रोमि 11 - चितवनिया थारुइस्राएलि मन्सावानिके परमेस्वरक दाया 1 वसके भेले कथि परमेस्वर यापन मन्सावानिके त्यागले बडसि? हइने त्यागले बडसि, केहकेकि मुइ यपनहिँ फेनि इस्राएलि हसे अब्राहमक वंसमा जरमल बेन्यामिन कुलक मन्से हखहि। 2 परमेस्वर पहिलहिँसे छानलि यापन मन्सावानिके हइने त्यागले बडसि। धरमसास्तरवामा एलिया अगमवक्तावाक बारेमा कहलि बतवा कथि तोहार हइने थाह बडइ? उअ इस्राएलि मन्सावानिक विरोधमा परमेस्वरसाङे यसके बिन्ति करसिय, 3 “हे प्रभु, हुनुका यपनहुँक अगमवक्तावानिके मारलइ हसे भोग चढोनवा यपनहुँक वेदियाह भस्कादेलइ तके मुइ मतरे यसकरे बचल बडहिँ, हुनुका मोरके फेनि मारे खोजइबडइ।” 4 बाकि परमेस्वर वकरेके कथि उतर देलसि? “मुइ सात हजार जनके यापन तहिँया बचाके धरले बडहिँ, जुने बाल देवतावाके ठेहुँनाके ढोग हइने करलइ।” 5 वसने करके परमेस्वरक दायासे छानल कतेक जन इस्राएलि मन्सेसभ यखना फेनि विस्वासयोग्य बडइ। 6 इअ हुनुकर करलि कमवासे हइने भेल हखइ, बाकि परमेस्वरक दायासे भेल हखइ। हुनुकर करलि कामसे भेल रहतिय त, परमेस्वरक दाया व्यरथ हतिय। 7 उहेसे यसके कहे सकबहुँ, इस्राएलि मन्सावाह परमेस्वरक यागा ठिक ठहरे खोजले ताफेनि, हुनुका ठिक हइने ठहरलइ। बाकि परमेस्वरक छानलि मन्सावाह मतरे हुनेक यागा ठिक ठहरलइ। याको इस्राएलि मन्सावाह हइलठ भके रहलइ। 8 जसने धरमसास्तरवामा लिखाइल बडइ, “परमेस्वर हुनुकाके चेतना हइने भेल आत्मा देले बडसि। यसनुक याखि देले बडसि जुने झिन देखइ हसे यसनुक कान देले बडसि जुने झिन सुनइ, याजुक दिनलइ फेनि हुनुका वसने बडइ।” 9 वसने करके राजा दाउद फेनि कहसिय, “हुनुकर भोज-भतेर फाना हसे धराप बनइ, एगुडा ढुस लगना हसे हुनुकाके बदला देना बात हखइ। 10 हुनुकर यखिया देखे हइने सके जोकर धुनरार हखइ, हसे हुनुकर बेकडिया सबदिन कुबरार हखइ।” कलमि बान्हल डार 11 उहेसे मुइ कहबहिँ, कथि यहुदि मन्सावाह उठे हइने सके जोकर ढुस लागके खसल बडइ? अहँ हइने! यहुदि मन्सावाह विस्वास हइने करलेसे अयहुदियाह मुक्ति पउलइ, ताकि हुनुका फेनि मुक्तिक तहिँया डाहि बनइ। 12 यहुदि मन्सावाह पाप करलेसे संसारक मन्सावाह आसिस पउलइ हसे यहुदि मन्सावाह यपनहिँ पतन हखइकि अयहुदि मन्सावाह बहुत आसिस पउलइ। याबे यहुदि मन्सावाह पछताप करके परमेस्वरवरि फिरतइ जउँ, हुनुका झन कतुरा बहुत आसिस पउतइ। 13 याबे मुइ तोहरा अयहुदियानिके कहइ बडहिँ। मुइ याको अयहुदियानिक तहिँया पठाइल ख्रिस्टक प्रेरित भेलेसे मुइ इअ कमवा विसेस महत्व देसहिँ। 14 इअ यासा बडइ कि मोर यपने यहुदि जातिक मन्सावानिके डाहि बनावे सकुँ हसे हुनुकरमधे कतेक जन परमेस्वरवरि फिरावे सकुँ? 15 केहकेकि परमेस्वर यहुदियानिके अस्विकार करइकि संसारक मन्सावाह हुनेसाङे मिलाप यलइ। हुने यहुदियानिके स्विकार करइकि, हुनुका मरलिसे जिवन पउले नहिँया हइने भेलइ त? 16 रोटि पकावेके तहिँया गिजलि पिठवाक ढेलवासे एक भाग पहिलो भेटिक रुपमा परमेस्वरके चढोबहुँ जउँ, उअ गिजलि पिठवाक जम्मे ढेलवा पवितर हसइ। यगर गछवाक जरिया पवितर हतइ जउँ, वकर डरवासभ फेनि पवितर हतइ। 17 गछवाक काम हइने लगना कतेक डार काटके फकाइल नहिँया परमेस्वर कतेक जन यहुदि मन्सावानिके यापन सम्बन्धसे हटादेलसि हसे तोहरा अयहुदियाह बनक जइतुनक डारसभ भेले फेनि उअ यसल जइतुनक गछवामा कलमि बन्हाइल बडह। याबे तोहरा फेनि उअ यसल जइतुनक गाछसे सक्ति देना खइना चिजु पावे सकबह। 