Luke 2 - Chin-Cumtu (Sumtu)

¹ Yaq khinga taengblei blaiq ya ta'gaung ca'lang án louqwai khoeq Kaeta mang Awgoukduq loeq a'maeng a'thut.

² Nei mcaq loeq mcaq ta'gaung ca'lang án louq khinga Kuqreniq khoeq Suriq pleiya khoeq ba'yeinkhan a'phlaet.

³ Khlaung ta'kum khoeq ta'gaung ca'lang án wonai tawiq ya yaqhniq án moeiq dun mloeq ta'kuma án ciq.

⁴ Yaqklongoeng Yawtaq khaw Hnyangphalang Dawoeiq myoewa khoeq a'kom khoeq khlaung a'phlaet klongoeng Galilae plei Nazaeq mloeqa khoeq sot loeqteq Dawoeiq mloeq a'phlaet khoeq Yudaq plei Baeqlein mloeqa ta'gaung ca'lang a'louqi yai a'ciq.

⁵ Yaqkha a'ciq kho wa yaqoeng án paeki khoeq hoenmawqnu Mariq khaw a'ciqi pui nauk.

⁶ Yaqhniq khoeq yaq dun án phaw loeq Mariq khaw a'caw a'moeiq hnowaiqya teq

⁷ Yaq loeq a'cawu pa'taw caw a'tauki. Yaq khinga taekhoekhana omdun moeiqcaqa teq sa'mi caw khoeq wawtoeng laet hniq loeqteq soecauk khaupa anhmyong. Mehon saw haqloeq Boiyesuq a'moeiq hni nakkhoeq toe cong saw haqla án hmyauk khoeq klong

⁸ Yaq yanoeng boengak toe cong saw haqloeq yaqhniq toe haqkhoeq Baeqlein mloeq phaela a'moeiq khoeq laicawiq haqla án cong.

⁹ Yaq khinga Boipaw mehon saw khaw yaqhniq phaela ma'lawiq ta'lawiq pau loeqteq Boipaw phumthaung khoeq yaqhniq phaela lang poeiq loeqteq toe cong saw haqkhaw ánpahaiyi poeiq.

¹⁰ Yaqateq Mehon saw loeqkhaw yaqhniqa pahaiyi yai tuk. Keiloeq khlaung haq awlum tawiq ya nana oeqcaq pha khoeq sa'taung pawi ka'mhmyauk haqkhoeq noeng.

¹¹ Nei khakhut khomghup a'oeqcaq pha khoeq khinga a'klawn saw Boikhreitaw khoeq nanghniq tawiq ya Dawoeiq mloeqa a'moeiq hni.

¹² Baeqlein mloeqa wawtoeng laet hniq loeqteq soecauk khapa anhmyong khoeq sa'mi caw náhmuq loeq náhmawtai taeng a'hau haq.

¹³ Ma'lawiq ta'lawiq a'coe mehon saw haqkhaw mehona khoeq komuk loeqteq Boipaw pawi klong na'khakhut án hmlokthat.

¹⁴ Mehona a'moeiq khoeq Boipaw pawi klong kánhmlokthaq. Somdak khlunga a'nmoeiq khoeq khlong haqla khaw mlungko yaedam bacaek taeng án hau.

¹⁵ Yaqkiyoeng mehon saw haqkhoeq mehona án ciqba kiyoeng toe cong saw haqloeq ma'hniqa mehon saw haq ta'thoq Boipaw loeq a'mphlaq haqkhoeq nei hmuqlong haq sota Baeqlein mloeqa máciqai taeng poemak loeq poemak án hmyauki.

¹⁶ Yaqkiloeq yaqhniq khaw a'yang án ciq ateq Yawtaq, Mariq loeq soecauk khapa án hmyong khoeq sa'mi cawa án khom.

¹⁷ Toe cong saw haqloeq sa'micawa án khom loeq mehon saw haqloeq án hau hoet khoeq sa'mi caw klong khoeq omdun ta'kuma án moeiq khoeq khlaung ta'kuma án cauk poeiq.

¹⁸ Toe cong saw haqloeq án cauk paek khoeq klong yauk laq saw awlum loeq nana án mauknauk.

¹⁹ Mariq loeqkhaw nei klong haq awlum a'mlung duka tawyi loeqteq nana a'tawiqi naukba.

²⁰ Toe cong saw haqkhaw mehon saw haqloeq yaqhniqa án hau hoet khoeq khakhut án hmuq laqa teq yaq hmuqlong haq tawiq ya Boipaw a án mlung án kowoeng hmlokthaq uk loeqteq án ciqba toeq. Sa'mi caw Yesuq Boipaw hma án aup khoeq klong

²¹ Yaqkiyoeng sa'mi caw a'moeiq khoeq hnupsaet a'moeiq kiyoeng sa'micawa a'yephyahli meingala án saiyai yaq teq a'hoen duka a'moeiq maw ta'koeiq mehon saw loeq a'nsin hoet khakhut Yesuq taeng a'ming án paek.

