Juan 3 - Porciones del Nuevo Testamento

Jesúsma zedꞌa Nicodemo

¹ Fariseorãnebemata bꞌasia Nicodemo abadata, nokꞌota bꞌasia judíorãnebemata.

² Maʉ̃ta diamase Jesúsma zepe mawũãsia: Miã Ũrãgꞌabari, daibara kꞌawua panʉã bʉra Daizezeba zokꞌadꞌata miã ũrãgꞌamarẽã, ũdudꞌakꞌata bʉa kꞌãwũã obꞌʉra miõba obꞌe ẽã Daizezeta izhi ũme bꞌʉ ẽbʉrʉ.

³ Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabꞌa wakusa tobʉrʉ ẽãrã Daizezeta Nokꞌodꞌebema ẽã.

⁴ Mawũãĩ Nicodemobara mawũãsia: ¿Dazhira zõrãta sãwũã wakusa toipe? ¿Mobera wakusa zhi papa bꞌitaedꞌa wã bꞌeika wakusa toita?

⁵ Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabꞌa baniãneba Jawurebiadꞌeba tobʉrʉ ẽãrã edꞌa wã bꞌe ẽã Daizezeta Nokꞌo maẽrã.

⁶ Beubaridꞌeba tobʉrʉra zharadꞌebema. Mawũãmina Jawurebiadꞌeba tobʉrʉra Jawurebiadꞌebema.

⁷ Kꞌawua ẽã krĩcharãrũã mʉã jarabʉrʉ kꞌarea zhãrã wakusa todꞌai barata.

⁸ Pʉ̃ãdrʉra pʉ̃ãdrʉbaria izha krĩña maẽba, zhi ugara bʉara ũrĩbaria, mawũãmina bʉara kꞌawua ẽã sãmaʉ̃ba uruta miã sãmaã wãta. Aramaʉ̃ kĩrãkꞌa sãwũãta kꞌawua ẽmina dajada awuara bꞌebaria Jawurebiadꞌeba tobʉrʉra.

⁹ Mawũãĩ Nicodemobara mawũãsia: ¿Maʉ̃ mawũãrã sãwũãpe?

¹⁰ Mawũãĩ Jesúsbara panaʉ̃ mawũãsia: ¿Bʉra Israel bꞌeta ũrãgꞌabarita maʉ̃ sãwũãta kꞌawua ẽka?

¹¹ Mʉã wãrĩnu bʉaa jaraya, daibara kꞌãrẽ kꞌawua bꞌeta jarabada, kꞌãrẽ ũdudꞌata jarabada, mawũãmina marãbara ĩjãna ẽã daiba jara bꞌera.

¹² Ne udꞌabemata mʉã marãã jarabʉrʉta ĩjãna ẽbʉrʉ, ¿sãwũã ĩjãnaĩpe mʉã marãã jarara ne ʉ̃trebemata?

¹³ Maʉ̃ kꞌawuaira miõta ʉ̃tre wãrĩzekꞌa, awuarabʉrʉ ʉ̃treba zedꞌaba kꞌawua bꞌʉta mʉ Beubari Bape bꞌʉba kꞌawua bꞌʉa ne ʉ̃trebemarã.

¹⁴ Drua drudrua tabꞌʉ maẽ Moiséba dãma ʉ̃tʉ jirabꞌʉdꞌa kĩrãkꞌa, mʉ Beubari Bape bꞌʉra ʉ̃tʉ jirabꞌʉdꞌaya.

¹⁵ Aramaʉ̃ne mʉnebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta.

Daizezebara kʉãgꞌa ẽjũãne bꞌera

¹⁶ Daizezebara ẽjũãne bꞌera kꞌãbãẽã kʉãgꞌaba diasia zhi Warra abꞌa bꞌʉta, izhidꞌebemata ĩjãbʉrʉra adua ẽbamarẽã, awuarabʉrʉ erubꞌamarẽã Daizeze ũme bꞌai jõ ẽãta.

¹⁷ Daizezebara zhi Warra naʉ̃ ẽjũãẽna zokꞌa ẽbasia aduabimarẽã ẽjũãne bꞌeta, awuarabʉrʉ zokꞌasia ẽjũãne bꞌera ẽdrʉdꞌamarẽã izhidꞌeba.

¹⁸ Izhidꞌebemata ĩjãbʉrʉra adua ẽã, mawũãmina zhi ĩjã ẽãrã aduaya, ĩjã ẽãba Daizeze Warra abꞌa bꞌʉdꞌebemata.

¹⁹ Kꞌãrẽneba aduaita mʉã jaraya: Ʉ̃nata bꞌʉra zesia ẽjũãne bꞌema, mawũãmina zhãrãbara pãrĩguata audre kʉãgꞌasidꞌa ʉ̃na kꞌãñabara, bia ẽãta obꞌeba.

