रोमि 8 - चितवनिया थारुपवितर-आत्मासे पउना जिवन 1 उहेसे जुने येसु ख्रिस्टमा भरोसा रखसइ, हुनुकर तहिँया परमेस्वरक दन्ड हइने बडइ। 2 केहकेकि हमरा येसु ख्रिस्टमा एगुडे भेलेसे जिवन देलाहर पवितर-आत्माक सक्ति हमराके पाप तके मृत्युक सक्तिसे छुटकारा देले बडसि। 3 जुन काम व्यवस्था हमार देहियाक पापि स्वभावक कारनसे कमजोर भके करे हइने सकलिय, उअ परमेस्वर करलसि। हुने यापन पुतरके पापि मन्से नहिँया बनाके पापक भोगक रुपमा पठोलसि। यसके हुने देहियामा पापके दन्ड देलसि। 4 याबे हमरा व्यवस्थाक कहल नहिँया करे सकुँ कहके परमेस्वर यसके करलसि। यसके हमार पापि स्वभाव यनुसार हमरा हइने, बाकि पवितर-आत्माक इछा यनुसार चलइ बडहुँ। 5 केहकेकि जुने पापि स्वभाव यनुसार चलसइ, उअ मन्सावा देहियाक इछा पुरा करे चाहसइ, बाकि पवितर-आत्मा यनुसार चललाहराह पवितर-आत्माक इछामा मन लगोसइ। 6 पाप स्वभावक इछा मन्सावाके मृत्युमा पुगोसिय, बाकि पवितर-आत्मामा मन लगोबिय जउँ, उअ अनन्त जिवन हसे सान्ति पउबिय। 7 पाप स्वभावक इछामा चललाहर मन्से परमेस्वरक विरोधि हसिय, केहकेकि उअ परमेस्वरक व्यवस्था पालन हइने करसिय हसे करे फेनि नाहिँ सकबिय। 8 जुन मन्सावा यापन पापमय स्वभावमा जिवन बितोसइ, उअ परमेस्वरके खुसि पारे नाहिँ सकबिय। 9 यगर परमेस्वरक आत्मा तोहारमा बास करबसि जउँ, तोहरा पापि स्वभावक अदलमा हइने रहसह, बाकि पवितर-आत्माक अदलमा रहसह। यगर ककरोसाङे ख्रिस्टक आत्मा हइने बडइ जउँ, उअ ख्रिस्टक मन्से हखबे हइने करिय। 10 यगर ख्रिस्ट तोहारमा बडसि जउँ, तोहार देहिया पापक कारनसे मरले ताफेनि तोहार आत्मा सबदिनक तहिँया जिउते रहतइ, केहकेकि परमेस्वर तोहराके यापन यागा ठिक ठहरोले बडसि। 11 यगर येसुजिके मरलिसे जिउतोलहरा परमेस्वरक पवितर-आत्मा तोहारमा बास करबसि जउँ, येसु ख्रिस्टके मरलिसे जिउतोलहरा तोहारमा बास करलहरा पवितर-आत्मासे तोहार नास हखना देहिके फेनि जिउतोबसि। 12 उहेसे प्रियसभ, हमार पापि स्वभावक इछा यनुसार चलेके हमार करकाप हइने बडइ। 13 यगर तोहरा पापि स्वभावक इछा यनुसार चलबह जउँ, तोहरा मरबह। बाकि पवितर-आत्माक सक्तिसे पापि स्वभावके नास करबह जउँ, तोहरा अनन्त जिवन पउबह। 14 परमेस्वरक आत्मा देखावल पइडामा बुललहराह हुनेक सन्तान हखइ। 15 केहकेकि हमरा फेरि डरमा रखना आत्माक अदलमा हइने, बाकि हमरा परमेस्वरक सन्तान हखना पवितर-आत्मा पउले बडहुँ। उहेसे हमरा परमेस्वरके अब्बा, बाबा कहके कहे सकसहुँ। 16 हमरा परमेस्वरक सन्तान हखहुँ कहके पवितर-आत्मा हमार आत्माके गवाहि देससि। 17 हमरा परमेस्वरक सन्तान भेलेसे हकवाला फेनि हखहुँ, हुनेक हकवाला हसे ख्रिस्टसाङे सझिया हकवाला हखबहुँ। हमरा ख्रिस्टक भोगलि दुःखवा नहिँया दुःख भोगबहुँ जउँ, ख्रिस्टसाङे यादरमा फेनि सहभागि हखबहुँ। पाछेसे पउना यादर 18 मोर विचारमा, इअ जिवनमा हमार भोगलि कस्ट हमार पाछेसे पउना समानसाङे दजइकि किहो फेनि हइने बडइ। 19 परमेस्वर यापन सन्तानसभके देखोना दिन हुनेक सिरिस्टि करलि जम्मे चिजुवा खाँ इछा करके इसियाइ बडइ। 20 केहकेकि परमेस्वरक बनोलि सिरिस्टि काम हइने लगना भेल रहलइ। उअ सिरिस्टिक यपने इछा हइने रहलइ, बाकि सिरिस्टि यासा करइ रहिय कहके परमेस्वर यसके करले हखसि। 21 सिरिस्टि यपनहिँ नासक बन्धनसे एक दिन छुटकारा पाके परमेस्वरक सन्तानक महान छुटकारामा सहभागि हखबिय। 22 हमरा जनसहुँ कि, जम्मे सिरिस्टि यखनिलइ जनिक हलुकइना बेथा लागल नहिँया दुःखमा छटपटाइ बडइ। 