Lucas 4 - Porciones del Nuevo Testamento

Ãtõmiãba Jesús wãẽãbiya nʉmana

¹ Jesús Jawurebiaba bira jẽrũya wãsia Jordán dodꞌeba. Maʉ̃nerã Jawurebiaba edesia drua drudrua tabꞌʉidꞌu.

² Mama bꞌasia ewari cuarenta, maʉ̃nerã wãẽãbiya bꞌasia ãtõmiãba. Miã kꞌãrẽta kꞌo ẽbasia maʉ̃ ewaridꞌera, mawũẽ maʉ̃ tẽãrã jarrasia.

³ Maʉ̃ne ãtõmiãba mawũãsia: Bʉta Daizeze Warrabʉrʉ naʉ̃ mongꞌaraa jaradua pan bamarẽã.

⁴ Mawũãĩ Jesúsbara panaʉ̃ mawũãsia: Maʉ̃ẽnabemata zhi bꞌʉmata mawũã bꞌʉa: Zhãrã bari zhikoba bꞌa ẽã, awuarabʉrʉ Daizezeba jara bꞌʉta jõma aribꞌae bꞌʉba bꞌaya. (Deuteronomio 8:3)

⁵ Mobebʉrʉ ãtõmiãbara edesia kꞌatuma ʉ̃tʉ nʉmʉĩnu, mobe bari aritia ũdubisia druadꞌe ẽjũã nʉmʉ jõma.

⁶ Mobe ãtõmiãbara mawũãsia: Mʉãrã naʉ̃ jõma bʉaa diaya bʉa kꞌabꞌarimarẽã, ne kĩrãwãrẽãta edꞌa nʉmʉsidꞌa diaya. Mʉãã diasidꞌa baera mʉzha dia krĩñabʉrʉa diaya.

⁷ Bʉta sãkꞌokꞌodꞌe kꞌobꞌepe mʉta ibia jarara jõma bʉre baya.

⁸ Mawũãĩ Jesúsbara panaʉ̃ mawũãsia: Ãtõmiã, mʉ maẽbara wãrũã, maʉ̃ẽnabemata zhi bꞌʉmata mawũã bꞌʉa: Bʉ Nokꞌo Daizezetrʉ ibia jaradua, izhi bedꞌeatrʉ aribꞌaedua. (Deuteronomio 6:13)

⁹ Mobebʉrʉ ãtõmiãbara edesia Jerusalén pʉwʉrʉedꞌa, mobe Daizeze deta audre ʉ̃tʉ nʉmʉĩnu edepe mawũãsia: Bʉta Daizeze Warrabʉrʉ namaʉ̃ba edꞌaa pinandrʉrua.

¹⁰ Maʉ̃ẽnabemata zhi bꞌʉmata mawũã bꞌʉa: Daizezebara izhi ángelerãta bʉma zokꞌakuaya bʉta kꞌarebadꞌamarẽã.

¹¹ Bʉra ãzhi juwuadꞌe edadꞌaya bʉ jẽrũta puo ẽbamarẽã mongꞌaraba.

¹² Mawũãĩ Jesúsbara panaʉ̃ mawũãsia: Maʉ̃ẽnabemasidꞌa mawũã bꞌʉa: Kꞌãrẽ orãrũã kꞌarebai kꞌawuaita bʉ Nokꞌo Daizezeba. (Deuteronomio 6:16)

¹³ Aramaʉ̃ne ãtõmiãbara wãẽãbiya nʉmanata jõma jõbibʉrʉdꞌera, Jesús maẽbara ãĩ wãsia ewari tẽãẽna.

Jesús miã ũrãgꞌa jʉ̃drʉdꞌa

¹⁴ Jesús jẽrũya Jawurebiaba zarea wãsia Galilea druaedꞌa. Mawũẽ izhira trʉ̃poasia maʉ̃ drua jõma.

¹⁵ Miã ũrãgꞌa bꞌasia de zhi jʉrebadata nʉmeza, maʉ̃nerã izhira jõmaʉ̃ba ibia jara bꞌeasia.

