Lucas 11 - Porciones del Nuevo Testamento

Jesúsba jaradiadꞌa zhiwidꞌiita

¹ Ewari abꞌa Jesús zhiwidꞌi nʉmape zhiwidꞌi berabꞌaribʉrʉdꞌera izha jʉrʉkuadꞌaba abꞌaʉba mawũãsia: Nokꞌó, daia jaradedꞌekarua zhiwidꞌiita, Juanba jaradedꞌekadꞌa kĩrãkꞌa izha jʉrʉkuadꞌaa.

² Mawũãĩ Jesúsbara mawũãsia: Marã zhiwidꞌibʉdadꞌera mawũãũdua: Bʉra Daizezeta ʉ̃tre bꞌʉa, bʉra wawiadꞌaidꞌe bꞌʉa. Dai Nokꞌota nʉmadua. Bʉa krĩñata odꞌaidꞌe bꞌʉa ʉ̃tre obꞌe kĩrãkꞌa, mawũã odꞌaidꞌe bꞌʉa druadꞌebidꞌa.

³ Zhiko ewarizabema daia diadua idꞌira.

⁴ Daiba kꞌazhiruata odꞌadꞌebara daira bedꞌea ne ẽã duanebirua, daibidꞌa bedꞌea ne ẽãne edabada dai bĩ ẽã obʉdata jõma. Daita idu wãẽãbirãrũã, awuarabʉrʉ daira kꞌarebarua ãtõmiã bia ẽãnebara.

⁵ Dewara mawũãsia: ¿Marãnebemaba izhi ũme zhibiata erubꞌʉdꞌera ewari ẽsadra izhima wãpe mawũãĩ ẽka: Bʉra mʉ ũme zhibiata bꞌʉa mʉãã prestadua pan ũbea ai ẽka?

⁶ ¿Mʉ ũme zhibiata odꞌe wãta mʉ maẽ deidꞌu zesia, maʉ̃ne mʉãrã kꞌãrẽ diaira ne ẽã ai ẽka?

⁷ ¿Mawũãĩ jaribara edꞌauba panaʉ̃ mawũãĩbʉka: Miãsẽã nʉmarãrũã, puertara ya serra nʉmʉã, mʉ warrarãsidꞌa mʉ bawara kꞌãĩgue nʉmʉã, maʉ̃ba mʉrã piradrʉ bꞌe ẽã maʉ̃ diaira aibʉka?

⁸ Mʉã marãã jaraya, izhi ũme zhibiaba maʉ̃ diaita piradrʉbʉrʉ ẽãsidꞌa pi widꞌi nʉmebʉrʉba piradrʉpe diaya jõma izha nesidꞌa bꞌʉra.

⁹ Mawũẽ mʉã marãã jaraya: Aramaʉ̃ kĩrãkꞌa Daizezea ne widꞌiudua, mawũãrã marãã diaya. Ne widꞌi bꞌeba jʉrʉudua, mawũãrã ũdudꞌaya. Ne widꞌi bꞌeba trʉ̃ũdua, mawũãrã jigaita puerta ewaya.

¹⁰ Daizezea ne widꞌi bꞌʉbara jidaya. Ne widꞌi bꞌʉba jʉrʉ bꞌʉbara ũduya. Ne widꞌi bꞌʉba trʉ̃ bꞌʉaara diaita puerta ewaya.

¹¹ ¿Zezeta marãnebemabara zhi warraba panta widꞌira mongꞌarata diaita bꞌʉka? ¿O bꞌedata widꞌira bꞌeda dia ẽã dãmata diaita bꞌʉka?

¹² ¿O nemʉta widꞌira drusũrẽta diaita bꞌʉka?

¹³ Marã bia ẽãta bꞌeba mazhi warrarãã ne biata dia kꞌawua bꞌebʉrʉ, ¿marã Zeze ʉ̃trebemabara audrebai Jawurebiata diai ẽka zhi widꞌibʉdaara?

Mebẽrãta ãzhirãĩnu zhõ duanerã jõña

¹⁴ Jesúsbara jaira ãĩ jʉretasia zhãrã nemi zebi ẽãta, aramaʉ̃ne jai ãĩ wãbʉrʉdꞌera nemi ze ẽã bꞌadꞌara bedꞌeabʉrʉba zhãrã kꞌobꞌebara bia akʉdruasidꞌa.

