Luke 7 - Chin-Cumtu (Sumtu)

¹ Khlaung haqla amcokhau haq kiyoeng Boiyesuq khoeq Ka'peyanau mloeq a'ciq.

² Yaqmloeqa Yawmaqa khoeq taphmu poemak hma nana a'mlum a'khlawq laq khoeq mya poemak a'moeiq khoeq kaw loeqteq du waiq leilei a'phlaet.

³ Yaq taphmu loeq Boiyesuq klong a'ya uk loeq a'coe Yudaq khlaung cang haqkhoeq Boiyesuq hma teiq haqloeq teq yaq mya a ta'hlai a'saiyai khoeqa baekisauk amtoeq haq.

⁴ Yaqhniq haqkhaw lo uk loeqteq Boiyesuqa nei taphmu khoeq Boi loeq na'sai louq paekai khoeq a'khaumlouqi dat.

⁵ Nei khlaung khoeq keihniq myoesaw haqla amkhaeki haqloeq teq ta'lazalaiq lungak a'sauk paek saw khaw a'phlaet taeng a'nhau.

⁶ Yaqateq Boiyesuq khaw yaqhniq hui tu a'ciq pawq loeqteq yaq taphmu im a'nphaw hmaungkawm taphmu loeq yaq a'yapui boengak teiq haqloeq teq Boiya Boi yoe, Kei ima na'lo wai khoeq kei Boi yoeng tawniy yahang klongoeng kei tawiq yoeng hnglai kawmi tiloeq locaaitiq.

⁷ Yaqtanaq loeqteq Boi hma kei lo hang loeqteq Boi yoeng kamkhomi yai khaw tawni yaqhang. Boiloeq a'maeng na'paek hyawqoeng kei mya mniq a'klokai.

⁸ Nei kha ka'hau laq khoeq teq kei daunga khaw caeksaw thaengthaeng a'nmoeiq. Keiloeq tapsaw poemaka cite taeng ka'hau loeq cit laq loeqteq, lote taeng ka'hau loeq a'lo laq. a'maeng a'nhnyini laq. Keiloeq caeksaw poemaka cite taeng a'maeng ka'paek loeq a'ciq laq. Kei mya haqla nei saiye taeng ka'hau loeq a'nsai laq taeng a'hau.

⁹ Yaqkha a'hau khoeq Boiyesuq loeq a'ya uk loeq nana mauk nauk loeqteq yaq hnuwa a'toemi saw haqla keiloeq nanghniqa kamhau haq waiq khoeq teq Iqtayelaq khlaungmyoe haqla pak nei kha a'myumi saw hmuphuwa hang taeng a'hau haq.

¹⁰ Taphmu loeq a'tiq haqkhoeq khlaung haq im a'nphaw ba loeq yaq mya khaw kaiyi loeqteq a'omba khoeq a'nkhom laq.

¹¹ A'la hnupakoeng Boiyesuq khoeq yaq ta'paiq haqloeng Na-iq taeng a'nhau khoeq mloeqa a'nphaw loeq ta'paiq haq ta'koeiq macaq loeqteq khlaung haqkhaw a'nlopawq.

¹² Boiyesuq khoeq mloeq pokwaq phaela a'phaw loeq khlaung yok yokak a'nbumui khoeq khlaung mcuqak loeq khongoeng koeq uk loeqteq mloeq planga a'nmsoqi. Yaq a'dusaw khoeq hmeinu poemakcaw phlaet loeqteq mloeq saw haq loeqkhaw yaq hna'taw hui tu a'nthaw pawq.

¹³ Boiyesuq loeq yaq hna'tawa a'hmuq loeq nana amhmaena teq kapaitiq taeng a'hau.

¹⁴ Yaqkiloeq Boiyesuq khoeq yaqhniq loeq koet uk loeq a'nlo khoeq khong phaela cit loeqteq a'kutoeng a'hmlaema teq khong koenqsaw haqkhaw a'ndum paeka teq Boi loeq sa'micawoe, nanga keiloeq kamhauwai. Thowe taeng a'hau.

¹⁵ Yaq a'du khoeq sa'mi caw khaw tho loeqteq a'soiyi. Boi loeqkhaw yaq pa'taw caw khoeq a'nuwa a'paek ba.

¹⁶ Khlaung haq loeqkhaw nana mauk nauk uk loeqteq ma'hniq hma Pa'rawphaeq poemak a'pau hni. Boipaw loeq yaq khlaung haqla a'sot haq hni taeng hau uk loeqteq Boipaw kyzu a'nmlokthaq.

¹⁷ Yaqkiyoeng Boi loeq a'sai khoeq yaq sa'taung khoeq Yudaq pleiblaiqya a'hyayi poeiq.

