Lucas 10 - Porciones del Nuevo Testamento

Jesúsba zokꞌakuadꞌa setenta

¹ Maʉ̃ tẽã Jesúsbara dewara awʉrʉrãta setenta jʉrʉkuape izhi naa ũme ũmekꞌa zokꞌakuasia pʉwʉrʉza izhi wãĩ maẽ.

² Maʉ̃nerã mawũãsia: Wãrãnebai mʉ ũrãgꞌa ĩjãnaĩrã bioa, mawũãmina miã ũrãgꞌadꞌaira bio ẽã. Maʉ̃ba widꞌiudua Daizeze zhãrã Zhibaria, miã ũrãgꞌabadata zokꞌamarẽã izhidꞌebema ĩjãĩta bꞌema.

³ Wãũdua, mʉã marã oveja zakerã kĩrãkꞌa zokꞌabʉrʉa usa pãta bꞌedꞌe edꞌa.

⁴ Zũbira ederãũdua, miã talegota, miã sandalia trokꞌa jʉ̃ĩta. Odꞌera zhãrã bawara dããrã bedꞌearãũdua.

⁵ Baridu maẽ marã deidꞌu wãbʉdadꞌera naara mawũãũdua: Daizezedꞌeba marã adu-a bꞌeaya.

⁶ Iabꞌa adu-a bꞌaidꞌe bꞌʉta mama bꞌʉbʉrʉ, marãba adu-a bꞌaidꞌebema jarabʉdara izhima wãña. Mawũã bꞌaidꞌe bꞌʉ ẽbʉrʉ maʉ̃ adu-a bꞌaidꞌebema mazhima zeya.

⁷ Abꞌaʉ dedꞌa kꞌopane duanadua, kꞌoudua, doudua marãã diabʉdata, traja bꞌʉra kꞌãrẽ diadꞌaidꞌe bꞌʉa. Deza kꞌãĩrãũdua.

⁸ Baridu pʉwʉrʉedꞌa jũẽbʉdadꞌe marãta bia edadꞌara kꞌoudua marãã diabʉdata.

⁹ Kꞌayata mama bꞌera bꞌebiudua, mobe mawũãũdua: Marã kꞌaita basia Daizezeta Nokꞌodꞌebemata.

¹⁰ Mawũãmina baridu pʉwʉrʉdꞌe edꞌa wãbʉdadꞌe marãta bia edadꞌa ẽbʉrʉ oidꞌu wãnape mawũãũdua:

¹¹ Egoro jarra marã pʉwʉrʉdꞌebema dai jẽrũma kꞌaradꞌara daibara niãwedꞌaya marã Daizezeba pua kꞌawua oidꞌebemata. Mawũãmina kꞌawuaudua, Daizezeta Nokꞌodꞌebema marã kꞌaita basia.

¹² Mʉã marãã jaraya, Daizezeba kꞌawua obʉrʉ ewadera Sodoma pʉwʉrʉdꞌe bꞌeadꞌara yarebai zuburia nʉmabigaya maʉ̃ pʉwʉrʉdꞌe bꞌe kꞌãñabara.

Pʉwʉrʉ tabꞌe maẽ ĩjãna ẽbadꞌapeadꞌa

¹³ ¡Daizezebara pua kꞌawua oya Corazín pʉwʉrʉdꞌe bꞌera! ¡Pua kꞌawua oya Betsaida pʉwʉrʉdꞌe bꞌera! Tiro pʉwʉrʉdꞌe, Sidón pʉwʉrʉdꞌe ũdudꞌakꞌata obʉrʉta mʉã marã maẽ odꞌata osibʉrʉ, dããrãbʉrʉta sopuaba wua paima jʉ̃ jewedꞌadꞌape, sopuaba burudꞌe itarra podꞌape, kꞌazhiruara ãmape Daizezeta pẽwãkꞌausidꞌa.

¹⁴ Mawũẽ Daizezeba kꞌawua obʉrʉdꞌera Tiro pʉwʉrʉdꞌe, Sidón pʉwʉrʉdꞌe bꞌeadꞌara yarebai zuburia bꞌeabiya marã kꞌãñabara.

