रोमि 3 - चितवनिया थारुपरमेस्वरक विस्वासयोग्यता 1 याबे यसके भेले जउँ, यहुदि हखके किहो फाइदा हइने बडइ त? खतना करेके किहो मोल हइने बडइ? 2 सदियो यहुदि हखइकि हरेक खलिकसे फाइदा बडइ। सबसे पहिला त, परमेस्वर यापन वचन यहुदियानिके सपदेले बडसि। 3 बाकि कतेक जन विस्वास हइने करलइ, कथि भेलइ त? कतेक जन विस्वास हइने करलइ कहतेमा वसके भेले परमेस्वरके विस्वास करे नाहिँ सकेतइ त? 4 सदियो वसके हइने हखइ! जम्मे मन्से झुठा फदकले फेनि परमेस्वर झुठा नाहिँ फदकबसि। जसने धरमसास्तरवामा लिखाइल बडइ, “यपनहुँ फदकलदकमा ठिक ठहरबहुँ हसे न्याय हखइकि यपनहुँक जित हतइ।” 5 बाकि हमरा खराब काम करइ परमेस्वर ठिक करइ बडसि देखार हतइ जउँ, हमरा कथि कहेके त? कथि परमेस्वर हमारसाङे खिसियाके गल्ति करलसि? कतेक जन मन्से यसने विचार करसइ। 6 वसनुक कहवाँ हतइ? यगर परमेस्वर ठिकसे हमराके न्याय नाहिँ करबसि जउँ, इअ संसारक याको मन्सावानिक न्याय कस्के करबसि त? 7 यगर मोर झुठा परमेस्वरक सत्यता स्पस्ट देखाके हुनेक महिमा हतइ जउँ, केहके मुइ पापि मन्से नहिँया दन्ड पवइ बडहिँ? 8 यउह, यसल परिनामक तहिँया हमरा खराब काम करु कहके हमरा सिखोइ बडहुँ कहके कुनहुँ-कुनहुँ मन्सावाह हमराके दोस लगोसइ। बाकि इअ बतवा सत्य हइने हखइ हसे यसनुक बात करलाहर मन्सेसभके परमेस्वर दन्ड देबसि। धरमि कुनहुँ फेनि हइने बडइ 9 वसके भेले, कथि हमरा यहुदि मन्सावाह याको जनसे यसल बडहुँ त? कसहुँकरके फेनि हइने बडहुँ। यहुदि हसे अयहुदि जम्मे जन पापक अदलमा बडइ कहके मुइ पहिलहिँ देखासकले बडहिँ। 10 धरमसास्तरवामा यसके लिखाइल बडइ, “परमेस्वरक लजरियामा कुनहुँ फेनि ठिक हइने बडइ, एक जन फेनि हइने बडइ। 11 परमेस्वरक बात बुझलाहर कुनहुँ फेनि हइने बडइ, परमेस्वरके खोजलाहर कुनहुँ फेनि हइने बडइ। 12 जम्मे जन परमेस्वरके त्यागले बडइ, हुनुका जम्मे जन काम हइने लगना भेल बडइ। भलाइ करलाहर कुनहुँ फेनि हइने बडइ, एक जन फेनि हइने बडइ। 13 हुनुकर घेन्टिया खुला चिन्डि नहिँया बडइ, हुनुका यापन जिभियासे छलक बात करसइ। हुनुकर फदकावा बिखियार साँपक बिख नहिँया बडइ। 14 हुनुकर मुहवा सराप हसे घिनाक बातसे भरल बडइ। 15 हुनुका मन्से मारेके छिटुवाह बडइ। 16 हुनुका जहवाँ गेले फेनि विनास करसइ हसे मन्सावानिके दुःख देसइ, 17 हसे हुनुका कबहुँ फेनि सान्तिमा रहे हइने जनले बडइ। 18 हुनुकर मनवामा परमेस्वरक डरे हइने बडइ।” 19 याबे हमरा जनसहुँ कि, व्यवस्थाक बात त व्यवस्थाक अदलमा रहलहरा मन्सावानिक तहिँया हखइ, उहेसे जम्मे जनक मुहवा चुप रहइ हसे संसारक जम्मे मन्सावाह परमेस्वरक यागा जवाफ देवे परतइ। 20 उहेसे व्यवस्था पालन करके परमेस्वरक लजरियामा कुनहुँ फेनि ठिक नाहिँ ठहरतइ, केहकेकि मन्सावा पापि बडइ कहके व्यवस्था देखोसिय। विस्वाससे परमेस्वरक लजरियामा ठिक ठहरेके 21 बाकि याबे त व्यवस्थाबिना परमेस्वर यापन लजरियामा मन्सावानिके ठिक ठहरोबसि कहके हुने देखोले बडसि। इहे बतवाक बारेमा व्यवस्था हसे अगमवक्तावाह कहले बडइ। 22 येसु ख्रिस्टमा विस्वास करलहरा जम्मे जनके परमेस्वर यापन लजरियामा ठिक ठहरोबसि, केहकेकि हुने ककरहुँके फेनि एकोरियाह व्यबहार हइने करससि। 23 केहकेकि जम्मे जन पाप करले बडइ हसे परमेस्वरक महिमा पावेके चुकले बडइ। 24 बाकि परमेस्वरक यापन दायासे येसु ख्रिस्टसे हमराके पापक दन्डसे बचोलसि हसे हुने परमेस्वरक यागा हमराके वसहि ठिक ठहरोलसि। 25 परमेस्वर येसु ख्रिस्टके हमार पापक मोल तिरेके तहिँया भोगक रुपमा इअ संसारमा पठादेलसि। मोर तहिँया येसु ख्रिस्ट यापन रकत बहोलसि कहलि बतवामा विस्वास करलि मन्सावाह ठिक ठहरतइ। इअ काम परमेस्वर यापन धारमिकता देखावेके तहिँया करलसि, केहकेकि हुने सहसान करके मन्सावानिक पहिनाक करलि पापक सजाय हुनुकाके हइने देलसि। 26 परमेस्वर यपनहिँ धरमि बडसि हसे येसुमा विस्वास करलहरानिके ठिक ठहरोलि बतवा हुने यखनिक जुनवामा परमानित करलसि। 27 वसके भेले कथिक तहिँया घमन्ड करेके? घमन्ड करना बात हइने बडइ। व्यवस्था पालन करके मन्से ठिक हइने ठहरसइ, बाकि ख्रिस्टमा विस्वास करके मतरे ठिक ठहरसइ। 28 हमार थाह बडइ कि, व्यवस्था पालन करके हइने, बाकि ख्रिस्टमा विस्वास करके मतरे परमेस्वरक यागा हमरा ठिक ठहरसहुँ। 29 कथि परमेस्वर यहुदियानिक मतरे परमेस्वर हखसि? कथि हुने अयहुदियानिक परमेस्वर हइने हखसि त? सदियो, हुने जम्मे जनक परमेस्वर हखसि। 30 केहकेकि परमेस्वर एगुडे मतरे बडसि। हुने यहुदि हसे अयहुदि जम्मे जनके हुनुकर विस्वाससे ठिक ठहरोबसि। 31 कथि हमार विस्वास व्यवस्थाके व्यरथ ठहरोसिय? वसके हखे नाहिँ सकतइ, बरु हमरा त हुनेक व्यवस्था समरथन करसहुँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.