Mateo 12 - Porciones del Nuevo Testamento

Trigota zhi kʉ̃mʉne ẽnapeadꞌa

¹ Jari ewadera trigota u tabꞌʉ maẽ Jesús berabꞌarisia ẽnaʉ̃bada ewade. Maʉ̃ne izha jʉrʉkuadꞌara jarrasidꞌa, mawũẽ trigota zhi kʉ̃mʉne ẽpe zhi taata kꞌosidꞌa.

² Maʉ̃ta fariseorãba ũdudꞌai mawũãsidꞌa: Bʉa jʉrʉkuadꞌabara obʉda ẽnaʉ̃bada ewade oidꞌe bꞌʉ ẽãta.

³ Mawũãnaĩ Jesúsbara mawũãsia: ¿Marãbara ledꞌakꞌa kĩrãkꞌa duanu ẽka rey Davidba odꞌara izhi ũme duanu bawara jarrasidꞌadꞌe?

⁴ Daizeze dedꞌa edꞌa wãpe kꞌosia pan Daizezeita bꞌʉbadata, maʉ̃ kꞌoidꞌe bꞌa ẽbasia miã izha miã izhi bawara bꞌeba, awuarabʉrʉ kꞌoidꞌe bꞌasia sacerdoterãbʉrʉ.

⁵ ¿O marãbara ledꞌa ẽã duanuka Daizezeba ũrãgꞌa Moiséa diadꞌadꞌe jara bꞌʉra? Mama jara bꞌʉ kĩrãkꞌara ẽnaʉ̃bada ewade Daizeze dedꞌa sacerdoterãba ne aribꞌae duanurã Daizezema bedꞌea ne ẽã.

⁶ Mawũẽ mʉã marãã jaraya, Daizeze de kꞌãñabara mʉrã audre zhi zromata nama bꞌʉa.

⁷ Sãwũãta kꞌawuadꞌara Daizezebara mawũãsia: Mʉãrã krĩña bꞌʉa zhãrã sozuburia bꞌeaita, mʉĩta nendʉwʉrʉta babue bꞌeai kꞌãñabara. Maʉ̃ta sãwũãta kꞌawua bꞌebʉrʉ jidꞌa ẽbakꞌausia mʉã jʉrʉkuadꞌa bedꞌea barabʉda ẽãta.

⁸ Maʉ̃ẽnabema mʉ Beubari Bape bꞌʉra ewari ẽnaʉ̃bada Nokꞌoa.

Ũmakĩrã juwua bagu bꞌadꞌa

⁹ Jesús mamaʉ̃bara wãbʉrʉta wãsia de zhi jʉrebadaidꞌu.

¹⁰ Mama iabꞌa bꞌasia juwua abꞌa bagu bꞌʉta. Maʉ̃nerã Jesús jidꞌai kꞌarea widꞌi mawũãsidꞌa: ¿Zhãrã bꞌebisia bꞌʉka ẽnaʉ̃bada ewadera?

¹¹ Mawũãnaĩ Jesúsbara mawũãsia: ¿Marãnebemaba oveja erubꞌʉta ẽnaʉ̃bada ewade uriadꞌe edꞌa bꞌaera jiraeda ẽbaika?

¹² ¿Maʉ̃ne zhãrã audre vale bꞌʉ ẽka oveja kꞌãñabara? Mawũẽ biara oidꞌe bꞌʉa ẽnaʉ̃bada ewadera.

¹³ Mawũãpe juwua bagu bꞌʉa mawũãsia: Bʉzhi juwua jirabꞌaridua. Mawũãĩ izhara jirabꞌarisia, mawũẽ bika bꞌesia juwua dewarabema kĩrãkꞌa.

¹⁴ Mawũẽ fariseorã wãnape krĩcha jʉrʉsidꞌa Jesús beadꞌaita.

Daizezeba nezokꞌa jʉrʉdꞌa

¹⁵ Jesúsbara maʉ̃ta kꞌawuape wãsia mamaʉ̃bara, zhãrã bio kꞌaidꞌu wãbʉdata kꞌaya bꞌera bꞌebisia jõma.

¹⁶ Maʉ̃nerã zarea jarakꞌasia izhi ʉ̃rʉ̃ dajada bedꞌeadꞌa ẽbamarẽã.

¹⁷ Aramaʉ̃ne arimaẽ berabꞌarisia Daizezeba bedꞌeata jarabibariba Isaíaba mawũãnata:

¹⁸ Naʉ̃ta mʉ nezokꞌa, mʉã jʉrʉdꞌata bꞌʉa. Mʉã kʉãgꞌata bꞌʉa, mʉrã izhi kꞌarea sobia bꞌʉa. Jawurebia mʉrẽta diaya, izhara zhãrã bꞌea jaraya mʉã bedꞌea ne ẽã bꞌeabiidꞌebemata.

¹⁹ Izhira zhõ bꞌia nʉma ẽã, miõba ũrĩna ẽã pʉwʉrʉ odꞌe mawũã bꞌia nʉmʉrã.