¹⁵ Mawũãmina ãzhirãnebema ʉ̃kʉrʉbara mawũãsidꞌa: Beelzebú jai duanu nokꞌo zareadꞌeba jaira ãĩ jʉrekua bꞌʉa.

¹⁶ Ʉ̃kʉrʉbara wãẽãbidꞌaita ũdudꞌakꞌata ũdubimarẽã jarasidꞌa Daizezedꞌeba nʉmʉbʉrʉ.

¹⁷ Mawũãmina Jesúsbara ãzhi sãwũã krĩcha kꞌobꞌeta kꞌawuape mawũãsia: Abꞌaʉ druadꞌebemata ãzhirãĩnu zhõ duanerã jõña. Abꞌaʉ dedꞌabemata ãzhirãĩnu zhõ duanerã jõña.

¹⁸ Aramaʉ̃ kĩrãkꞌa ãtõmiãta jai izha jʉre nʉmʉ bawara zhõ nʉmerã, ¿sãwũã ari nokꞌota nʉmaĩpe? Maʉ̃ta marãbara jarabʉda Beelzebú zareadꞌeba mʉã jaira ãĩ jʉrekua bꞌʉta.

¹⁹ Marãma mʉã Beelzebú zareadꞌeba jaita ãĩ jʉrekua bꞌʉbʉrʉ, ¿marã pẽwã bꞌebara kꞌai zareadꞌeba ãĩ jʉrekua bꞌe? Widꞌidꞌara marãba jarabʉdara ãzhara jaradꞌaya mawũã ẽãta.

²⁰ Daizeze zareadꞌeba mʉã jaira ãĩ jʉrekua bꞌʉa, mawũẽ wãrãne Daizezeta Nokꞌodꞌebemata marãma zea.

²¹ Ũmakĩrã mesẽrãba ne izhi zhõbarita erubꞌʉba izhi deta akʉ bꞌʉra, bia nʉmʉã izha ne erubꞌʉra.

²² Mawũãmina izhi audre mesẽrãta zebʉrʉdꞌera izhira edre bꞌaebipe ne izhi zhõbarira jõma jãrĩña maʉ̃ba zarea bꞌʉta, mobe awʉrʉ bawarauba draya.

²³ Mʉ ũme nʉmʉ ẽãbara mʉrã jura bꞌʉa. Mʉ bawarauba zhãrãta mʉma zebi ẽãbara zhadiga bꞌʉa.

Jaita wakusa zebaridꞌebema

²⁴ Jaita zhãrãneba ẽdrʉbʉrʉdꞌera drua drudrua tabꞌʉ maẽ põãsãne nimi baebaria, sãma bꞌaita jʉrʉbʉrʉdꞌe ũdu ẽbai mawũãbaria: Mʉrã wakusa mʉzhi dedꞌaa wãña mʉzhi ẽdrʉdꞌama.

²⁵ Aramaʉ̃ne zebʉrʉdꞌera ũdubaria barre bi-ia nʉmʉta.

²⁶ Mawũẽ wãpe jai awʉrʉta siete jʉrebaria izhi audre bia ẽãta, mobe edꞌa wãnape mama duanebaria. Mawũẽ zhãrã maʉ̃ audre zuburia bꞌebaria izhi naara bꞌadꞌa kꞌãñabara.

Wãrãne sobiadꞌaidꞌebema

²⁷ Jesúsba maʉ̃ta jara nʉmʉne wũẽrãba kꞌabanane edꞌauba nemi jĩgua mawũãsia: Sobia bꞌaidꞌe bꞌʉa bʉ tope ju dawuadꞌara.

²⁸ Mawũãĩ izhara mawũãsia: Audrera sobia bꞌeaidꞌe bꞌʉa Daizeze bedꞌeata ũrĩpe aribꞌae bꞌeta.

Ũdudꞌakꞌata ũdubimarẽã jaradꞌapeadꞌa

²⁹ Kꞌabana bʉredrʉ bʉsidꞌe Jesúsbara mawũãsia: Zhãrã idꞌi ewadebema bia ẽãta bꞌea. Mʉta Daizezedꞌeba nʉmʉbʉrʉ ũdudꞌakꞌata ũdubimarẽã jara bꞌea. Mawũãmina mʉãrã ũdudꞌakꞌara ũdubiga ẽã, awuarabʉrʉ ũdubigaya Jonás berabꞌaridꞌa kĩrãkꞌabʉrʉ.

