambʌ chʌnts'ijt tsa' bʌ i tuch'u i chʌnwejlel pañimil.

⁹ Junts'ijt tsa' wen p'ʌta. Tsa' caji i cha'len guerra ti sur yic'ot ya' ti' pasibal q'uin yic'ot ti' contra jini israelob.

¹⁰ Tsi' contraji i cha'año' bʌ Dios. Tsi' jisa lamital jini ñuco' bʌ i ye'tel.

¹¹ Tsi' ñopo i contrajin i Yum jini yumʌlob ti panchan. Tsi' tiq'ui jini mu' bʌ i pulbeñob i majtan tac Dios. Tsi' bib'esa jini Templo ba' mi' cha'leñob ch'ujutesaya.

¹² Pero tsa' tijq'uiyob jini año' bʌ ti panchan ame bʌc' tilic i jisañob jini jontol bʌ yumʌl. Jini cha'an tsa' jili ti pañimil chuqui tac toj. Tsa' p'ojli lot yic'ot jontolil.

¹³ Tsa cubibe i t'an cha'tiquil ángelob. Juntiquil tsi' c'ajtibe yambʌ: ¿Baqui ora mi caj i cha' pulbentel i majtan Dios ti jujump'ejl q'uin ya' ti pulʌntib? ¿Jala to mi caj i bib'esʌntel jini Ch'ujul* bʌ Ajñibʌl i cha'an lac Yum? ¿Baqui ora mi caj i q'uextʌbentel i jontolil? ¿Baqui ora mi caj i mʌjlel i cha'an xñopt'añob?

¹⁴ Yambʌ ángel tsi' jac'ʌ: Jinto mi' ñumel lujump'ejl i waxʌc'al yic'ot uxbajc' (2,300) q'uin, che'en. Ti wi'il mi caj i sʌq'uesʌntel jini Ch'ujul bʌ Ajñibʌl.

¹⁵ Joñon Danielon, tsac cha'le wersa cha'an mic ch'ʌmben isujm ili tsa' bʌ j q'uele. Awilan tsa' wa'le winic tic tojlel.

¹⁶ Tsa cubibe i t'an tilem bʌ ya' ti ñoja' i c'aba' Ulai. Tsi yʌlʌ: Gabriel, tsictesʌben i sujmlel jini ujtel to bʌ i q'uel ili winic, che'en.

¹⁷ Gabriel tsi' lʌc'tesa i bʌ ba' añon. Tsa' cajiyon ti wen bʌq'uen. Tsa' ñuc yajliyon ti lum. Tsi' subeyon: I yalobil winic, yom ma' ch'ʌmben isujm. Mi caj i ts'ʌctiyel pejtel iliyi che' ti' jilibal pañimil, che'en.

¹⁸ Tsa' c'uñ'ayon. Tsa' ñol yajliyon ti lum. Pero tsi' ñijcayon ch'ojyel. Tsi' coltayon cha'an mic wa'tʌl.

¹⁹ Tsi' subeyon: Wʌ' añon cha'an mic subeñet chuqui mi caj i yujtel che' ti' yorajlel i mich'ajel Dios, come jini q'uelel bʌ a cha'an mi' caj ti ujtel ti' jilibal pañimil.

²⁰ Jini tat tiñʌme' tsa' bʌ a q'uele am bʌ cha'ts'ijt i xulub, jiñʌch rey ti Media yic'ot jini rey ti Persia.

²¹ Jini tat chivo jiñʌch yumʌl ti Grecia. Jini tam bʌ i xulub am bʌ ti' yojlil i wut jiñʌch ñaxan bʌ rey ti Grecia.

²² Jini chʌnts'ijt xulub tsa' bʌ pasi ti' q'uexol jini ñaxan bʌ, jiñʌch chʌntiquil yumʌlob. Pero mach cabʌlic i ñuclel che' bajche' jini ñaxan bʌ yumʌl.

²³ Che' yomix jilel i yumʌntel ili yumʌlob, che' cabʌlix i jontolil winicob, mi caj i wa'chocontel juntiquil rey wen ch'ejl bʌ, wen p'ip' bʌ i jol.

²⁴ Mi caj i wen p'ʌtan, pero mach cha'anic i bajñel p'ʌtʌlel. Tilem i p'ʌtʌlel ti Satanás. Baqui jach mi' majlel mi' cha'len jisaya. Pejtelel chuqui mi' ña'tan i mel, mi' mel. Mi caj i jisan jini p'ʌtʌlo' bʌ yic'ot i cha'año' bʌ Dios.

²⁵ Wen p'ip' i jol, wen yujil lotiya. Mi caj i bʌc' jisan jini mach bʌ yʌxʌlobic i yo. Mi caj i chañ'esan i bʌ ti' contra i Yum yumʌlob, pero Dios mi caj i jisan.

²⁶ Jini tsa' bʌ a q'uele isujmʌch. Mi' caj ti ujtel ti jo'bajc' yic'ot jo'lujunc'al (2,300) q'uin che' bajche' tsac tsictesʌbeyet. Mach yomic ma' tsictesan chuqui tsa' q'uele, come jal to mi caj i yujtel, che'en Gabriel.

²⁷ Joñon Danielon. Tsa' c'uñ'ayon. Cabʌl q'uin c'amon. Che' bʌ tsa' c'oc'ayon, tsa' caji c cha' melben i ye'tel jini rey. Pero tsac wen mele c pusic'al cha'an chuqui tac tsaj q'uele, come ma'anic tsac ch'ʌmbe isujm.