Mateo 22 - Porciones del Nuevo Testamento

Ne jaradꞌa juwua jidabadadꞌeba

¹ Jesúsbara wakusa ne bio jarakꞌa mawũãsia:

² Daizezeta Nokꞌota nʉmʉrã reyta bꞌadꞌa kĩrãkꞌa bꞌʉa, maʉ̃bara fiesta osia zhi warra juwua jidayidꞌera.

³ Juwua jidayidꞌe trʉ̃kuadꞌata trʉ̃ne nezokꞌarã izhidꞌeta zokꞌasia, mawũãmina maʉ̃rã ze krĩñana ẽbasia.

⁴ Wakusa nezokꞌarã dewaraurãta zokꞌabʉrʉta mawũãsia: Trʉ̃kuadꞌapeadꞌaa jaraudua mʉrẽ zhikora aribꞌaesita. Mʉãrã beabisia mʉ tororãta, mʉ nendʉwʉrʉrã boreguearãta. Mawũẽ jõma aribꞌae nʉmʉ baera zedꞌamarẽã jaraudua juwua jidayima.

⁵ Mawũãmina trʉ̃kuadꞌapeadꞌara wãna ẽãbʉrʉ ʉ̃kʉrʉ wãsidꞌa ãzhi trabajoedꞌa, ʉ̃kʉrʉ ãzha kꞌãrẽ oi bꞌʉta oedꞌa.

⁶ Waya ʉ̃kʉrʉbara nezokꞌarãta jirtopota jirachi makenasidꞌa.

⁷ Maʉ̃ta reyba ũrĩbʉrʉdꞌera kĩrũpe zokꞌasia soldaorã izhidꞌeta, aramaʉ̃ne makenasia maʉ̃rã miã beamiãta bꞌera, mobe basia ãzhi pʉwʉrʉra.

⁸ Mobebʉrʉ nezokꞌarã izhidꞌea mawũãsia: Juwua jidayidꞌebema wãrãnebai zhi aribꞌaema. Mawũãmina trʉ̃kuadꞌapeadꞌara trʉ̃kuaidꞌe bꞌa ẽbasia.

⁹ Mawũẽ oza wãũdua, mobe juwua jidayima trʉ̃ũdua mazha ũdubʉdata.

¹⁰ Mawũãĩ nezokꞌarã oza wãnape ãzha ũdubʉdata jõma jʉresidꞌa biata bꞌeta, bia ẽãta bꞌeta, aramaʉ̃ne juwua jidayidꞌebema birasia trʉ̃kuadꞌapeadꞌaba.

¹¹ Trʉ̃kuadꞌapeadꞌata akʉita rey edꞌa wãbʉrʉdꞌera mama ũmakĩrãta ũdusia zhãrã juwua jida nʉmʉne jʉ̃bibadaba zho bꞌʉ ẽãta.

¹² Mawũẽ mawũãsia: ¿Bʉra sãwũã nama edꞌa zesi zhãrã juwua jida nʉmʉne jʉ̃bibadaba zho bꞌʉ ẽãrã? Mawũãĩ izhira chupea kꞌobꞌasia.

¹³ Mawũẽ reybara ne aribꞌae nʉmeã mawũãsia: Jẽrũta, juwuata jʉ̃ũdua, mobe bꞌaribueudua ãĩ pãrĩguadꞌe tebʉdꞌe, mama jẽgaya kidꞌa kꞌõsesea.

¹⁴ Aramaʉ̃ kĩrãkꞌa Daizezebara bio trʉ̃kua nʉmʉkꞌãrĩã, mawũãmina bio ẽã zhi jʉrʉmarã.

Rey Romanebemaĩta plata widꞌibadadꞌebema

¹⁵ Maʉ̃ tẽã fariseorã wãnape bedꞌeasidꞌa Jesús sãwũã wãẽã bedꞌeabidꞌaita.

¹⁶ Mawũẽ ãzhi pẽwã bꞌeta rey Herode pẽwã bꞌe bawara izhima zokꞌabʉdata jarabuesidꞌa mawũãnamarẽã: Miã Ũrãgꞌabari, daiba kꞌawua bꞌedꞌera bʉara jara bꞌʉa wãrãta, aramaʉ̃ne wãrĩnuta jara bꞌʉa Daizeze ota. Bʉra krĩcha zhãrãneã zhi edebi ẽã bʉara akʉ ẽbaera zhãrãnebemata.

¹⁷ Bʉma sãwũãta daia jaradua: ¿Diasia bꞌʉka rey César plata diabadara, o dia bꞌe ẽ?

¹⁸ Jesúsbara kꞌawuasia ãzhara bĩ ẽã oita kꞌobꞌeta, mawũẽ mawũãsia: ¿Mʉrã kꞌãrẽã wãẽãbidꞌaita kꞌopanʉ marã sewa bibaʉta bꞌebara?

¹⁹ Mʉãã ũdubiudua monedata rey Romanebemaa diabadata. Mawũãĩ ãzhara ũdubisidꞌa denario abꞌa.

²⁰ Mobebʉrʉ Jesúsbara mawũãsia: ¿Naʉ̃nerã kꞌai zata nʉmʉ, kꞌai trʉ̃ta bꞌʉ nʉmʉ?

²¹ Mawũãĩ mawũãsidꞌa: Césardꞌea. Mawũãnaĩ mawũãsia: Césardꞌera César diaudua, Daizezedꞌera Daizezea diaudua.

²² Maʉ̃ta ũrĩnaĩ bia akʉdruape ãmaẽbʉdata wãsidꞌa.

