तितस 3 - चितवनिया थारुयसल कामक तहिँया सबदिन तयार रहिह 1 वसने करके विस्वासिसभके सासकसभ हसे सरकारि मन्सावानिक अदलमा रहे परतइ, कहलि माने परतइ। हुनुकाके यसल काम करेके सबदिन तयार रहे कहके सम्झोसि। 2 हुनुका ककरहुँक बदनाम झिन करइ हसे झगडा फेनि झिन करइ। बरु हुनुका सान्त भके हसे जम्मे जनसाङे नम्र व्यबहार करे पतरइ। 3 केहकेकि हमरा फेनि एक समयमा मुरुख, हइलठ, ठगाइल हसे जम्मे खलिक कामवासना तके सुख-विलासमा फसल रहलहुँ। वसने हमरा एक-दोसरि जनके घिरिना हसे डाह करते दिन बितोहुँ। हमरा हेलित रहलहुँ हसे एक-दोसरि जनके हेला करइ। 4 बाकि जब हमार मुक्तिदाता परमेस्वरक दाया हसे प्रेम परकट भेलइ, 5 तब हुने हमराके बचोलसि। इअ त हमरा धरमि कामसे हइने, बाकि हमराके दाया करलेसे बचोले बडसि। हुने हमराके पवितर-आत्मासे हमार पाप धोके हमराके लउठा जनम हसे लउठा जिवन देलसि। 6 हुने हमार मुक्तिदाता येसु ख्रिस्टसे हमार वपरा प्रसस्त मतरामा पवितर-आत्मा खन्योलसि, 7 ताकि हमरा हुनेक अनुग्रहसे धरमि ठहरके अनन्त जिवनक यासाक हकदार हखे सकुँ। 8 इअ बात सदियो हखइ। तुइ इअ बतवामा जोड देहि कहके मुइ चाहसहिँ, ताकि जुने परमेस्वरमा विस्वास करले बडइ, हुनुका यसल काममा ध्यान देइ। केहकेकि इअ जम्मे मन्सावानिक तहिँया यसल हसे फाइदाक बात हखइ। 9 बाकि व्यरथक ठोरा-बोलिसे, पहिलाक पुरखाक वंसावलिक बात, फुट हसे यहुदि व्यवस्था सम्बन्धि झगडासे तनाउ रहिह। केहकेकि इअ त काम हइने लगना हसे व्यरथक बात हखइ। 10 मन्डलियामा फुट यनलहराके दु पारिलइ चेतवनि देसि। यगर उअ नाहिँ मनबिय जउँ, वकरसाङे सम्बन्ध झिन रखिह। 11 यसनुक मन्से भ्रस्ट हसे पापि रहसइ कहके जनिह। हुनुकर यपने पपवा हुनुकाके कतेक दोसि बडइ कहके देखोसइ। 12 जब मुइ तोर लघिना अर्तिमास कि तुखिकसके पठोबहि, तुइ जसके भेले फेनि मोरके निकोपोलिस सहरवामा भेटे यइसि, केहकेकि मुइ वहवहिँ जाड बितावेके निरनय करले बडहिँ। 13 तोहरा वकिल जेनस हसे अपोल्लोसक यातरामा चाहिँ लगना जम्मे चिजु मदत करेके कोसिस करिह। 14 हमार मन्सावाह यसल काममा यापन जुन बितोइ, ताकि खाँ चाहि लगलि जुनवामा मदत करे सकइ। हुनुका काम बिनाक झिन रहइ। 15 यहवाँ मोरसाङे रहलहरा जम्मे जन तोरके नमस्कार पठोले बडइ। हमराके माया करलहरा विस्वासिसभके नमस्कार बडइ। परमेस्वरक अनुग्रह तोहार जम्मे जनसाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.