18 उहेसे तोहरा उअ काटके फकलि डरवानिसे हमरा यसल बडहुँ कहके घमन्ड झिन करिह, केहकेकि तोहरा जरियाके हइने धानले बडह, बाकि जरिया तोहराके धानले बडिय। 19 बाकि तोहरा यसके कहबह, “मुइ कलमि बन्हाए सकहि कहके उअ डरवाह कटाइल रहलइ।” 20 इअ बतवा सदियो हखइ, यहुदि मन्सावाह विस्वास हइने करलेसे डारसभ नहिँया काटके फकाइल नहिँया फकेलइ। तोहरा विस्वास करलेसे उअ ठउरियामा कलमि बन्हाइल बडह। उहेसे घमन्ड झिन करिह, बाकि परमेस्वरके यादर करिह। 21 यगर परमेस्वर सदि डारसभके बाँकि हइने रखलसि जउँ, कथि तोहराके बाँकि रखबसि त? 22 परमेस्वर दयगर हसे कठोर बडसि कहके फेनि विचार करिह। हुने विस्वास हइने करलहरानिक तहिँया कठोर बडसि, बाकि तोहरा हुनेक दायामा सरन लेके रहबह जउँ हुने दयगर बडसि, नत तोहरा काटके फकाइल डार नहिँया हखबह। 23 यगर यहुदि मन्सावाह अविस्वास छाडके विस्वास करतइ जउँ पहिलाक ठउरियामा कलमि बन्हेतइ, केहकेकि परमेस्वर हुनुकाके फेरि कलमि बान्हे सकबसि। 24 तोहरा अयहुदि मन्सावाह बनक जइतुनक गाछसे काटके यानल डारसभ नहिँया बडह हसे स्वभाव यनुसार हइने मिलना भेले फेनि एगुडा यसल जइतुनक गाछमा कलमि बन्हाइल बडह। उअ यहुदि मन्सावाह यसल जइतुनक गाछक डारसभ नहिँया हखइ। हुनुकाके फेरि यानके परमेस्वर कलमि बान्हे सकबसि। जम्मे इस्राएल जातिक उद्धार 25 प्रियसभ, एगुडा रहस्यक बात तोहार थाह हखइ कहके मुइ चाहसहिँ। उअ तोहरा थाह पउबह जउँ, तोहरा यापन तहिँया घमन्ड नाहिँ करबह। रहस्यक बात इअ हखइ कि, ख्रिस्टमा यावे परना अयहुदिसभ विस्वास नाहिँ करइलइ कतेक जन इस्राएलि मन्सेसभ यापन हृदय कठोर बनोतइ। 26 यसने जम्मे इस्राएलि जातिक उद्धार हतइ, जसने धरमसास्तरवामा लिखाइल बडइ, “मुक्तिदाता सियोनसे यबसि, हुने याकुबक वंसके खराब कामसे फिरोबसि। 27 हुनुकर तहिँया मोर वाचा पुरा हतइ, जब मुइ हुनुकर पाप छमा देबहिँ।” 28 यहुदि मन्सावाह सुसमाचार विस्वास हइने करलेसे परमेस्वरक सतरुसभ हखइ, इअ बतवा तोहरा अयहुदि मन्सावानिक तहिँया त यसल भेलइ। बाकि यहुदि मन्सावाह परमेस्वरक छानल मन्सेसभ हखइ हसे हुनुकर पुरखवानिसाङे प्रतिग्या करलेसे हुनुकाके यखना फेनि हुने प्रेम करससि। 29 केहकेकि परमेस्वर यापन देलि वरदान फिरता नाहिँ लेबसि हसे हुनेक छानलि मन्सावानिक बारेमा हुने मन नाहिँ बदलबसि। 30 तोहरा अयहुदियाह फेनि एक समय परमेस्वरक आग्या पालन हइने करह, बाकि इस्राएलि मन्सावाह आग्या पालन हइने करलेसे यखनि तोहरा हुनेक दाया पउले बडह। 31 यखनि इस्राएलि मन्सावाह परमेस्वरक आग्या पालन हइने करइ बडइ। बाकि जसने परमेस्वर तोहरा अयहुदियानिके दाया देखोलसि, वसने हुनुकाके फेनि हुने एक दिन दाया देखोबसि। 32 केहकेकि जम्मे मन्सावाह परमेस्वरक दाया पवइ कहके हुने जम्मे जनके हइलठ हखे देलसि। परमेस्वरक स्तुति हसे यादर 33 आहा! परमेस्वरक धन कतुरा बहुत हसे बुद्धि तके ग्यान कतुरा गहिर बडइ! हुनेक न्याय करबहिँ कहलि बतवा कुने बयान करे सकबिय? हुनेक काम करना तरिका कुने पाता लगावे सकबिय? 34 “प्रभुक मन कुने जनले बडिय? कि हुनेक सल्लाह देलाहर कुने बडिय त? 35 कुने परमेस्वरके किहो चिजु देले बडइ, हसे हुने वकरेके फिरता देवेपरइ?” 36 परमेस्वर जम्मे चिजुवा सिरिस्टि करलसि। उअ जम्मे चिजुवा हुनेमा भर परसइ। हुनेक यादर हखइ कहके यसके करलसि। हुनेक सम्मान सबदिन हखइ! आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.