²² Yaqkiyoeng Mawse loeq a'tauk hoet khoeq peinyat klam a'moeiq khakhut Mariq loeq yaqayaq cimcai aung a'saiyai khoeq hnup a'mcawn loeq nupaw haqloeq sa'mi caw khoeq Boipaw a an aupai khoeq Yeruqsalein mloeqa an ciqi pui nauk.

²³ Yaqhniq loeq nei kha án sai laq khoeq teq Boipaw loeq a'peinyat hoet khakhut a'cawu pa'taw caw ta'kum khoeq Boipaw hma án aup laqai taeng a'yok klongoeng a'phlaet.

²⁴ Yaqkhakhut wakho cungak seiyaqloeq khoe dawhneiq án puzaw laqai taeng Boipaw peinyat klama a'hau khakhut an puzawai khoeq a'phlaet. Suqmaung loeq Boipaw klong a'hau khoeq klong

²⁵ Yaq khinga Yeruqsalein mloeqa Suqmaung taeng a'ming a'moeiq khoeq cangpaw poemak a'moeiq. Yaqkhoeq Boipaw hmuqlong sai louq loeqteq Boipaw hmaungkauma khlaungpawi a'phlaet khakhut Iqtayelaq khlaungmyoe haqloeq án khaum laq khoeqhaq duka khoeq a'hloeq haqlai saw Boipaw a a'congi khoeq khlaung a'phlaet. Cimcai muikhlaw khoeq yaqhma kom loeqteq

²⁶ Boikhreitaw hmu laq ta'ong du laq hlaq tiq taeng cimcai muikhlawoeng a'laqi.

²⁷ Mariq loeq Yawtaq khaw Boipaw peinyat a'moeiq khakhut sa'mi caw Yesuq khoeq Boipawa an aupai tawiq ya Boipawa wotpyuq dun kyonga an ciqi pui nauk tuna cimcai muikhlaw loeq Suqmaunga Boipaw a wotpyuq dun kyonga a'wanai khoeq laum a'mphlaq.

²⁸ Yaqkiyoeng Suqmaung loeq sa'micawa poem loeqteq Boipaw a na'khakhut a'mhmlok thaq.

²⁹ Boi yoe, nang loeq na'hau khoeq plau a'moeiq khakhut towa keiya mlungko yaedamoeng ka'du khwai a'mpaek hna'boei.

³⁰ A'piyawoe naka khlaung haqla a'klawnai khoeq nang loeq na'hloeq khoeq Boiya kei ka'mikoeng ka'hmuq laqhni.

³¹ Somdaeka a'moeiq khoeq khlaung haq loeqkhaw Boipaw loeq na'hloeq khoeq Boiya án hmuq laqai.

³² Yaqkhoeq Boipaw tawiq ya a'coe khlaungmyoe haqla a'mphlaqai khoeq a'lang phlaet loeqteq nang khlaung myoeq a'phlaet khoeq Iqtayelaq phumthaung a'lo wai khoeq Boi a'phlaet.

³³ Mariq loeq Yawtaq loeqkhaw Suqmaung loeq a'hau khoeq sa'mi caw Yesuq klong anyauk khoeq khinga nana an mauk nauk.

³⁴ Yaqkiyoeng Suqmaung loeq yaqhniqa pa'si a'paek kiyoeng Mariqa Boipaw loeq nang na'caw khoeq Iqtayelaq khlaungmyoe haq duka a'plaet paek a'laqi yai saw loeq a'klawn a'laqi yai saw haqla a'mkha haqlai tawiq ya a'haeq a'laqi. Yaqkhoeq Boipaw hma a'lo khoeq na'maek phlaet loeqkhaw khlaung haqloeq yaqa án myang.

³⁵ Nei khoeq teq khlaung haqloeq án mlunga án mkhin khoeqhaq a'pau wai khoeq klong a'phlaet. Nang na'mlunga khaw cimhmyum coeki loeqteq a'wonai taeng a'hau. Hanaq loeq sauksi a'khaumi khoeq klong

³⁶ Yaqduna Asa a'myoe a'caenga khoeq Phenwelaq cawhnu Anaq taeng an hau khoeq Pa'rawphaeq nu poemak khaw a'moeiq. Yaq hna'taw khoeq a'pawha a'laqi kiyoeng a'pawhawoeng kumseiq anomhom.

