Mateo 14 - Porciones del Nuevo Testamento

Juan Burukꞌoemiã beabidꞌadꞌebema

¹ Maʉ̃ ewadera Herode Galileadꞌe reyta bꞌʉdꞌe ũrĩsia Jesús trʉ̃poa nʉmʉta.

² Mawũẽ izha zokꞌa jʉre bꞌʉa mawũãsia: Maʉ̃ mʉma Juan Burukꞌoemiãta beudꞌata piradrʉbʉrʉa, maʉ̃neba mawũã ũdudꞌakꞌata okuaita zarea nʉmʉã.

³ Mawũã jarasia Herodebara Juan jidabipe cadenaba jʉ̃bipe cárceldꞌe buebidꞌaba, mawũã osia Herodía kꞌarea, maʉ̃ zhi mebea Felipe kĩma basia.

⁴ Mawũẽ Juanbara mawũã bazhia: Kꞌãʉ̃ bʉara kĩmata erubꞌaira biga ẽã.

⁵ Herodebara bea krĩña bꞌasimina wawia bꞌasia zhãrã bꞌeta, zhãrãma Juan bꞌasi baera Daizezeba bedꞌeata jarabibarita.

⁶ Mawũãmina Herode año cumpli nʉmʉ fiestadꞌe Herodía kꞌauta miõ ẽsadra bairabʉrʉta Herodema biga basia.

⁷ Mawũẽ Herodebara wãrĩnu diaita jarasia jõma izha widꞌibʉrʉta.

⁸ Mawũẽ zhi papaba jaradꞌadꞌe widꞌi mawũãsia: Epedꞌekꞌodꞌe mʉãã diadua Juan Burukꞌoemiã buruta.

⁹ Mawũãĩ rey Herode sopuasia, mawũãmina izhi bawara nekꞌo kꞌobꞌe kĩrãbita kꞌãrẽ wãrĩnu diaita jaradꞌa baera jarasia diadꞌamarẽã.

¹⁰ Mobe otatubisia Juan cárceldꞌe.

¹¹ Aramaʉ̃ne zhi burura epedꞌekꞌodꞌe wedꞌape diasidꞌa Herodía kꞌaua, mawũẽ izhara diasia zhi papaa.

¹² Juanba jʉrʉkuadꞌara zedꞌape zhi kꞌakua jirabꞌaridꞌape jousidꞌa, mobe wãnape jarasidꞌa Jesúa.

Nekꞌobigadꞌa cinco mil

¹³ Jesúsbara maʉ̃ta ũrĩpe mamaʉ̃bara dobꞌa jãbadꞌe wãsia miõ ne ẽãĩnu, zhãrãbara maʉ̃ta kꞌawuadꞌape kꞌaidꞌu jẽde wãsidꞌa pʉwʉrʉ tabꞌe maẽba.

¹⁴ Jesús jãbadꞌeba udꞌubꞌaebʉrʉdꞌe kꞌabanata ũdui ãzhi sozuburiape bꞌebikuasia ãzhidꞌebema kꞌaya bꞌeta.

¹⁵ Keudꞌe izha jʉrʉkuadꞌabara orradꞌape mawũãsidꞌa: Miõ ne ẽã maẽ bꞌedꞌe ewari ya keua, mawũẽ kꞌabanata kꞌobꞌera wãbigarua wãnamarẽã pʉwʉrʉ zake tabꞌema, aramaʉ̃ne edadꞌamarẽã kꞌãrẽ kꞌoita.

¹⁶ Mawũãnaĩ Jesúsbara mawũãsia: Wãnaĩrã nesidꞌa ẽã, marãba nekꞌobigaudua.

¹⁷ Mawũãĩ ãzhara mawũãsidꞌa: Daibara nama erubꞌea pan juesoma bꞌeda ũme.

¹⁸ Mawũãnaĩ izhara mawũãsia: Mʉma weudua naĩnu.

