Luke 11 - Chin-Ekai1 ကိုယ်တော်ယေရှု အဆုတောင်းအောင်ပုန်ပိဇလော့ တပည့်တော်ပွန်းနောတ်လော့ "အရှင်ယောဟန် လော့ ယတပည့်တော်ဝဲ့ယာ ဆုတောင်းနည်းဘဟော့ အစုပ်ပိတ်လှောက်ကာ တပည့်တော်ဝဲ့ဝါဟော့ ဆုတောင်းပုံ ဆုတောင်းနည်းအစုပ်ပိတ်ကေး" သိမ်အဟောက်။ 2 အနီကြောင်းငို ကိုယ်တော်လော့ ယနိယာ နောင်နိဆုတောင်းအောင်ကနို "ပအောင်ဘုရားဝေါ၊ ချောင်အားလုံးလော့ ဘုရားရှင်နာ ရိုသေငအလော့ လေးမြတ်ဆီးဘွေ့။ ဘုရားရှင်ကြွလူးလော့သဲ့ ချောင် ပေန်းနောတ်ချင်းနာ အုပ်စိုးဘွေ့ အရှင်ဘုရားဝိုး။ 3 တပည့်တော်ဝဲ့ တွက် နှုတ်တောင်း အလိုအပ်သဟော့ မအေးအုပ်ဗုန်း အပိတ်ဘွေ့ 4 တပည့်တော် ဝဲ့ အပုဝါ အပြစ်ကျူးလွန်ဟော့ ချောင်တကားဝါ ဟော့ တပည့်တော်ဝဲ့လော့ ခွင့်ကနိလှို့ပိတ်လှောက်ကာ။ကနိယာဟော့ ဒုစရိုက် မပြစ်သဲ့ ကနိကျူးလွန်နိုင်းတောက် ယနိဟောက်ဝဟော့ ဝဲ့ဟော အတားပိတ်ဘွေ့။ သိမ်ဆုတောင်းအောင်ဘွေ့တို့" သိမ် အဟောက်။ 5 အနီပုန်ပိဇလော့ ကိုယ်တော် လော့ ဆက်လော့သဲ့ "နောင်နိဒိတ်ကာဟော့ ချောင်ပေန်းနောတ်လော့ မိတ်ဆွေပေန်းနောတ်ငှာ အညမ်းစိမ်ငါစိလော့သဲ့ "ကေယာပေါင်မုန့် လုံးထုံဘောင်း အပူးဝေ့။ 6 ကေ့ မိတ်ဆွေ ပေန်းနောတ် ဖိုးလူးလော့သဲ့ ယလော့အေးရိုင်ဟော့ ဘောင်းငှော မွက်သေးယ" 7 အနီကနို နောင်းမိတ်ဆွေလော့ "ကေ့ အနှောက်ယှက်သိုင်းသိ၊ ဒိုင်ဆွတ်ဟော့ ကခါ့ပုန်ဟီ၊ ကေ့စိုးနောင်ဝဲ့ဟော့ အိဒွန်းနာ ယနိအိမာက်ဟီ၊ ကေ့အိဒွန်းနာဟော့ ဘောင်းဟော့ အပိတ်ခုသိပ်လာ့ဟု" သိမ်အဟောက်ခု။ 8 ယဝဟော့ နောင်းမိတ်ဆွေ ဖြစ်လော့ဟော အိဒွန်းနာဟော့ထောန်လော့သဲ့ ပေါင်မုန့် အပိတ်ကိုင်းဆိတ်လာ့။ ရှိတ်လော့ဟော နောင်လော့ နောင်းအယှက်သိက္ခာ ငဲ့တအုံ ဆက်သလော့ နတုန်း အုန်ကနို ယလော့ အိဒွန်းနာဟော့ ထောင်လော့သဲ့ နောင်နလိုအိုဝဟော့ ပေါင်မုန့် အပိတ်ကိုင်း။ 9 အနီကြောင်းငို ဘုရားငှာဟော့ "တုံအုန်ဘွေ့တို့၊ နောင်နိလော့ နောသင်နိလာ့အာဝိုင်း။ ရွှီဟော့ချောင်လော့ အခွန်းနိုင်။ဒိုင်ဆွတ် ခုတ် ဘွေ့၊ ဒိုက်ဆွတ်ခုတ်ဟော့ ချောင်အားလုံးငှာ ပ အဟူးပိတ်ကိုင်း။ 10 တုန်အုန်ဟော့ ချောင်အားလုံးလော့ ယနိ လာ့အဝိုင်း၊ ဒိုက်ဆွတ်ခုတ်ဟော့ ချောင်တိုင်းငါ ဒိုက်ဆွတ်အဟူးပိတ်ကိုင်း။ 11 နောင်နိစိုးနောင်ဝဲ့လော့ ဘို့အို့အလို့သဲ့ ငိုး အတုန်းအုံကနို နီအနူးပိုးလော့ ဖော် အပိတ်ကိုင်းရိုး။နောင်နိစိုးနောင်ဝဲ့လော့ ဘို့အို့အလို့သဲ့ ပေါင်မုန့် အတုန်းအုံကနို နီအနူးပိုးလော့ လုံးသောက် အပိတ်ကိုင်းရိုး။ 12 နောင်နိစိုးနောင်ဝဲ့လော အာတွေ့ အတုံးအုံကနို နီအပိုးလော့ ကင်းမြီးကောက် အပိတ်ကိုင်းရိုး။ 13 နောင်နိယဟော့ ပွယ်ငှားဟော့ ချောင် နောင်နိဖြစ်ကနိုပ နောင်နိစိုးဝဲ့ယာ ပွယ်ဟော့ အရာဝဲ့နော နောင်နိပိတ်ကနို နိဗ္ဗာန်ရွှေမြို့တော်အရှင် ပအောင်ဘုရားဝဟော့ တုန်အုံဟော့ချောင် ဘုရားဉာဏ်အလင်းတော်ဝဲ့ အပိတ်ကိုင်း အဆင်သင့်အမွက်။ 14 ကိုယ်တော်ယေရှုလော့ ချောင်ပေန်းနောတ်တာ ပေါန်ဟောက်ခုငှားအုံ ပြုစားဟောက် ခွက်ရိုင်ကုန်ငေတ် အလှာန်တို့။ အနီပုန်ပိဇ အနီခွက်ရိုင် အဆုပေါန်ပိဇ အနီချောင် စဖလာ့သဲ့ အသက်အက်ပိ ချောင်ပုရိသတ်သဲ့လော့ ယနိအံ့ဩသို့။ 15 ဆိတ်လော့ဟော ချောင်တချို့လော့ "နီချောင်ငဟော့ ခွက်ရိုင်းရဟော့ရှန်ပလာန်း 'ဗေလဇေပုလ' ငှာဟော့ တန်ခိုးတော်ဝို အနီပွန်ငှားဟော့ချောင် အလှာန် နော အဖြစ်" သိမ်ယနိဟောက်။ 16 အရာချောင်ငဲ့လော့ဟော ကိုယ်တော်ယန်စမ်းသပ်ဝိုင်။ အနီကြောင်းငိုယနိလော့ ကိုယ်တော်ဝါ ဘုရားရှင်ငှာဟော့ အမှတ်အသား အုဝေတ် အပြဝဲ့ သိမ် ယနိတုန်အုံ။ 17 ကိုယ်တော်လော့ ထော်ချောင်ငဲ့လော့ ဘောင်းယနိခင်းသိမ် အမှတ်ကြောင်းငို "နိုင်ငံ အုဝေတ်တာ ချောင်ငဲ့ စိတ်ဝမ်းကွဲ အလို့သဲ့ တိုက်ပြဲရဲ့ အဖြစ်ကနို အနီနိုင်ငံ အပျက်စီးလာ့ဝိုင်။ အလှောက်ကာ မိသားစုဝါဟော အချင်းချင်း