रोमि 16 - चितवनिया थारुव्यक्तिगत अभिवादन 1 मुइ हमार बहिनिया फिबिक बारेमा तोहराके डउल बात कहबहिँ। उअ किंक्रिया सहरवामा भेलि मन्डलियामा सेविकाक काम करसिय। 2 मुइ तोहराके कहबहिँ, प्रभुक मन्से नहिँया वकरेके स्वागत करिह हसे वकर खाँचोमा मदत करिह, केहकेकि उअ बहुत मन्सेसभके मदत करले बडिय तके मोरके फेनि मदत करले बडिय। 3 मोरसाङे येसु ख्रिस्टक काम करलहरा सहकरमि प्रिस्का हसे अकिलासके मोर अभिवादन बडइ। 4 हुनुका मोर जिवन बचावेके तहिँया मरेके इछुक भेलइ। हुनुकाके मुइ मतरे हइने, बाकि अयहुदि जतियाक विस्वासियवाह फेनि धन्यवाद देसइ। 5 हुनुकर घरवामा जामा भेलि विस्वासिसभके मोर अभिवादन बडइ। मोर प्रिय सङहतियावा इपेनितसके अभिवादन बडइ। एसिया छेतरमा सबसे पहिला ख्रिस्टमा उहे विस्वास करले रहलिय। 6 तोहार तहिँया खाँ दुःख करलाहर मरियमके फेनि अभिवादन बडइ। 7 मोरसाङे झ्यालखनवामा रहलाहर यहुदि सङहाति एन्ड्रोनिकस हसे वकर जनियावा युनियसके अभिवादन कहदिह। हुनुका प्रेरितसभ मधेसे नाउँ चलल प्रेरित रहलइ हसे मोरसे यागा हुनुका ख्रिस्टमा विस्वास करले रहलइ। 8 प्रभुमा मोर प्रिय सङहाति एम्प्लिआतसके अभिवादन कहदिह। 9 ख्रिस्टमा हमार सहकरमि उरबानस हसे मोर प्रिय सङहाति स्ताखुसके अभिवादन कहदिह। 10 ख्रिस्टक योग्य ठहरल सेवक अपेल्लेसके अभिवादन कहदिह। अरिस्तोबुलसके हसे वकर घरवामा रहलहरानिके अभिवादन कहदिह। 11 मोर यहुदि सङहतिया हेरोदियनके अभिवादन कहदिह। प्रभुमा विस्वास करलाहर नरकिससके हसे वकर घरवामा रहलहरानिके अभिवादन कहदिह। 12 प्रभुक तहिँया खाँ दुःख करलाहर जनियानिसभ तुरुफेना हसे तुरुफोसा परसिसके अभिवादन कहदिह। वसने प्रभुक तहिँया खाँ दुःख करलाहर जनियानि परसिसके अभिवादन कहदिह। 13 प्रभुक चुनल रुफस हसे वकर दाओ, जुने प्रभुमा मोर दाओ नहिँया भेल बडिय, हुनुकाके अभिवादन कहदिह। 14 असिंक्रितस, फ्लेगन, हरमेस, पतरोबास, हरमास हसे हुनुकरसाङे भेलि प्रिय विस्वासिसभके अभिवादन कहदिह। 15 फिलोलोगस, युलिया, नेरियस हसे वकर बहिनिया तके ओलिम्पास हसे वकरसाङे भेलि जम्मे परमेस्वरक जनसभके अभिवादन कहदिय। 16 तोहरा एक-दोसरि जनके पवितर प्रेमसे अभिवादन करिह। ख्रिस्टमा जम्मे विस्वासिसभ तोहराके अभिवादन पठोले बडइ। 17 प्रियसभ, तोहराके सिखोलि सिछाक विरोधमा फुट हसे वाधा यनलहराके ध्यान दिह हसे यसनुक मन्सेसभसे तनाउ रहिह कहके मुइ तोहारसे बिन्ति करइ बडहिँ। 18 केहकेकि यसनुक मन्सेसभ ख्रिस्ट हमार प्रभुक तहिँया हइने, बाकि यपने पेटवाक तहिँया सेवा करइरहसइ। हुनुका चिपुलचापुल बात करसइ हसे सोझ मन्सावानिक हृदयके धोखा देसइ। 19 तोहरा परमेस्वरक कहलि आग्या पालन करइबडह कहके जम्मे जनक थाह बडइ, उहेसे मुइ तोहारसाङे खुसि बडहिँ। बाकि जथि यसल बडइ, वकर तहिँया तोहरा बुद्धियार हखिह हसे जथि खराब बडइ, वकरमा निरदोस हखिह कहके मुइ चाहसहिँ। 20 सान्ति देलाहर परमेस्वर हलहालि सइतनवाके तोहार टङवातर धङबसि। हमार प्रभु येसु ख्रिस्टक अनुग्रह तोहारसाङे रहइ। 21 मोर सहकरमि तिमोथि तोहराके अभिवादन पठोले बडिय। वसने करके मोर यहुदि भयवाह लुकियस, यासोन हसे सोसिपातरोस तोहराके अभिवादन पठोले बडइ। 22 पावलक वरिसे इअ चिठिया लिखलाहरा मुइ तरतियस फेनि प्रभुमा तोहराके अभिवादन पठोइ बडहिँ। 23 मोर घरबेटिया गायस, जुने जम्मे मन्डलियाके सत्कार करसिय, उअ फेनि अभिवादन पठोले बडिय। यसनेकरके सहरवाक कोसाध्यछ इरास्तस हसे विस्वासि सङहतियावा क्वाटरस तोहराके अभिवादन पठोले बडइ। 24 हमार प्रभु येसु ख्रिस्टक अनुग्रह तोहारसाङे रहइ। आमेन। 25 हमरा जम्मे जन परमेस्वरक प्रसंसा करु। मोर प्रचार करलि सुसमाचार हसे येसु ख्रिस्टक यसल समादसे परमेस्वर तोहार विस्वासके बरियार बनावे सकससि। इअ येसु ख्रिस्टक बारेक यसल समाद जुग-जुगसे गुप्तमा रहल ख्रिस्टक सुसमाचार याबे अयहुदि मन्सावानिक तहिँया परकट भेल बडइ। 26 बाकि याबे इअ बतवा हमार तहिँया स्पस्ट भेल बडइ हसे जम्मे जतियाक मन्सावाह हुनेमा विस्वास करइ तके हुनेक आग्या पालन करइ कहके सबदिन रहलाहर परमेस्वरक आग्या यनुसार अगमवक्तावानिसे लिखइलि बतवासे चारिवरि परचार कराइ बडइ। 27 जम्मे जनलाहर एक मतरे परमेस्वरके सदासरवदा येसु ख्रिस्टसे यादर हखइ रहइ। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.