Luke 22 - Chin-Cumtu (Sumtu)

¹ Patakha pawi taeng án hau khoeq ta'sepawaq khoeq puqpawi án saiyai khoeq khing a'mcouq hni.

² Yahaenpaw lang haqloeq klam hmotsaw haqkhoeq khlaung haqla án keiq klongoeng Boiyesuqa pikha a'klong sui uk loeq án tuk laqlai yoe? nakkhoeq lawm án sui.

³ Yaqkhowa Cadan khoeq ta'paiq ha'laihneiq tau wa khoeq poemak a'phlaet khoeq Yudaqsakayouq taeng an hau khoeq Yudaq duka a'wona teq

⁴ Yadasakyouq khoeq Yahaenpaw lang haqloeq Boipaw a wotpyuq dun kyonga khoeq a'lang haq hma cit loeqteq Boiyesuq khoeq yaqhniq kuta kha a'awp laqai yoe? nakkhoeq án toengbang.

⁵ Yaqhniq loeqkhaw nana haet nauk uk loeqteq Yudaqsakayouq wa haen án paekai khoeq án mlung án tuyi.

⁶ Yudasakayouq loeqkhaw a'mlung tuyi loeqteq khlaung haq moeiq yaq uk khoeq khinga Boiyesuqa a'manai khoeq a'cawnauk.

⁷ Yaqkiyoeng ta'sepawaq khoeq mup pawi hnup taeng án hau khoeq patakha pawi tawiq toecaw án puzawai khoeq hnup a'phaw hni.

⁸ Yaqklongoeng Boiyesuq loeq Petaruq loeq Yawhana patakha pawi khoeq keiyoeng nán ei homai khoeq tawiq ya cithni tiloeq saihoet tehniq taeng a'hau hoeiq.

⁹ Yaqhniq loeqkhaw, Boi yoe keihniq loeq baung a kan sai naka a'boeiyaiyoe? taeng an hiq.

¹⁰ Boiyesuq loeqkhaw, nanghniq khoeq mloeq duka nan won nak loeq aungsaen koeq loeqteq a'lo khoeq khlaung poemakoeng nan khomi loeq yaq khlaung a'won khoeq ima wonpawq boei hniq.

¹¹ Yaqkiloeq im mawqa, ka'hniq sa'la loeq yaq ta'paiq haqloeng patakha pawi a'mulawm ei án ei yai khoeq dun a'mplaq haqlai khoeq nanga hiqsauk a'mtoeq haq taeng hau boei tuk.

¹² Yaqnaka im mawq loeq nanghniqa a'honthapa a'mciqi pui nauk haqloeq teq a'ya uk khoeq kan a'mplaq hoeiq lai. Yaq khana sai boei tuk taeng a'hau haq.

¹³ Yaqkiyoeng Petaruq loeq Yawhan khaw sot hniq loeqteq Boi loeq a'sin hoeiq khakhut patakha pawi tawiq a'pawilanga an sai.

¹⁴ Án ei yai khing a'phaw loeq Boiyesuq khoeq ta'paiq haqloeng eipawiya án ngunghmo.

¹⁵ Yaqkiyoeng Boiyesuq loeq yaqhniqa, kei khoeq hnga'lai kawmhang loeq ka'du hmaungkawm nei patakha pawi khoeq nanghniq oeng ka'ei homai khoeq nana ka'loyi.

¹⁶ Nanghniqa keiloeq ka'mhau haqkhoeq teq patakha pawi khoeq Boipaw khomcaenga a'luiq mawoeng nei pawi khoeq keiloeq ei ta'hlang taeng yaqhniqa a'hau haq.

¹⁷ Yaqkiyoeng khap louq loeqteq Boipaw a a'hmlokthaq kiyoeng, nei khap khoeq louqi tuk loeq ok hom mouk.

¹⁸ Nanghniqa keiloeq ka'mhau haqkhoeq teq to ta'koeiq mcaq loeqteq Boipaw khomcaeng a'phaw mawoeng ca'byeit taiqya a'phlaet khoeq hau keiloeq ka'ok beqai seiyaq taeng a'hau haq.

