रोमि 2 - चितवनिया थारुपरमेस्वरक न्याय 1 उहेसे अरे मन्सावा, कथि तुइ दोसरे जनके दोस लगोसहि? तोहरा जुने भेले फेनि दोसि हइने बडहुँ कहके लाथ लगावे नाहिँ सकबह, केहकेकि जथिमा तोहरा दोसरे जनके दोस लगोसह, उहेमा तोहरा यपनहिँ फेनि दोसि ठहरबह, केहकेकि तोहरा दोस लगोलहरा फेनि उहे काम करसह। 2 हमार थाह बडइ कि, यसनुक काम करलाहर मन्सेसभके परमेस्वर डउलसे न्याय करबसि। 3 अरे मन्सावा, तुइ यसनुक काम करलाहर मन्सेसभके दोस लगोसहि हसे तुइ यपनहिँ फेनि उहे काम करसहि जउँ, कथि तुइ परमेस्वरक न्यायसे बचे सकबहि? 4 कथि तोहरा परमेस्वरक बहुत दाया, सहसानाके किहो हइने सम्झसह? परमेस्वर यापन दायासे तोहार पापि मनवा हुनेवरि फिरोह कहलि बतवा कथि तोहार हइने थाह बडइ? 5 बाकि तोहरा त यापन हृदय कठोर बनोसह हसे पछताप करे हइने चाहसह। उहेसे परमेस्वरक खिस यइना दिनक तहिँया तोहरा यापन पउना दन्ड जामा करके धरले बडह। उअ दिन परमेस्वर जम्मे मन्सावानिके ठिकसे न्याय करबसि। 6 परमेस्वर हरेक मन्सेके वकर करलि कमवा यनुसारक इनाम देबसि। 7 जुन मन्सेसभ भलाइक काम करके महिमा, इज्जत हसे सबदिन रहना जिवन खोजसइ, परमेस्वर हुनुकाके अनन्त जिवन देबसि। 8 बाकि यपनहिँके मतरे प्रेम करलाहर, सत्य बात पालन हइने करलाहर हसे खराब काम करलाहर मन्सेसभके परमेस्वर खाँ नाहिँ डउलसे दन्ड देबसि। 9 खराब काम करलहरा जम्मे मन्सावाहमा, पहिला यहुदि हसे अयहुदि मन्सावानिमा फेनि दुःख तके कस्ट यतइ। 10 बाकि परमेस्वर यसल काम करलाहर हरेक जनके पहिला यहुदि हसे वकरपाछा अयहुदिके फेनि सम्मान, यादर हसे सान्ति देबसि। 11 केहकेकि परमेस्वर ककरहुँके फेनि एकोरियाह व्यबहार नाहिँ करबसि। 12 अयहुदि मन्सावाह जुने परमेस्वरक व्यवस्था हइने पाके पाप करले बडइ, हुनुका व्यवस्था नाहिँ पाके नास हतइ हसे जुने व्यवस्था पाके पाप करले बडइ, हुनुकर न्याय व्यवस्थासे हतइ। 13 केहकेकि व्यवस्था सुनके मतरे परमेस्वरक लजरियामा मन्से ठिक हइने ठहरसइ, बाकि व्यवस्था पालन करके मतरे परमेस्वरक लजरियामा मन्से ठिक ठहरसइ। 14 अयहुदि मन्सावानिसाङे यहुदि मन्सावानिक व्यवस्था हइने बडइ, बाकि हुनुका स्वभावसे व्यवस्थाक बात पालन करसइ। इअ बतवा पालन करलेसे हुनुकर हृदयमा व्यवस्था बडइ कहके देखोसइ। 15 हुनुकर हृदयमा व्यवस्थाक चाहल बात लिखाइल बडइ कहके यापन चालचलनसे देखोसइ हसे हुनुकर यपने विवेक फेनि गवाहि देसिय। हुनुकर विचारसभ कहियो हुनुकाके दोस लगोसिय हसे कहियो ठिक काम करलह कहके समरथन करसिय। 