Jesús wãna Nazaret pʉwʉrʉedꞌa

¹⁶ Jesús wãsia Nazaret pʉwʉrʉedꞌa izhi waridꞌaidꞌu. Ẽnaʉ̃bada ewade de zhi jʉrebada maẽ edꞌa wãsia izhi kꞌawa bꞌʉ kĩrãkꞌa, mobe piradrʉsia Daizeze bedꞌeata leita.

¹⁷ Librota diasidꞌa Daizezeba bedꞌeata jarabibaridꞌeta Isaíadꞌeta. Maʉ̃ libro ewabʉrʉdꞌera ũdusia zhi bꞌʉmata mawũã bʉta:

¹⁸ Jawurebia Daizezedꞌera mʉne bꞌʉa, mʉrã jʉrʉsi baera bedꞌea biata jaramarẽã zuburia bꞌea. Mʉrã zokꞌasia sobia omarẽã sopua bꞌeta, ẽdrʉbiita jaramarẽã jida erubꞌeta, ne ũdubimarẽã daʉbꞌerrea bꞌeta, ẽdrʉbimarẽã zuburia obꞌeta.

¹⁹ Jaramarẽã ewari biara arabasita Daizezeba ẽdrʉbigaira. (Isaías 61:1-2a)

²⁰ Mawũã lepe libro burape diasia zhi wuagꞌabaria, mobe jewedꞌasia. Maʉ̃nerã de zhi jʉrebada maẽrã izhira jõmaʉ̃ba akʉ duanasia.

²¹ Mawũẽ mawũãsia: Mʉã zhãrã ẽdrʉbigaita mawũã zhi bꞌʉmata idꞌi arimaẽ berabꞌaria mazhi kĩrãbita.

²² Izhi ʉ̃rʉ̃rã jõma bia bedꞌea duanasia, bia akʉdrua bꞌeta izhira bia miã ũrãgꞌa bꞌʉdꞌeba mawũã duanasia: ¿Naʉ̃ ẽka José warrara?

²³ Maʉ̃nerã Jesúsbara mawũãsia: Jarabadata marãbara mʉãã mawũãnaña: Zhãrã bꞌebibari, bʉzhikusa zhi bꞌebirua. Capernaúm pʉwʉrʉdꞌe ne bio odꞌata daiba ũrĩnapeadꞌata namabidꞌa odua bʉzhi druadꞌe.

²⁴ Mawũãpe mawũãsia: Mʉã wãrĩnu marãã jaraya, Daizezeba bedꞌeata jarabibarira bia edadꞌa ẽã izhi druadꞌera.

²⁵ Mʉã wãrĩnu marãã jaraya, Israel druadꞌera wũẽrãrã pẽdrarã bio bꞌeasia Elía bꞌasi ewadera. Maʉ̃nerã año ũbea ẽsadra kue ze ẽãba jarrabata bꞌaesia drua jõmaʉ̃ne.

²⁶ Mawũãmina Daizezebara maʉ̃rã miã iabꞌabidꞌa kꞌarebadꞌe zokꞌa ẽbasia Elíara. Awuarabʉrʉ kꞌarebadꞌe zokꞌasia wũẽrã pẽdra Sarepta pʉwʉrʉdꞌe bꞌʉta Sidón pʉwʉrʉ kꞌaita.

²⁷ Israel druadꞌera aidꞌaba kꞌaya bꞌesidꞌa bio bꞌeasia Daizezeba bedꞌeata jarabibari Eliseo bꞌasi ewadera. Mawũãmina maʉ̃rãnebema miõta nene ẽã bꞌe ẽbasia, awuarabʉrʉ nene ẽã bꞌesia Naamán Siria druadꞌebemata.

²⁸ Maʉ̃ta ũrĩbʉdadꞌera de zhi jʉrebada maẽ kꞌobꞌera jõma kꞌãbãẽã kĩrũsidꞌa.

²⁹ Mawũẽ piradrʉdꞌape pʉwʉrʉdꞌebara Jesús ãĩ jʉretabʉdata edesidꞌa kꞌatuma ãmiãĩnu, maʉ̃ kꞌatumane tabꞌasia ãzhi pʉwʉrʉra, mawũã edesidꞌa mamaʉ̃ba bʉretadꞌaita.

³⁰ Mawũãmina izhira ãzhi ẽsaubara ãĩ jʉ̃drʉpe wãsia.

