Mateo 8 - Porciones del Nuevo Testamento

Jesúsba bꞌebidꞌa aidꞌaba kꞌaya bꞌʉta

¹ Jesús kꞌatumaneba zebʉrʉdꞌera zhãrã bio kꞌaidꞌu zesidꞌa.

² Maʉ̃ne aidꞌaba kꞌaya bꞌʉba orrape izhi kĩrãbita sãkꞌokꞌodꞌe kꞌobꞌepe mawũãsia: Nokꞌó, bʉa krĩñabʉrʉ mʉrã nene ẽã bꞌebirua.

³ Mawũãĩ Jesúsbara juwuaba tõbꞌari mawũãsia: Mʉãrã krĩña bꞌʉa, mawũẽ bʉra nene ẽã bꞌidꞌa! Audre ẽãne izhi aidꞌara nebasia.

⁴ Mobebʉrʉ Jesúsbara mawũãsia: Bʉ kꞌãwũã bꞌebʉrʉta miõã jararãrũã, awuarabʉrʉ wãpe sacerdotea ũdubirua, mobe bʉzhi bꞌedꞌabari nendʉwʉrʉta babuedꞌamarẽã diadua, Moiséba jaradꞌa kĩrãkꞌa odua bʉ bꞌebʉrʉta ãzha kꞌawuadꞌamarẽã.

Jesúsba bꞌebidꞌa nezokꞌata soldaorã nokꞌodꞌeta

⁵ Capernaúm pʉwʉrʉdꞌe Jesús edꞌa wãbʉrʉdꞌera, soldaorã nokꞌo Romanebemaba orrabʉrʉta zuburia bedꞌea,

⁶ mawũãsia: Nokꞌó, mʉ nezokꞌata dedꞌa tabꞌʉa, kꞌakua pira ẽã kꞌaya tabꞌʉa, zuburia tabꞌʉa.

⁷ Mawũãĩ Jesúsbara mawũãsia: Mobera mʉ wãpe bꞌebiya.

⁸ Mawũãĩ soldaorã nokꞌobara panaʉ̃ mawũãsia: Nokꞌó, mʉrã biata bꞌʉ ẽã bʉ mʉ dedꞌa deidꞌu zeira. Mawũẽ bꞌei bedꞌeata jaradua, mawũãrã mʉ nezokꞌara bꞌeya.

⁹ Aramaʉ̃ kĩrãkꞌa mʉãrã aribꞌae bꞌʉa nokꞌoba jarabʉrʉta. Mʉãbidꞌa soldaorãta jʉre bꞌʉa mʉã jarabʉrʉdꞌe bꞌeta. Mʉã iabꞌaʉa: Wãrũã, abʉrʉdꞌera wãbaria. Iabꞌaʉa: Zerua, abʉrʉdꞌera zebaria. Mʉ nezokꞌaa: Naʉ̃ta odua, abʉrʉdꞌera obaria.

¹⁰ Jesúsba maʉ̃ta ũrĩbʉrʉdꞌera sobiape izhi kꞌaidꞌu erjiranʉã mawũãsia: Mʉã wãrĩnu marãã jaraya, mʉãrã miã Israel bꞌedꞌebema ũdu ẽã kꞌãwũã soidꞌu kꞌobꞌʉra.

¹¹ Mʉã marãã jaraya, Daizezeba kꞌawua obʉrʉ ewadera bio zedꞌaya ʉ̃madau ʉ̃tʉ zebariareba, ʉ̃madau bꞌaebariareba. Maʉ̃rãta jewedꞌa nekꞌodꞌaya Abraham bawara, Isaac bawara, Jacobo bawara ʉ̃tre Daizezeta Nokꞌo maẽ.

¹² Mawũãmina Israel Daizezeta Nokꞌodꞌebemane bꞌeaidꞌe bꞌebara ĩjãna ẽãba jʉrekuaya ãĩ pãrĩguadꞌe tebʉdꞌe, mama jẽgadꞌaya kidꞌa kꞌõsesea.

¹³ Mobebʉrʉ Jesúsbara soldaorã nokꞌoa mawũãsia: Wãrũã, bʉra soidꞌu kꞌobꞌʉba aribꞌae nʉmaẽdaya. Aramaʉ̃ne izhi nezokꞌara bꞌesia aramaʉ̃ ʉ̃madaudꞌe.

Jesúsba bꞌebidꞌa Pedro pakꞌõrẽta

¹⁴ Jesús Pedro dedꞌa wãbʉrʉdꞌera ũdusia Pedro pakꞌõrẽ kʉdꞌadꞌe tabꞌʉta kʉwamiãba.

¹⁵ Mawũẽ juwuata tõbꞌaribʉrʉdꞌera kʉwamiãbara kenabꞌarisia. Mawũẽ izhira piradrʉpe ne jigasia.