16 इअ बतवा उअ दिन पुरा हतइ, जब परमेस्वर मोर परचार करलि सुसमाचार यनुसार येसु ख्रिस्टसे मन्सावानिक हृदयमा रहल गुप्त बातक न्याय करबसि। यहुदिसभ हसे व्यवस्था 17 तोहरा, जुने यपनहिँके हमरा यहुदि हखहि कहके व्यवस्थामा भर परसह हसे सदियो परमेस्वरके चिनसहुँ कहके घमन्ड करसह, 18 परमेस्वर हमारसे कथि चाहससि, उअ हमार जम्मे थाह बडइ कहके कहसह। तोहरा व्यवस्थाक सिखावल यसल बातमा सहमत हसह। 19 तोहरा मनवामा यान्हर भेलि मन्सावानिके पइडा देखोसहुँ कहके धाक लगोसह हसे यन्हारिमा पइडा हइने देखलहरानिक तहिँया यपनहिँके सदियो ज्योति सम्झसह। 20 तोहरा मुरुख मन्सावानिके ठिक बात सिखावे सकसहुँ कहसह, किहो हइने जनलहरानिके सिछा देसहुँ कहसह हसे परमेस्वरक व्यवस्था हमारसाङे भेलेसे जाने परना जम्मे बात जनले बडहुँ कहके दाबि करसह। 21 यसने तोहरा दोसरे जनके सिखोसह, बाकि यपनहिँ केहके हइने सिखसह? दोसरे जनके चोरावे नाहिँ बनतइ कहके परचार करसह, बाकि तोहरा यपनहिँ केहके चोरोसह त? 22 तोहरा जुने धुचुड झिन करिह कहसह, कथि तोहरा यपनहिँ धुचुड करसह? तोहरा, जुने मुरतियानिके घिरिना करसह, कथि तोहरा यपनहिँ अयहुदियानिक मन्दिरवाहमा भेलि चिजुवा चोरोसह? 23 तोहारसाङे व्यवस्था बडइ कहके घमन्ड करसह, कथि तोहरा व्यवस्था पालन नाहिँ करके परमेस्वरक अनादर करबह? 24 केहकेकि धरमसास्तरवामा लिखाइल बडइ, “तोहरा यहुदियानि कारनसे अयहुदियानिक बिचा परमेस्वरक नाउँक निना भेल बडइ।” 25 यगर तोहरा व्यवस्था पालन करबह जउँ खतना करल महत्व बडइ, बाकि तोहरा व्यवस्था पालन नाहिँ करबह जउँ त, तोहरा खतना हइने करल मन्से नहिँया हखह। 26 यगर खतना हइने भेल मन्से व्यवस्था पालन करबिय जउँ, कथि उअ खतना करल मन्से नहिँया नाहिँ हखबिय त? 27 उहेसे देहियामा खतना हइने करलि अयहुदि मन्सावाह व्यवस्था पालन करतइ जउँ, हुनुकहिँ तोहराके दोसि ठहरोतइ, केहकेकि तोहरा खतना भेलि यहुदि मन्सावानिसाङे लिखल व्यवस्था भके फेनि तोहरा पाप करइबडह। 28 केहकेकि मन्सावानिके देखावेके तहिँया मतरे यहुदि नियम पालन करलाहर मन्से सदियो यहुदि हइने हखइ। वसने देहियामा करलि खतना फेनि सदियो खतना हइने हखइ। 29 सदियो यहुदि उअ हखिय, जुने मनवासे यहुदि हखिय। सदियो खतना करना बात त लिखल नियम पालन करना बात मतरे हइने, बाकि पवितर-आत्मासे हृदय बदलाएके बात हखइ। यसनुक मन्सेक बखान त मन्सेसभसे हइने, बाकि परमेस्वरसे हसइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.