रोमि 13 - चितवनिया थारुसासकसभके करे परना करतव्य 1 हमरा जम्मे जन सासन करलाहर सासकसभक अदलमा रहे परतइ, केहकेकि हुनुकाके परमेस्वर अधिकार देले हखसि। जुने सासकसभ बडइ, हुनुका परमेस्वरसे नियुक्त भेल हखइ। 2 उहेसे सासकसभक विरोध करलहरा परमेस्वरसे नियुक्त भेलिसभक विरोध करसइ हसे जुने-जुने विरोध करसइ, हुनुका दन्ड पउतइ। 3 केहकेकि यसल काम करलहराह हइने, बाकि खराब काम करलहरा सासकसभसे डेराए परतइ। कथि तोहरा सासक डर बिना रहे चाहबह? वसके भेले यसल काम करह हसे तोहराके हुनुका च्याबास देतइ। 4 केहकेकि हुनुका त तोहार भलाइक तहिँया परमेस्वरक खटावल मन्सेसभ हखइ, बाकि तोहरा खराब काम करबह जउँ डरडरे रहे परतइ, केहकेकि दन्ड देवेके अधिकार हुनुका पउले रहसइ। सासकसभ त खराब काम करलहरानिके दन्ड देलाहर परमेस्वरक खटावल मन्सेसभ हखइ। 5 उहेसे परमेस्वरक दन्डसे बचेके मतरे हइने, बाकि तोहार विवेक सुद्ध राखेके तहिँया हुनुकर अदलमा रहे परतइ। 6 तोहरा कर तिरे परतइ, केहकेकि सासकसभ यापन पउलि जिम्मा पुरा करइकि हुनुका परमेस्वरक काम करइरहसइ। 7 तोहरा तिरे परना जम्मे जनके तिरिह, कर तिरेके बडइ जउँ कर तिरिह, राजस्व तिरे परनाके राजस्व तिरिह। वसने करके यादर करे परलहराके यादर करिह, सम्मान देवे परलहराके सम्मान दिह। एक-दोसरि जनके करे परना करतव्य 8 एक-दोसरि जनके प्रेम करेके बाहेक याको कुनहुँ चिजुमा ककरो रिनि झिन हखिह। केहकेकि जुने यापन पोरसियवाके प्रेम करसिय, उअ व्यवस्था पुरा करसिय। 9 व्यवस्थामा “तुइ धुचुड झिन करसि, तुइ हत्या झिन करसि, तुइ झिन चोरोसि, तुइ लोभ झिन करसि” इअ आग्यासभ बाहेक याको जतेक फेनि आग्या बडइ, उअ जम्मेक सारांस इअ हखइ, “तुइ यापन पोरसियवाके यपने नहिँया प्रेम करसि।” 10 प्रेम करलाहर मन्से पोरसियवाक खराबि हइने करसइ। उहेसे प्रेम करेके कहले व्यवस्था पुरा करेके हखइ। 11 हमरा यखनि बचलि समयक महत्व तोहार थाह बडइ। उहेसे तोहरा यसल जिवन बितोइह, निनसे उठेके ठिक जुन यासकल बडइ, केहकेकि हमरा पहिला विस्वास करलि जुनवासे यखनि हमार मुक्ति झन लजिके यासकल बडइ। 12 खराब दिन वराय लगलइ हसे यसल दिन लजिके यासकल बडइ। उहेसे यन्हारमा करना काम छाडके हमरा ज्योतिक हाथ-हथियार धारन करु। 13 हमरा दिनक इजोरमा रहल नहिँया ठिकसे चलु। मोजमाजा करेके, मातल रहेके, धुचुड करेके, भ्रस्टचार करेके, झगडा करेके हसे डाह करेके छाडदेउ। 14 बाकि प्रभु येसु ख्रिस्टक स्वाभाव धारन करु हसे पापि स्वभावक इछा पुरा करेके विचार नाहिँ करु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.