Jaita abꞌadꞌa

³¹ Jesús wãsia Capernaúm pʉwʉrʉedꞌa, maʉ̃ pʉwʉrʉra Galilea druadꞌebema. Mobe miã ũrãgꞌa bꞌasia ewari ẽnaʉ̃badaza.

³² Maʉ̃nerã izhi miã ũrãgꞌabʉrʉdꞌera bia akʉdrua bꞌeasia izhira zarea bara bedꞌea bꞌʉba.

³³ Maʉ̃ne de zhi jʉrebada maẽ ũmakĩrãta bꞌasia jai abꞌʉta. Mawũẽ maʉ̃neba jaibara nemi jĩgua mawũãsia:

³⁴ Daira idaribirua. ¿Bʉra dai bawara kꞌãrẽta sãwũã bꞌʉ Jesús Nazaredꞌebema? ¿Bʉra zebʉrʉka dai ãrĩĩta? Bʉra kꞌaita mʉã kꞌawua bꞌʉa, bʉra Daizezedꞌea.

³⁵ Maʉ̃ne Jesúsbara kẽã mawũãsia: Chupearua, kꞌãʉ̃nebara ãĩ wãrũã. Mawũãĩ jaibara ãzhi ẽsadra bꞌaebipe maʉ̃nebara ãĩ wãsia puo ẽã.

³⁶ Mawũẽ jõmaʉ̃ba bia akʉdrua ãzhirãĩnu mawũãsidꞌa: ¿Naʉ̃ bedꞌeara kꞌãrẽ zhi zromape? Jaira zarea bara jʉrekua bꞌʉba ãĩ wã nʉmeã.

³⁷ Aramaʉ̃ne izhira trʉ̃poasia maʉ̃ drua jõma.

Jesúsba bꞌebidꞌa Simón pakꞌõrẽta

³⁸ Mobebʉrʉ Jesús piradrʉpe de zhi jʉrebada maẽbara ãĩ wãpe wãsia Simón dedꞌa. Simón pakꞌõrẽ kꞌãbãẽã kʉwa nʉmʉba zuburia bedꞌeasidꞌa izhibari.

³⁹ Mawũẽ Jesús izhima bꞌarrupe kʉwamiã kẽãsia, mawũẽ kʉwamiãbara kenabꞌaribʉrʉba izhira audre ẽãne piradrʉpe ne jigasia.

Jesúsba bꞌebikuadꞌa kꞌayarãta bio

⁴⁰ Ʉ̃madau bꞌaebʉrʉdꞌera kꞌayata erubꞌeta ne kĩrãtõnoãba kꞌaya bꞌeta Jesúsma wesidꞌa. Mawũẽ izhara abꞌa abꞌakꞌa juwua ʉ̃rʉ̃ bꞌʉkua bꞌebikuasia.

⁴¹ Jaisidꞌa zhãrã biodꞌeba ãĩ wãbʉdata nemi jĩgua mawũãsidꞌa: ¡Bʉra Daizeze Warra! Mawũãmina izhara kẽãkuasia, aramaʉ̃ne bedꞌeabiga ẽbasia kꞌawua bꞌeba izhira zhãrã Ẽdrʉbita.

Jesús Galileadꞌe pʉrrʉa miã ũrãgꞌadꞌa

⁴² Ʉ̃nadrʉbʉrʉdꞌera pʉwʉrʉdꞌebara Jesús ãĩ wãsia miõ ne ẽã nʉmʉĩnu. Maʉ̃nerã zhãrãbara jʉrʉsidꞌa, aramaʉ̃ne izhi bꞌʉ maẽ jũẽkuape jarasidꞌa wã ẽbamarẽã ãzhi maẽbara.

⁴³ Mawũãmina izhara mawũãsia: Mʉãrã pʉwʉrʉ awʉrʉta tabꞌe maẽbidꞌa bedꞌea biata jarakꞌaibara Daizezeta Nokꞌodꞌebemata. Mʉrã izhara maʉ̃ kꞌarea zokꞌasia.

⁴⁴ Aramaʉ̃ne miã ũrãgꞌa wãsia de zhi jʉrebadata nʉmeza Galilea druadꞌe.