Jesúsba bꞌebikuadꞌa kꞌayarãta bio

¹⁶ Keubʉrʉdꞌera Jesúsma bio wesidꞌa jai abꞌeta. Mawũẽ bedꞌeama abꞌaʉba jaira ãĩ jʉrekuasia, jõma bꞌebikuasia kꞌayarãsidꞌa.

¹⁷ Aramaʉ̃ne arimaẽ berabꞌarisia Daizezeba bedꞌeata jarabibariba Isaíaba mawũãnata: Izha bꞌebisia dazhirã kꞌaya bꞌeadꞌara, izha bꞌebisia dazhirã pua bꞌeadꞌara.

Jesús pẽwã krĩña panana

¹⁸ Jesúsbara ũdusia izhira zhãrã bioba bʉredrʉbʉdata, mawũẽ jarasia kĩrãrãã chãnamarẽã.

¹⁹ Maʉ̃ne ũrãgꞌa Moisédꞌe jarabarita zepe mawũãsia: Miã Ũrãgꞌabari, mʉã bʉra pẽwãña bʉ wãbʉrʉma.

²⁰ Mawũãĩ Jesúsbara mawũãsia: Usa pã de bara bꞌʉa, ibanasidꞌa de bara bꞌʉa, mawũãmina mʉ Beubari Bape bꞌʉra ne ẽã sãma kꞌãĩ bꞌaira.

²¹ Awʉrʉba izhi pẽwã bꞌedꞌebemaba mawũãsia: Nokꞌó, mʉrã naara idu wãbirua mʉ zeze joudꞌe.

²² Mawũãĩ Jesúsbara mawũãsia: Mʉ kꞌaidꞌu bꞌadua. Aduaita beuya bꞌea idu joubigarua ãzhirãta beubʉdara.

Jesúsba taʉbidꞌa nanguta do bomatʉta

²³ Jesús jãbadꞌe bꞌaribʉrʉdꞌera izha jʉrʉkuadꞌara kꞌaidꞌu jʉ̃drʉsidꞌa.

²⁴ Maʉ̃ne do jedꞌea õbꞌʉdꞌe nanguta kꞌãbãẽã bʉsadꞌewaba do bomatʉba nabiru bʉsadꞌewasia jãbara. Maʉ̃ẽna kꞌãĩsia Jesúra.

²⁵ Mawũẽ izha jʉrʉkuadꞌara zedꞌape ʉ̃rʉ̃ma mawũãsidꞌa: Nokꞌó, daira kꞌarebarua, dazhirã tabodꞌoa.

²⁶ Mawũãnaĩ izhara mawũãsia: ¿Kꞌãrẽã pera kꞌobꞌe? Marã soidꞌu kꞌobꞌaita wãẽã bꞌea. Mobe piradrʉpe kẽãsia nanguta, do bomatʉta, mawũẽ jipa taukua nʉmaẽdasia.

²⁷ Mawũẽ bia akʉdrua mawũãsidꞌa: ¿Naʉ̃ kꞌaipe kꞌãwũã nanguba do bomatʉba izhi bedꞌeata aribꞌaebʉdara?

Kĩrãnema panana Gadara bidꞌarãta

²⁸ Jesús kĩrãrẽ jũẽbʉrʉta Gadara bidꞌarã druaidꞌu jũẽbʉrʉdꞌera, izhima zesidꞌa ũme kĩrãnema panʉta, beuwãrã wuagꞌaita peña zobꞌeata nʉme maẽba zesidꞌa, kꞌãbãẽã menajachata panʉba miõta berabꞌari bꞌe ẽbasia maʉ̃ odꞌera.

²⁹ Mawũẽ nemi jĩgua mawũãsidꞌa: ¿Dai bawara bʉra kꞌãrẽta sãwũã bꞌʉ Jesús Daizeze Warra? ¿Naĩnu zebʉrʉka dai zuburia oita ewari nawedꞌa?

³⁰ Maʉ̃ne ãzhi maẽba wawara bio nekꞌo duanasia chĩnata.

³¹ Mawũẽ jai zuburia bedꞌeabʉdata mawũãsidꞌa: Daita ãĩ jʉrekuara daira idu edꞌa wãbigarua chĩna jari duanune.

³² Mawũãnaĩ Jesúsbara mawũãsia: Wãũdua. Aramaʉ̃ta ãzhira maʉ̃rãnebara ẽzoape edꞌa wãsidꞌa chĩna mawũã duanune. Mawũẽ chĩna duanurã jõma doidꞌu peñane bʉrʉgʉzoape beukuasia doedꞌa.

³³ Mawũẽ chĩna akʉ bꞌera wãẽbasidꞌa, aramaʉ̃ne pʉwʉrʉedꞌa zebʉdadꞌera maʉ̃ta jõma nebʉrʉ jarasidꞌa kĩrãnema panʉ sãwũã berabꞌaribʉdata.

³⁴ Mawũẽ pʉwʉrʉdꞌebema jõma Jesúsma zebʉdadꞌe ũdudꞌai, zuburia bedꞌeasidꞌa wãmarẽã ãzhi druadꞌebara.