³⁰ Jonás berabꞌaridꞌa kĩrãkꞌabara Daizezedꞌeba nʉmʉta kꞌawuabigasia Nínive pʉwʉrʉdꞌe bꞌea. Mʉ Beubari Bape bꞌʉbidꞌa mawũã kꞌawuabigaya zhãrã idꞌi ewade bꞌea.

³¹ Daizezeba zhãrã kꞌawua obʉrʉdꞌera Sabá druadꞌe reina bꞌidꞌabadara beudꞌata piradrʉya zhãrã idꞌi ewade bꞌe bawara, maʉ̃bara marã aduabimarẽã jaraya, maʉ̃ẽnabema izhira drua wawaraidꞌuba zesia rey Salomón krĩchata ũrĩne. Maʉ̃ne mʉ nama bꞌʉra audre zhi zroma Salomón kꞌãñabara.

³² Daizezeba zhãrã kꞌawua obʉrʉdꞌera Nínive pʉwʉrʉdꞌe zhãrã bꞌeadꞌara beudꞌata piradrʉdꞌaya zhãrã idꞌi ewade bꞌe bawara, maʉ̃rãbara marã aduabimarẽã jaradꞌaya, maʉ̃ẽnabema Jonásba Daizeze bedꞌeata jarabʉrʉba ãzhara kꞌazhiruara ãmape Daizezeta pẽwãsidꞌa. Maʉ̃ne mʉ nama bꞌʉra audre zhi zroma Jonás kꞌãñabara.

Ĩbĩrã kꞌakuadꞌebema

³³ Miõba ĩbĩrã kꞌoape merãkꞌa, miã ãna nʉmʉka. Awuarabʉrʉ ʉ̃tʉ bꞌʉbaria deidꞌu zebʉdaba ʉ̃na ũdudꞌamarẽã.

³⁴ Ĩbĩrã kꞌakuadꞌebema dabʉa. Bʉ dabʉta bigabʉrʉ bʉ kꞌakuara jõma ʉ̃na bꞌʉa. Mawũãmina bʉ dabʉta biga ẽbʉrʉ bʉ kꞌakuara pãrĩguadꞌe bꞌʉa.

³⁵ Mawũẽ kĩrãkuitarua bʉa obꞌʉta bʉma bigata bia ẽãneba pãrĩguata bꞌa ẽbamarẽã.

³⁶ Bʉ kꞌakuata jõma ʉ̃na bꞌʉta parĩguadꞌebema ne ẽã bꞌʉbʉrʉ jõma ʉ̃na bꞌaya, ĩbĩrãba bʉta zhi ʉ̃naba ʉ̃nabari kĩrãkꞌa bꞌaya.

Jesúsba jaradꞌa fariseorãnebemata

³⁷ Jesús ma bedꞌeabʉrʉdꞌera fariseo abꞌaʉba jarasia izhi maẽ nekꞌomarẽã. Mawũẽ Jesús deidꞌu wãpe jewedꞌasia nekꞌoita.

³⁸ Fariseoba maʉ̃ta ũdui bĩ ẽãsia ãzha obꞌe kĩrãkꞌa mitia ne ẽã obʉrʉta juwua surrua o ẽãba nekꞌoi nawedꞌa.

³⁹ Maʉ̃ne Jesúsbara mawũãsia: Marã fariseorãta bꞌera vasota, epedꞌekꞌota, ʉ̃rʉ̃bʉrʉ zhi sʉgʉma kĩrãkꞌa bꞌea, mawũãmina marã edꞌara bia ẽãba bira bꞌea, nezrʉga bia ẽãta obꞌeba.

⁴⁰ Marã krĩcha ne ẽã bꞌea, ¿ʉ̃rʉ̃bemata odꞌabara o ẽbasika edꞌabemasidꞌa?

⁴¹ Zuburia bꞌea diaudua mazha ne erubꞌedꞌebemata, mobedꞌeba marã jipadꞌe mitia ne ẽã bꞌeaya.

