Mateo 19 - Porciones del Nuevo Testamento

Jesúsba jaradꞌa kĩma ãmaĩrã kꞌazhiruata

¹ Jesúsbara maʉ̃ bedꞌeata ma jarape Galileadꞌebara wãbʉrʉta Judea druaedꞌa wãsia do Jordán kĩrãrẽ.

² Maʉ̃ne kꞌabanata wãsidꞌa kꞌaidꞌu, mawũẽ mama bꞌebikuasia zhi kꞌaya bꞌeta.

³ Maʉ̃ne izhima fariseorãta zedꞌape wãẽãbidꞌai kꞌarea mawũãsidꞌa: ¿Idaribi panʉka zhũmakĩrãba izhi wũẽrã ãmaĩrã newẽã kꞌarea?

⁴ Mawũãnaĩ Jesúsbara panaʉ̃ mawũãsia: ¿Marãbara ledꞌakꞌa kĩrãkꞌa bꞌeta jẽdeubara zhi odꞌabara zhũmakĩrãta wũẽrãta osi ẽka?

⁵ Maʉ̃ba Daizezebara mawũãsia: Zhũmakĩrãbara ãmaẽ bꞌaya zezera, papara, aramaʉ̃ne izhi wũẽrã ũme pane bꞌaya, mawũẽ ũmeta kꞌakua abꞌa pane bꞌaya.

⁶ Mawũẽ ya ũme ẽã, awuarabʉrʉ kꞌakua abꞌabaia. Aramaʉ̃ne Daizezeba ãba bꞌʉdꞌara zhi ãmabiidꞌe bꞌʉ ẽã zhãrãbara.

⁷ Mawũãĩ mawũãsidꞌa: ¿Mobera kꞌãrẽã Moisébara jarasi ãmaĩnebemata wũẽrãã kꞌarta diamarẽã aramaʉ̃ne ãmaĩta?

⁸ Mawũãnaĩ Jesúsbara mawũãsia: Aribꞌaedꞌa ẽbaita marã sora zare baera Moisébara idaribisia mazhi wũẽrã ãmaĩrã. Mawũãmina jẽdeubara Daizezebara mawũã nʉmʉ ẽbasia.

⁹ Mawũẽ mʉã marãã jaraya, bariduba izhi wũẽrã ãmabʉrʉta wũẽrãba awʉrʉ erukꞌãĩ ẽãne ãmape awʉrʉta kꞌãĩbʉrʉra kꞌazhiruata oya. Wũẽrã ãmanapeadꞌata kꞌãĩbʉrʉsidꞌa kꞌazhiruata oya.

¹⁰ Mawũãĩ izha jʉrʉkuadꞌabara mawũãsidꞌa: Zhũmakĩrãba izhi wũẽrã ãmabʉrʉdꞌe mawũãbʉrʉ audre biga miã kꞌãĩ ẽbaita.

¹¹ Mawũãnaĩ Jesúsbara mawũãsia: Mawũã kĩma ne ẽã bꞌaira jõmaʉ̃ne ẽã, awuarabʉrʉ Daizezeba dobꞌa bꞌaidꞌe bꞌʉkꞌãrĩtrʉ mawũã bꞌea.

¹² Ʉ̃kʉrʉra kĩma ne ẽã bꞌaita to bꞌʉa, ʉ̃kʉrʉra kꞌapabʉdaba kĩma ne ẽã bꞌea, ʉ̃kʉrʉra kĩma ne ẽã bꞌea Daizezeta Nokꞌoba jara bꞌʉta aribꞌae nʉmaĩta. Dobꞌa bꞌa bꞌeita bꞌʉra dobꞌa bꞌadua.

Jesúsba ibia jaradꞌa wũãwũãrãta

¹³ Wũãwũãrãta ʉ̃kʉrʉ Jesúsma wesidꞌa ãzhi ʉ̃rʉ̃ juwua bꞌʉkua zhiwidꞌimarẽã. Mawũãmina izha jʉrʉkuadꞌabara zhi webʉdata kẽãsidꞌa.

¹⁴ Mawũẽ Jesúsbara mawũãsia: Wũãwũãrã mʉma idu zebiudua, bueamarãũdua, naʉ̃rãne kĩrãkꞌa izhi krĩcha bꞌetrʉ Daizezeta Nokꞌodꞌebema.

¹⁵ Mawũãpe wũãwũãrã juwua ʉ̃rʉ̃ bꞌʉkua zhiwidꞌipe wãsia mamaʉ̃bara.