²⁰ Cha bꞌʉadea bꞌʉra bꞌʉeta ẽã, ĩbĩrã kidrʉ bꞌʉra kia ẽã. Bia nʉmaña bꞌʉta aramaʉ̃ kĩrãkꞌa edaya bia nʉmabiyeedꞌa.

²¹ Aramaʉ̃ne ẽdrʉira izhita krĩchadꞌaya zhãrã bꞌebara. (Isaías 42:1-4)

Mitia bedꞌeadꞌapeadꞌa Jawurebiama

²² Jesúsma wesidꞌa jai abꞌʉta daʉbꞌerrea nemi ze ẽã bꞌʉta. Mawũẽ bꞌebibʉrʉba daʉbꞌerrea nemi ze ẽã bꞌadꞌara ne ũdu bedꞌeasia.

²³ Mawũẽ zhãrã jõmaʉ̃ba bia akʉdrua mawũãsidꞌa: ¿Naʉ̃ ẽka Nokꞌota rey Davidꞌeba urura?

²⁴ Fariseorãba maʉ̃ta ũrĩnaĩ mawũãsidꞌa: Naʉ̃bara jaira ãĩ jʉrekua bꞌʉ ẽã, awuarabʉrʉ jʉrekua bꞌʉa Beelzebú jai duanu nokꞌo zareadꞌeba.

²⁵ Ãzhi mawũã krĩcha kꞌobꞌeta Jesúsbara kꞌawuape mawũãsia: Abꞌaʉ druadꞌebemata ãzhirãĩnu zhõ duanerã jõña, abꞌaʉ pʉwʉrʉdꞌebemata o abꞌaʉ dedꞌabemata ãzhirãĩnu zhõ duanerã jõña.

²⁶ Aramaʉ̃ kĩrãkꞌa ãtõmiãba jai izha jʉre nʉmʉta ãĩ jʉrekuara, ari izhidꞌebema bawara zhõ nʉmeña. ¿Mawũãrã sãwũã ari nokꞌota nʉmaĩpe?

²⁷ Marãma mʉã Beelzebú zareadꞌeba jaita ãĩ jʉrekua bꞌʉbʉrʉ, ¿marã pẽwã bꞌebara kꞌai zareadꞌeba ãĩ jʉrekua bꞌe? Widꞌidꞌara marãba jarabʉdara ãzhara jaradꞌaya mawũã ẽãta.

²⁸ Mʉãrã Daizeze Jawurebiadꞌeba jaira ãĩ jʉrekua bꞌʉa, mawũẽ wãrãne marãma zea Daizezeta Nokꞌodꞌebemata.

²⁹ Ũmakĩrã mesẽrãta bꞌʉ dedꞌara ¿sãwũã iabꞌa edꞌa wãpe izhi netata zrʉgaipe naara izhita jʉ̃ ẽbʉrʉ? Jʉ̃bʉrʉtrʉ izhi dedꞌa ne nʉmʉrã zrʉga bꞌeya. (Aramaʉ̃ kĩrãkꞌa ãtõmiã mʉãrã edre nʉmʉkꞌãrĩba jaira ãĩ jʉrekua bꞌʉa.)

³⁰ Mʉ ũme nʉmʉ ẽãbara mʉrã jura bꞌʉa. Mʉ bawarauba zhãrãta mʉma zebi ẽãbara zhadiga bꞌʉa.

³¹ Maʉ̃ba mʉã marãã jaraya: Kꞌazhirua bio odꞌata mitia bedꞌeadꞌata zuburia bedꞌeara Daizezebara bedꞌea ne ẽã bꞌʉya zhãrã bꞌera. Mawũãmina Jawurebiama mitia bedꞌeabʉrʉra bedꞌea ne ẽã bꞌʉ ẽã.

³² Bariduta mʉ Beubari Bape bꞌʉta bĩ ẽã jaradꞌata zuburia bedꞌeara Daizezebara bedꞌea ne ẽã bꞌʉya. Mawũãmina Jawurebiama mitia bedꞌeabʉrʉra bedꞌea ne ẽã bꞌʉ ẽã, miã naʉ̃ ewade miã ewari tẽãbidꞌa.

³³ Bakuruta biabara zhi tara biata zau bꞌʉa, bakuruta bia ẽãbara zhi tara bia ẽãta zau bꞌʉa. Mawũẽ bakurura zhi tadꞌeba ũdukꞌawa panʉã.

³⁴ Marã dãma neãrã bara bꞌe kĩrãkꞌa bꞌea. ¿Sãwũã biata bedꞌeadꞌaipe bia ẽãta bꞌera? Sodꞌe nʉmʉkꞌãrĩta jara bꞌʉa ibara.

³⁵ Biata bꞌʉbara sodꞌe biata nʉmʉkꞌãrĩta jara bꞌʉa. Bia ẽãta bꞌʉbara bia ẽãta sodꞌe nʉmʉkꞌãrĩta jara bꞌʉa.

