रोमि 15 - चितवनिया थारुदोसरि जनक वास्ता 1 हमरा विस्वासमा बरियार भेलि मन्सावा विस्वासमा कमजोर भेलि मन्सावाक कमजोरि सहे परतइ। हमरा यपनहिँके मतरे खुसि पारे नाहिँ बनतइ, बाकि दोसरे जनक कमजोरिके फेनि सहे परतइ। 2 हमरा हरेक जन विस्वासिसभक आत्मिक उन्नति हसे हुनुकर भलाइ हखइ कहके ध्यान देवे परतइ। 3 केहकेकि ख्रिस्ट फेनि यपनहिँके खुसि पारेके काम हइने करलसि। जसने धमरसास्तरवामा लिखाइल बडइ, “यपनहुँके निना करलहरा मोरके निना करले बडइ।” 4 धरमसास्तरवामा पहिला लिखइलि बतवाह हमार सिछाक तहिँया लिखाइल रहलइ, ताकि वकरसे यइना सहेके सक्ति हसे उत्साहसे हमरा यासा पावे सकुँ। 5 परमेस्वर सहेके सक्ति हसे उत्साहक स्रोत हखसि। तोहराके येसु ख्रिस्टक चालमा चलेके हसे एक-दोसरि जनसाङे एक मन हखेके सक्ति दिय। 6 यसके तोहरा एक मन भके हसे एक स्वरमा हमार प्रभु येसु ख्रिस्टक पिता हसे परमेस्वरक प्रसंसा करे सकबह। 7 परमेस्वरके महिमा देवेके तहिँया ख्रिस्ट तोहराके स्विकार करले नहिँया तोहरा फेनि एक-दोसरि जनके स्विकार करिह। 8 मुइ तोहराके कहबहिँ, हमार पिता-पुरखाके देलि वाचा परमेस्वर पुरा करबसि हसे हुने सत्य बडसि कहके देखावेके तहिँया ख्रिस्ट यहुदियानिक सेवक भेलसि। 9 उहेसे परमेस्वर अयहुदियानिके दाया देखोलसि, ताकि हुनुका हुनेक महिमा करइ। जसने धरमसास्तरवामा लिखाइल बडइ, “उहेसे अयहुदियानिक बिचा मुइ यपनहुँक प्रसंसा करबहिँ हसे यपनहुँक नाउँक स्तुति करबहिँ।” 10 धरमसास्तरवाक दोसरि ठउरियामा यसके लिखाइल बडइ, “अरे अयहुदि मन्सावाह, परमेस्वरक मन्सावानिसाङे आनन्द मनोह।” 11 दोसरि ठउरियामा यसके फेनि लिखाइल बडइ, “अरे जम्मे अयहुदि मन्सावाह, प्रभुक प्रसंसा करह, हसे जम्मे मन्सावाह हुनेक प्रसंसा करइ।” 12 यसइया अगमवक्ता फेरि कहसिय, “यिसइक वंससे एक जन यबसि। हुने अयहुदि मन्सावानिमा सासन करबसि, हसे अयहुदि मन्सावाह हुनेमा यासा रखतइ।” 13 तोहरा यासा देलाहर परमेस्वरमा विस्वास करले बडह। हुनेहिँ तोहराके आनन्द हसे सान्तिसे भरदेसि। ताकि तोहार यासा पवितर-आत्माक सक्तिमा बढते जयसकइ। अयहुदियानिक सेवक पावल 14 प्रियसभ, तोहरा भलाइ करलाहर मन्सेसभ हखह कहके मोर थाह बडइ। तोहार परमेस्वरक वचन थाह बडइ हसे एक-दोसरि जनके सिखावे सकबह। 15 ताफेनि तोहरा कतेक बात सम्झना करह कहके मुइ इअ चिठिया सहाससे लिखइ बडहिँ। परमेस्वर मोरके देलि अनुग्रहसे 16 अयहुदि मन्सावानिक बिचा येसु ख्रिस्टक सेवक मोरके बनोलसि। पुजेरिया परमेस्वरके मन परना भेटि चढोले नहिँया मुइ फेनि अयुदियानिके सुसमाचार सुनाके सेवाक काम करसहिँ, ताकि हुनुका पवितर-आत्मासे सुद्ध हखे सकइ। 17 उहेसे परमेस्वरक तहिँया मोर करलि सेवाक बारेमा मुइ येसु ख्रिस्टमा गरव करसहिँ। 