Mateo 17 - Porciones del Nuevo Testamento

Jesús awuaradꞌa

¹ Maʉ̃ tẽã ewari seis babʉrʉdꞌera, Jesúsbara edesia Pedrota, Jacobota, Juan Jacobo mebeata, maʉ̃rãta awuara jʉre edesia kꞌatuma ʉ̃tʉ nʉmʉĩnu.

² Mama awuarasia ãzhi kĩrãbita, izhi kĩrã ʉ̃nasia ʉ̃madau kĩrãkꞌa, izhi wuara totroa ʉ̃nasia ʉ̃na kĩrãkꞌa.

³ Maʉ̃nerã Moiséta Elíata zhi ũdubisidꞌa, bedꞌea kꞌopanasia Jesús bawara.

⁴ Mawũẽ Pedrobara Jesúa mawũãsia: Nokꞌó, biga dazhirã nama kꞌobꞌera, bʉa krĩñabʉrʉ nama de kꞌãĩdeta ũbea odꞌaya abꞌa bʉita, abꞌa Moiséita, abꞌa Elíaita.

⁵ Mawũã bedꞌea kꞌobꞌʉdꞌe ãzhira ãnabꞌarisia jãrãrã ʉ̃naba, maʉ̃ne Daizezeta jãrãrãneba bedꞌeabʉrʉta mawũãsia: Naʉ̃ mʉ warra mʉãrã kʉãgꞌa, mʉrã izhi kꞌarea sobia bꞌʉa, izhi bedꞌeara ũrĩũdua.

⁶ Izha jʉrʉkuadꞌaba maʉ̃ta ũrĩnaĩ tadꞌazoasia egoroma kĩrã bꞌarru, aramaʉ̃ne kꞌãbãẽã perasidꞌa.

⁷ Mawũẽ Jesúsbara orrape ãzhi tõbꞌaripe mawũãsia: Pirabꞌariudua, perarãũdua.

⁸ Mawũãĩ ãzha akʉbʉdadꞌera miõ ũdudꞌa ẽbasia, awuarabʉrʉ ũdusidꞌa Jesústa abꞌabai.

⁹ Kꞌatumaneba yedꞌa ãzhi urudꞌe Jesúsbara mawũãsia: Marãba ũdubʉdara miõã jararãũdua, mʉ Beubari Bape bꞌʉta beudꞌata piradrʉyeedꞌa.

¹⁰ Mawũãĩ izha jʉrʉkuadꞌabara widꞌi mawũãsidꞌa: ¿Ũrãgꞌa Moisédꞌe jarabadabara kꞌãrẽã jarabada zhãrã Ẽdrʉbiita zei nawedꞌa Elíata naara zeita?

¹¹ Mawũãnaĩ Jesúsbara panaʉ̃ mawũãsia: Wãrĩnu Elíara naara zeya, mobe ne jõma araa oya.

¹² Mawũãmina mʉã marãã jaraya, Elíara ya zesia, maʉ̃ta ũdukꞌawadꞌa ẽbasia, awuarabʉrʉ izhira zuburia osidꞌa. Mʉ Beubari Bape bꞌʉra mʉsidꞌa abꞌarika ãzha zuburia odꞌaya.

¹³ Mobebʉrʉ izha jʉrʉkuadꞌabara kꞌawuasidꞌa Elíadꞌebemata jarakꞌabʉrʉra jarabʉrʉta Juan Burukꞌoemiãta.

Jesúsba bꞌebidꞌa kũrã wawa bꞌʉta

¹⁴ Kꞌatumaneba kꞌabanama zebʉdadꞌera ũmakĩrãta Jesúsma zepe izhi kĩrãbita sãkꞌokꞌodꞌe kꞌobꞌepe mawũãsia:

¹⁵ Nokꞌó, sozuburiarua mʉ warrata, wawa bꞌʉa, mawũẽ biodꞌe zuburia bꞌʉa, bꞌaema bio bꞌae bꞌʉa tebʉdꞌe, bꞌaema bio bꞌae bꞌʉa doedꞌa.

