Mateo 21 - Porciones del Nuevo Testamento

Jesús edꞌa wãna Jerusalénne

¹ Jerusalén kꞌaita babʉdadꞌe, Betfagé pʉwʉrʉedꞌa zebʉdata Olivo kꞌatumaẽna zebʉdadꞌera Jesúsbara izha jʉrʉkuadꞌata ũme zokꞌabʉrʉta,

² mawũãsia: Pʉwʉrʉ zakeidꞌu wãũdua jari mazhi kĩrãbita tabꞌʉidꞌu. Marãbara ũdudꞌaya burra jʉ̃ nʉmʉta, burro kũrãsidꞌa izhi ũme ũdudꞌaya, burra ẽnape ũmewedꞌa mʉma weudua.

³ Iabꞌaʉba widꞌira mawũãũdua: Nokꞌoba nesidꞌakuabʉrʉa, nane diabꞌarikuaya.

⁴ Aramaʉ̃ne arimaẽ berabꞌarisia Daizezeba bedꞌeata jarabibariba mawũãnata:

⁵ Jerusalénne bꞌea mawũãũdua: Marã Reyra marãma urua, Ibiadꞌe bꞌʉta burrodꞌe ʉ̃rʉ̃ jewedꞌa urua, burro kũrãne ʉ̃rʉ̃ urua nendʉwʉrʉ ne zʉgʉa ataubari waudꞌe. (Zacarías 9:9)

⁶ Izha jʉrʉkuadꞌara wãnape osidꞌa Jesúsba jaradꞌa kĩrãkꞌa.

⁷ Mawũẽ wesidꞌa burrata burro kũrãta, mobe ʉ̃rʉ̃ bꞌʉsidꞌa ãzhidꞌe wua ãnebꞌari panʉta, mobebʉrʉ Jesús jewedꞌasia ʉ̃rʉ̃.

⁸ Kꞌabanabara bia edabʉdata ãzhidꞌe wua ãnebꞌari bꞌeta odꞌe ewarazoasidꞌa. Waya dewaraurãbara pãrãrã kiduata tʉdꞌape odꞌe tadꞌazoasidꞌa.

⁹ Zhãrãbara na wãba tẽã uruba nemi jĩgua mawũãsidꞌa: ¡Bʉra ibia jaradꞌaya rey Davidꞌeba urura! ¡Ibia jaradꞌaya Daizezedꞌeba zebʉrʉra! ¡Daizezera ibia jaraudua ʉ̃trera! (Salmos 118:25-26)

¹⁰ Aramaʉ̃ne Jesús Jerusalénne edꞌa wãbʉrʉdꞌera pʉwʉrʉdꞌebema jõma bꞌʉgadrʉ mawũãsidꞌa: ¿Naʉ̃ kꞌaipe?

¹¹ Maʉ̃nerã zhãrãbara mawũãsidꞌa: Naʉ̃ Jesústa Daizezeba bedꞌeata jarabibaria, Nazaret pʉwʉrʉdꞌebema, Galilea druadꞌebema.

Jesúsba miti ẽã odꞌa Daizeze deta

¹² Jesús edꞌa wãsia Daizeze dedꞌa ewara maẽ, mobe jõma ãĩ jʉrekuasia mama ne nendo bꞌeta, ne eda bꞌeta, mesara burekuasia plata kꞌãbiabadadꞌera, buguera burekuasia pusirã nendobadadꞌera.

¹³ Mobe mawũãsia: Naʉ̃ẽnabemata zhi bꞌʉmata mawũã bꞌʉa: Mʉ dera zhiwidꞌibadata nʉmʉã adꞌaya. Mawũã bꞌʉdꞌera marãbara nezrʉgamiãrã de babi nʉmʉkꞌãrĩna.

¹⁴ Daizeze dedꞌa ewara maẽ Jesús orrasidꞌa daʉbꞌerrea bꞌeba, wã bꞌe ẽã bꞌeba, mawũẽ bꞌebikuasia.

¹⁵ Sacerdoterã nokꞌorãba, ũrãgꞌa Moisédꞌe jarabadaba mawũã biata obꞌʉta ũdubʉdadꞌera warrarãbara Daizeze dedꞌa ewara maẽ nemi jĩgua mawũãsidꞌa: ¡Ibia jaradꞌaya rey Davidꞌeba urura! Mawũãnaĩ kĩrũbʉdaba,

¹⁶ mawũãsidꞌa: ¿Bʉara ũrĩ kꞌobꞌʉka naʉ̃rãba jara kꞌopanʉrã? Mawũãnaĩ Jesúsbara mawũãsia: Ããjã, ¿maʉ̃ẽnabemata marãbara ledꞌakꞌa kĩrãkꞌa bꞌeta mawũã bꞌʉ ẽka: Warrarã kedꞌea, ju do kedꞌea bʉzhita ibia jarabigaya abꞌʉ ẽka? (Salmos 8:2)

¹⁷ Mawũãpe ãmaẽkuabʉrʉta Jerusalénnebara ãĩ wãsia Betania pʉwʉrʉedꞌa, mobe mama ʉ̃nadrʉsia.

