Juan 4 - Porciones del Nuevo Testamento

Jesús bedꞌeadꞌa wũẽrã Samariadꞌebemaa

¹ Nokꞌo Jesúsbara kꞌawuasia fariseorãbara ũrĩsidꞌata zhãrãba mawũãbʉdata: Jesúsbara zhãrã audre jʉre buru kꞌoekua nʉmʉã Juan kꞌãñabara.

² Mawũãsidꞌa Jesúsbara zhãrã buru kꞌoekua nʉmʉ ẽãta, awuarabʉrʉ zhãrã buru kꞌoe duanasia izha jʉrʉkuadꞌabʉrʉ.

³ Fariseorã bĩ ẽã bꞌeta kꞌawuape Judea druadꞌebara wãbʉrʉta, wakusa wãsia Galilea druaedꞌa.

⁴ Maʉ̃nerã berabꞌariita bara basia Samaria druadꞌe.

⁵ Aramaʉ̃ne zesia pʉwʉrʉ Samaria druadꞌebemata Sicar abadaidꞌu, mama kꞌaita bꞌasia Jacobo bꞌadꞌaba druata diadꞌata zhi warra Joséa.

⁶ Mama bꞌasia poso Jacobodꞌeta. Mawũẽ Jesúra odꞌe mapoea zebʉrʉba jewedꞌasia poso kꞌaita. Maʉ̃nerã nʉmasia ʉ̃matipa badea.

⁷ Maʉ̃ne wũẽrãta Samariadꞌebemata zesia baniã juedꞌe, mawũẽ Jesúsbara mawũãsia: Baniã mʉã doita diadua.

⁸ Maʉ̃ẽna izha jʉrʉkuadꞌara pʉwʉrʉedꞌa wãsidꞌa kꞌãrẽ kꞌoita edadꞌe.

⁹ Mawũãĩ wũẽrã Samariadꞌebemabara mawũãsia: ¿Bʉra judíota sãwũã baniã doita mʉãã widꞌibʉrʉ, maʉ̃ne mʉrã wũẽrã Samariadꞌebemata bꞌʉ ẽka? Mawũãsia judíorã Samariadꞌebema bawara zhi biata duanu ẽbaera.

¹⁰ Mawũãĩ Jesúsbara panaʉ̃ mawũãsia: Daizezeba dia bꞌʉdꞌebemata sãwũãta bʉa kꞌawuara, kꞌaiba baniã mʉã doita diadua abʉrʉta bʉa kꞌawuara, bʉara baniã widꞌikꞌausia, mobedꞌeba mʉãrã diakꞌausia baniã dazhi bꞌabi bꞌʉta.

¹¹ Mawũãĩ wũẽrãbara mawũãsia: Nokꞌó, bʉara kꞌãrẽba jueira ne ẽã, maʉ̃ne posora eidꞌua. ¿Mawũẽ bʉara sãmabemata erubꞌʉ baniã dazhi bꞌabi bꞌʉra?

¹² ¿Mobera bʉra audre zhi zromakꞌa zõrã dazhirãta Jacobo kꞌãñabara? Naʉ̃ posora izhara daiita ãmaẽsia, naʉ̃ta do bazhidꞌa izha, zhi warrarãba, izhi pakꞌarãba.

¹³ Mawũãĩ Jesúsbara panaʉ̃ mawũãsia: Naʉ̃ baniãta dobʉrʉra wakusa obisiaya.

¹⁴ Mawũãmina baniã mʉã diabʉrʉta dobʉrʉra obisiakꞌa baya, awuarabʉrʉ baniã mʉã diabʉrʉra izhidꞌe drʉ nʉmaña Daizeze ũme bꞌai jõ ẽãta.

¹⁵ Mawũãĩ wũẽrãbara mawũãsia: Nokꞌó, mʉãã diadua maʉ̃ baniãta, mʉ obisia ẽbaita, miã nama juedꞌe ze ẽbaita.

¹⁶ Mawũãĩ Jesúsbara mawũãsia: Bʉzhi kĩmata trʉ̃ne wãrũã, mobe zeudua naĩnu.

¹⁷ Mawũãĩ wũẽrãbara panaʉ̃ mawũãsia: Mʉrã kĩma ne ẽã. Mawũãĩ Jesúsbara mawũãsia: Bʉara bia jarabʉrʉa bʉra kĩma ne ẽã abʉrʉbara.

¹⁸ Bʉara kĩma edama juesoma bꞌʉa, idꞌi erubꞌʉsidꞌa bʉ kĩma ẽã, mawũẽ bʉa mawũã jarabʉrʉra wãrĩnuã.

¹⁹ Mawũãĩ wũẽrãbara mawũãsia: Nokꞌó, mʉma bʉra Daizezeba bedꞌeata jarabibaria.