³⁶ Mawũẽ mʉã marãã jaraya, bedꞌeata bia ẽãta bedꞌeadꞌapeadꞌara jõma Daizezea jaradꞌaya izha kꞌawua obʉrʉ ewadera.

³⁷ Aramaʉ̃nerã bʉra bʉzhi bedꞌeadꞌeba bedꞌea ne ẽã bꞌʉya, o bʉzhi bedꞌeadꞌeba bedꞌea bara bꞌʉya.

Ũdudꞌakꞌata ũdubimarẽã jaradꞌapeadꞌa

³⁸ Mobebʉrʉ ũrãgꞌa Moisédꞌe jarabadaba fariseorã bawarauba Jesúa mawũãsidꞌa: Miã Ũrãgꞌabari, bʉta Daizezedꞌeba nʉmʉbʉrʉ daibara ũdu krĩña panʉã ũdudꞌakꞌata bʉa obʉrʉta.

³⁹ Mawũãnaĩ Jesúsbara panaʉ̃ mawũãsia: Marã bia ẽãba Daizezedꞌebema ĩjã ẽã bꞌeta jara bꞌea ũdubimarẽã ũdudꞌakꞌata, mawũãmina mʉãrã ũdudꞌakꞌara ũdubiga ẽã, awuarabʉrʉ ũdubigaya Daizezeba bedꞌeata jarabibarita Jonás berabꞌaridꞌa kĩrãkꞌabʉrʉ.

⁴⁰ Bꞌeda zroma bꞌitaedꞌa Jonásta ewarita ũbea diamaseta ũbea bꞌadꞌa kĩrãkꞌa, mʉ Beubari Bape bꞌʉsidꞌa beudꞌata egorodꞌe edꞌa tabꞌaya ewarita ũbea diamaseta ũbea.

⁴¹ Daizezeba zhãrã kꞌawua obʉrʉdꞌera Nínive pʉwʉrʉdꞌe zhãrã bꞌeadꞌara beudꞌata piradrʉdꞌaya zhãrã idꞌi ewade bꞌe bawara, maʉ̃rãbara marã aduabimarẽã jaradꞌaya, maʉ̃ẽnabema ãzhara kꞌazhiruara ãmape Daizezeta pẽwãsidꞌa Jonásba Daizeze bedꞌeata jarabʉrʉba. Maʉ̃ne mʉ nama bꞌʉra audre zhi zroma Jonás kꞌãñabara.

⁴² Daizezeba zhãrã kꞌawua obʉrʉdꞌera Sabá druadꞌe reina bꞌidꞌabadara beudꞌata piradrʉya zhãrã idꞌi ewade bꞌe bawara, maʉ̃bara marã aduabimarẽã jaraya, maʉ̃ẽnabema izhira drua wawaraidꞌuba zesia Salomón krĩchata ũrĩne. Maʉ̃ne mʉ nama bꞌʉra audre zhi zroma Salomón kꞌãñabara.

Jaita wakusa zebaridꞌebema

⁴³ Jaita zhãrãneba ẽdrʉbʉrʉdꞌera drua drudrua tabꞌʉ maẽ põãsãne nimi baebaria, sãma bꞌaita jʉrʉbarimina ũdukꞌa.

⁴⁴ Mawũẽ mawũãbaria: Mʉrã wakusa mʉzhi dedꞌa wãña mʉzhi ẽdrʉdꞌama. Aramaʉ̃ne zebʉrʉdꞌera ũdubaria bari nʉmʉta barre bi-ia nʉmʉta.

⁴⁵ Mawũẽ wãpe jai awʉrʉta siete jʉrebaria izhi audre bia ẽãta, mobe edꞌa wãnape mama duanebaria. Mawũẽ zhãrã maʉ̃ audre zuburia bꞌebaria izhi naara bꞌadꞌa kꞌãñabara. Mawũã abꞌarika berabꞌariya idꞌi ewade bia ẽãta bꞌera.

Kꞌobꞌeadꞌa Jesús papata zhi mebẽrãta

⁴⁶ Zhãrã kꞌobꞌea Jesús mawũã bedꞌea nʉmʉne, zhi papata zhi mebẽrãta ewaradꞌe kꞌopanʉta izhaa bedꞌea krĩña kꞌopanasia.

⁴⁷ Mawũẽ iabꞌaʉba mawũãsia: Bʉ papata bʉ mebẽrãta ewaradꞌe kꞌopanʉã, bʉaa bedꞌea krĩña kꞌopanʉã.

⁴⁸ Mawũãĩ izhara panaʉ̃ maʉ̃ jarabʉrʉa mawũãsia: ¿Bʉma kꞌaipe mʉ papa, kꞌairãpe mʉ mebẽrã?

⁴⁹ Mawũãpe izha jʉrʉkuadꞌama juwua su mawũãsia: Naʉ̃rãta mʉ papa, mʉ mebẽrã.

⁵⁰ Mʉ Zeze ʉ̃tre bꞌʉba krĩñata obꞌeta maʉ̃ta mʉ mebea, mʉ nawekꞌaua, mʉ papaa.