ယနိဆိတ်ကနို အနီမိသားစု ပြိုကြဲ အပျက်စီးလာ့ဝိုင်။ 18 တကယ်လော့ မာရ်နောတ်သဲ့လော့ ယကိုယ်တိုင်လော့ အချင်းချင်း ဆန့်ကျင်အလို့သဲ့ ယနိတောက်အောက် ကနို နောက်ဆုံးငါ ယနိ တိုင်းပြည်ယဟော့ ခါ ယနိတည်ထောင်ခုဝိုင်ရိုး။ တိုဝါ ကေ့လော့ 'ဗေလဇေဗုလ' တန်ခိုးအာဏာ ဝို ခွက်ရိုင်းရဲ့ အမောင်းထုတ်သိမ် နောင်နိ ဟောက်။ 19 တကယ်လော့ ကေ့လော ယတန်ခိုးအာဏာဝို ကမောင်းထုတ်ကနို နောင်နိတပည့်လော့ နီ တန်ခိုးအာဏာ ဆွန်အွမ်လော့သဲ့ ပွယ်ငှားဟော့ ခွက်ရိုင်းရဲ့ နောင်နိလှာန်ငိုး။ အနီချောင်ငဲ့လော့ နောင်းငါ အဆုံးအဖြတ် အပိတ်ကိုင်း။ 20 ဆိတ်လော့ဟော တကယ်လော့ ကေ့ယဟော့ ဘုရားရှင်တန်ခိုးတော် ဆွန်အွမ်ဟလော့ ပွယ်ငှားဟော့ ခွက်ရိုင်းရဲ့ ကလှာန်သိမ် ဟောက်ကနို နောင်နိငှာ ဘုရားရှင် သာသနာ အဖိုးဟီသိမ်သက်သေနောင်နိပြခုဟီ။ 21 စာန်းလော့သဲ့ ဝဟော့ချောင်ပေန်းနောတ်တဟော့ ယကိုယ်တိုင်လော့ ယအင်း အစုန်းခုကြောင်းငို။ ယလော့ အပိုင်ငဟော့အားလုံး အလုံခြုံ။ 22 ဆိတ်လော့ဟော ယထောက်စာန်းဟော့ချောင်လော့ အနောင်းအောင်ကနို အနီချောင်လော့ အားအကိုးဝဟော့ လက်နက်ကိရိယာ ဝဲ့ သိမ်းလော့သဲ့ အစိအိရိုင်။ အနီပေါန်ပီဇ အရာချောင်ငဲ့ ဝါဟော့ ယလော့ အလူးပိယဟော့ အဖိုင့်ပိတ်ကိုင်း။ 23 တကယ်လော့ နောင်နိယဟော့ ကေ့ပေါတ်သို ရပ်တည် ငှားတွက်တာ ကေ့ အဆန့်ကျင်ဟော့ချောင်နော။ တကယ်လော့ နောင်နိယဟော့ ကေ့ဟွေးတူ ကောက်ပဲသီးနှံနဲ့ အတွက်တူဝါ ရမ်းငှားတွက်တာ နောင်နိယဟော့ ကောက်ပဲသီးနှ့နဲ့ ဖိုင့်ဟော့ချောင်ငဲ့နော နောင်နိ ဖြစ်။ 24 "ပွယ်ငှားဟော့ခွက်ရိုင်းလော့ အပူးအူနောက်ဒွန်းချောင်ငှာဟော့ ကန္တာရ ဒိက်ကာ စိလော့သဲ့ အဒွန်းနောက်ဒွန်း အရွှီအွေ။ ဆိတ်လော့ဟော နေရာ ရွှီလော့ အလငှားပိလော့ ဘလော့ "ကေ့နေသားကကြောက်ကဟော့ဝါနေကစိရိုင်ဟီ" သိမ်အဟောက်။ 25 ယအဖိုးဘော်ပိလော့ ထော်ချောင်ငဟော့ သန့်ရှင်းအုံဖိတ်လော့အသောက်ကဟော့အင်းလှောက်ကာ မအွမ်းဒူဝိုင်း အဘွယ်။ 26 အနီပိလော့ ပွယ်ငှားဟော့ခွက်ရိုင်းလော့ ယထောက်ကာ ပိုလော့ဆိုးဟော့ ပွယ်ငှားဟော့ လခွက်ရိုင်း ကုန်ရှေ အဘိက်အိပ်ကော့။ ယနိအားလုံးအနီချောင်ငှာလူးအလို့သဲ့ ယနိအွမ်းပိလော့ အနီချောင်အခြေအနေယဟော့ ပိုလော့ အဆိုးလူးတို့" သိမ်အမိန့်ဟောက်။ 27 ကိုယ်တော်ယေရှုလော့ ချောင်ပုရိတ်သတ်သာ အဟောတွန်းနာ နှတိုးနူးပေန်းနောတ်လော့ "အရှင် ဟော့ အသောက်အောက်လော့ အစောင့်ရှောက် ဟော့နှတိုးနူးဝဟော့ မင်္ဂလာမွက်ဟော့ချောင်အဖြစ်" သိမ်အဟောက်။ 28 အနီပိလော့ ကိုယ်တော်လော့ "နီပေါန်ဝဟော့ အမှန်။ ဆိတ်လော့ဟော ဘုရားရှင်လော့ အဟောက်ဝတ်တဟော့ မင်္ဂလာတရားတော်ဝဲ့ နာအာလာ့ဟော့ချောင်ငဲ့နော ပွယ်ဟော့ ချမ်းသာ မင်္ဂလာ အဖြာဖြာ အခံစားလာ့ဝိုင်" သိမ်အဟောက်။ 29 ချော်ငပေန်းနောတ်သဲ့လော့ ကိုယ်တော် ယနိဝိုင်းရံတွန်းနာကိုယ်တော်လော့ "တိုဝါခေတ်တာ ချောင်ငဲ့လော့ ကီးကယ်ဆိုးဝါးဟော့ချောင်ငဲ့ဖြစ်အလို့သဲ့ နောင်နိယဟော့ ဘုရားရှင်ငှာဟော့ နိမိတ်လက္ခဏာဝဲ့ အပြဝိုင်သိမ် ယနိ တုန်အုံ၊ ဆိတ်လော့ဟော ပရောဖက်'ယောန' အဖြစ်သဟော့ နောင်နိယာ အပြဟော့ နိမိတ်လက္ခဏာအုဝေတ်နော အဖြစ်။ 30 'နိနေဝ' မြို့ဝါဟော့ချောင်ငဲ့ငါ 'ယောန' အဖြစ်သဟော့ သာဓက အပြလှောက်ကာ၊ 'လူ့သားတော်' ဟောတိုဝါဟော့ချောင်ငဲ့ငါ နိမိတ်လက္ခဏာ အုဝေတ် အပြဝိုင်။ 31 တရားစီရင်ဟော့ အချိန်ဖိုးကနို 'ရှေဘ' ပြည်(အာရေးဗီးယားတောင်ပိုင်းငါမွက်ဟော့)ရှန်ပလာန်းနူး ဝဟော့ နောင်နိဟွေးတူ အတွက်တူဝါ ရင်ဆိုင်အိုင်လော့သဲ့ နောင်နိယာ အစွဲအွေရိုင်။ အနီရှန်ပလာန်းနူးလော့ ပညာမွက်ဟော့ ရှောလမုန်ငှားဟော့ ပညာမွက်ဟော့ချောင်ငှာဟော့ ပေါလ် အဟင်ဝေါင် ကြောင်းငို ခရီးအလှိုးဝါဟော့ အလူးနော။ ဆိတ်လော့ဟော နီနေရာဝါ ပညာရှိ ရှောလမုန် ထောက်ကာ ကြီးကျယ်မြင့်မြတ်ဟော့ ချောင် အဖိုးဟီ။ 32 