²⁰ Dai zhibarirãbara Daizezera ibia jara bꞌeasia naʉ̃ kꞌatumane, maʉ̃ne marãbara jara bꞌea Daizezera Jerusalénnebʉrʉ ibia jaradꞌai barata.

²¹ Mawũãĩ Jesúsbara mawũãsia: Mʉã za jaraita ĩjãrũã, ewarita zeya, maʉ̃nerã marãbara naʉ̃ kꞌatumane miã Jerusalénne ibia jaradꞌa ẽã Daizezera.

²² Marãbara Daizezera ibia jara bꞌeta izhidꞌebema sãwũãta kꞌawuadꞌa ẽã, daibara Daizezera ibia jara bꞌea izhidꞌebema sãwũãta kꞌawua bꞌeta, zhãrã Ẽdrʉbigaira uruba judíorãneba.

²³ Mawũãmina ewarita zeya, maʉ̃ ewarira ya arabasia, mawũẽ Daizeze wãrĩnu ibia jara bꞌebara Jawurebiadꞌeba wãrĩnu ibia jaradꞌaya, Daizezebara krĩña bꞌʉa izhira mawũã ibia jaradꞌaita.

²⁴ Daizezera Jawurea, mawũẽ izhita ibia jara bꞌebara Jawurebiadꞌeba wãrĩnu ibia jaradꞌaidꞌe bꞌʉa.

²⁵ Mawũãĩ wũẽrãbara mawũãsia: Mʉã kꞌawua bꞌʉa zhãrã Ẽdrʉbiira zeita, izhi zebʉrʉdꞌera daia bia jarakꞌaya ne jõma.

²⁶ Mawũãĩ Jesúsbara mawũãsia: Mʉta izhia, mʉãta bʉ ũme bedꞌea kꞌobꞌʉa.

²⁷ Maʉ̃ne izha jʉrʉkuadꞌara zesidꞌa, mawũẽ bia akʉdruasidꞌa wũẽrã ũme bedꞌea kꞌobꞌʉba, mawũãmina miõba widꞌidꞌa ẽbasia kꞌãrẽta widꞌi bꞌʉra, o maʉ̃ wũẽrã ũme kꞌãrẽ ʉ̃rʉ̃ bedꞌea kꞌobꞌʉra.

²⁸ Wũẽrãbara zokꞌo izhidꞌera ãmaẽpe wãsia pʉwʉrʉedꞌa, mobe zhãrã bꞌea mawũãsia:

²⁹ Ũmakĩrãta akʉdꞌe zeudua, jõma jarabʉrʉa mʉã kꞌãrẽ odꞌata. ¿Kꞌãgʉra zhãrã Ẽdrʉbii ẽka?

³⁰ Mawũãĩ pʉwʉrʉdꞌebara wãsidꞌa, aramaʉ̃ne zesidꞌa Jesúsma.

³¹ Maʉ̃ẽna izha jʉrʉkuadꞌabara ibiadꞌe jara mawũãsidꞌa: Miã Ũrãgꞌabari, nekꞌorua.

³² Mawũãnaĩ izhara mawũãsia: Mʉãrã zhikota kꞌoita erubꞌʉa marãba kꞌawuadꞌa ẽãta.

³³ Mawũãĩ izha jʉrʉkuadꞌabara ãzhirãĩnu mawũãsidꞌa: ¿Iabꞌaʉba zhikota wesi ẽka?

³⁴ Maʉ̃ne Jesúsbara mawũãsia: Mʉ zhikora mʉãrã mʉ zokꞌadꞌaba krĩñata oibara, aramaʉ̃ne izha kꞌãrẽ obi nʉmʉkꞌãrĩta jõbiibara.

³⁵ ¿Ne udꞌapeadꞌata bꞌʉaira marãbara jedꞌekꞌo kĩmarẽ wãẽã nʉmʉã abada ẽka? Mawũãmina mʉã marãã jaraya: Ne bꞌʉaita akʉdꞌai kĩrãkꞌa akaudua druadꞌe zhãrã bꞌeta, ya mʉnebemata ĩjãĩta nʉmeã.

³⁶ Ne bꞌʉa nʉmʉbara ne jida bꞌʉa, aramaʉ̃ kĩrãkꞌa nʉmʉbara jara bꞌʉa mʉnebemata ĩjãnamarẽã Daizeze ũme bꞌai jõ ẽãnebemata, mawũẽ ne ubarita ne bꞌʉabari ũme sobiabada kĩrãkꞌa bꞌʉa.

³⁷ Maʉ̃ẽnabemata jarabadara wãrĩnuta mawũã bꞌʉa: Abꞌara zhi ubaria, waya dewarabemata zhi bꞌʉabaria.

