रोमि 4 - चितवनिया थारुअब्राहमक विस्वास 1 याबे हमार पुरखावा अब्राहमक बारेमा बात करु। परमेस्वरक यागा उअ कस्के ठिक ठहरलिय कहलि बारेमा हेरु। 2 यगर अब्राहम कामसे ठिक ठहरतिय त, वकर घमन्ड करेके ठउरि हतिय, बाकि परमेस्वरक यागा वकर घमन्ड करना ठउरि हइने बडइ। 3 धरमसास्तरवा कथि कहसिय? “अब्राहम परमेस्वरमा विस्वास करलिय। उहे विस्वासक कारनसे परमेस्वर वकरेके ठिक ठहरोलसि।” 4 यगर कुनहुँ मन्से काम करबिय जउँ, उअ बनिहारि पउसिय। वकर पउलि बनिहारि दान हइने हखइ, बाकि उअ वकर कमाइल चिजु हखइ। 5 जुने धरम-करममा भरोसा हइने रखसिय, बाकि दोसि मन्सेके निरदोस ठहरोलहर परमेस्वरमा भरोसा रखसिय, वकर उहे विस्वासक कारनसे परमेस्वर वकरेके ठिक ठहरोबसि। 6 रजवा दाउद धरम-करमसे हइने, बाकि परमेस्वरसे ठिक ठहरल मन्सेके धन्यक कहसिय, 7 “हुनुका धन्यक हखइ, जाकर दुस्ट काम छमा भेल बडइ, हसे पापसभ झपाइल बडइ। 8 उअ मन्सावा धन्यक हखिय, जाकर पापक लेखा परमेस्वर हइने लेससि।” 9 इअ यासिरवाद खतना करलि मन्सावानिक तहिँया मतरे हइने, बाकि खतना हइने करलि मन्सावानिक तहिँया फेनि हखइ। हमरा कहइ बडहुँ, “अब्राहम परमेस्वरमा विस्वास करलेसे उअ ठिक ठहरलिय।” 10 उअ कहिया भेलइ? वकर खतना हखलिसे यागा कि पाछा? वकर खतना भेलिसे पाछा हइने, बाकि खतना भेलिसे यागा परमेस्वर वकरेके ठिक ठहरोलसि। 11 अब्राहमक खतना हइने भेले फेनि परमेस्वरमा विस्वास करके ठिक ठहरावलक चिन्हा कि छाप खतना रहलइ। यसने अब्राहम खतना हइने करले ताफेनि परमेस्वरमा विस्वास करलहरा जम्मे मन्सावानिक पुरखा भेलिय। हुनुका विस्वास करलेसे परमेस्वर हुनुकाके ठिक ठहरोबसि। 12 उअ त खतना करलहरानिक फेनि पिता भेलिय। बाकि हुनुकर खतना मतरे हखे नाहिँ बनतइ, हुनुकरमा फेनि हमार पुरखा अब्राहमक नहिँया विस्वास हखे परतइ, जुन विस्वास वकर खतना हखलिसे पहिलहिँ रहलइ। 13 अब्राहम व्यवस्था पालन करलेसे हइने, बाकि विस्वाससे ठिक ठहरलेसे परमेस्वर वकरेके हसे वकर सन्तानसभके संसारक हकवाला बनावेके प्रतिग्या करलसि। 14 यगर व्यवस्था पालन करलहरा मतरे हकवाला हतइ जउँ, विस्वास व्यरथ हसे प्रतिग्या बेकार हतइ। 15 केहकेकि व्यवस्था पालन हइने करलहरामा परमेस्वरक दन्ड यसइ, बाकि जहवाँ व्यवस्था हइने बडइ, वहवाँ आग्या हइने मानेके त बाते हइने भेलइ। 16 उहेसे उअ प्रतिग्या विस्वास करलेसे पवेसइ हसे इअ परमेस्वरक दायामा भर परसइ। इअ प्रतिग्या व्यवस्था पालन करलहराक तहिँया मतरे हइने, बाकि अब्राहमक नहिँया विस्वास करलाहर जम्मे जनक तहिँया फेनि हखइ, केहकेकि अब्राहम हमार जम्मे जनक पुरखा हखिय। 17 जसने धरमसास्तरवामा लिखाइल बडइ, “मुइ तोरके बहुत जातिसभक पुरखा बनोले बडहिँ।” अब्राहम मरलि मन्सावानिके जिवन देलाहर हसे किहो फेनि हइने भेल चिजुके फदकके किहो चिजुसभ बनावे सकलाहर परमेस्वरमा विस्वास करलिय। 18 सन्तानक यासा हइने हखइकि “तोर सन्तान तरगन नहिँया बहुत हतइ” कहके परमेस्वरक देलि प्रतिग्यामा अब्राहम यासा राखके विस्वास करलिय हसे यसने उअ बहुत जातिसभक पुरखा बनलिय। 19 अब्राहमक उमेर लगभग सय बरस पुगल रहलइ, बाकि उअ बुढ भके मरल नहिँया भेलि देहिया हसे वकर जनियावा बाझि बडिय कहलि बतवा वकरेके विस्वासमा कमजोर बनावे हइने सकलइ। 20 उअ परमेस्वरक प्रतिग्या करलि बतवामा किहो सक हइने करलिय, बाकि यापन विस्वासमा झन बरियार भके परमेस्वरके यादर करलिय। 21 केहकेकि परमेस्वर प्रतिग्या करलि बतवा सदियो पुरा करे सकबसि कहके वकर पाका थाह रहलइ। 22 इहे विस्वासक कारनसे “परमेस्वर वकरेके ठिक ठहरोलसि।” 23 “परमेस्वरक यागा उअ ठिक ठहरल हखिय” कहके धरमसास्तरवामा लिखइलि बतवा वकर तहिँया मतरे हइने लिखाइल हखइ, 24 इअ त हमार तहिँया फेनि लिखाइल हखइ। हमरा जुने येसु हमार प्रभुके मरलिसे जिउतोलहर परमेस्वरमा विस्वास करले बडहुँ। इहे विस्वासक कारनसे हमरा फेनि परमेस्वरक यागा ठिक ठहरल बडहुँ। 25 हमार पापक तहिँया परमेस्वर येसु प्रभुके मरेके तहिँया सपदेलसि हसे हमरा परमेस्वरक यागा ठिक ठहरे सकुँ कहके हुनेके फेरि जिउतोलसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.