Kũrãta bara bꞌadꞌa

¹⁶ Kũrãta Jesúsma zepe mawũãsia: Miã Ũrãgꞌabari, bʉra biata bꞌʉa, ¿mʉãrã kꞌãrẽ biata oi barape Daizeze ũme bꞌai jõ ẽãta erubꞌaira?

¹⁷ Mawũãĩ Jesúsbara mawũãsia: ¿Bʉara mʉrã kꞌãrẽã biata jarabʉrʉ? Miõta biata bꞌʉ ẽã, awuarabʉrʉ biara abꞌabai bꞌʉa Daizezeta. Mawũãmina Daizeze ũme bꞌai jõ ẽã maẽ edꞌa wã krĩña bꞌʉbʉrʉ aribꞌaedua Daizezeba jara bꞌʉta.

¹⁸ Mawũãĩ kũrãbara mawũãsia: ¿Sãʉ̃ta aribꞌaeipe? Mawũãĩ Jesúsbara jara mawũãsia: Miã bearãrũã. Kĩma ẽãta erukꞌãĩrãrũã. Nezrʉgarãrũã. Zhãrã ʉ̃rʉ̃ sewa nebʉrʉrãrũã.

¹⁹ Wawiarua bʉ zezera bʉ papara. Zhãrã kʉãgꞌarua bʉzhi kĩrãkꞌa.

²⁰ Mawũãĩ kũrãbara mawũãsia: Mʉãrã maʉ̃ jõma aribꞌae bꞌʉa kũrã wedꞌauba, ¿mawũẽ kꞌãrẽta ãmaña wãẽã bꞌʉ?

²¹ Mawũãĩ Jesúsbara mawũãsia: Bʉta bia nʉma krĩña bꞌʉbʉrʉ wãpe bʉzha ne erubꞌʉta nendope platara zuburia bꞌea diadua, mawũãrã ne biata erubꞌaya ʉ̃tre. Aramaʉ̃ne zepe mʉta pẽwãdua.

²² Kũrãbara maʉ̃ bedꞌeata ũrĩpe sopua wãsia kꞌãbãẽã bara bꞌʉ baera.

²³ Mawũẽ izha jʉrʉkuadꞌaa Jesúsbara mawũãsia: Mʉã wãrĩnu marãã jaraya, bara bꞌʉra borekea edꞌa wã ẽã Daizezeta Nokꞌodꞌebemanerã.

²⁴ Mʉã wakusa marãã jaraya, aguja uriadꞌe camellota audre bia berabꞌari bꞌeya bara bꞌʉta edꞌa wãĩ kꞌãñabara Daizezeta Nokꞌodꞌebemane.

²⁵ Izha jʉrʉkuadꞌabara maʉ̃ta ũrĩnape kꞌawua ẽã krĩcha mawũãsidꞌa: ¿Bara bꞌʉsidꞌa mawũãbʉrʉ kꞌaita ẽdrʉipe?

²⁶ Mawũãnaĩ Jesúsbara ãzhi akʉ mawũãsia: Ẽdrʉira zhãrãĩtara boreke ẽã, mawũãmina ẽdrʉbi bꞌeidꞌeba Daizezeitara ne jõma borekea.

²⁷ Mawũãĩ Pedroba mawũãsia: Daibara ne jõma ãmaẽsidꞌa, mobe bʉta pẽwã bꞌea. ¿Mawũẽ daibara kꞌãrẽta jidadꞌaipe?

²⁸ Mawũãĩ Jesúsbara mawũãsia: Mʉã wãrĩnu marãã jaraya, ne jõma zhiwidꞌita nʉmebʉrʉdꞌera, mʉ Beubari Bape bꞌadꞌara Reyta jewedꞌaya mʉzhi bugueta kĩrãwãrẽãne, marã mʉ pẽwã bꞌesidꞌa nokꞌorãta jewedꞌa duaneña bugue docedꞌe. Aramaʉ̃ne kꞌawua oduaneña Israel warrarã docedꞌebemata.

²⁹ Bariduba deta ãmaẽrã, zhi mebẽrã zhũmakĩrãrãta, nawekꞌaurãta ãmaẽrã, zezeta, papata, wũẽrãta, warrarãta, druata, mʉ kꞌarea ãmaẽrã, jidama cien jidaya ãmaña. Mobe Daizeze ũme bꞌai jõ ẽãta jidaya.

³⁰ Mawũãmina bio zhi zromata bꞌera zhi zroma ẽãta duaneña, waya zhi zroma ẽãta bꞌeta zhi zromata duaneña.