तितस 1 - चितवनिया थारु1 मुइ पावल, परमेस्वरक दास हसे येसु ख्रिस्टक प्रेरित, इअ चिठिया लिखइ बडहिँ। परमेस्वर यापन चुनलि मन्सावानिक विस्वास बरियार बनावेके हसे हुनुकाके सत्यक ग्यानक बारेमा सिछा देवेके तहिँया मोरके छानले बडसि। उअ ग्यान मन्सावानिके परमेस्वरक भक्तिवरि डोर्योसिय। 2 जुन विस्वास हसे ग्यान अनन्त जिवनक यासाक यधार बडइ, उअ अनन्त जिवन कबहुँ फेनि झुठा हइने फदकलहर परमेस्वर, बहुत यागासे प्रतिग्या करले रहलसि, 3 याबे परमेस्वर यापन तोकलि जुनवामा, मोरके जिम्मा लगोलि परचारसे इअ खुसिक समाद परकट करले बडसि। हमार मुक्तिदाता परमेस्वरक आग्यासे इअ जिम्मा मोरके सपाइल बडइ। 4 मोरसाङे एगुटे विस्वास भेल मोर सदि बेटा तितस, मुइ तोरके इअ चिठिया लिखइ बडहिँ। परमेस्वर पिता हसे हमार मुक्तिदाता येसु ख्रिस्ट तोरके अनुग्रह हसे सान्ति दिय। क्रेट ठिसवामा तितसक काम 5 मुइ तोरके वहवाँक बाँकि रहल कमवा पुरा करके हसे हरेक सहरवामा एल्डरसभ नियुक्त करेके तहिँया क्रेट ठिसवामा छाड देलहि। 6 मन्डलियाक एल्डरवाह निरदोस हसे एगुडे मतरे जनि भेल मन्से हखे परतइ। वकर बेटवा-बेटियाह विस्वासि, यसल चरितर हसे आग्याकारि भेल हखे परतइ। 7 केहकेकि मन्डलियाक यगुवावा परमेस्वरक कामक देखभाल करलाहर भेलेसे, निरदोस हखे परतइ। उअ घमन्डि, हल-हालि खिसियाह, मोदहरिया, झगडेहर हसे धनक लोभि नाहिँ हखे परतइ। 8 बरु पहुनावानिके सेवा-सत्कार करलाहर, भलाइक काम मन परोलहर, ग्यानि, इमान्दार, पवितर हसे यपनहिँके अदलमा रखलाहर मन्से हखे परतइ। 9 यापन पउलि सदि सिछामा डटके रहे परतइ, ताकि उअ दोसरे जनके फेनि उअ सदि सिछासे सहास देवे सकिय हसे उअ सिछाक विरोध करलहरानिके फेनि गल्ति देखावे सकिय। 10 केहकेकि खास करके खतना कहलहरा मधे बहुत जन, यगुवानिक अदलमा रहेके हइने मनलाहर, फलफलिया हसे ठगहर मन्से बडइ। 11 हुनुका यापन फाइदाक तहिँया झुठा सिछा देके, जम्मे घर-परिवारके बिगडोइ बडइ। उहेसे हुनुकर मुहवा बन्द करे परतइ। 12 हुनुकर एक जन अगमवक्ता फेनि यसके कहले बडिय, “क्रेटक मन्सावाह जम्मे झुठा, दुस्ट पसुह हसे कोह्रि घिचुवाह बडइ।” 13 इअ कहलि बतवा सदियो हखइ। उहेसे हुनुकाके काडा चेतवनि देसि, ताकि हुनुका यापन विस्वासमा बरियार हखइ। 14 हुनुका यहुदियानिक बनावल काथा झिन सुनइ हसे जुन मन्सावाह सत्यके इन्कार करसइ, हुनुकर आग्या झिन मनइ। 15 जुन मन्सावाक मनवा सुद्ध हसइ, हुनुकर तहिँया जम्मे चिजुवा सुद्ध हसइ। बाकि भ्रस्ट हसे अविस्वासिसभक तहिँया किहो फेनि सुद्ध हइने हसइ, केहकेकि हुनुकर मनवा हसे सोचाइ असुद्ध हसइ। 16 “हमरा परमेस्वरके चिनसहुँ” कहके हुनुका दाबि करसइ, बाकि यापन कमवासे हुनेके इन्कार करसइ। हुनुका घिन लगना हसे आग्या हइने मनलाहर हखइ। हुनुका कुनहुँ यसल कामक तहिँया लाइक हइने बडइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.