रोमि 9 - चितवनिया थारुपरमेस्वरक छानल जाति 1 मुइ ख्रिस्टक मन्से भेलेसे सदियो फदकइ बडहिँ, झुठा हइने फदकइ बडहिँ। पवितर-आत्माक अदलमा रहल मोर विवेक मुइ झुठा हइने फदकसहिँ कहके साछि देसिय। 2 मोर माया करलि इस्राएलि मन्सावानिक तहिँया मोर हृदयमा खाँ सोक हसे पिर बडइ। 3 केहकेकि मोर यपने जाति इस्राएलि मन्सावाह मुक्ति पउतइ जउँ, त मुइ ख्रिस्टसे यलग हखके सरापित हखेके तहिँया फेनि तयार हतहिँ। 4 हुनुका इस्राएलि मन्सेसभ हखइ हसे परमेस्वर हुनुकाके यापन सन्तान बनोलसि तके हुनेक महिमा देखोलसि। परमेस्वर हुनुकरसाङे वाचा बन्हलसि हसे व्यवस्था देलसि। हुने इस्राएलि मन्सावानिके कस्के सेवा करे परतइ कहके सिखोलसि तके हुनुकाके बहुत चिजु देबहि कहके प्रतिग्यासभ देलसि। 5 इस्राएलि मन्सावाह नाउँ चलल हमार पुरखावानिक सन्तान हखइ। ख्रिस्ट यपनहिँ फेनि उहे इस्राएलि वंसमा जरमलसि। हुने जम्मे चिजुमा सासन करलाहर परमेस्वर हखसि। हुनेक सबदिन प्रसंसा हखइ। आमेन। 6 इस्राएलि मन्सावाह ख्रिस्टमा विस्वास हइने करले फेनि परमेस्वर हुनुकाके करलि प्रतिग्या विफल हइने भेल बडइ, केहकेकि इस्राएलि जातिसे जरमलि जम्मे मन्सावाह परमेस्वरक सन्तान हइने हखइ। 7 अब्राहमक वंसक जम्मे जन वकर बेटा-बेटिसभ हइने भेलइ, बाकि परमेस्वर अब्राहमके कहलसि, “तोर बेटवा इसहाकसे तोर सन्तानसभ हतइ।” 8 यकर यरथ अब्राहमक जम्मे सन्तानसभ परमेस्वरक बेटा-बेटिसभ हइने हखइ, बाकि हुनेक प्रतिग्यासे जरमलि सन्तानसभ मतरे अब्राहमक बेटा-बेटिसभ हखइ। 9 केहकेकि परमेस्वर यसके प्रतिग्या करले रहलसि, “दोसरि बरसवा इहे जुनवामा मुइ फिरके यबहिँ हसे तोर जनियावा सारा एगुडा बेटा जरमोबिय।” 10 यतुरा मतरे हइने, रिबेका फेनि जउराहा बेटा जरमोलिय, उअ दु जनक बाबा हमार पुरखा इसहाक भेलिय। 11 उअ दु जन बेटवा जरमलिसे यागा हुनुका कुनहुँ डउल हसे खराब काम करलिसे पहिला परमेस्वर एक जनके छानलसि। हुनेक छानना काम मन्सेक काम हेरके हइने, बाकि हुनेक इछा यनुसार हसइ। 12 उअ दु जन बेटवा जरमलिसे यागा परमेस्वर रिबेकाके यसके कहलसि, “बडकि बेटवा छुटकि बेटवाक सेवा करबिय।” 13 जसने धरमसास्तरवामा लिखाइल बडइ, “मुइ याकुबके प्रेम करलहिँ, बाकि एसावके घिरिना करलहिँ।” 14 वसके भेले हमरा कथि कहुँ त? कथि परमेस्वर डउलसे न्याय करे हइने जनले बडसि त? हुने वसके करबे नाहिँ करबसि! 15 केहकेकि परमेस्वर मोसाके यसके कहलसि, “जुन मन्सावाके मोर दाया लगसइ, वकरेके मुइ दाया करसहिँ हसे जुन मन्सावाके मोर सोग लगसइ, वकरेके मुइ सोगेसहिँ।” 16 उहेसे परमेस्वर मन्सेक यपने इछा कि कोसिससे वकरेके हइने छानले हखसि, बाकि हुनेक यपने दायासे छानले हखसि। 17 केहकेकि धरमसास्तरवामा एक जन मिस्र देसवाक रजवा फारोक बारेमा यसके लिखाइल बडइ, “तोरके मोर सक्ति देखावेके हसे जम्मे संसारमा मोर नाउँ चलावेके उदेस्यसे मुइ तोरके राजा बनोले हखहि।” 