⁴² ¡Daizezebara pua kꞌawua oya marã fariseorãta bꞌera! Marãbara menta kiduata, ruda kiduata, ne udꞌebema kiduata diez bꞌʉabʉdaza abꞌa Daizezea diabada. Mawũãmina zhãrã kĩrãẽpa bia edadꞌa ẽã, miã Daizezera kʉãgꞌadꞌa ẽã. Maʉ̃ne maʉ̃trʉ aribꞌaedꞌaidꞌe bꞌʉa, ne wuaabema kenabꞌari ẽã aribꞌae bꞌedꞌe.

⁴³ ¡Daizezebara pua kꞌawua oya marã fariseorãta bꞌera! Nokꞌorãta jewedꞌabari maẽ jewedꞌa krĩñadea de zhi jʉrebada nʉme maẽrã, marã wawia saludꞌaita krĩñadea pʉwʉrʉdꞌe kꞌabana maẽrã.

⁴⁴ ¡Daizezebara pua kꞌawua oya marã ũrãgꞌa Moisédꞌe jarabadata bꞌera, fariseorãta bꞌera, marã sewa bibaʉta bꞌea! Mawũẽ beuwãrã jou nʉmeta ũdudꞌa ẽkĩrãkꞌa bꞌea, mitiata ʉ̃rʉ̃ nebʉdata zhãrãba kꞌawuadꞌa ẽkĩrãkꞌa bꞌea.

⁴⁵ Mawũãĩ ũrãgꞌa Moisédꞌe jarabariba panaʉ̃ mawũãsia: Miã Ũrãgꞌabari, bʉa maʉ̃ta jarabʉrʉbara bĩ ẽã jarabʉrʉa daisidꞌa.

⁴⁶ Mawũãĩ izhara mawũãsia: ¡Daizezebara pua kꞌawua oya marã ũrãgꞌa Moisédꞌe jarabadata bꞌesidꞌa! Marãbara zhãrãã aribꞌaebibada miõba bꞌe ẽãta, mawũãmina mazhara aribꞌaedꞌa ẽã.

⁴⁷ ¡Marã Daizezebara kꞌawua oya! Marãbara Daizezeba bedꞌeata jarabibarirã joudꞌapeadꞌa nʉmema ne pãrãbada, maʉ̃rã beakuasidꞌa marã zhibarirã bꞌeadꞌaba.

⁴⁸ Aramaʉ̃nerã marã krĩcha abꞌarika bꞌea mazhi zhibarirãba odꞌapeadꞌadꞌera. Ãzhara wãrãne beakuasidꞌa, waya marãbara maʉ̃rã joudꞌapeadꞌa nʉmema ne pãrãbada.

⁴⁹ Maʉ̃ba arimaẽ kꞌawua Daizezebara mawũãsia: Mʉãrã marãma zokꞌaya mʉã bedꞌeata jarabibarirãta, mʉ bedꞌeata jara wãbadata. Maʉ̃rãnebema ʉ̃kʉrʉ beakuadꞌaya, ʉ̃kʉrʉra zuburia odꞌaya pẽwã.

⁵⁰ Idꞌi ewade bꞌera Daizezebara kꞌawua oya izha bedꞌeata jarabibarirã bebu jõmaʉ̃ kꞌarea, bea uda ẽjũã osidꞌadꞌeba ʉ̃taa.

⁵¹ Maʉ̃ta Abel bebudꞌeba Zacaría bebu bitabai nʉmʉã, Zacaríara beasidꞌa altar maẽ Daizeze dedꞌa. Mʉã marãã jaraya, maʉ̃rã jõmaʉ̃ kꞌarea Daizezebara kꞌawua oya idꞌi ewade bꞌeta.

⁵² ¡Daizezebara pua kꞌawua oya marã ũrãgꞌa Moisédꞌe jarabadata bꞌera! Marãbara idaribidꞌa ẽã Daizezedꞌebema kꞌawuadꞌaira. Miã mazhabidꞌa kꞌawuadꞌa ẽã, zhi kꞌawua krĩñabʉdaara idaribidꞌa ẽã.

⁵³ Jesúsba maʉ̃ta jarabʉrʉdꞌera ũrãgꞌa Moisédꞌe jarabadara fariseorã bawara kꞌãbãẽã bĩ ẽãsidꞌa, mawũẽ bedꞌeata widꞌisidꞌa ne bio jara bedꞌeamarẽã.

⁵⁴ Aramaʉ̃ne wãẽãbidꞌape izhi bedꞌeadꞌeba jidꞌaita.