रोमि 14 - चितवनिया थारुएक-दोसरि जनक कमजोरि सहिह 1 विस्वासमा कमजोर भेलि विस्वासि मन्सावाके स्विकार करिह, बाकि वकर विचारक बारेमा दोस लगाके झगडा झिन करिह। 2 कुनहुँ जम्मे चिजु खाइ बनतइ कहके विस्वास करसइ, बाकि विस्वासमा कमजोर भेलि मन्सावा सागपात मतरे खेसिय। 3 जुने जम्मे चिजु खेसिय, उअ सागपात खेलहरवाके गिल्ला झिन करिय हसे जुने जम्मे चिजु हइने खेसिय खेलहरवाके उअ दोस झिन लगोइ, केहकेकि परमेस्वर हुनुका दुन्हुँ जनके स्विकार करले बडसि। 4 दोसरे जनक बहरियाके दोस लगोलहर तुइ कुने हखहि? वकर मलिकवा उअ डउल काम करइ बडिय कि हइने डउल काम करइ बडिय कहके कहबिय। प्रभु कमजोर बहरियाके फेनि ठिक काम करेके मदत करे सकबसि, केहकेकि प्रभु वकरेके मदत करबसि। 5 कुनहुँ मन्से एगुडा दिनके दोसरि दिनवासे डउल दिन मनसइ, दोसरि मन्सावा जम्मे दिनवाके एगुडे नहिँया मनसइ। हरेक मन्से यापन मनलि दिनवाके यापन मनवामा पाका करे परसइ। 6 जुन मन्सावा कुनहुँ दिनवाके विसेस रुपसे पालन करसइ, उअ प्रभुक यादरक तहिँया पालन करसिय। जुन मन्सावा मासु खेसिय, उअ प्रभुक यादरक तहिँया खेसिय, केहकेकि उअ प्रभुके धन्यवाद देसिय। जुन मन्सावा मासु हइने खेसिय, उअ फेनि परमेस्वरक यादरक तहिँया हइने खेसिय हसे परमेस्वरके धन्यवाद देसिय। 7 हमरा कुनहुँ फेनि यापन तहिँया हइने जिएसहुँ हसे हमरा कुनहुँ फेनि यापन तहिँया हइने मरसहुँ। 8 यगर हमरा जियबहुँ जउँ प्रभुक यादरक तहिँया जियबहुँ हसे मरबहुँ जउँ प्रभुक यादरक तहिँया मरबहुँ। उहेसे हमरा जियले फेनि मरले फेनि प्रभुक हखहुँ। 9 ख्रिस्ट मरलिसभक हसे जिउतिसभक दुन्हुँक प्रभु हखेके तहिँया मरलसि हसे फेरि जिउतलसि। 10 वसके भेले तोहरा सागपात खेलहरवा याको जनके केहके दोस लगोसह? हसे तोहरा मासु खेलहरवा याको जनके केहके दोस लगोसह? हमरा जम्मे जन परमेस्वरक न्याय करना ठउरियाक यागा ठडियाए परतइ। 11 केहकेकि धरमसास्तरवामा लिखाइल बडइ, “परमप्रभु कहससि, ‘मुइ जिउते परमेस्वर भेलेसे, हरेक मन्से मोर यागा ठेहुँनेतइ, हसे जम्मे जन यापन मुहवासे मुइ परमेस्वरके प्रसंसा करतइ’।” 12 उहेसे हमरा जम्मे जन यापन-यापन करलि कमवाक लेखा परमेस्वरके देवे परतइ। 13 उहेसे हमरा एक-दोसरि जनके दोस नाहिँ लगाउ। बरु विस्वासिसभक चित दुखोना कि बाधा देना काम हमरा कबहुँ फेनि नाहिँ करबहुँ कहके निरनय लेउ। 14 प्रभु येसुमा विस्वास करलेसे मोर इअ बतवा पाका थाह बडइ कि, कुनहुँ फेनि खइना चिजु यपनहिँ असुद्ध हइने हसइ, बाकि जुने उअ असुद्ध बडइ सोचतइ, उअ वकर तहिँया असुद्ध हसइ। 15 यगर तुइ जथि खेबहि उअ चिजुवासे याको विस्वासिसभक चित दुखतइ जउँ, तुइ प्रेम हइने करसहि। जाकर तहिँया ख्रिस्ट मरलसि, बाकि तोर खइलि उअ चिजुवासे नास झिन हखइ। 16 उहेसे तोर खाएके बारेमा ठिक लगले फेनि याको जन इअ बिसयमा बात झिन कटइ। 17 केहकेकि परमेस्वरक राज कहले खाए हसे पिएके हइने, बाकि उअ धारमिकता, सान्ति हसे आनन्दक बारेमा हखइ, जुन पवितर-आत्मा देससि। 18 जुने यसने खलिकसे ख्रिस्टक सेवा करसिय, उअ परमेस्वरके खुसि बनोसिय हसे मन्सावानिसे यादर पउबिय। 19 उहेसे हमरा मेलमिलाप करोना हसे एक-दोसरि जनके विस्वासमा बरियार बनोना चिजुमा ध्यान देवे परसइ। 20 खइना चिजुक तहिँया परमेस्वरक कामके नस्ट झिन करिह। मासु खाएके हइने डउल हइने हखइ, बाकि यापन खइलि चिजुवासे याको जनके बाधा पारेके हइने डउल हखइ। 21 वास्तवमा डउल त इअ हखइ कि, मासु नाहिँ खाएके, मोद नाहिँ पिएके हसे विस्वासिसभक बाधा पारना किहो चिजु फेनि नाहिँ करेके। 22 तोरमा भेलि विस्वास परमेस्वर हसे तोर बिचा रखसि। उअ मन्सावा धन्यक हखिय, जुने यापन ठिक ठहरोलि चिजुवाक कारनसे यपनहिँके दोसि हइने ठहरोसिय। 23 बाकि कुनहुँ सक करके किहो चिजु खेतइ जउँ, वकर विवेक वकरेके दोसि ठहरोबिय, केहकेकि उअ विस्वास विना खइले रहसिय। विस्वास विना करलि जम्मे काम पाप हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.