Lucas 2 - Porciones del Nuevo Testamento

Jesús todꞌa

¹ Jari ewadera rey Augusto Césarbara jarasia zhãrã jõma juachadꞌamarẽã.

² Mawũã juachadꞌakꞌata juachasidꞌadꞌera, Cirenio nokꞌota bꞌasia Siria druadꞌe.

³ Mawũẽ zhi juachabidꞌaita jõma wãsidꞌa abꞌa abꞌakꞌa ãzhi todꞌa pʉwʉrʉedꞌa.

⁴ Maʉ̃ba Joséra Galilea druadꞌeba Nazaret pʉwʉrʉdꞌeba wãrĩzesia Judea druaedꞌa. Rey David todꞌa pʉwʉrʉta Belén abadaidꞌu wãrĩzesia rey Davidꞌeba uruta bꞌasi baera.

⁵ Izhira wãsia María zhi kĩma bayi ũme zhi juachabidꞌaita. Izhi ũme zhi edaita bedꞌea bꞌʉta maʉ̃ bꞌiogꞌoa bꞌasia.

⁶ Maʉ̃ne ãzhi mama panʉne arabasia toi ewarita.

⁷ Aramaʉ̃ne to edasia zhi wau ãwũẽrã wũãwũãta. Mobe wuaba burape bꞌarizhirusia nendʉwʉrʉ nekꞌobadadꞌe. Mawũã osia ãzhiitara bari nʉmʉ ẽãba ãĩba zebʉrʉ kꞌãĩbibada deta.

Ángelerã zhi ũdubidꞌapeadꞌa

⁸ Oveja akʉbadata abꞌaʉ druadꞌe bꞌeta, diamase akʉ bꞌeasia ãzhi ovejata.

⁹ Maʉ̃ne zhi ũdubisia ángel Daizezedꞌeta, mawũẽ Daizeze ʉ̃naba ãzhi pʉrra ʉ̃nasia, mawũẽ kꞌãbãẽã perasidꞌa.

¹⁰ Mawũãmina ángelbara mawũãsia: Perarãũdua, kꞌãbãẽã sobiaidꞌebemata mʉã marãã bedꞌea biata jaraya zhãrã jõmaʉ̃ĩtabemata.

¹¹ Idꞌi rey David pʉwʉrʉdꞌe tosia zhãrã Ẽdrʉbita, izhira zhãrã ẽdrʉbita Nokꞌoa.

¹² Marãba sãwũã kꞌawuadꞌaita mʉã jaraya: Marãbara wũãwũã ũdudꞌaya wuaba bʉra bꞌarizhiruta, nendʉwʉrʉ nekꞌobadadꞌe bꞌarizhiruta.

¹³ Maʉ̃ daucha ángel bawara ángelerã ʉ̃trebemata kꞌabana zhi ũdubisidꞌa, maʉ̃rãbara Daizeze ibia jara mawũãsidꞌa:

¹⁴ ¡Daizezera ibia jaraudua ʉ̃trera, druadꞌera adu-a bꞌeaya izha bia erunʉmʉta bꞌera!

¹⁵ Ángelerã ãzhi maẽba ʉ̃taa wãbʉdadꞌera, oveja akʉbadabara ãzhirãĩnu mawũãsidꞌa: Belén pʉwʉrʉidꞌu wãdrʉ, mobe naʉ̃ kꞌãwũã berabꞌaribʉrʉta akʉdꞌaya Daizezeba dazhirãã jarabʉrʉta.

¹⁶ Aramaʉ̃ta ĩñabasia zebʉdadꞌera María José ũme ũdusidꞌa, wũãwũãsidꞌa bꞌarizhirasia nendʉwʉrʉ nekꞌobadadꞌe.

¹⁷ Mawũã ũdudꞌai nebʉrʉsidꞌa ángelba jaradꞌata wũãwũãnebemata.

¹⁸ Jõma zhi ũrĩbʉdabara bia akʉdruasidꞌa oveja akʉbadaba maʉ̃ta jarabʉdadꞌera.