18 अयहुदि मन्सावानिके आग्याकारि बनावेके तहिँया मोर सुनोलि सुसमाचार हसे ख्रिस्ट मोरसे करलि काम बाहेक याको किहोक बारेमा फदकेके मुइ याट नाहिँ करबहिँ। 19 मुइ सक्तिसालि चिन्हा हसे यचम्मक कामसभ परमेस्वरक आत्माक सक्तिसे करले हखहि। वसने मुइ यरुसलेमसे लेके इल्लुरिकनलइ चारिवर ख्रिस्टक सुसमाचार परचार करेके काम पुरा करले बडहिँ। 20 ख्रिस्टक बारेमा हइने सुनलि ठउरियामा सुसमाचार परचार करेके मोर खाँ इछा बडइ, केहकेकि दोसरे जनक बेठावल जग वपरा मुइ घर नाहिँ बनोबहिँ। 21 जसने धरमसास्तरवामा लिखाइल बडइ, “हुनेक बारेमा जकरेके कबहुँ हइने कहाइल रहलइ, हुनुका हुनेके देखतइ, हसे हुनेक बारेमा जुने कबहुँ हइने सुनले बडइ हुनुका बुझतइ।” पावलक रोम जायके योजना 22 तोहार लघिना यावेके मुइ बहुत पारि विचार करले फेनि ख्रिस्टक बारेमा हइने सुनलि ठउरियामा परचार करे परलेसे यावे हइने सकलहि। 23 बाकि इअ छेतरसभमा मुइ परचारक काम वरासकले बडहिँ हसे बहुत बरससे तोहराके भेटेके मोर खाँ इछा भेलेसे, 24 मुइ स्पेन देस जाइकि तोहराके भेटेके यासा करले बडहिँ। किहो समय तोहारसाङे बितावेके इछा बडइ हसे वहवाँसे स्पेन जायके तोहरा मोरके मदत करबह कहके मोर यासा बडइ। 25 बाकि इअ पारि परमेस्वरक जनसभक तहिँया पइसा पुगावे मुइ यरुसलेमवरि जाइ बडहिँ। 26 केहकेकि माकेडोनिया हसे अखइया छेतरमा भेलि मन्डलियाह यरुसलेममा भेलि गरिब मन्सावानिके पइसा पठोइ बडइ। 27 हुनुका इअ खुसिसे जामा करले हखइ। सदियो हुनुका यकर तहिँया रिनि रहलइ। केहकेकि अयहुदि मन्सावाह यहुदि मन्सावानिसे आत्मिकि आसिससभ पउले बडइ जउँ, अयहुदि मन्सावाह फेनि यहुदि मन्सावानिक खाँचो परइकि मदत करइ। 28 उहेसे हुनुकर पठोलि पइसवा यरुसलेममा भेलि गरिब विस्वासिसभके देवेके काम सकके तोहराके भेटते मुइ स्पेन जेबहिँ। 29 मोर थाह बडइ कि, जब मुइ तोहार लघिना यबहिँ, येसु ख्रिस्टक पुरा आसिस लेके यबहिँ। 30 प्रियसभ, हमार विस्वास प्रभु येसु ख्रिस्टमा भेलेसे हसे एक-दोसरि जनके प्रेम करेके तहिँया हुनेक आत्मा हमराके देले बडसि। उहेसे तोहरा मोरसाङे मिलके परमेस्वरसे मोर तहिँया परथाना करेके खाँ जोड करिह कहके मुइ तोहराके बिन्ति करइ बडहिँ। 31 मुइ यहुदा छेतरमा भेलि परमेस्वरके हइने चिनलि मन्सावानिसे बचे सकुँ हसे यरुसलेममा भेलि परमेस्वरक मन्सावाह मोर लेले गेलि पइसवा हुनुका स्विकार करइ कहके परथाना करदिह। 32 परमेस्वरक इछा हतइ जउँ मुइ खुसिसे तोहार लघिना यबहिँ हसे हमरा एक-दोसरि जनमा उत्साहित हखबहुँ। 33 सान्ति देलाहर परमेस्वर तोहार जम्मे जनसाङे रहसि। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.