रोमि 5 - चितवनिया थारुमिलाप हसे आनन्द 1 हमरा येसु ख्रिस्टमा विस्वास करलेसे परमेस्वरक यागा ठिक ठहरल बडहुँ हसे हमार प्रभु येसु ख्रिस्टसे परमेस्वरसाङे हमार मिलाप भेल बडइ। 2 हुने हमराके विस्वाससे परमेस्वरक दायामा यनलसि। यखनि हमरा इहे दायामा बचइ बडहुँ हसे परमेस्वरक सम्मानमा सहभागि हखेके यसरामा आनन्दित बडहुँ। 3 यतुरा मतरे हइने, हमार दुःखवामा हमरा खुसि हसहुँ, केहकेकि हमार दुःखवा हमराके सहेके सक्ति देसिय। 4 हमार थाह बडइ कि सहेके सक्ति हमार चरितरके बरियार बनोसिय हसे चरितर हमार यासाके बरियार बनोसिय। 5 उअ यासा हमराके निरास हखे हइने देसिय, केहकेकि परमेस्वर हमराके पवितर-आत्मा देके हमार हृदयमा परमेस्वरक प्रेम भर देले बडसि। 6 हमरा मुक्तिक तहिँया यपनहिँ किहो करे हइने सकइकि ख्रिस्ट हमार पापिसभक तहिँया ठिक जुनवामा मरलसि। 7 धरमि मन्सेक तहिँया सायद कुनहुँ मरे फेनि सकतइ हसे खाँ यसल मन्सेक तहिँया कुनहुँ मरेके याट फेनि करे सकतइ। 8 बाकि परमेस्वर हमार तहिँया प्रेम यसके देखोलसि कि, हमरा पापि रहते ख्रिस्ट हमार तहिँया मरलसि। 9 सदियो हमरा ख्रिस्टक रकतसे परमेस्वरक यागा ठिक ठहरल बडहुँ हसे हुने हमराके परमेस्वरक खिससे बचोबसि। 10 केहकेकि हमरा परमेस्वरक सतरु हखते हुनेक पुतरक मृत्युसे परमेस्वर हमराके यापनसाङे मिलापमा यनलसि। हुनेसाङे मिलाप भेलेसे झन बढि ख्रिस्टक जिवनसे हमराके बचोबसि। 11 यतुरा मतरे हइने, ख्रिस्टसे परमेस्वर हमराके यापनसाङे मिलापमा यनलेसे हमार प्रभु येसु ख्रिस्टसे परमेस्वरमा हमरा आनन्दित फेनि बडहुँ। आदमसे मृत्यु, ख्रिस्टसे जिवन 12 एक जन मन्सेसे पाप संसारमा यलइ हसे वकर पापवा मृत्यु यनलिय। यसने जम्मे मन्सावामा मृत्यु फइललइ, केहकेकि जम्मे मन्सावा पाप करलइ। 13 परमेस्वर व्यवस्था देलिसे यगाहे संसारमा पाप रहलइ, बाकि व्यवस्था हइने भेलेसे पाप करलहरा मन्सावाके दोसि ठहरावेके आधार हइने रहलइ। 14 आदमक जुनवासे व्यवस्था लिखलाहर मोसाक जुनवालइ मृत्यु जम्मे मन्सावानिमा राज करलिय। आदम परमेस्वरक आग्या पालन हइने करलेसे मरलिय, बाकि याको मन्सावाह आदमक नहिँया पाप हइने करले ताफेनि मरलइ। एक तरिकासे आदम चाहिँ पाछा यइना ख्रिस्टक नमुना रहलिय। 15 बाकि परमेस्वरक वसहिक वरदान आदमक पाप नहिँया हइने हखइ। केहकेकि एक जन मन्से आदमक करल पापक कारनसे बहुत जन मरलइ, बाकि परमेस्वर हमराके देलि दायाक वरदान जम्मे मन्सावानिक तहिँया वकरसे फेनि झन महान बडइ। इअ परमेस्वरक वरदान चाहिँ एक जन मन्से येसु ख्रिस्टसे बहुत जन पउले बडइ 16 इअ वसहि देल वरदानक परिनाम एक जन मन्सेक करल पापक परिनाम नहिँया हइने बडइ। आदमक करल पापक कारन मन्सावाह दोसि ठहरलइ हसे हुनुका दन्डक भागिदार भेलइ, बाकि मन्सावाह बहुत पाप करले फेनि परमेस्वर हुनुकाके वसहि निरदोस ठहरोलसि। 17 एगुडा मन्से आदम पाप करलेसे जम्मे मन्सावा मरे परलइ, बाकि परमेस्वरक प्रसस्त दाया हसे वसहिक वरदानसे परमेस्वरक यागा ठिक ठहरलि जम्मे जन एगुडे मन्से येसु ख्रिस्टसे अन्नत जिवन पउतइ तके हुनेसाङे राज करतइ। 18 उहेसे एक जन मन्से आदमक पापसे जम्मे मन्सावाह पापि भेलइ हसे दन्ड पउलइ। वसने एगुडा मन्से येसुजिक धारमिक कामसे परमेस्वरक यागा जम्मे मन्सावा ठिक ठहरसइ हसे अनन्त जिवन पउसइ। 19 एक जन मन्से आदम आग्या पालन हइने करलेसे बहुत जन पापि भेलइ। वसने एक जन मन्से येसुजिक आग्या पालन करलेसे बहुत मन्सेसभ परमेस्वरक यागा ठिक ठहरतइ। 20 मन्सावाह कतुरा बहुत पाप करले बडइ कहके थाह पावेके तहिँया परमेस्वर व्यवस्था देलसि, बाकि मन्सावाह जतुरा बहुत पाप करलइ, वकरसे बढता दाया परमेस्वर देखोलसि। 21 पहिला पापक सक्तिसे जम्मे मन्सावाह पाप करलइ हसे मरलइ। याबे परमेस्वरक दायासे हमरा हुनेक यागा ठिक ठहरबहुँ हसे हमार प्रभु येसु ख्रिस्टसे अनन्त जिवन पउबहुँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.