¹⁵ Capernaúm pʉwʉrʉdꞌe bꞌera ʉ̃taa wãĩta krĩcha bꞌedꞌe Daizezebara pepekuaya beudꞌapeadꞌata zuburia bꞌeabiima.

¹⁶ Marã mʉnebemata bꞌe bedꞌeata ũrĩnarã mʉ bedꞌeata ũrĩnaña, marãta seribidꞌa ẽbʉrʉ mʉta seribidꞌa ẽã, mʉta seribidꞌa ẽãrã mʉ zokꞌadꞌata seribidꞌa ẽã.

Jẽrũya zekuadꞌa setenta zokꞌakuadꞌata

¹⁷ Setenta zokꞌakuadꞌara jẽrũya sobia zebʉdata Jesúa mawũãsidꞌa: Nokꞌó, jaira dai edre nʉmeã bʉ trʉ̃neba.

¹⁸ Mawũãnaĩ mawũãsia: Mʉã ũdusia ãtõmiã ʉ̃treba bꞌaeta ba erudru kĩrãkꞌa.

¹⁹ Mʉã marãã zareata diasia dãmata, drusũrẽta nebʉdara eubꞌari ẽbamarẽã, ãtõmiã zarea jõmaʉ̃ ʉ̃rʉ̃ diasia, mawũẽ marã miã kꞌãrẽba sãwũã ẽã.

²⁰ Mawũãmina sobiarãũdua jaita marã edre nʉme kꞌarea. Awuarabʉrʉ sobiaudua marã trʉ̃ta zhi bꞌʉma kꞌarea ʉ̃tre.

Jesús sobiadꞌa

²¹ Maʉ̃ ewadera Jesús Jawurebiadꞌeba sobia mawũãsia: Zeze, mʉã bʉra ibia jaraya, bʉra ʉ̃trebema Nokꞌoa, drua Nokꞌoa, bʉ mawũã Nokꞌodꞌebema bʉara kꞌawuabi ẽbasia ãzhikusa krĩcha banata bꞌeara, awuarabʉrʉ kꞌawuabisia krĩcha bana ẽãta bꞌea. Zeze, bʉma mawũã biga basia.

²² Izhidꞌebemata jõma mʉãã kꞌawuabisia mʉ Zezebara. Miõba kꞌawua ẽã mʉ zhi Warradꞌebema, awuarabʉrʉ kꞌawua bꞌʉa mʉ Zezebʉrʉ. Miõba kꞌawua ẽã mʉ Zezedꞌebema, awuarabʉrʉ kꞌawua bꞌʉa mʉ zhi Warrabʉrʉ. Mawũẽ mʉ zhi Warraba kꞌawuabi krĩñabʉrʉara kꞌawuabiya.

²³ Mobebʉrʉ izha jʉrʉkuadꞌama pʉrʉwape dobꞌaʉdꞌe mawũãsia: Sobia bꞌeaya marãba ũdu bꞌeta ũdu bꞌera.

²⁴ Mʉã marãã jaraya, Daizezeba bedꞌeata jarabibarirã bioba, reyrã bioba ũdu krĩña bꞌeasia mʉã obꞌʉta marãba ũdu bꞌeta, mawũãmina ũdudꞌa ẽbasia. Ũrĩ krĩña bꞌeasia marãba ũrĩ bꞌeta, mawũãmina ũrĩna ẽbasia.

Biata bꞌadꞌa Samariadꞌebemata

²⁵ Ũrãgꞌa Moisédꞌe jarabarita piradrʉpe wãẽãbiita Jesúa mawũãsia: Miã Ũrãgꞌabari, ¿mʉã kꞌãrẽ obʉrʉba jidaipe Daizeze ũme bꞌai jõ ẽãrã?

²⁶ Mawũãĩ izhara mawũãsia: ¿Kꞌãrẽta jara bꞌʉ tabꞌʉ Daizeze ũrãgꞌadꞌera? ¿Bʉa kꞌãrẽta lebari?