³⁸ Aramaʉ̃ kĩrãkꞌa mʉã marã zokꞌasia awʉrʉrãba jaradꞌapeadꞌa maẽ marãneba ĩjãnamarẽã, aramaʉ̃ne awʉrʉrãba jaradꞌapeadꞌa maẽ marãneba ĩjã tupudꞌea.

³⁹ Samaria bidꞌarã maʉ̃ pʉwʉrʉdꞌe bꞌebara bioba Jesúsdꞌebema ĩjãsidꞌa, maʉ̃ẽnabema wũẽrãba mawũãsia: Kꞌãʉ̃bara mʉãã jarasia mʉã kꞌãrẽ odꞌata jõma.

⁴⁰ Maʉ̃neba Samaria bidꞌarã Jesúsma zedꞌape zuburia bedꞌeasidꞌa ãzhi bawara bꞌemarẽã, mawũẽ mama bꞌesia ewari ũme.

⁴¹ Aramaʉ̃ne ãmaña bioba ĩjãsidꞌa bedꞌeata izha jarabʉrʉta ũrĩbʉdaba.

⁴² Maʉ̃nerã wũẽrãã mawũãsidꞌa: Daibara ĩjã kꞌopanʉ ẽã bari bʉa jarabʉrʉdꞌeba, awuarabʉrʉ izhi bedꞌeara jipa daiba ũrĩbʉda, mawũẽ kꞌawuabʉda naʉ̃ wãrĩnu ẽjũãne zhãrã bꞌeta Ẽdrʉbiita.

Jesúsba bꞌebidꞌa nokꞌo warrata

⁴³ Mawũã ewari ũme bꞌape Samaria druadꞌebara Jesús wãsia Galilea druaedꞌa.

⁴⁴ Izhi Jesúsba jaradꞌa kĩrãkꞌa Daizezeba bedꞌeata jarabibarira izhi druadꞌebʉrʉ bia edadꞌa ẽã.

⁴⁵ Galilea druaedꞌa zebʉrʉdꞌera Galilea bidꞌarãbara bia edasidꞌa, maʉ̃ẽnabema ãzhara ũdusidꞌa Jerusalénne kꞌãrẽ odꞌata jõma, Egiptodꞌeba ẽzoadꞌata krĩcha fiesta odꞌapeadꞌa maẽ mawũã ũdusidꞌa, ãzhisidꞌa wãsi baera maʉ̃ fiestaidꞌura.

⁴⁶ Jesús wakusa zesia Caná pʉwʉrʉedꞌa, maʉ̃ pʉwʉrʉra Galilea druadꞌebema, mama baniãta vino babidꞌa basia. Maʉ̃ne Capernaúm pʉwʉrʉdꞌe bꞌasia reyba nokꞌota bꞌʉkꞌãrĩta, maʉ̃ warrata kꞌaya nʉmasia.

⁴⁷ Maʉ̃ne izha ũrĩsia Jesús zebʉrʉta Judea druadꞌeba Galilea druaedꞌa, mawũẽ izhima zepe zuburia bedꞌeasia zhi warrata bꞌebidꞌe wãmarẽã beubodꞌota.

⁴⁸ Mawũẽ Jesúsbara mawũãsia: Ũdudꞌakꞌata mʉã obʉrʉta ũdubʉda ẽãrã marãbara mʉnebema ĩjãna ẽã.

⁴⁹ Mawũãĩ reyba nokꞌota bꞌʉkꞌãrĩbara mawũãsia: Nokꞌó, zerua mʉ warra beui nawedꞌa.

⁵⁰ Mawũãĩ Jesúsbara mawũãsia: Dedꞌaa wãrũã, bʉ warrara bꞌidꞌa. Maʉ̃bara ĩjãsia Jesúsba mawũãbʉrʉra, mawũẽ wãsia.

⁵¹ Odꞌe wãne izhi nezokꞌarãba kĩrãzhu zedꞌape mawũãsidꞌa: Bʉ warrara bꞌidꞌa.

⁵² Mawũãnaĩ izhara widꞌisia kꞌãrẽ ʉ̃madaudꞌe arigu basita. Mawũẽ mawũãsidꞌa: Nuwuedꞌa ʉ̃madau pʉrra a la una kenabꞌarisia kʉwamiãbara.

⁵³ Mawũẽ zhi zezebara kꞌawuasia maʉ̃ ʉ̃madaudꞌe Jesúsba bʉ warrara bꞌidꞌa adꞌata. Mawũẽ izhara Jesúsdꞌebema ĩjãbʉrʉba ĩjãsidꞌa zhi kĩmaba zhi warrarãba.

⁵⁴ Jesúsbara maʉ̃ta ũdudꞌakꞌata zhi ũmeta osia, Judea druadꞌeba Galilea druaedꞌa wãpe.