23 सिरिस्टि करलि चिजुवा मतरे हइने, हमरा फेनि दुःखमा छटपटाइ बडहुँ। हमरा परमेस्वरक करलि प्रतिग्या संकेतक रुपमा पवितर-आत्मा पउले बडहुँ। उहेसे हमराके फेनि हुने कहिया धरमपुतर बनोबसि हसे जम्मे खराब चिजुसे हमार देहियाके छुटकारा देबसि कहके खाँ इसियाइ बडहुँ। 24 केहकेकि इहे जबड यासाक तहिँया परमेस्वर हमराके बचोलसि हसे हमरा इहे यासामा बचइ बडहुँ। यासा कहले हमरा हइने देखलि चिजुवा पावेके तहिँया इसियाएके हखइ। मन्से पहिला पासकलि चिजुवाक यासा हइने करसइ। 25 यगर हमरा हइने देखलि चिजुवामा यासा करसहुँ जउँ, उअ चिजुवा पावेके तहिँया हमरा सहसान करके इसियसहुँ। 26 वसने करके पवितर-आत्मा हमार कमजोरिमा मदत करससि। कस्के परथाना करेके हखइ, हमार थाह हइने हखइकि पवितर-आत्मा यपनहिँ हमरा कहे हइने सकना सबदसभमा हमार तहिँया परथाना करदेससि। 27 परमेस्वर जम्मे मन्सावानिक हृदयक बात जनससि, हुनेक पवितर-आत्मा कहल बात कथि हखइ वकर यरथ फेनि थाह बडइ। केहकेकि परमेस्वरक इछा यनुसार पवितर-आत्मा कथि विचार करससि परमेस्वरक जनसभक तहिँया परथाना करससि। 28 हमार थाह बडइ कि, परमेस्वरके प्रेम करलहरा मन्सावाह हसे हुनेक योजना यनुसार बलोलरानिक तहिँया हुने जम्मे चिजुमा भलाइ करससि। 29 परमेस्वर यापन बलोलि मन्सावानिके पहिलहिँसे चिनले रहलसि। परमेस्वर हुनुकाके यापन पुतर ख्रिस्ट नहिँया हखइ कहके इछा करलसि। यसके ख्रिस्ट बहुत जनक जेठ ददेर भेलसि। 30 परमेस्वर जकरे-जकरेके पहिलहिँसे छानलसि, हुनुकाके बलोलसि हसे जकरे-जकरेके हुने बलोलसि, हुनुकाके यापन लजरियामा ठिक ठहरोलसि तके जकरे-जकरेके यापन लजरियामा ठिक ठहरोलसि, हुनुकाके समान फेनि देलसि। परमेस्वरक प्रेम 31 हमरा यकर बारेमा कथि कहेके त? परमेस्वर हमारवरि बडसि जउँ, हमार विरोध कुने करे सकबिय? 32 परमेस्वर यापन पुतरके फेनि बचाके हइने धरलसि, बाकि हमार जम्मे जनक तहिँया हुनेके देलसि। याबे कथि हुने हमराके ख्रिस्टसाङे जम्मे चिजु फेनि नाहिँ देबसि त? 33 परमेस्वरक छानलि मन्सावानिके कुने दोस लगावे सकबिय त? कुनहुँ फेनि नाहिँ सकतइ, केहकेकि हुने यपनहिँ हुनुकाके यापन लजरियामा ठिक ठहरोले बडसि। 34 कुने हमराके दोस लगावे सकबिय त? कुनहुँ फेनि नाहिँ सकतइ, केहकेकि येसु ख्रिस्ट हमार तहिँया मरलसि। उतुरा मतरे हइने, परमेस्वर हुनेके मरलिसे जिउतोलसि हसे यखनि परमेस्वरक दहिनिकलहरवा बेठल बडसि तके हमार तहिँया परमेस्वरसाङे बिन्ति करइ बडसि। 35 याबे कुन चिजु हमराके ख्रिस्टक प्रेमसे यलग करे सकतइ त? हमार दुःख, गारह हखे सकतइ, सतावट यावे सकतइ। हमार लगावेके लुगा नाहिँ हखे सकतइ हसे हमरा भुखले रहेके जुन फेनि यावे सकतइ। हमरा यापतमा परे सकबहुँ कि कुनहुँ मारे फेनि सकतइ, बाकि इअ कुनहुँ चिजुसभ फेनि हमराके ख्रिस्टक प्रेमसे यलग करे नाहिँ सकतइ। 36 जसने धरमसास्तरवामा लिखाइल बडइ, “हमरा यपनहुँमा विस्वास करलेसे हमराके दिन-दिन मारे खोजसइ। हमरा काटे लिगइकि भेडा नहिँया बडहुँ।” 37 बाकि इअ जम्मे खराब चिजुवा हमारमा घटले ताफेनि हमराके जिते नाहिँ सकतइ, केहकेकि ख्रिस्ट हमराके प्रेम करलेसे बडसि। 38 मोर पाका थाह बडइ कि, कुनहुँ चिजु फेनि ख्रिस्टक प्रेमसे हमराके यलग करे नाहिँ सकतइ। न त मृत्यु, न त जिवन, न स्वरगदुतसभ, न त दुस्ट सासकसभ, न यखनिक हसे पाछे हखना घटना, न त सक्तिसभ, 39 न वपरा यकसवा हसे न तर धरतियामा भेलि सक्तिसभ, न सिरिस्टि भेलि कुनहुँ सक्ति येसु ख्रिस्ट हमार प्रभुमा भेल परमेस्वरक प्रेमसे हमराके यलग करे सकतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.