18 उहेसे परमेस्वर जकरेके दाया करे चाहससि, वकरेके दाया करससि हसे जाकर मनवा कठोर बनावे चाहससि, वकर मनवा कठोर बनोससि। 19 कुनहुँ यसके कहे सकबह, “वसके भेले परमेस्वर केहके यखना मन्सावानिके दोस लगोससि त? हुनेक इछाके कुने रोके सकतइ?” 20 अरे मन्सावा, परमेस्वरक मुहे-मुह लगलाहर तुइ कुने हखहि? मटियाक भडियावा वकरेके बनोलहराके “केहके तुइ मोरके यसनुक बनोलहि?” कहके कहबहिँ त? 21 माटिक भडिया बनोलहरा गिजलि मटियाक गोलरवासे यापन इछा यनुसार भडिया बनावे नाहिँ सकबिय। उअ गिजलि मटियाक गोलरवासे एगुडा विसेस कामक तहिँया हसे उहे मटियाक गोलरवासे सधारन कामक परयोगक तहिँया बनोलिय। 22 उहेसे मन्सेसाङे कसनुक व्यबहार करेके कहके परमेस्वरक इछाक बात हखइ। हुनेक यापन खिस हसे सक्ति देखावे इछा भेले फेनि हुने नास करे परना मन्सेके खाँ सहसानसे सहले बडसि। 23 यादर पावेके तहिँया पहिलासे तयार पारलि हुनेक मन्सावानिके यापन महान सम्मानक देखावेके तहिँया यसके करलसि। 24 केहकेकि हुनेक बलोलि हमरहिँ हखहुँ। हुने हमरा यहुदियानिके मतरे हइने, अयहुदियानिके फेनि बलोलसि। 25 परमेस्वरक कहलि बतवा होसे अगमवक्ता यसके लिखले बडिय, “जुने मोर मन्सेसभ हइने रहलइ, हुनुकाके मुइ ‘मोर मन्सेसभ’ कहके बलोबहिँ हसे जकरेके मुइ प्रेम हइने करले रहलहि, वकरेके मुइ ‘मोर प्रिय’ कहबहिँ।” 26 हसे “उहे ठउरियामा अयहुदियानिके छाडके याको मन्सावानिके यसके कहेलइ, ‘तोहरा मोर मन्सेसभ हइने रहलह’, वहवाँ हुनुका ‘जिउते परमेस्वरक सन्तान’ कहके कहतइ।” 27 इस्राएलक बारेमा यसइया अगमवक्तावा यसके कहसिय, “इस्राएलक सन्तानक संख्या समुनदरक बालु जतुरा बहुत भेले फेनि हुनुकरमधे इचिके जनके मतरे परमेस्वर बचोबसि। 28 केहकेकि प्रभु इअ धरतियामा यापन दन्ड देना काम हलहालि पुरा करबसि।” 29 यसइया अगमवक्ता पहिलहिँ कहले रहलिय, “यगर सरवसक्तिमान परमप्रभु हमार तहिँया सन्तान बचाके नाहिँ धरले रहतसि त हमरा सदोम हसे गमोराक मन्सावानि नहिँया नास हतहुँ।” इस्राएलि मन्सावानिक अविस्वास 30 वसके भेले हमरा कथि कहेके त? अयहुदि मन्सावाह परमेस्वरक लजरियामा ठिक हखे हइने खोजले ताफेनि हुनुका विस्वास करलेसे हुने हुनुकाके ठिक ठहरोलसि। 31 बाकि इस्राएलक मन्सावाह व्यवस्था पालन करके परमेस्वरक लजरियामा ठिक हखेके बहुत कोसिस करलइ, बाकि हुनेक लजरियामा हुनुका ठिक हखे हइने सकलइ। 32 केहके हइने हखे सकलइ त? केहकेकि हुनुका यापन कामसे परमेस्वरक लजरियामा ठिक हखेके कोसिस करलइ, बाकि विस्वाससे परमेस्वरक लजरियामा ठिक हखे हइने खोजलइ। उहेसे हुनुकर तहिँया ख्रिस्ट ढुस लगना पत्थरा भेलसि। 33 जसने ख्रिस्टक बारेमा धरमसास्तरवामा लिखइलि नहिँया भेलइ, “हेरह, मुइ सियोनमा एगुडा पत्थरा रखबहिँ, उअ पत्थरवामा बहुत जन ढुस लगतइ, एगुडा सिल, जाकरमा हुनुका खससइ, बाकि हुनेमा विस्वास करलहरा मन्सावाह कुनहुँ फेनि लजियामा नाहिँ परतइ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.