¹⁹ A'la muq louq loeqteq Boipaw a a'hmlokthaq kiyoeng muq phaiq loeq yaqhniqa paek haqloeq teq, nei muq khoeq nanghniq tawiq keiloeq ka'tong khoeq keipum a'phlaet. Keiya sa'diq a'mlaq haqlai tawiq ya nei kha sai boei tuk taeng a'hau haq.

²⁰ Yaqkhakhut a'muei án ei kiloeq ca'byeit haung khap khaw louq loeqteq, nei khap khoeq nanghniq tawiq ya ka'lei khoeq kei a'thiya a'moeiq khoeq pa'ranyein tha a'phlaet.

²¹ Seiloeqkhaw keiya a'mawpai khoeq khlaung kut khoeq kei hui tu eipawiya a'moeiq.

²² Khlaungcaw khoeq yaq hnup a'phaw khoeq khinga a'ciq laqai khoeq a'layi. Seiloeqkhaw khlaungcawa a'awp khoeq khlaung teq oeqcaq hlaq taeng a'hau.

²³ Yaqateq ta'paiq haqkhoeq má hniq tau wa khoeq a'ni loeq yaqkha a'saiwaiq yoe? taeng poemak loeq poemak án hiqi.

²⁴ Yaqkiyoeng yaqhniq duka a'ni a'laen haek taeng má mkhin laqai yoe? nakkhoeq poemak loeq poemak án myangi nauk.

²⁵ Yaqklongeng Boi loeq, a'coe khlaungmyoe mang haqloeq yaqhniq plei saw haqla a'maengoeng uksuk uk loeqkhaw yaqhniqa yaqhniq a'pawi khoeq mang haq taeng a'hau án loeyi.

²⁶ Seiloeqkhaw nanghniq khoeq yaqhniq haq khakhut saiyai tuk. Nanghniqa a'muksuk haq saw khaw ta'paiq khakhut a'phlat laqai. A'lang khaw mya khut a'omtheiq laqai.

²⁷ Eipawiya ngung loeqteq a'eiyaisaw loeq ei ok haq a'calang paek sawa a'ni a'sum a'won haekoe? Eipawiya a'ngung saw khoeq a'laeng haek seiyaq moe? Seiloeqkhaw kei khoeq nanghniqa ei ok haq a'calang paek saw khakhut ka'phlaet.

²⁸ Nanghniq loeq keiya pikhowakhaw a'hmyaqa tuk. Hnga'lai haqloeng khomi laq hang loeqkhaw nanghniq khoeq keiyoeng nán om hom khoeq khlaung haq nán phlaet.

²⁹ Kei pawu loeq yaq khomcaeng khoeq keiya a'mpaek khut kei khomcaeng khoeq nanghniqa kamawp haq kiyoeng

³⁰ Nanghniq khoeq kei khomcaenga a'moeiq khoeq eipawiya ngung tuk loeq nán ei ok laqai. Yaqkiyoeng nanghniq khoeq kei nawna ngung tuk loeqteq Iqtayelaq khlaungmyoe ha'laihneiq khoeq nán thin cong laqai.

³¹ Yaqkiyoeng Boiyesuq loeq Siqmou Siqmou, hnyin boei. Zungcaung a'mti khakhut Cadan loeq nanghniqa a'mti haqlai tawiq ya khwai a'mtongi hni.

³² Siqmou, nang na'myumi khoeq klok hlaq tawiq ya suq ka'mtongi paek. Keihma na'lo ba khoeq khinga na'ta nau haq án phlaet khoeq a'coe ta'paiq haqloeq án myumi khoeq mlung khaw nei thauka caetong sai haq baboei taeng a'hau.

³³ Petaruq loeqkhaw Boi yoe, kei khoeq Boi hui tu thong duka pak seisei, a'du duna pak seisei ka'lo pawqai taw noeng taeng a'hau.

³⁴ Boiyesuq loeqkhaw Petaruq oe nanga ka'mhau khoeq teq, tohnupa a a'khon mawoeng nang loeq keiya hmotaahang taeng patthum a'myangai nakkhoeq a'hau.

³⁵ Yaqkiyoeng Boiyesuq loeq ta'paiq haqla, keiloeq nanghniqa khi, haenkhi loeq khocum haq paw ta'ong ka'mteiq haq kho wa nanghniqa pi a'loebeq oe tang ka'mhiq haq lateq pikhaw loecaq taeng nán hau.

