रोमि 12 - चितवनिया थारुपरमेस्वरक सेवामा समरपन 1 उहेसे प्रियसभ, परमेस्वर तोहराके दाया करलेसे मुइ तोहराके अनुरोध करबहिँ कि, तोहरा यपनहिँके पवितर हसे परमेस्वरक मन परना जिउते भोगक रुपमा चढोइह। तोहार आत्मासे करे परना सदि सेवा फेनि इहे हखइ। 2 इअ संसारक मन्सावानिक नहिँया तोहार चालचलन झिन हखइ, बाकि यापन सोच-विचारके परमेस्वरके बदले दिह। यसके करबह जउँ, तोहार जिवनमा परमेस्वरक इछा कथि बडइ कहके बुझे सकबह, कथि चिजु यसल बडइ, कुन चिजु परमेस्वरक मन परसइ हसे कथि चिजु सिद्ध बडइ उअ तोहार डउलसे थाह हतइ। 3 परमेस्वर मोरके दाया करके देलि वरदानक अधिकार यनुसार मुइ तोहरा जम्मे जनके कहबहिँ, जुने यपनेके जसने सम्झे परतइ वकरसे बढि झिन सम्झइ, बाकि परमेस्वरक देलि विस्वास यनुसार तोहरा जसनुक बडह वसने सोचिह। 4 केहकेकि जसने हमार एगुडे देहिमा बहुत यङसभ रहसइ, बाकि जम्मे यङसभक एगुडे काम हइने रहसइ। 5 वसने हमरा बहुत जन भेले ताफेनि ख्रिस्टमा एगुडे देहि हखहुँ हसे हरेक जनक एक-दोसरि जनक चाहिँ लगसइ। 6 परमेस्वर हुनेक दायासे हमराके फरक-फरक वरदानसभ देले बडसि। यगर हमरा अगमवाडि फदकेके वरदान पउले बडहुँ जउँ, हुनेक देलि विस्वास यनुसार फदकु। 7 यगर कुनहुँ सेवा करना वरदान पउले बडह जउँ, दोसरे जनके सेवा करिय, यगर कुनहुँ परमेस्वरक सिछा देवेके वरदान पउले बडह जउँ, उअ सिछा देवेके काम करिय। 8 यरति देलहरवा यरति दिय, खाँचोमा परलहराके मदत करलहरा उदार मनसे दिय। अगुवाइ करलहरा मनचोप लगाके अगुवाइ करिय हसे दाया देखोलहरा मन्सावा खुसिसे दाया देखोइय। 9 तोहार प्रेम देखावटि झिन हखइ, बाकि सदियो हखइ। जुन चिजु खराब बडइ, उअ त्यागिह। जुन चिजु यसल बडइ, वकरमा लागल रहिह। 10 एक-दोसरि जनके यपने भाइ-बहिन नहिँया प्रेम करिह। यापनसे बढता दोसरे जनके यादर करिह। 11 तोहरा आल्सि झिन हखिह, बाकि मेहनत करिह। आत्मामा जोसाके जम्मे हृदयसे प्रभुक सेवा करइरहिह। 12 तोहरा यासामा आनन्द करिह, कस्टमा सहसान धारन करिह, परथाना करइरहिह। 13 प्रभुक जनसभक खाँचो परइकि मदत करिह हसे घरवामा यइलि पहुनावानि सेवा-सत्कार करिह। 14 तोहराके सतोलरानिके सराप हइने, बाकि यासिरवाद दिह। 15 जुने आनन्द बडइ हुनुकरसाङे आनन्द मनोइह, जुने सोक करसइ, हुनुकरसाङे सोक करिह। 16 एक-दोसरि जनसाङे मिलके रहिह। घमन्डि झिन हखिह, बाकि नम्र मन्सेसाङे सङगत करिह। यपनहिँके बुद्धियार झिन सम्झिह। 17 खराबक बदला खराब झिन करिह। जथि चिजु जम्मे मन्सावानिक लजरियामा यसल बडइ, वकरमा ध्यान दिह। 18 हखे सकतइ जउँ, जम्मे जनसाङे मिलके रहिह। 19 प्रियसभ, यपनहिँ कबहुँ फेनि ककरोसे बदला झिन लिह, बाकि हुनुकाके दन्ड देवेके काम परमेस्वरके छाडदिह, केहकेकि धरमसास्तरवामा परमप्रभुक कहल बात लिखाइल बडइ, “बदला लेवेके काम मोर हखइ, मुइ बदला लेबहि।” 20 दोसरि ठउरियामा यसके लिखाइल बडइ, “तोर सतरुवा भुखाइल बडिय जउँ, वकरेके खियोसि, पियासल बडिय जउँ, वकरेके पानि देसि। यसके करबहिँ जउँ, तोहार सतरुवासभ लजियामा परतइ।” 21 खराब चिजुके तोहराके जिते झिन दिह, बाकि भलाइक काम करके खराबके जितिह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.