²⁰ Bia ẽãta obꞌebara ʉ̃nata bꞌʉra krĩñana ẽã, aramaʉ̃ne ʉ̃nata bꞌʉma zedꞌa ẽã, ãzha obꞌeta kꞌawuadꞌa ẽbamarẽã.

²¹ Mawũãmina Daizezedꞌebema wãrãta aribꞌae bꞌʉra ze bꞌʉa ʉ̃nata bꞌʉma, aramaʉ̃ne kꞌawuadꞌamarẽã izhara obꞌʉta Daizezedꞌebemata.

Juanba jaradꞌa Jesúsdꞌebemata

²² Maʉ̃ tẽã Jesús zesia izha jʉrʉkuadꞌa bawara Judea druaedꞌa, ãzhi bawara mama bꞌasia zhãrã buru kꞌoekua.

²³ Juanbidꞌa zhãrã buru kꞌoekua nʉmasia Enón pʉwʉrʉdꞌe Salin kꞌaita, mama tadrʉ bꞌasi baera dota kꞌãbãẽã. Mawũẽ zhãrã zepe buru kꞌoe nʉmeãsia.

²⁴ Maʉ̃nerã wadꞌi cárceldꞌe bꞌʉdꞌa ẽbasia Juan.

²⁵ Maʉ̃ne Juanba jʉrʉkuadꞌata judíorã ʉ̃kʉrʉ bawara kꞌaikꞌaiasidꞌa Daizeze kĩrãbita bia bꞌeaita ne sʉgʉ badadꞌebema kꞌarea.

²⁶ Maʉ̃rãta Juanma zedꞌape mawũãsidꞌa: Miã Ũrãgꞌabari, Jordán kĩrãrẽ bʉ ũme kꞌobꞌadꞌadꞌebemata bʉa daia jaradꞌabara zhãrã buru kꞌoekua nʉmʉã, mawũẽ jõma izhima ze nʉmʉã.

²⁷ Mawũãnaĩ Juanbara panaʉ̃ mawũãsia: Miõba mawũã jʉre nʉma bꞌe ẽã Daizezeba dia ẽbʉrʉ.

²⁸ Mʉã jaradꞌara marãbara kꞌawua bꞌeta mʉãrã mawũãsia: Mʉ ẽã zhãrã Ẽdrʉbira, awuarabʉrʉ izhi zeita jarakꞌamarẽã mʉrã izhi na zokꞌadꞌapeadꞌa.

²⁹ Juwua jidaidꞌera wũẽrã zhũmakĩrãba erunʉmʉã, izhi ũme zhi biata kꞌaita bꞌʉra izhi nemita ũrĩ bꞌʉba kꞌãbãẽã sobia bꞌidꞌabaria. Jesúsdꞌebema ũrĩ bꞌʉba aramaʉ̃ kĩrãkꞌa mʉrã kꞌãbãẽã sobia bꞌʉa.

³⁰ Jesúra wuaabʉrʉ zhi zromata bꞌeya, mawũãmina mʉrã zhi zroma ẽãta bꞌeya.

Ʉ̃treba zedꞌadꞌebema

³¹ Jesús ʉ̃treba zebʉrʉra jõmaʉ̃ audre zhi zroma, druadꞌebemata bꞌʉra druadꞌebemata bꞌʉba ne druadꞌebemata jara bedꞌea bꞌʉa, mawũãmina ʉ̃treba zebʉrʉra jõmaʉ̃ audre zhi zroma.

³² Mawũẽ ʉ̃tre izha ũdudꞌata izha ũrĩnata jara bꞌʉa, mawũãmina miõba ĩjãna ẽã izha jara bꞌʉra.

³³ Izha jara bꞌʉta iabꞌaʉba ĩjãrã maʉ̃ĩtara Daizezera wãrĩnu bedꞌea bꞌʉa.

³⁴ Daizezeba zokꞌadꞌabara Daizeze bedꞌeata jara bꞌʉa Daizezeba Jawurebiata diadꞌaba.

³⁵ Zhi Zezebara zhi Warra kʉãgꞌa, mawũẽ ne jõma chãbꞌarisia izhi juwuadꞌe.

³⁶ Zhi Warradꞌebemata ĩjã bꞌʉbara erubꞌʉa Daizeze ũme bꞌai jõ ẽãta, mawũãmina zhi Warradꞌebemata ĩjã ẽãbara erubꞌa ẽã Daizeze ũme bꞌai jõ ẽãrã, awuarabʉrʉ Daizezeba kĩrũbiba pua kꞌawua oya.