¹⁶ Mʉãrã wesia bʉa jʉrʉkuadꞌama, mawũãmina bꞌebi bꞌedꞌa ẽã.

¹⁷ Mawũãĩ Jesúsbara panaʉ̃ mawũãsia: ¡Marã soidꞌu duanu ẽãta bia ẽãta bꞌea! ¿Mʉrã sõmbeedꞌa marã bawara bꞌaipe? ¿Mʉãrã sõmbeedꞌa zrogꞌa nʉmaĩpe? Weudua naĩnu.

¹⁸ Mobebʉrʉ Jesúsbara jaira kẽãsia, mawũẽ jaira ẽdrʉsia kũrãnebara, izhira aramaʉ̃ta bꞌesia.

¹⁹ Mawũẽ izha jʉrʉkuadꞌabara Jesús orradꞌape dobꞌaʉa widꞌi mawũãsidꞌa: ¿Daibara kꞌãrẽneba ãĩ jʉreta bꞌedꞌa ẽbasi?

²⁰ Mawũãnaĩ Jesúsbara mawũãsia: Bꞌedꞌa ẽbasia marã soidꞌu kꞌobꞌaita wãẽã bꞌeba. Mʉã wãrĩnu marãã jaraya, mostaza ta wĩka kĩrãkꞌa marãta wĩkabidꞌa soidꞌu bꞌebʉrʉ kꞌatuma za nʉmʉã mawũã bꞌedꞌaya: Namaʉ̃bara zawa kꞌobꞌadꞌe wãrũã, mawũãnaĩ kꞌobꞌadꞌe wãña. Aramaʉ̃ne marãĩtara kꞌãrẽ obꞌe ẽãrã ne ẽbaya.

²¹ Mawũãmina jai kꞌãwũã bꞌʉra arakꞌãwũãrã ãĩ wã ẽã, awuarabʉrʉ ãĩ wã bꞌʉa nekꞌo ẽã zhiwidꞌi.

Wakusa Jesúsba jaradꞌa izhi beadꞌaita

²² Izha jʉrʉkuadꞌa bawara Galileadꞌe bꞌedꞌe Jesúsbara mawũãsia: Mʉ Beubari Bape bꞌʉra zhãrã juwuadꞌe chãbꞌaridꞌaya.

²³ Maʉ̃nerã beadꞌaya, mawũãmina ewari ũbeadꞌe beudꞌata piradrʉya. Mawũãĩ ãzhira sopuasidꞌa kꞌãbãẽã.

Impuesto diadꞌa Daizeze deita

²⁴ Capernaúm pʉwʉrʉedꞌa zebʉdadꞌera, impuesto Daizeze deita widꞌibadata Pedroma zedꞌape mawũãsidꞌa: ¿Miã Ũrãgꞌabarita marãnebara impuesto pagꞌa bꞌʉka?

²⁵ Mawũãnaĩ Pedrobara mawũãsia: Pagꞌabaria. Mawũãpe izhi deidꞌu wãbʉrʉdꞌera Jesús naara bedꞌeabʉrʉta mawũãsia: ¿Simón, bʉma sãwũãpe? ¿Reyrãta druadꞌe bꞌebara impuesto kꞌairãneta widꞌibada, ãzha jʉre bꞌea widꞌibadakꞌa o ãĩbemaneta widꞌibada?

²⁶ Mawũãĩ Pedrobara panaʉ̃ mawũãsia: Widꞌibada ãĩbemaneta. Mawũãĩ Jesúsbara mawũãsia: Aramaʉ̃nerã ãzha jʉre bꞌebara pagꞌadꞌa ẽã.

²⁷ Mawũãmina bĩ ẽã duana ẽbamarẽã wãrũã do jedꞌea õbꞌʉidꞌu, mobe bꞌeda gadua, bʉa bꞌeda naara jiraedabʉrʉta itoebꞌaribʉrʉdꞌe yedꞌa ũduya platata, maʉ̃ta jiraedape maʉ̃ba pagꞌadua impuesto mʉrẽta bʉreta.