Lucas 15 - Porciones del Nuevo Testamento

Oveja aduadꞌadꞌebema

¹ Jesús orrasidꞌa rey Romanebemaĩta plata widꞌibadaba bioba dewaraurã kꞌazhirua omiãrãba izhi bedꞌea ũrĩnaĩta.

² Mawũẽ fariseorãbara ũrãgꞌa Moisédꞌe jarabadabara jara mawũãsidꞌa: Naʉ̃bara bia eda bꞌʉa kꞌazhirua omiãrãta, nekꞌo bꞌʉa ãzhi bawara.

³ Mawũẽ Jesúsbara ne jara mawũãsia:

⁴ ¿Marãnebemaba oveja cien erubꞌʉta abꞌa aduara, zhi noventa y nueve drua drudrua tabꞌʉ maẽ ãmaẽpe aduadꞌata jʉrʉ wã ẽka ũduyeedꞌa?

⁵ Ũdubʉrʉdꞌera ikiwadꞌe jirabꞌari edaya sobia.

⁶ Deidꞌu jũẽbʉrʉdꞌera izhi bawara zhibiarãta ãba jʉreya de kꞌaita bꞌe bawara, mobe mawũãña: Mʉ bawara sobiaudua mʉã ũdusi baera mʉ oveja aduadꞌata.

⁷ Mʉã marãã jaraya, aramaʉ̃ kĩrãkꞌa ʉ̃trera audre sobiadꞌaya kꞌazhirua omiã abꞌaʉba kꞌazhiruara ãmabʉrʉta Daizezeta pẽwãbʉrʉ kꞌarea. Noventa y nueve biarãta Daizeze pẽwã bꞌe kꞌãñabara.

Ne jaradꞌa moneda aduadꞌadꞌeba

⁸ ¿Wũẽrãba moneda diez erubꞌʉta abꞌa aduara, ĩbĩrã kꞌoape de barre kĩrãkuita jʉrʉ ẽka ũduyeedꞌa?

⁹ Ũdubʉrʉdꞌera wũẽrãrã izhi bawara zhibiarãta de kꞌaita bꞌe bawara ãba jʉrepe mawũãña: Mʉ bawara sobiaudua mʉã ũdusi baera moneda aduadꞌata.

¹⁰ Mʉã marãã jaraya, aramaʉ̃ kĩrãkꞌa ángelerã Daizezedꞌera sobiadꞌaya kꞌazhirua omiã abꞌaʉba kꞌazhiruara ãmape Daizezeta pẽwãbʉrʉ kꞌarea.

Ne jaradꞌa warraba plata gastadꞌadꞌeba

¹¹ Jesúsbara dewara mawũãsia: Ũmakĩrãba erubꞌasia warrarã ũme.

¹² Tẽãbemaba zhi zezea mawũãsia: Zeze, mʉrẽrã diadua bʉa kꞌãrẽ diai bꞌʉra. Mawũãĩ dra dedꞌekasia kꞌãrẽ diai bꞌʉra.

¹³ Maʉ̃ tẽã ewari dããrã ẽãne tẽãbemane jõma nendope maʉ̃ plataba wãsia drua wawaraidꞌu. Maĩnu platara ewaradꞌe gastasia izha krĩñane bꞌʉdꞌe.

¹⁴ Mawũã jõma ewaradꞌe gastabʉrʉdꞌe jarraba zromata bꞌaesia maʉ̃ druadꞌera, mawũẽ jarrabadꞌe bꞌesia.

¹⁵ Mawũẽ wãpe maʉ̃ druadꞌebemata bꞌʉ maẽ bꞌesia. Maʉ̃bara zokꞌasia meã izhi druadꞌe chĩna akʉmarẽã.

¹⁶ Maʉ̃nerã izhara kꞌo krĩña bꞌasia algarroba chĩnaba kꞌo bꞌeta, mawũãmina miõba diadꞌa ẽbasia.

¹⁷ Mawũẽ izhikusa krĩchabʉrʉta mawũãsia: Trajabadata bꞌebara mʉ zeze dedꞌara zhiko adꞌuba erubꞌea, maʉ̃ne nama mʉrã jarraba beua.

¹⁸ Mʉrã wakusa mʉ zezema wãpe mawũãña: Zeze, mʉrã kꞌazhirua obʉrʉa Daizeze kĩrãbita, bʉ kĩrãbita.

¹⁹ Ya mʉrã bʉ warra aidꞌe bꞌʉ ẽã. Mʉrã bꞌʉdua bʉre trajabadarã iabꞌaʉ kĩrãkꞌa.

²⁰ Mawũã krĩchape zesia zhi zezema. Wawarawedꞌa zhi zezeba ũdui sozuburiape wãẽbasia. Mobe oburape kĩrãma nigasia.

²¹ Maʉ̃ne warrabara mawũãsia: Zeze, mʉrã kꞌazhirua obʉrʉa Daizeze kĩrãbita, bʉ kĩrãbita. Ya mʉrã bʉ warra aidꞌe bꞌʉ ẽã.

²² Mawũãmina zhi zezebara izhi nezokꞌarãã mawũãsia: Wua audre biata jiraedadꞌape jʉ̃biudua. Anillota juwuadꞌe jʉ̃biudua, albarca jẽrũne jʉ̃biudua.

²³ Pakꞌa zake boregueata wedꞌape beaudua, nekꞌodꞌaya fiesta odꞌaya.

²⁴ Naʉ̃ mʉ warra beudꞌa kĩrãkꞌa nʉmanata zokꞌai bꞌʉa, aduadꞌata ũdubʉda. Aramaʉ̃ne fiesta kꞌaudꞌa duanesia sobia.

²⁵ Maʉ̃nerã warra nabema meã traja nʉmasia. Jẽrũya zebʉrʉdꞌe de kꞌaita babʉrʉdꞌe ũrĩsia ne za barabꞌʉta, danza barabꞌʉta.

²⁶ Mawũẽ nezokꞌata abꞌa trʉ̃pe widꞌisia kꞌãrẽ kꞌaudꞌa nʉmeta.

²⁷ Mawũẽ maʉ̃bara mawũãsia: Bʉ mebeata zesia, mawũẽ bʉ zezebara pakꞌa zake boregueata beabisia bia bika ibꞌari baera.

²⁸ Mawũãĩ maʉ̃ kꞌarea kĩrũpe edꞌa wã krĩña ẽbasia. Mawũẽ zhi zezera ãĩ zepe zuburia bedꞌeasia edꞌa wãmarẽã.

²⁹ Mawũãĩ izhara panaʉ̃ zhi zezea mawũãsia: Año bio babʉrʉa mʉrã bʉita traja bꞌʉta, bʉa jarabʉrʉra mʉãrã aribꞌae ẽã nʉmakꞌa. Maʉ̃ta bʉara diakꞌa miã chivo zakesidꞌa mʉta sobiaira mʉ ũme zhibiarã bawara.

³⁰ Maʉ̃ne naʉ̃ bʉ warra ibꞌaribara bʉ platara gastasia wũẽrãrã jõmaʉ̃neta bꞌema, maʉ̃ta bʉara beabibʉrʉa pakꞌa zake boregueata.

³¹ Mawũãĩ zhi zezebara mawũãsia: Warra, bʉra ewariza mʉ ũme bꞌʉa, mawũẽ kꞌãrẽ mʉrẽrã jõma bʉrea.

³² Mawũãmina fiesta odꞌaita bara basia sobiadꞌaita. Naʉ̃ bʉ mebeara beudꞌa kĩrãkꞌa nʉmanata zokꞌai bꞌʉba, aduadꞌata ũdubʉdaba.