रोमि 6 - चितवनिया थारुपापमा मृत्यु, ख्रिस्टमा जिवन 1 वसके भेले याबे हमरा कथि कहेके त? कथि परमेस्वरक प्रसस्त दाया पावेके तहिँया हमरा पाप करते रहुँ त? 2 अहँ, वसके करे नाहिँ बनतइ! पापक तहिँया हमरा मरल बडहुँ जउँ, याबे कस्के पाप करते जिए सकबहुँ? 3 तोहार थाह बडइ कि, हमरा जतेक जन येसु ख्रिस्टमा बप्तिस्मा लेलहुँ, हुनेसाङे एक भके मरलहुँ। 4 उहेसे बप्तिस्मासे हमरा फेनि हुनेसाङे मृत्युमा गडेलहु। जसने पिताक महिमाक सक्तिसे ख्रिस्ट मरलिसे जिउतेलसि, वसने हमरा फेनि लउठा जिवनमा ख्रिस्ट नहिँया जियबहुँ। 5 यगर हमरा हुनेक मृत्युमा हुनेसाङे एक भेल बडहुँ जउँ, हुनेक पुनरुत्थानमा फेनि सदियो हमरा हुनेसाङे एक हखबहुँ। 6 हमरा जनसहुँ कि, हमार पुरान स्वभाव हुनेसाङे क्रुसमा टङाइल बडइ, ताकि हमार पापि स्वभाव नास हखइ हसे याबेसे हमरा पापक कमारा नाहिँ हखुँ। 7 केहकेकि जुन मन्सावा मरसकल बडिय, उअ पापसे छुटकारा पउले बडिय। 8 यगर हमरा ख्रिस्टसाङे मरल बडहुँ जउँ, हुनेसाङे फेनि जिउतबहुँ कहके हमरा विस्वास करसहुँ। 9 हमरा जनसहुँ कि, ख्रिस्ट मरलिसे जिउतेलसि हसे याबे हुने कबहुँ फेरि नाहिँ मरबसि। हुनेमा मृत्युक कुनहुँ सक्ति राज करे नाहिँ सकबिय। 10 पापक सक्तिके नास करेके ख्रिस्ट एकपल्टा मरलसि, याबे हुने कबहुँ नाहिँ मरे परतइ। जुन जिवन हुने जियबसि, परमेस्वरके यादर देवेके तहिँया जियबसि। 11 वसने करके तोहरा फेनि यापन पापक तहिँया मरल, बाकि येसु ख्रिस्टमा परमेस्वरक तहिँया जिउते भेल सम्झे परतइ। 12 उहेसे यापन मरके जइना देहियामा पापके सासन करे झिन दिह हसे देहियाक करे चाहलि खराब चिजुसभ करे झिन दिह। 13 यापन देहियाक कुनहुँ फेनि यङसभके पाप करेके तहिँया दुस्टताक साधनक रुपमा झिन सोपिह, बाकि मृत्युसे जिवनमा यानल मन्सेसभ नहिँया यपनहिँके परमेस्वरमा सोपिह हसे हुनेक यसल कामक तहिँया यापन देहियाक यङसभके सोपिह। 14 पाप तोहारमा राज झिन करिय, केहकेकि तोहरा व्यवस्थाक अदलमा हइने, बाकि अनुग्रहक अदलमा बडह। पापक कमारा हइने बाकि परमेस्वरक कमारा 15 याबे कथि त? हमरा व्यवस्थाक अदलमा हइने, बाकि अनुग्रहक अदलमा बडहुँ कहके पाप करेके त? यसके करे कबहुँ नाहिँ बनतइ। 16 जाकर आग्या पालन करके तोहरा यपनहिँके कमाराक रुपमा सोपसह, तोहरा वकरे कमारा हसह कहके कथि तोहार हइने थाह बडइ? तोहरा पापक कमारा भके वकर आग्या पालन करबह जउँ मरबह, परमेस्वरक आग्या पालन करबह जउँ, तोहरा हुनेक यागा ठिक ठहरबह। 17 बाकि परमेस्वरके धन्यवाद हखइ कि, तोहरा एकपल्टा पापक कमारा रहलह, बाकि तोहरा यखनि हृदयसे यापन परमेस्वरक सिखोलि सिछा पालन करसह। 18 परमेस्वर तोहराके पापसे छुटकारा देले बडसि हसे याबे तोहरा परमेस्वरक यसल काम करेके तहिँया हुनेक कमारा भेल बडह। 19 तोहारमा मन्सेक कमजोर स्वभाव भेलेसे, मोर कहलि बतवा तोहरा डउलसे बुझे सकह कहके मालिक हसे कमाराक उसार उदाहरन देइ बडहिँ। एक समयमा खराब इछा लेके झन-झन बढि घिन लगना पाप हसे दुस्ट काम करेके तहिँया तोहरा यापन यङसभके सोपलह। याबे पवितर हखेके तहिँया तोहरा यापन यङसभ परमेस्वरक तहिँया यसल काम करलाहर कमारा नहिँया सोपदेह। 20 तोहरा पापक कमारा रहइकि परमेस्वरक यागा यसल काम करेके तोहार चाहना हइने रहलइ। 21 तोहरा पहिलाक करलि कमवासे कथि पउलह त? उअ कमवासे यखनि लाज मनसह जउँ, उअ कमवा त मृत्यु मतरे यनसिय। 22 याबे तोहरा पापसे छुटकारा पउले बडह हसे परमेस्वरक कमारा भेल बडह। इअ तोहराके पवितर बनोसिय हसे अनन्त जिवनमा पुगोसिय। 23 केहकेकि पापक बनिहारि त मृत्यु हखइ, बाकि परमेस्वरक दान त हमार प्रभु येसु ख्रिस्टमा अनन्त जिवन हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.