रोमि 7 - चितवनिया थारुबियाहसे एक उदाहरन 1 प्रियसभ, मुइ इअ बतवा व्यवस्था जनलहरानिके कहइ बडहिँ। मन्सावा बचइलइ मतरे व्यवस्था लागु हसइ कहके कथि तोहार हइने थाह बडइ? 2 एक जन बियाह करल जनियानि वकर मरदावा बचइलइ मतरे व्यवस्था यनुसार यापन मरदावासाङे बियाहक बन्धनमा बन्हनाइल रहसिय, बाकि वकर मरदावा मरबिय जउँ, उअ कानुनक बन्धनसे स्वतन्तर हखबिय। 3 वसने करके, यगर वकर मरदावा जिउते रहते उअ दोसरे मरदानासाङे बियाह करबिय जउँ, उअ धुचुड करबिय, बाकि वकर मरदावा मरेले पाछा, उअ बियाहक बन्धनमा बन्हाइल नाहिँ रहबिय। यगर उअ दोसरे मरदानासाङे बियाह करबिय फेनि धुचुड नाहिँ करबिय। 4 वसने करके, हेरह प्रियसभ, तोहरा फेनि व्यवस्था पालन करेकेसे छुटकारा पउले बडह, केहकेकि ख्रिस्ट क्रुसवामा मरइकि हमरा फेनि हुनेसाङे मरलहुँ। याबे हमरा परमेस्वरक तहिँया यसल काम करे सकुँ कहके मरलिसे जिउतेलि ख्रिस्टसाङे हमरा जम्मे जन एक भेल बडहुँ। 5 पहिला हमरा एक समयमा यापन पापमय इछामा जिवन बितोइ रहलहुँ। जुन कमवा व्यवस्था करे नाहिँ बनतइ कहके कहलिय, उहे कमवा हमरा झन बढता करलहुँ हसे हमार करलि हइने डउलि कमवासे हमरा मरे परलइ। 6 बाकि याबे हमराके अदलमा रखना व्यवस्थासे छुटकारा पउले बडहुँ, केहकेकि हमरा ख्रिस्टसाङे मरलहुँ। उहेसे याबे हमरा पुरान लिखल व्यवस्थाक तरिकासे सेवा हइने करसहुँ, बाकि पवितर-आत्माक देलि लउठा तरिकासे परमेस्वरक सेवा करसहुँ। व्यवस्था हसे पाप 7 वसके भेले हमरा कथि कहेके त? कथि व्यवस्था पाप यनलिय? वसके हइने। व्यवस्था नाहिँ रहतिय त मुइ पाप थाह नाहिँ पउतहिँ, केहकेकि “तुइ लोभ झिन करसि” कहके व्यवस्था नाहिँ कहतिय त लोभ करे नाहिँ बनतइ कहके मुइ थाह नाहिँ पउतहिँ। 8 बाकि जब व्यवस्थासे “लोभ करेके पाप हखइ” कहके मोर थाह भेलइ, तब मोर पुरान जिवन जम्मे खलिक लोभ करेके इछा करलिय। केहकेकि व्यवस्था नाहिँ रहतिय त हमार जिवनमा पापक किहो अधिकार नाहिँ हतिय। 9 एक समय मुइ व्यवस्थाक बारेमा हइने जानके यापन हिसाबसे जिवन बितोइ रहलहि, बाकि व्यवस्थाक कहलि बतवा बुझलेपर मुइ पाप करइ बडहिँ कहके थाह पउलहिँ हसे 10 मोर मरे परलइ। जुन व्यवस्था मोर तहिँया जिवन देवेके रहलइ, उअ व्यवस्था मोर तहिँया मृत्यु यनलिय। 11 केहकेकि पाप धारमिक आग्याके दाउ पारके मोरके धोखा देलिय। यसके पपवा धारमिक आग्याके हथियार बनाके मोरके मारलिय। 12 उहेसे व्यवस्था पवितर बडइ हसे धारमिक आग्या फेनि पवितर, ठिक तके यसल बडइ। 13 कथि यसल व्यवस्था मोरके मारलिय त? वसके हइने, बरु यसल आग्याके परयोग करके पपवा मोरके मारलिय। यसके पापक सकलि रुप देखा परलइ हसे पाप सदियो हइने डउल बडइ कहके आग्या देखोसिय। 14 हमार थाह बडइ कि व्यवस्था परमेस्वरक आत्मासे देल यसल चिजु हखइ, बाकि मुइ देहियाक स्वभाव यनुसार चलसहिँ, केहकेकि मुइ वकर दास भेल नहिँया उअ मोरके सासन करसिय। 15 मुइ कथि काम करइ बडहिँ कहके मुइ यपनहिँ उअ हइने बुझसहि। केहकेकि मुइ जथि करे चाहसहिँ, उअ मुइ हइने करसहिँ, बाकि जथि मुइ घिना करसहिँ, उहे मुइ करसहिँ। 16 उहेसे मोर करे हइने चाहलि खराब काम मुइ करसहिँ जउँ, मुइ व्यवस्था यसल बडइ कहके सहमत हसहिँ। 17 उहेसे याबे मोर करल खराब काम मुइ हइने करले हखहि, इअ त मोर भितरा भेलि पपवा करले हखिय। 18 मोर थाह बडइ कि, मोरमा कुनहुँ यसल बात हइने बडइ। मोर कहे खोजलि बतवा इअ हखइ कि, मोर पाप स्वभावमा कुनहुँ यसल बात हइने बडइ, केहकेकि मुइ यसल काम करे त चाहसहिँ, बाकि करे हइने सकसहिँ। 19 केहकेकि मुइ यसल काम करे चाहसहिँ, बाकि उहे मुइ हइने करसहिँ। मुइ खराब काम करे हइने चाहसहिँ, बाकि उहे मुइ करसहिँ। 20 याबे मुइ जथि करेके इछा हइने करसहिँ, उहे करबहिँ कहलाहर मुइ हइने हखहि, बाकि मोरमा बास करलहरा पपवा उअ काम करसिय। 21 जब मुइ भलाइक काम करे चाहसहिँ, तब खराब इछा फेनि मोरसाङे रहसिय। मोर जिवनमा इहे नियमवा काम करइकि पउले बडहिँ। 22 केहकेकि मोर आत्मा परमेस्वरक व्यवस्थामा खुसि हसिय। 23 बाकि मोर देहियाक यङसभमा दोसरे नियम काम करइकि मुइ थाह पवइ बडहिँ। उअ नियमवा मोर मनवामा भेलि नियमक विरोध करसिय हसे उअ मोरमा भेलि पापक नियमक अदलमा मोरके फसोसिय। 24 मुइ कसनुक दुःखि मन्से! मोरके मृत्युवरि लिगना देहियासे कुने बचावे सकबिय? 25 मुइ परमेस्वरके धन्यवाद देबहिँ, हुनेहिँ येसु ख्रिस्टसे मोरके छुटकारा देबसि। उहेसे मुइ यापन मनवासे परमेस्वरक व्यवस्थाक पालन करसहिँ, बाकि मोर हृदयमा दुस्ट विचार भेलेसे मुइ यखना फेनि पापक नियमक अदलमा बडहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.