¹⁸ Yaqkiloeq hneitchein sa'la Yawhan ta'paiq haqloeq nei klong haq awlum khoeq Yawhana a'ncauk paeka teq yaq loeq ta'paiq poemhnei a'boeki hoeiq loeqteq

¹⁹ Boi khoeq a'lo wai taeng a'nhau khoeq khlaung moe? Seiyaqloeq a'coewa keihniq loeq ka'ncong laq hmai moe? taeng a'nhiqai khoeq ta'paiq poemhneiqa Boiyesuq hma a'teiq hoeiq.

²⁰ Yaqhniq khoeq Boiyesuq hma a'nphaw loeq hneitchein sa'la Yawhan loeq keihniq khoeq Boi hma amteiq haqloeq teq Boi khoeq a'lo wai taeng a'nhau khoeq khlaung moe? seiyaqloeq a'coe a keihniq loeq ka'ncongi laq hmai moe? taaeng hiqsauk a'mtoeq haq.

²¹ Yaq khinga Boiyesuq loeq kaiyaqsaw haqla mboei haqloeq teq sa'simangca loeq a'manisaw haqla a'thut paek haqkhoeq tanaq a'mik mu haqla khaw a'nmik loeq a'hmuq ba lai khoeq a'sai paek haq.

²² Boiloeq Yawhan ta'paiq haqla nanghniq na'nhmuq laq khoeqhaq Yawhana cit uk loeq hmyauk hoeihniq. A'mik mu haqloeq a'nhmuq laqhni. A'nkut kho pawiyaqsaw haqkhaw laum a'nciq noeng ba hni. A'mnosaw haqkhaw a'nboei ba hni. A'hnaw paungsaw haqkhaw a'nyauk ba hni. A'dusaw haqkhaw a'nhaeng ba hni, Khlaung sounglai haq loeqkhaw sa'taung pawi a'nyauk laqhni.

²³ Kei klongoeng a'mlung klakaq khoeq khlaung khoeq a'oeqcaq.

²⁴ Yawhan loeq a'hloeq haqkhoeq ta'paiq haq a'nciqba kiloeq Boiyesuq loeq khlaung haqla Yawhan klong a'cauk paek haqkhoeq teq nanghniq tau wa na'nciq nak loeq pi khoeq sota na'nciqai yoe? Khli hui tu a'kaeng pawq khoeq kyuthingsau moe?

²⁵ Nanghniq khoeq planga na'nsoq loeq pi khoeq na'nhmuq waiq yoe? Wawtpawi a'wawt nauk khoeq khlaung na'nhmuq waiq moe? A'phu bau wawtpawi cawpawi haq wawt nauk uk loeqteq Zingoeng a'nom khoeqhaq nawn duka na'nhmuq laqai.

²⁶ Nanghniq a'planga sot uk loeqteq pi bong khlaunga na'nhmuq wai yoe? Pa'rawphaeq poemaka na'nhmuq waiq moe? A'laiyi. Nanghniqa keiloeq ka'mhau haq waiq khoeq teq Yawhan khoeq Pa'yawphaeq thaukapak a'laen beq.

²⁷ Klamcawa kei Boipaw loeq a'caw a'ciqai dun laum a'pawilanga ta'paiq a'klanyangsaw a'yang ka'teiqai taeng a'yok khoeq Yawhan klong a'phlaet.

²⁸ Nanghniqa keiloeq kamhau haqlai. Yawhan thauka a'laen khoeq neisomdaeka a'ni khaw moeiqhmaq. Seiloeqkhaw Boipaw khomcaenga a'lepaek laqi yaq khoeq pak Yawhan thauka a'laen beq taeng a'hau.

²⁹ Boiyesuq loeq a'hau khoeq plau a'ya uk laq saw haqkhoeq Boipaw peinyat hnyini uk loeqteq Yawhan hma hneitsein a'npaekisaw haq duka a'khon koksaw haqkhaw a'paw.

³⁰ Seiloeqkhaw Phariqsae loeq klam hmotsaw haqkhoeq Boipaw peinyat a'nhnyini khoeqloeq Yawhan hma hneitsein a'npaekiyai khoeq a'nmyang.

³¹ Yaqkiloeq Boi loeq a'la a'hau khoeq teq nanghniq khoeq pi na'nlouqi yoe? Pi bong khlaung haqloe naka

³² keihniq loeq a'mtumkhok paek uk hang loeqkhaw nanghniq lauma tuk. A'kaq dun caiqkhlang a'mhau paek uk hang loeqkhaw nanghniq kapaq tuk taeng ziduka ngung uk loeqteq mpokpan uk loeq án soiyi khoeq sa'mi haq nálouqi.

³³ Yawhan khoeq eieiyaq, ma'moiq boeng wai ota'ong hlaiqpat loeq a'ciq naka khaw nanghniq loeq Yawhana sa'simangca loeq a'mani taeng na'nhau.