Beudꞌata piradrʉdꞌaidꞌebema

²³ Maʉ̃ ewade saduceorãta zesidꞌa Jesúsma, maʉ̃rãbara jara bꞌea beudꞌara piradrʉ ẽãta, mawũẽ widꞌi,

²⁴ mawũãsidꞌa: Miã Ũrãgꞌabari, Moisébara mawũãsia: Iabꞌaʉta warra ne ẽã beura, izhi wũẽrã zhi mebeaba edaibara, aramaʉ̃ne zhi mebea beudꞌata warra barabiya.

²⁵ Ewari abꞌa daidꞌe edꞌa mebẽrãta siete pãĩna bazhia, nabemata miã kꞌãĩpe beusia, warra ne ẽbasi baera izhi wũẽrã zhi mebeaita ãmaẽsia.

²⁶ Zhi ũmesidꞌa abꞌarika berabꞌarisia, zhi ũbeasidꞌa, zhi sietesidꞌa.

²⁷ Jõma mawũã berabꞌaridꞌa tẽãne beusia wũẽrãsidꞌa.

²⁸ ¿Kꞌõbe beudꞌata piradrʉbʉdadꞌera sietedꞌebemabara sãʉ̃ba izhi wũẽrã baipe mawũã ãzhi jõmaʉ̃ba kꞌãĩnapeadꞌara?

²⁹ Mawũãnaĩ Jesúsbara panaʉ̃ mawũãsia: Marã wãẽã bꞌeba maʉ̃ẽnabemata zhi bꞌʉmarã sãwũãta kꞌawuadꞌa ẽã, miã Daizeze zareara sãwũãta kꞌawuadꞌa ẽã.

³⁰ Beudꞌata piradrʉbʉdadꞌera miã kꞌãĩna ẽã, awuarabʉrʉ Daizeze ángelerã ʉ̃tre bꞌe kĩrãkꞌa bꞌeaya.

³¹ Mawũãmina beudꞌata piradrʉdꞌaidꞌebema, ¿marãbara ledꞌakꞌa kĩrãkꞌa bꞌeta Daizezebara mawũãsi ẽka?:

³² ¿Mʉrã Abraham Zhibaria, Isaac Zhibaria, Jacobo Zhibaria asi ẽka? Aramaʉ̃nerã Daizezera beukuadꞌa Zhibari ẽã, awuarabʉrʉ zokꞌai bꞌe Zhibaria.

³³ Maʉ̃ta ũrĩnape zhãrãbara bia akʉdruasidꞌa mawũã miã ũrãgꞌa bꞌʉdꞌeba.

Zhi zromata bꞌʉa aribꞌaedꞌai bꞌʉta

³⁴ Fariseorãbara ũrĩsidꞌa mawũã chupeabigabʉrʉta saduceorãta, mawũẽ zhi jʉresidꞌa.

³⁵ Mobe ãzhidꞌebema abꞌa ũrãgꞌa Moisédꞌe jarabariba wãẽãbii kꞌarea widꞌi mawũãsia:

³⁶ Miã Ũrãgꞌabari, ¿Daizezeba jara bꞌʉta aribꞌaedꞌai bꞌʉra sãʉ̃ta zhi zromape ũrãgꞌadꞌera?

³⁷ Mawũãĩ Jesúsbara jara mawũãsia: Nokꞌo Daizezera soidꞌu kʉãgꞌarua, bʉzhi jawureidꞌuba, bʉzhi krĩchaidꞌuba.

³⁸ Maʉ̃ta zhi zroma Daizezeba aribꞌaemarẽã jara bꞌʉra.

³⁹ Zhi ũmeta aramaʉ̃ kĩrãkꞌa bꞌʉta mawũã bꞌʉa: Zhãrã kʉãgꞌarua bʉzhi kĩrãkꞌa.

⁴⁰ Maʉ̃ ũmeta aribꞌae nʉmʉba jõma aribꞌae nʉmaña Daizezeba ũrãgꞌa Moiséa diadꞌata, Daizezeba bedꞌeata jarabibarirãba bꞌʉdꞌapeadꞌata.

¿Kꞌaidꞌeba uru zhãrã Ẽdrʉbiira?

⁴¹ Fariseorã ãba nʉmʉne Jesúsbara widꞌibʉrʉta,

⁴² mawũãsia: ¿Marã sãwũã krĩcha bꞌe zhãrã Ẽdrʉbii ʉ̃rʉ̃rã? ¿Kꞌaidꞌeba zeipe? Mawũãĩ mawũãsidꞌa: Rey Davidꞌeba zeya.

⁴³ Mawũãnaĩ Jesúsbara mawũãsia: ¿Bari kꞌãwũta Davidbara Jawurebiadꞌeba izhi Nokꞌoa abʉrʉta mawũãsika?:

⁴⁴ Daizezebara mʉ Nokꞌoa mawũãsia: Mʉ juwua araare jewedꞌarua, bʉ jura bꞌeta jõma mʉã bʉ jẽrũ edre bꞌʉyeedꞌa. (Salmos 110:1)

⁴⁵ Davidba mawũã izhi Nokꞌoa adꞌara, ¿sãwũã bari kꞌãwũta izhidꞌeba uruta bꞌaipe?

⁴⁶ Aramaʉ̃ne miõba panaʉ̃ bꞌedꞌa ẽbasia izhi bedꞌeara. Miõba kꞌãrẽ widꞌi ẽbasia maʉ̃ ewadeba ʉ̃taara.