'နိနေဝေ' မြို့စိုးဝဲ့လော့ နောင်နိစွဲချက်တောင်အလို့သဲ့ ယနိရင်ဆိုင်ငိုင်။ ယနိယဟော့ 'ယောန' လော့ သွန်သင် ဟောပြော ကြောင်းငို နောင်တလအလို့သဲ့ ဘုရားဆည်းကပ်ဟော့ ချောင်ငဲ့ အဖြစ်။ နီနေရာဝါ ပိုလော့ လင်လော့မြင့်မြတ်ဟော့ချောင် အဖိုးဟီ" သိမ်အဟောက်။ 33 "မီးထွန်းလော့ အသောက်ကဟော့ မီးအိမ် ငဟော့နီးလော့ဟော့ ထုဝအို့၊ ဒိက်တွီးစွေးကောဝါဟောသောက်ကအို့၊ အင်းဒိက်ကာဝေါင်လူးဟော့ချောင်ငဲ့လော့ အလင်းအလာ့အာဝိုင်တော့ မီးအိမ်ငဟော့ မီးတောင်ငါနော ချိတ်အလော့သဲ့သောက်။ 34 နောင်နိ မိတ်ဟော နောင်နိဟော့ခန္ဒာကိုယ်မီးအိမ်လှောက်နော အဖြစ်။ နောင်မိတ်အပွယ်ကနို နောင်နလိုအို ဝဟော့ အလင်းရောင်အားလုံးလာ့အာသလော့သဲ့၊ နောင်မိတ်အပွယ်ငှားကနို အရာအားလုံး အရှုန်းငိုင်။ 35 အနီကြောင်းငို နောင်နိ အဝါန်းငဟော့ အရှုန်းဖြစ်ငှားအုံ သေသေချာချာစိုင်ဘွေ့တို့။ 36 တကယ်လော့ နောင်ငါ အလင်းရောင် အမွက်ကနို ဘောင်အရာဟော အရှုန်းသိမ်မွက်ဟားလော့သဲ့ မီးအိမ်ငါမွက်ဟော့ အဝါန်ဟော့ဝို နောင်အပေါ်ဝါ အလင်းလှောက်ကာ နေရာတိုင်းငါ အဝါန်ငိုင်" သိမ်အဟောက်။ 37 အလှောက် အဟောက်ပုန်ပိဇ ဖာရိရှဲပေန်းနောတ်လော့ ကိုယ်တော် ယေရှုဝါ အမူဘု အစို့ဝိုင်သိမ် ယအင်းနာ အဖိတ်အိပ်။ 38 ကိုယ်တော်လော့ ယအင်းနာစိလော့သဲ့ ဘုအေးဒွန်းနာ အငုန်း။ ကိုယ်တော်လော့ ဘုအေးမောင်ငို အကွက်ဘွက်အွပ်တအုံ ဘုအေးဒွန်းနာ အငုန်းကြောင့်ငို အနီ ဖာရိရှဲ လော့ကီးကယ် အမအံ့ဩတို့။ 39 အနီကြောင်းငို ကိုယ်တော်လော့ ယဝါ "နောင်နိ ဖာရိရှဲ ငဲ့ဝဟော့ ဘပွယ် အကြောင်ငါဟော့နော နောင်နိဘွက်သလို့သဲ့ နောင်နိ အဒိက်ကာဟော့ လောဘတရားဝဲ့ရို နောင်နိယုတ်ညံ့လော့သဲ့ အမွက်။ 40 လူမိုက်ကဲ့ရော၊ ဘုရားရှင်လော့ အဒိက် လော့ အကြောင် ဖောဟိသဒါန် အဖန်ဆင်းပိတ်။ 41 နောင်နိယဟော့ ဆင်းရဲသားဝဲ့ယာ နောင်နိပိတ်ကနို နောင်နိလော့ နောင်နိစိုင်းသကားဝဟော့ ဘုရားရှင်လော့ ကျေနပ်လော့ အနိုးအိုနောက်ကိုင်း။ 42 ဖာရိရှဲ ဝဲ့ နောင်နိယဟော့ ဒုက္ခ နောင်နိခွန်းဟီ၊ နောင်နိယဟော့ ဘုရားရှင်နာ နောင်နိအွမ်ဖွမ်းနာဟော့ဆု ဟော့ ခိုင်ဆမက်၊ အွန်းစဟူ တဲ့ဘောင်း အထိုက်အပါးရဲ့ဖြစ်ဟော့ ပုန်ငှာဝါဟော့ ပုန်နောတ် ယနိလျှူ။ဆိတ်လော့ဟောနောင်နိလော့ ယပွေးလှိုင်အိုင်နောက်သလို့ဘုရားရှင်ကြည်ညိုတသို့။ နောင်နိယဟော့ ဘုရားရှင်နာ ပုန်ငှာဝါ ဟော့ ပုန်နောတ် နောင်နိပိတ်ထောက်ကာ အရာချောင်ငဲ့ ယာ မှုမှုတကျင့်သုံးသလို့သဲ့ နောင်နိဟင်းရှေလာ့ဝိုင်။ 43 ဖာရိရှဲ ဝဲ့ဝေါ၊ နောင်နိလော ဒုက္ခနောင်နိခွန်းဟီ။ ဓမ္မာရုံငဲ့ဝါဟော ရှေ့ဆုံးငါငုံးသလော့သဲ့ နေရာနောင်နိလောက်အောင်လာ့ဝဟော့ နောင်နိနိုးအိုနောက်။ဈေးဒိက် ချောင်မနဲလော့ဂုဏ်ပြုအလော့ နောင်နိကြိုဆို ဝဟော့ဟော နောင်နိနိုးအိုနောက်ဟွန်း။ 44 ဆိတ်လောဟော့ နောင်နိဒုက္ခနောင်နိခွန်းလာဟီ၊ နောင်နိယဟော့ အမှတ်အသားမွက်ငှားဟော့ စူ ခူ လှောက်ကာနော အတူ။ ချောင်ငဲ့လော့ အမှတ်အသားမွက်ငှားဟော့နေရာ ပုဝါ ဟော့ ယနိကြောင်းအောင်လာ့ကနို စူခူ နောသိမ်မှတ်သအို" သိမ် အဟောက်။ 45 မောရှေကျမ်းဟယ်ဟော့ချောင်ပေန်းနောတ်လော့ "ကိုယ်နော်နီလှောက် အမိန့်ကဟော့ ကနိ အစော်ကားအာနော်" သိမ် ပြန်လော့အဟောက်ဘော်။ 46 ကိုယ်တော်လော့ "ကျမ်းဟယ်ဟော့ ဆရာဝဲ့ရော နောင်နိ ဒုက္ခ နောင်နိခွန်းဟီ။ နောင်နိလော့ ချောင်ငဲ့ယာ ရေ့ဟော့ ဝန်ထုပ်ဝန်ပိုးဝဲ့ နောင်နိကို့ရှောက်။ ဆိတ်လော့ဟော နောင်နိယဟော့ ထော်ချောင်ငဲ့လော့ ယနိကို့ဝဟော့ တာဝန်နဲ့ အကွက်ရုန်းငို ထိသလော့ ပ ကူညီယသို့။ 47 နောင်နိယဟော့ တကယ်ပ ဒုက္ခ စိုးဝဲ့ နောင်နိဖြစ်။ လကိုးဝါ နောင်နိ ဟန်ပိုးဝဲ့လော့ ယနိသုတ်ကော့တဟော့ ပညာမွက်ဟော့ ချောင်ငဲ့ အတောက် နောင်နိလော့ ဂုဏ်ပြုသလော့ အထိမ်းအမှတ် ကျောက်တိုင် နောင်နိစို့ပိတ်။ 48 အဲ့လှောက်နောင်နိစိုင်းယဟော့ နောင်နိဟန်ပိုးဝဲ့လော့ အစိုင်းဘော့တဟော့ အမှန်သိမ်နောင်နိခင်းကြောင်းငို အဖြစ်။ အလှောက်အဆိတ်ငှားကနို နောင်နိဘဟော့ ထော်ချောင်ငဲ့လော့ ယနိသုတ်ကေတ်တဟော့ ပညာမွက်ဟော့ ပရောဖက်အတောက် အဲ့နီ အထိမ်းအမှတ် ကျောက်တိုင်ငဲ့ နောင်နိစောက်ပိတ်ကိုင်းဆိတ်လာ့။ 49 အနီကြောင်းငို ဘုရားရှင်ဉာဏ်အလင်းတော်ဝို ယနိ ပွယ်ငှားဟော့အကြောင်းငဲ့ ကဟောက်ဝတ်တဟော့ "နောင်နိငှာ ပညာမွက်ဟော့ ပရောဖက်လော့ တမာန်တော်ဝဲ့ ကလို့ဝိုင်။ ဆိတ်လော့ဟော အဲ့နီ ပရောဖက်သဲ့ တမာန်တော်ဝဲ့ ဝဟော့ တချို့ဝဟော့ သုတ်တလို့သဲ့ တချို့နီး နောင်နိဟင်းဆိုင်ရိုင်" သိမ် အဖြစ်။ 50 တနှုတ် လောကီစိုးဝဲ့ ပညာမွက်ဟော့သူတော်ကောင်း ငဲ့ အားလုံး ဘန်သုတ်ကြောင်းငို ကမ္ဘာဦးစာ တကွယ့်လော့ ယနိသုတ်ကြောင်းငို အပြစ်ယနိသင့်ဟီ။ 51 အနီပညာမွက်ဟော့ သူတော်ကောင်းငဲ့ယာ 'အာဗေလ' လော့စလော့သဲ့ ဗိမာန်တော်ဒိက်ကာ ဟော့လော့ ယဇ်ပလ္လင်ကြားဝါ အသုတ်ခွန်းအွမ်လာ့ဟော့ 'ဇာခရိ' စို့ အဖြစ်။ နီကြောင်းငို နီဟော့အတောက် နောင်နိချောင်ငဲ့ အပြစ်ပိတ်နောင်နိခွန်းအွမ်လာ့ဝိုင်ယဟော့ အသေအချာနော။ 52 မောရှေ ကျမ်းဟယ်ဟောချောင်ငဲ့ရိုး နောင်နိမိုက်တွင်းနက်သိုင်းတို့။ နောင်နိလော့ ဘုရားရှင်ငို အဆိုင်အိုင်ငဟော့ အသိပညာ ဘဏ်တိုက် သော့ ဝဟော့ သိမ်းသလို့သဲ့၊ ကိုယ်တိုင်ဟော ဝေါင်ငတို့၊ အရာချောင်ငဲ့ဟော့ နောင်နိတား" သိမ်အဟောက်။ 53 ကိုယ်တော်လော့ အနီနေရာဝဟော့ အစိပိဇ ကျမ်းစိုဟယ်ဟော့ချောင်ငဲ့လော့ ဖာရိရှဲ ငဲ့ဝဟော့ ယနိဟွေးတူ ကိုယ်တော်ဝါ အမွက်ရှောက်ငှူး။ ယန်ယဟော့ ကိုယ်တော်ဝါ အရာအကြောင်းအရာဝဲ့ အဟောဝဟော့ ယနိလိုအို။ 54 အကြောင်းရင်းငဟော့ ယနိလော့ ကိုယ်တော်လော့ အဟောက်ဝဟော့ ပေါလ်ဝါ အမှားအပို ကနို အမမ်းခုဝိုင်သိမ် အဖြစ်။ |
This translation of the Chin-Ekai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.