³⁴ Yaqtanaq khlaungcaw loeq a'coe khlaung haq khut ei ok loeq a'om naka khaw nanghniq loeq Yesuq khoeq ei-ok a'nlaen khoeq khlaung phlaet loeqteq a'kon koksaw haq, khlaungsei haqloeng a'om hom taeng na'nhau tuba.

³⁵ Seiloeqkhaw Boipaw lawm a'mon nakkhoeq yaq lawmoeng a'ciqsaw haqloeq a'nhmotai taeng a'hau haq.

³⁶ Yaqkiyoeng Phariqsae poemak loeq Boiyesuqa yaq ima a'mu buq a'ei yai khoeq a'baeki. Yaqklongoeng Boiyesuq khaw yaq khlaung ima cit pawq loeqteq a'ei yai khoeq khlung phaela a'ngung.

³⁷ Yaqmloeqa pawi yaq a'sai khoeq hna'taw poemak a'moeiq. Yaq hna'taw khoeq Phariqsae ima Boiyesuq loeq buq a'eipawq khoeq a'ya uk loeq yaq hna'taw loeq nana a'phu a'laen khoeq siot pa'angak khoeq loeqteq yaqduna a'lo.

³⁸ Yaqkiyoeng yaq hna'taw khoeq Boiyesuq phaela ya loeqteq a'kaqa teq yaq mik khli woeng Boiyesuq kho a'yuwa teq a'samoeng a'hoq poeiqba. Yaqkiyoeng Boiyesuq kho mhnam loeqteq siot a'hluq.

³⁹ Boiyesuqa Buq eiya baekisaw Phariqsae loeq yaqkhoeq a'hmuqa teq nei khlaung khoeq Pa'rawphaeq a'hmon nak loeq nei hna'taw khoeq pi bong hna'tawoe nakkhoeq a'hmot pha. Pawi yaq khoeq hna'taw a'phlaet nakkhoeq a'hmot phasa nakkhoeq a'mlungoeng a'mkhin.

⁴⁰ Boiyesuq loeq yaqa Siqmouwoe, Nanga ka'mhauwai khoeq uwak a'moeiq taeng a'hau wa teq Siqmou loeqkhaw hauwae, Boi yoe taeng a'hau loeq

⁴¹ Boi loeqkhaw ampusaw poemak hma khlaung poemhneiq pawsa puwa an ciq. Poemak loeq haen khaiq khlahngaw, a'la poemak loeq haen khaiq hngawgip lei a'nkhawm.

⁴² Yaqhniq loeq leimawqa lei msap noen cahniqa teq leimawq loeq yaqhniq poemhneiqa lei ampaek hoeiq lai loecaq taeng a'hau hoeiqla teq yaqhniqa a'ni loeq haen mawqa nana a'khaeki yaiyoe? taeng a'hiq.

⁴³ Siqmou loeq, lei thaengthaeng paek laqaisaw loeq nana kyezu a'taungi yai taeng a'hau.

⁴⁴ Yaq hna'taw pa'toeng hlaengi loeqteq Siqmou wa yaq hna'tawa na'hmuq moe? Nang ima ka'lo kho wa ka'kho ka'bawtiyai khoeq tui ampaeka tiloeqkhaw nei hna'taw loeq kei kho khoeq yaq mik khliyoeng bawt loeqteq a'samoeng huong a'hoq poeiq.

⁴⁵ Kei ka'lo kho wa keiya amhnam tiloeq amdouwa ti. Seiloeqkhaw nei hna'taw loeq kei kho wa daedae amhnam.

⁴⁶ Nang loeq keiluwa tanlweinsi yoeng pak amhluqa tiloeqkhaw nei hna'taw loeq a'phu a'laen khoeq siotoeng kei kho wa a'hluq.

⁴⁷ Yaqklongoeng nanga keiloeq ka'mhauwaiq khoeq teq nei hna'taw khoeq a'plaet thaengthaeng duka khoeq a'hloeq a'laqi klongoeng nana amkhaeki. A'plaet ba'dakcawa khoeq a'hloeq a'laqi nak loeq ba'dakcawnoeng amkhaeki taeng a'hau.

⁴⁸ Yaqkiyoeng Boiyesuq loeqkhaw yaq hna'tawa nang a'plaeta khoeq ka'mhloeq hni taeng a'hau.

⁴⁹ Yaqateq Boiyesuq oeng a'nngunghom khoeq khlaung haqloeq a'plaeta khoeq pak ka'hloeq noen taeng a'hau saw a'niyoe? taeng poemak loeq poemak a'nsoiyi nauk.

⁵⁰ Seiloeqkhaw Boiyesuq loeq yaq hna'tawa nang na'myumi klongoeng Boipaw loeq na'plaeta khoeq a'mklawn hni. Na'mlung yaedamoeng na'ciq khoq hni taeng a'hau.