³⁶ Yaqateq Boiyesuq loeq, towa haenkhi a'moeiq naka ciqi youq. Nán oeiyai khoeq khi a'moeiq naka khaw ciqi youq. Nanghniqa cim moeiq yaq loeq wawt boengak yeiq tuk loeq cim hleiq oek.

³⁷ Nanghniqa keiloeq ka'mhau haqkhoeq teq, yaqkhoeq ta'la moeiq yaqkhoeq ca'langa a'thoen a'laqi yai taeng klamcawa kei klong yok uk loeq án tauk khakhut a'luiqyai klongoeng a'phlaet.

³⁸ Yaqateq ta'paiq haqloeq, Boi yoe so hme, keihniq hma cim laenghneiq a'moeiq taeng án hau wa teq Boiyesuq loeqkhaw ma'laqhni taeng a'hau haq.

³⁹ Yaqkiyoeng Boiyesuq khaw paengtoeng a'sainown khakhut tanlwein tonga a'ciq. Ta'paiq haqkhaw yaq hnu woeng án toemi pawq.

⁴⁰ Yaq dun án phaw loeq Boiyesuq loeq ta'paiq haqla, a'hmlaekinauk laqi hlaq tuk tawiq ya suq tongi boei tuk taeng a'hau haq.

⁴¹ Yaqkiyoeng Boi khaw yaqhniq oeng lung weiqakca baung a'hlawa cit loeqteq a'mkhuklu khlawqi loeqteq

⁴² Oe pawu woe, keiya a'phlaetai khoeq nei hnglai khoeq keihma khoeq a'mphaeng paek hme. Seiloeqkhaw Boipaw loeq na'mlung a'moeiq khut noeng phlaet teseq. Kei ka'mlung a'moeiq khakhut phlaetaq caek taeng suq a'tongi.

⁴³ Yaqateq mehona khoeq mehon saw haq lo uk loeqteq Boiyesuqa a'ta án paek ba.

⁴⁴ Boiyesuq khoeq nana a'mlung sounglai loeqteq a'mlung paw loeq suq a'tongi kho wa Boi hma a'klawq khoeq a'mkhlawn haqteq a'thi a'long khut daeka a'klawq.

⁴⁵ Yaqkha suq a'tongi kiloeq Boiyesuq khaw tho loeqteq ta'paiq haq án moeiq duna a'lo baloeq ta'paiq haqkhaw yaidak uk loeqteq án iq khoeq noeng a'khom haq.

⁴⁶ Boi loeq ta'paiq haqla, a'piya nán iq oe? Thotuk loeqteq khlaung haqloeq a'hmlaekinauk haqhlaq tawiq ya suq tongi boei tuk taeng a'la sa'diq a'paek haq.

⁴⁷ Boiyesuq loeq yaqkha a'hau haq tuna khlung lui luiyak khoeq Boi hma án lo. Yaq khlaung lui tau wa ta'paiq ha'laihneiq duka poemak a'phlaet khoeq Yudasakayouq loeq a'loyi pui nauk haq. Yudaq loeq Boiya a'mhnamai khoeq a'phaela a'ciq.

⁴⁸ Seiloeqkhaw Boiyesuq loeq yudaq oe, nang loeq khlaungcawa mhnam tiloeqteq khlaungsei haq kuta na'aupai moe? taeng a'hiq.

⁴⁹ Ta'paiq poemak loeq yaqkha a'phlaet khoeqhaq a'hmuq loeq, Boi yoe, keihniq loeq yaqhniqa cimoeng kán thungi laqai moe? taeng a'hiq.

⁵⁰ Yaqkiyoeng Yahaenpaw lang ta'paiq poemaka cimoeng a'sawqa teq saet poet hnaw a'baetoeq.

⁵¹ Boiyesuq loeqkhaw, nei hyawqoeng mdum hne taeng hau loeqteq yaq a'baet khoeq mya hnaw khoeq a'kutoeng a'tapaek bala teq a'pawi ba.

⁵² Yaqkiyoeng Boiyesuq loeq yaqa án manai án lo khoeq Yahaenpaw lang haq, Boipawa wotpyuq dun kyong cong saw haqloeq Yudaq khlaung cang haqla, nanghiq loeq keiya damblaqa nán man khut tuk haq cim haq khaek tuk loeq piya nán lowoe?