Ikꞌazhirua jaradꞌa higuera zhi ta ne ẽãta

¹⁸ Diapedꞌa wakusa Jerusalén pʉwʉrʉedꞌa zebʉrʉdꞌera jarrasia Jesús.

¹⁹ Maʉ̃ne bakuru higuera o kꞌaita nʉmʉta ũdui maĩnu wãbʉrʉdꞌera maʉ̃nerã kꞌãrẽ ũdu ẽbasia, awuarabʉrʉ ũdusia zhi kiduatrʉ, mawũẽ mawũãsia: Bʉra wueta zau ẽbaya. Audre ẽãne higuera bagusia.

²⁰ Izha jʉrʉkuadꞌaba maʉ̃ta ũdudꞌai bia akʉdrua mawũãsidꞌa: ¿Sãwũã kꞌãwũã aramaʉ̃ta bagu dogꞌo bakuru higuera?

²¹ Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãta soidꞌu bꞌebʉrʉ, marãma kꞌãrẽta bꞌe ẽãne duanu ẽbʉrʉ bari kꞌãwũã bakuru higuera kĩrãkꞌa odꞌa ẽã, awuarabʉrʉ kꞌatuma za nʉmʉã jarabʉdata: Ãĩ wãrũã, pusadꞌe doidꞌu wãrũã abʉdadꞌera aribꞌae nʉmaẽdaya.

²² Jõma marãba widꞌibʉdara zhiwidꞌi soidꞌu kꞌobꞌebʉrʉ jidadꞌaya.

Zareata Jesúsdꞌe

²³ Daizeze dedꞌa ewara maẽ Jesús zebʉrʉdꞌera, sacerdoterã nokꞌorãbara, pʉwʉrʉ nokꞌorãbara izhira orrasidꞌa miã ũrãgꞌa nʉmʉne, mobe mawũãsidꞌa: ¿Kꞌaiba obi bꞌʉ bʉa obꞌʉra? ¿Kꞌaiba diasi kꞌãwũã zarea nʉmaĩrã?

²⁴ Mawũãnaĩ Jesúsbara panaʉ̃ mawũãsia: Mʉãbidꞌa marãã widꞌiya, marãba panaʉ̃narã mʉãbidꞌa marãã jaraya kꞌaiba obi bꞌʉta mʉã obꞌʉra.

²⁵ Zhãrã buru kꞌoemarẽã Juan, ¿kꞌaiba zokꞌasi? ¿Ʉ̃trebemaba o zhãrãba? Mawũãĩ ãzhirãĩnu mawũãsidꞌa: Dazhirãba Ʉ̃trebemaba zokꞌasia adꞌara, ¿mobera kꞌãrẽã ĩjãna ẽbasi aya?

²⁶ Dazhirãba zhãrãba zokꞌasia adꞌaisidꞌa, dazhirãbara zhãrãta wawia bꞌea jõmaʉ̃ma Juan Daizezeba bedꞌeata jarabibarita bꞌʉ baera.

²⁷ Mobebʉrʉ panaʉ̃bʉdata Jesúa mawũãsidꞌa: Daibara kꞌawuadꞌa ẽã. Mawũãnaĩ izhara mawũãsia: Mʉãbidꞌa marãã jara ẽã kꞌaiba obi bꞌʉra mʉã obꞌʉra.

Ne jaradꞌa warra ũmeneba

²⁸ ¿Mawũãmina marãma sãwũãpe? Ũmakĩrãba erubꞌasia warrarãta ũme, mawũẽ zhi nabemata orrape mawũãsia: Warra, idꞌira trajadꞌe wãrũã mʉ uvadꞌe.

²⁹ Mawũãĩ izhara panaʉ̃ mawũãsia: Mʉrã wã krĩña ẽã. Mawũãnata tẽã wãĩta krĩchape wãsia.

³⁰ Zhi zezebara dewarabemata orrape abꞌarika jarasia. Mawũẽ maʉ̃bara mawũãsia: Ãjã nokꞌó, mʉrã wãña. Mawũãpe wã ẽbasia.

