तितस 2 - चितवनिया थारु

यसल सिछा

¹ बाकि तुइ सदि सिछामा भेलि बतवा मतरे सिखोसि।

² बुढ मरदाना मन्‍सेसभके संयमि, गम्‍भिर, इमान्‍दार हखेके सिखोइह। हुनुका विस्‍वास, माया हसे सहसानमा पाक्‍का हखे परतइ।

³ वसने करके, बुढि जनियानिसभके परमेस्‍वरके यादर देना जिन्‍गि बितावेके सिखोइह। हुनुका बिना कारन दोसरे जनके निना झिन करइ हसे मोदक वसमा झिनपरइ, बरु जथि बात यसल बडइ, उअ बतवा हुनुका दोसरे जनके सिखावे परतइ।

⁴ तब हुनुका बाठिन जनियानिके यापन-यापन दुलहवानिके हसे बेटवा-बेटियानिके माया करेके तहिँया सिखावे सकतइ।

⁵ बाठिन जनियानि संयमि, पवितर, दयगर हखे परतइ। हुनुका यापन दुलहवाक अदलमा रहके यापन घर-परिवारक जम्‍मे जिम्‍मेवारि डउलसे पुरा करे परतइ, ताकि कुनहुँ फेनि परमेस्‍वरक वचनक निना करे झिन सकइ।

⁶ वसने करके, ढोठनियावानिके आत्‍मसंयमि हखेके सिखोइह।

⁷ तुइ यापन जम्‍मे कमवामा हुनुकर यागा यपनहिँके यसल नमुना बनके देखोसि। तुइ इमान्‍दार हसे गम्‍भिर भके,

⁸ सदि सिछा देसि, ताकि तोहार विरोधमा उठलहरा किहो हइने कहे सकके लजियामा परइ।

⁹ कमारासभके यापन-यापन मलिकवाक अदलमा रहके जम्‍मे काममा हुनुकाके खुसि पारइ कहके सिखोइह। हुनुका यापन मलिकवासाङे मुहे-मुहे झिन लगइ, हसे

¹⁰ हुनुका झिन चोरोइ, बाकि जम्‍मे काममा पुरा विस्‍वासिलो हसे इमान्‍दार हखे परतइ। यसने हुनुकर करलि जम्‍मे कमवासे हमार मुक्‍तिदाता परमेस्‍वरक वचनक इज्‍जत बढोतइ।

¹¹ केहकेकि जम्‍मे मन्‍सावानिक मुक्‍तिक तहिँया परमेस्‍वरक अनुग्रह परकट भेल बडइ।

^12-13 जब हमरा, हमार महान परमेस्‍वर हसे मुक्‍तिदाता येसु ख्रिस्‍टक महिमाक परकट हखेके दिनक खुसि पउना यसरामा इसियाइ बडहुँ, उअ परमेस्‍वरक अनुग्रह हमराके परमेस्‍वर विनाक जिवन हसे सांसारिक लालच छाडेके, इअ जुनवामा संयमि, इमान्‍दार हसे परमेस्‍वरक भक्‍तिक जिवन जिएके सिखोसि।

¹⁴ हुने हमार जम्‍मे पापसे हमराके उद्धार देवेके हसे यसल काममा समरपित रहलहरानिके यापन तहिँया एगुडा जाति सुद्ध पारेके तहिँया यपनहिँके देलसि।

¹⁵ तुइ विस्‍वासिसभके इअ जम्‍मे बिसय सिखोसि। पुरा अधिकारसे हुनुकाके हउसला देसि हसे हुनुकाके डटसि। कुनहुँ फेनि तोरके तुच्‍छ झिन सोचइ।