⁵³ Kei khoeq hnuptoeng Boipawa wotpyuq dun kyonga ka'moeiq kho wa piya a'mana tuk koe? Sei loeqkhaw nei khing khoeq nanghniq khing a'phlaet klongoeng manaq khaw yaq loeq pawi yaq khoeqhaq a'saiyai khoeq a'khing a'phlaet taeng a'hau haq.

⁵⁴ Yaqkiyoeng yaqhniq loeq Boiya man uk loeqteq Yahaenpaw lang ima án ciqi pui nauka teq Petaruq loeqkhaw a'hlaw ta'thoq a'hnu woeng a'toemi.

⁵⁵ Khlai duka boengak khlaung haqloeq mi án omi tuna Petaruq khaw yaqhniq laikla a a'ngung pawq.

⁵⁶ Yaq tuna myanu poemak loeq Petaruq a'ngung pawq khoeq a'hmuq loeq yaqa a'kutyungoeng mkhiq loeqteq, nei khlaung khaw a'man a'laqi khoeq Yesuq hui tu a'ompawq khoeq khlaung a'phlaet taeng a'hau.

⁵⁷ Yaqateq Petaruq loeq yaq hna'tawa keiloeq yaq khlaunga hmawtaq hang taeng a'myang.

⁵⁸ A'tawncaw a'kla loeq khlaung poemak loeq Petaruqa a'hmuq loeq, nang khaw yaqhniq tau wa khoeq pomak na'phlaet taeng a'hau. Seiloeqkhaw Pataruq loeq, kei yaqhniq tau wa khoeq seiyaq hang tang a'myang tuba.

⁵⁹ A'la nayiyak baung a'kla loeq a'coe klaung poemak loeq, nei khlaung khaw Galilae plei saw phlaet loeqteq Yesuq hui tu a'ompawq khoeq a'sikcang taeng a'hau.

⁶⁰ Seiloeqkhaw Petaruq loeq, nang na'hau khoeq keiloeq hmotaq hang taeng a'myang tuba. Yaqkha a'myang tuna a khaw a'kawn toeq.

⁶¹ Yaqateq Boiyesuq loeq Petaruqa a'touqi. Petaruq khaw Boi loeq a'hau hoet khoeq, tohnupa a a'khawn mawoeng nang loeq patthum a'myangai taeng a'hau khoeq plau sa'diq a'laq bala teq,

⁶² a'planga sot loeqteq mpoq loeq a'kaq toeq.

⁶³ Boiyesuqa a'cong saw haqloeq Boiya mtaklaek nauk uk loeqteq án souq.

⁶⁴ Boi mik khoeq wawtoeng pit uk loeqteq, nanga a'ni loeq a'msouq woe? nakkhoeq hau hme taeng hau uk loeqteq,

⁶⁵ a'coe pawi yaq khoeq plau haqloeng khaw Boiyesuqa án mkok.

⁶⁶ Kho a'wa loeq Yahaenpaw lang haq, klam hmotsaw haq Yudaq khlaung cang haqloeq ta'la yunga Boiya áncaetcawq.

⁶⁷ Yaqhniq loeq Boiyesuqa, nang khoeq a'klawnsa Boikhreitaw a'sik moe? keihniqa a'mhau haqle taeng án hiq. Boiyesuq loeqkhaw, a'layi taeng ka'mhau haq naka nanghniq loeq a'myumi hlaq tuk.

⁶⁸ A'klawn saw Mesiyaq klong nanghniqa ka'mhiq haq naka khaw nanghniq loeq hau hlaq tuk.

⁶⁹ Seiloeqkhaw to ta'koeiq mcaq loeqteq khlaungcaw khoeq Boipaw a'tat saet pa'toeng a'ngungai taeng a'hau haq.

⁷⁰ Yaqateq Yaqhniq loeq, yaqnaka nang khoeq Boipawcaw na'phlaet moe? taeng án hau. Boiyesuq loeqkhaw nanghniq loeq nán hau khakhut a'layi taeng a'hau haq.

⁷¹ Yaqhniq loeqkhaw a'pisauksi a'loebeq oe? Yaq plau a'soq khoeq keihniq loeq kán ya uk laqhni taeng án hau.