¹⁹ Mobebʉrʉ poajãrã ʉ̃rʉ̃ zhãrã jewedꞌabigape pan juesomata bꞌeda ũmeta jiraedape ʉ̃taa akʉ zhiwidꞌipe pan bꞌʉekuape diasia izha jʉrʉkuadꞌaa, mawũẽ izha jʉrʉkuadꞌabara jedꞌekasidꞌa kꞌabanata kꞌobꞌea.

²⁰ Jõma jãwũã nekꞌosidꞌa, adꞌubadꞌapeadꞌata zhi bꞌʉgʉzoamata jʉrepesidꞌa jamara doce bira.

²¹ Zhi nekꞌodꞌapeadꞌara zhũmakĩrãrãta nʉmasia cinco mil, wũẽrãrãta warrarãta juacha ẽã.

Jesús tebadꞌa do ʉ̃rʉ̃

²² Mobebʉrʉ Jesúsbara izha jʉrʉkuadꞌara jãbadꞌe bꞌaribigape izhi naa kĩrãrã wãbigasia, maʉ̃ẽna izhira wãta jara tebasia kꞌabanata kꞌobꞌea.

²³ Kꞌabanata kꞌobꞌea mawũã wãta jara tebape kꞌatumaĩnu wãrĩzesia dobꞌa zhiwidꞌiita, diamase nʉmebʉrʉdꞌera mama bꞌasia dobꞌa.

²⁴ Maʉ̃ẽna jãbara do jedꞌea õbꞌʉ ẽsadra babʉrʉta jamawe erunʉmasia do bomatʉba, mawũã erunʉmasia pʉ̃ãdrʉta ãzhi wãma nʉmʉ ẽãba.

²⁵ Maʉ̃ne ʉ̃nadrʉ bodꞌodꞌe Jesús ãzhima zesia do ʉ̃rʉ̃ taidꞌe.

²⁶ Mawũã do ʉ̃rʉ̃ taita izha jʉrʉkuadꞌaba ũdubʉdadꞌera pera mawũãsidꞌa: ¡Beuwãrãta taia! Mawũãnape bꞌiasidꞌa peraba.

²⁷ Aramaʉ̃ta Jesúsbara mawũãsia: ¡Wãniguaudua, mʉta taia, perarãũdua!

²⁸ Mawũãĩ Pedroba panaʉ̃ mawũãsia: Nokꞌó, bʉta taibʉrʉ mʉta bʉma wãbirua do ʉ̃rʉ̃.

²⁹ Mawũãĩ Jesúsbara mawũãsia: Zerua. Mawũãĩ Pedro jãbadꞌeba udꞌubꞌaepe do ʉ̃rʉ̃ tebadꞌewasia Jesúsma.

³⁰ Mawũãmina zarea pʉ̃ãdrʉ nʉmʉta akʉpe perasia, maʉ̃ne tabʉsadꞌewai bꞌia mawũãsia: ¡Nokꞌó, mʉrã kꞌarebarua!

³¹ Aramaʉ̃ta Jesúsbara juwuadꞌe jidape mawũãsia: ¡Bʉra soidꞌu kꞌobꞌaita wãẽã bꞌʉa! ¿Kꞌãrẽã teba bꞌe ẽãta krĩchabʉrʉ?

³² Aramaʉ̃ne ãzhira jãbadꞌe bꞌaribʉdadꞌera tausia pʉ̃ãdrʉra.

³³ Mawũẽ jãbadꞌe kꞌopanʉbara orradꞌape ibia jara mawũãsidꞌa: Bʉra wãrãne Daizeze Warra.

Jesúsba bꞌebidꞌa kꞌayarãta Genesaredꞌe

³⁴ Kĩrãrẽ chãbʉdadꞌera jũẽsidꞌa Genesaret druaedꞌa.

³⁵ Zhãrã mama bꞌeba Jesústa kꞌawuadꞌai ibꞌarita jarabisidꞌa maʉ̃ drua jõma, mawũẽ jõma izhima wesidꞌa kꞌaya bꞌeta.

³⁶ Zuburia bedꞌeasidꞌa arigu idu tõbꞌaribimarẽã izhi wua ita. Jõma zhi tõbꞌaridꞌapeadꞌara bꞌe duanesia.