²⁷ Mawũãĩ izhara panaʉ̃ mawũãsia: Nokꞌo Daizezera soidꞌu kʉãgꞌarua, bʉzhi jawureidꞌuba, bʉzhi zareaidꞌuba, bʉzhi krĩchaidꞌuba. Bʉzhi zhãrã kʉãgꞌarua bʉzhi kĩrãkꞌa.

²⁸ Mawũãĩ Jesúsbara mawũãsia: Bʉara bia panaʉ̃bʉrʉa. Maʉ̃ta odua, mawũãrã Daizeze ũme bꞌai jõ ẽã bꞌaya.

²⁹ Mawũãĩ izhara sewa bia widꞌi krĩñape Jesúa mawũãsia: ¿Kꞌaipe mʉ zhãrã?

³⁰ Mawũãĩ Jesúsbara panaʉ̃ mawũãsia: Ũmakĩrãta wãsia Jerusalénneba Jericó pʉwʉrʉedꞌa, maʉ̃ne nezrʉgamiãrãba jidadꞌape zrʉgasidꞌa ne erubꞌadꞌata, wuata. Nitbia puodꞌape wãsidꞌa, aramaʉ̃ne beudea tabꞌʉesidꞌa.

³¹ Maʉ̃ne sacerdoteta maʉ̃ odꞌe zebʉrʉdꞌera akʉ jipa berabꞌarisia.

³² Abꞌarika Levidꞌebemata arakꞌaita zebʉrʉdꞌera akʉ jipa berabꞌarisia.

³³ Mawũãmina Samariadꞌebemata odꞌe wãta izhi kꞌaita zebʉrʉdꞌe ũdui sozuburiasia.

³⁴ Mawũẽ orrape zhara kꞌõgꞌozoadꞌata wuaba pãrĩkuasia, maʉ̃nerã vinoba sʉgʉpe olivo dragꞌaba soasia. Mobe izhi burrodꞌe kꞌobꞌʉpe edesia odꞌe wã nʉmʉta kꞌãĩbadaidꞌu, aramaʉ̃ne akʉsia.

³⁵ Nrũẽma izhi wãba plata ewari ũme erbꞌaribʉrʉta denario ũme erbꞌaripe de zhibaria diabʉrʉta mawũãsia: Naʉ̃ta akʉdua. Jõma bʉa audre gastabʉrʉra mʉã pagꞌaya mʉ wakusa zebʉrʉdꞌe.

³⁶ ¿Maʉ̃rã ũbeadꞌebemabara bʉma sãʉ̃ba ãzhi zhãrãta bꞌasi nezrʉgamiãrãba jidadꞌapeadꞌara?

³⁷ Mawũãĩ izhara mawũãsia: Zhi sozuburiadꞌaba. Mawũãĩ Jesúsbara mawũãsia: Wãpe bʉabidꞌa abꞌarika odua.

Jesúsba akʉdꞌe wãna Marta María ũme

³⁸ Jesús odꞌe wãne pʉwʉrʉ zakedꞌe edꞌa wãsia, maʉ̃ne wũẽrã Marta abadaba izhi dedꞌa bia edasia.

³⁹ Martara mebea bara bꞌasia María abadata. Maʉ̃ Maríara Jesús jẽrũ kꞌaita jewedꞌa bꞌepe ũrĩ bꞌesia izhi bedꞌeata.

⁴⁰ Mawũãmina Marta ĩñabasia nʉmʉta kꞌãrẽ oita bioba Jesús orrape mawũãsia: Nokꞌó, ¿bʉara kĩrãkuita ẽka mʉ mebeaba mʉ abꞌa ne aribꞌaebi nʉmʉrã? Jaradua mʉ kꞌarebamarẽã.

⁴¹ Mawũãĩ Jesúsbara panaʉ̃ mawũãsia: Marta, bʉra kꞌawua ẽã ĩñabasia nʉmʉã kꞌãrẽ oita bioba.

⁴² Mawũãmina Daizeze bedꞌeata ũrĩnaĩ barata bꞌʉa. Maríabara maʉ̃ta biata jidabʉrʉa, mawũẽ miõba ãĩ tʉdꞌa ẽã.