³¹ ¿Ũmebara sãʉ̃ba osi zhi zezeba krĩñarã? Mawũãĩ ãzhara mawũãsidꞌa: Osia nabemaba. Mawũãnaĩ Jesúsbara mawũãsia: Mʉã wãrĩnu marãã jaraya, rey Romanebemaĩta plata widꞌibadata, wũẽrãrã jõmaʉ̃ne bꞌeta marã kꞌãñabara wãnaña Daizezeta Nokꞌota bꞌʉma.

³² Maʉ̃ẽnabema Juan marãma zesia sãwũã bꞌeaidꞌebemata jaradꞌe, maʉ̃ marãbara ĩjãna ẽbasia. Mawũãmina rey Romanebemaĩta plata widꞌibadabara, wũẽrãrã jõmaʉ̃neta bꞌebara ĩjãsidꞌa. Mawũãmina marãbara maʉ̃ ũdusidꞌaidꞌu kꞌazhiruara ãmape Daizezeta pẽwãna ẽbasia izhidꞌebemata ĩjãnaĩta.

Uvadꞌe trajabadata bia ẽãta bꞌeadꞌa

³³ Ũrĩũdua, mʉã dewara ne jarakꞌaya: Ũmakĩrãta bꞌasia drua zhibarita, maʉ̃bara uvata upe serrape osia uva bꞌata piabarita. Mobe uva akʉita pãrãsia deta ʉ̃tʉ drasoa, mobe uvadꞌe trajabadaa arrendape wãsia wawara.

³⁴ Uva bꞌʉabada ewade nezokꞌarã izhidꞌeta zokꞌasia uvadꞌe trajabadama, jidadꞌamarẽã uva izhaa diabʉdata.

³⁵ Mawũãmina uvadꞌe trajabadabara nezokꞌarã jirtoposia, mobe ʉ̃kʉrʉ jirachi jidasidꞌa, ʉ̃kʉrʉ beasidꞌa, ʉ̃kʉrʉ mongꞌaraba tabꞌarisidꞌa.

³⁶ Wakusa nezokꞌarã dewaraurãta audre zokꞌasia nabemarã kꞌãñabara, maʉ̃rã abꞌarika osidꞌa.

³⁷ Mobebʉrʉ zhi warrata ãzhima zokꞌabʉrʉta mawũãsia: Wawiadꞌaya mʉ warrara.

³⁸ Mawũãmina uvadꞌe trajabadabara zhi warrata ũdudꞌai ãzhirãĩnu mawũãsidꞌa: Ne zhi zezedꞌera naʉ̃ba jidaya, mawũẽ beadꞌaya, aramaʉ̃ne dazhirãba jidadꞌaya izha jidaita bꞌʉra.

³⁹ Aramaʉ̃ne jirtopota uvadꞌebara ãĩ jʉretadꞌape beasidꞌa.

⁴⁰ Aramaʉ̃nerã uva zhibarita zebʉrʉdꞌera ¿uvadꞌe trajabadara marãma sãwũã oipe?

⁴¹ Mawũãĩ mawũãsidꞌa: Bia ẽãta bꞌera sozuburia ẽã makenaña, mobe uva izhidꞌera awʉrʉrã uvadꞌe trajabadaa arrendaya. Aramaʉ̃ne izhaa diadꞌaira diadꞌamarẽã uva bꞌʉabada ewade.

⁴² Mawũãnaĩ Jesúsbara mawũãsia: ¿Marãbara ledꞌakꞌa kĩrãkꞌa duanu ẽka aramaʉ̃ kĩrãkꞌa mʉ seribidꞌa ẽãnebemata zhi bꞌʉmarã?: ¿Jara bꞌʉ ẽka de obadaba mongꞌara seri ẽãne bꞌʉdꞌapeadꞌara wagꞌauta bꞌesita. Daizezeba mawũã osi baera dazhirãma ne bia abꞌʉ ẽka? (Salmos 118:22-23)

⁴³ Maʉ̃neba mʉã marãã jaraya, marã Daizezebara izhita Nokꞌodꞌebemane duanabi ẽã, awuarabʉrʉ maʉ̃ne bꞌeabiya izha jara bꞌʉta obꞌeta.

⁴⁴ Iabꞌa maʉ̃ mongꞌara ʉ̃rʉ̃ bꞌaera bꞌʉgꞌʉzoaya, maʉ̃ mongꞌarata iabꞌaʉ ʉ̃rʉ̃ bꞌaera naʉ̃sãña.

⁴⁵ Maʉ̃ jarabʉrʉta ũrĩnaĩ sacerdoterã nokꞌorãbara fariseorãbara kꞌawuasidꞌa ãzhita jarabʉrʉta.

⁴⁶ Mawũẽ sãwũã jidadꞌaita krĩcha jʉrʉsidꞌamina, zhãrãta wawiasidꞌa zhãrãma Jesús Daizezeba bedꞌeata jarabibarita bꞌʉ baera.