³⁷ Towa yaqkhoeq hmeinu poemak phlaet loeqteq saekipkumhli a'moeiq hni. Yaq hna'taw khoeq Boipawa wotpyuq dun kyonga khoeq pikhowakhaw sot ta'ong Boipaw a mkhoeqi loeqteq suq tongi loeqteq ei hmuti loeqteq hnuptoeng yantoeng a'sai louq khoeq a'phlaet.

³⁸ Yaq hna'taw kkoeq Boipaw a wotpyuq dun kyonga a'phaw loeq sa'mi caw Yesuqa a'hmuq loeq Boipaw a hmlokthaq loeqteq Yeruqsalein mloeqa a'klawnai khoeq a'congi khoeq khlaung haqla nei sa'mi caw Yesuq klong a'hmyauk haq. Nazaraeqa sa'mi caw Yesuq loeq a'nu paw haq án lo ba khoeq klong

³⁹ Yaqkiyoeng Yawtaq loeq Mariq loeqkhaw peinyat a'moeiq khakhut Boipaw hmuqlong haq sai louq poeiqhniq loeqteq yaqhniq im a'moeiq dun Galilae plei Nazaraeq mloeqa ancitba.

⁴⁰ Sa'mi caw khaw bau loeqteq plaengnya woeng a'yungta woeng luiq loeqteq Boipaw phumthaung a'laqi khoeq sa'mi caw a'phlaet. Boipaw a wotpyuq dun kyonga sa'mi caw Boiyesuq a'om khoeq klong

⁴¹ Mariq loeq Yawtaq khoeq patakha pawi tawiq ya Yeruqsalein mloeqa kumtoeng an ciq.

⁴² Boiyesuq ka'kum hng'laihniq a'luiq loeq kumtoeng an ciq khakhut patakha pawi ansaiyai tawiq ya yaq mloeqa an ciq.

⁴³ Patakha pawi hnup a'nmcawn loeq sa'mi caw Yesuq khoeq Yeruqsalein mloeqa a'kyan hoet khoeq hmawt ta'ong ima an ciq.

⁴⁴ Sa'mi caw Yesuq khoeq yaqhniq hui tu implansaw khlaung haq lui yoeng a'lo pawq taeng mkhin uk loeqteq hnupak poeiq oeng ancit hni. Yaqkiyoeng sa'mi caw Yesuq khoeq myoesaw haq khlaung haq luiya ansuiya teq

⁴⁵ sui uk loeq khomaquka teq Yeruqsalein mloeq an lo ba.

⁴⁶ Hnupthum a'kla kiloeq sa'mi caw Yesuq khoeq Boipawa wotpyuq dun kyonga Yudaq sa'la haq laikla a a'ngung khoeq yaqhniq loeq ankhomba. Yaq loeq yaqhniq loeq án hau khoeqhaq hnyin loeqteq yaqhniqa plauplan a'hiq haq ba.

⁴⁷ Sa'mi caw Yesuq plau a'nyauk khoeq khlaung ta'kum loeq yaq plaenga woeng a'hau khoeq plau loeq a'hiq haq khoeqhaq nana án mauk nauk.

⁴⁸ Yawtaq loeq Mariq loeq sa'mi caw Yesuqa an khom loeq nana an mauk nauk hniq loeqteq a'nu loeq ka'cawoe keihniqa nei kha piya amsai hoeiqloe? Keihniq loeq nana amtheiq nauk hoeiq hniq hang loeqteq kanmsui hoeiq taeng a'hau.

⁴⁹ Yaqkhowa sa'mi caw Yesuq loeqkhaw pi klongoeng keiya amsui hoeiqloe? Kei khoeq Boipaw ima ka'moeiq khoeq amhmawta hniti moe? taeng a'hau hoeiq.

⁵⁰ Seiloeqkhaw sa'mi caw Yesuq loeq pi a'hau woe nakkhoeq yaqhniq loeq yawcuwaq hniq. Khlaung hmaungkaum Boipaw hmaungkauma sa'mi caw Yesuq loeq a'hmoi a'laqi khoeq klong

⁵¹ Yaqkiyoeng sa'mi caw Yesuq khaw a'nu loeq a'paw hui tu Nazaraeq mloeqa citpawqba loeqteq yaqhniq plau hnyini loeqteq a'om. A'nu loeqkhaw mehon saw loeq a'hau khoeq plau ta'koeiq mcaq loeqteq Yesuq klong haq a'mlunga a'tawiqi nauk poeiqba.

⁵² Yaqkiyoeng sa'mi caw Yesuq khaw plaengnya woeng a'yungtha woeng luiq loeqteq Boipaw hmaungkaum khlaung haq hmaungkauma a'hmoi a'laqi.