¹⁹ Mawũãmina Maríabara maʉ̃ jõma kĩrãkuitasia izhi sobitabaiba.

²⁰ Oveja akʉbadara jẽrũya Daizezeta ibia jara wãsidꞌa, wũãwũãnebemata ũrĩbʉdaba ũdubʉdaba ángelba ãzhaa jaradꞌa kĩrãkꞌa.

Jesús ededꞌapeadꞌa Daizeze deidꞌu

²¹ Todꞌata ewari ocho babʉrʉdꞌera warra zakera kꞌakua eta kꞌõsidꞌa, mobe Jesústa trʉ̃gasidꞌa ángelba jaradꞌa kĩrãkꞌa bꞌiogꞌoai nawedꞌa.

²² Todꞌadꞌeba ãzhi zhi wuagꞌa panʉ ewarita Moisé ũrãgꞌadꞌe jara bꞌʉ kĩrãkꞌa aribꞌaebʉdadꞌera wũãwũã Jerusalén pʉwʉrʉedꞌa wesidꞌa bꞌʉdꞌaita Daizezeita.

²³ Maʉ̃ẽnabemata Daizeze ũrãgꞌa zhi bꞌʉmane mawũã bꞌʉa: Zhi togꞌaiba zhũmakĩrãta tobʉrʉdꞌera bꞌʉdꞌaidꞌe bꞌʉa Daizezeita.

²⁴ Maʉ̃nerã edesidꞌa Daizeze ũrãgꞌadꞌe edei jara bꞌʉta: Umata ũme o pusirã zakerãta ũme.

²⁵ Maʉ̃ne Jerusalénne bꞌasia Simeón abadata, biata bꞌʉta Daizeze kĩrãbita kĩrãẽpa bꞌasia, maʉ̃bara jʉ̃ã bꞌasia Israel ẽdrʉbigaidꞌebemata. Jawurebiara bꞌasia izhi ũme.

²⁶ Jawurebiaba zhi jarama basia izhira beu ẽãta izha ũdu ẽwedꞌara zhãrã Ẽdrʉbita Daizezedꞌeta.

²⁷ Mawũẽ Jawurebiaba zebibʉrʉba zesia Daizeze deidꞌu. Zhibarirãbara wũãwũã Jesús Daizeze deidꞌu wesidꞌa Moisé ũrãgꞌaba jara bꞌʉdꞌe odꞌaita.

²⁸ Maʉ̃ne Simeónbara juwuadꞌe edape Daizeze ibia jara mawũãsia:

²⁹ Kꞌõbebʉrʉ mʉ Zhibari, mʉ bʉzhi nezokꞌa adu-a beubirua, bʉa jaradꞌara bʉara aribꞌaea.

³⁰ Mʉzhi dabʉba ũdubʉrʉa bʉre zhãrã Ẽdrʉbira.

³¹ Izhidꞌebema bʉara aribꞌaebʉrʉa jõmaʉ̃ daidꞌu.

³² Izhira ʉ̃nata bꞌʉba ẽdrʉdꞌaita kꞌawuabigaya judíorã ẽãta bꞌea, aramaʉ̃ne izhikꞌareuba bia trʉ̃poa nʉmaña Israel bʉreta bꞌera. (Isaías 42:6; 49:6)

³³ Josébara Jesús papa ũmeba bia akʉsidꞌa mawũã jarabʉrʉba Jesúsdꞌebemata.

³⁴ Mobebʉrʉ Simeónbara ibia jarakꞌape Jesús papa María mawũãsia: Naʉ̃ bꞌʉsidꞌa Israel bio aduaita, bio ẽdrʉita. Maʉ̃ dajadata Daizezedꞌeba nʉmʉ ẽã adꞌaya.

³⁵ Kuchota diaju nʉmʉ kĩrãkꞌa nʉmaña bʉ sopuara, maʉ̃nebara kꞌawuadꞌaya bio sãwũã krĩcha bꞌeta sodꞌeba.

³⁶ Dewara mama bꞌasia Ana Daizezeba bedꞌeata jarabibarita, Fanuel kꞌauta Aserdꞌeba uruta jipadꞌe zhõdrata bꞌasia. Zhi kĩma ũme siete año panasia zhi zakedꞌeuba.

³⁷ Pẽdrata bꞌʉta ochenta y cuatro año bata bꞌasia. Izhira Daizeze dedꞌa ewara maẽ wã tau ẽãta diamase ewaridꞌe Daizeze ibia jara bꞌidꞌa bazhia nekꞌo ẽã zhiwidꞌi.

³⁸ Maʉ̃sidꞌa Simeón kꞌobꞌʉdꞌe zepe zhibia jisia Daizezea, mobe wũãwũãnebemata jõmaʉ̃ã jarakꞌasia ãzhi ẽdrʉbigaita jʉ̃ã bꞌea Jerusalénne.

Jẽrũya wãnapeadꞌa Nazaret pʉwʉrʉedꞌa

³⁹ Daizeze ũrãgꞌa zhi bꞌʉmane jara bꞌʉta jõma aribꞌaebʉdadꞌera, jẽrũya wãsidꞌa Galilea druaedꞌa, ãzhi pʉwʉrʉ Nazareedꞌa.

⁴⁰ Wũãwũã zarea wari wãta krĩcha bara wãsia. Daizezebara bia erunʉmasia izhira.

Wũãwũã Jesús bꞌadꞌa Daizeze de maẽ

⁴¹ Zhibarirã añoza Jerusalén pʉwʉrʉedꞌa wã panasia Egiptodꞌeba ẽzoadꞌata krĩcha fiesta obadadꞌe.

⁴² Mawũẽ Jesús doce año babʉrʉdꞌe Jerusalén pʉwʉrʉedꞌa wãrĩzesidꞌa mawũã wã kꞌawa panʉ baera fiestadꞌe.

⁴³ Fiesta jõbʉrʉdꞌe ãzhi jẽrũya zebʉdadꞌera wũãwũã Jesús Jerusalénne bꞌesia, kꞌawuadꞌa ẽãne Joséba miã zhi papaba.

⁴⁴ Kꞌabanane edꞌa nimita krĩchadꞌape odꞌe ewari abꞌa wãsidꞌa dakita zhi mebẽrãne edꞌa, ãzha ũdukꞌawuadꞌe edꞌa.

⁴⁵ Mawũãmina ũdudꞌa ẽãba jẽrũya wãsidꞌa Jerusalén pʉwʉrʉedꞌa jʉrʉ.

⁴⁶ Aramaʉ̃ne ewari ũbeadꞌe Daizeze dedꞌa ewara maẽ ũdusidꞌa, ũrãgꞌa Moisédꞌe jarabada bawara jewedꞌa bꞌʉta bedꞌeata ũrĩ widꞌika bꞌasia.

⁴⁷ Izhi bedꞌeata ũrĩ nʉmebara bia akʉ duanasia krĩcha bara bꞌʉdꞌeba kꞌãrẽ bia panaʉ̃ bꞌʉba.

⁴⁸ Zhibarirãba ũdudꞌai kꞌawua ẽãsidꞌa. Zhi papabara mawũãsia: Wauzake, ¿bʉara daira kꞌãrẽã kꞌãwũã obʉrʉ? Bʉ zezeba mʉ ũmeba bʉra jʉrʉ panʉã sopua.

⁴⁹ Mawũãĩ izhara mawũãsia: ¿Mʉrã kꞌãrẽã jʉrʉ panʉ? ¿Marãbara kꞌawuadꞌa ẽka mʉ Zezedꞌebemane mʉ nʉmaĩ barara?

⁵⁰ Ãzhara ũrĩ bꞌedꞌa ẽbasia mawũã jarabʉrʉra.

⁵¹ Mobebʉrʉ ãzhi kꞌaidꞌu jẽrũya Nazaret pʉwʉrʉedꞌa wãpe ãzha jarabʉrʉdꞌe bꞌesia. Zhi papabara maʉ̃ jõma kĩrãkuitasia izhi sobitabaiba.

⁵² Jesús wari wãta krĩcha bara wari wãsia. Bia erunʉmasia Daizezeba dewara zhãrãba.