रोमि 10 - चितवनिया थारु1 मोर प्रियसभ, इस्राएलि मन्सावानिके परमेस्वर बचोसि कहके मोर हृदयक इछा बडइ, उहेसे हुनुकर तहिँया मुइ परमेस्वरसाङे परथाना करसहिँ। 2 मुइ साछि देबहिँ कि, हुनुकर परमेस्वरक सेवा करेके खाँ जोस बडइ, बाकि परमेस्वरक सेवा कस्के करे परतइ कहके हुनुका हइने जनले बडइ। 3 केहकेकि परमेस्वर यापन लजरियामा मन्सावानिके कस्के ठिक ठहरोबसि कहके हुनुका वास्ता हइने करलइ, उहेसे हुनुका यापन तरिकासे हुनेक लजरियामा ठिक ठहरेके कोसिस करलइ। परमेस्वर हुनुकाके जसके यापन लजरियामा ठिक ठहरावे चाहलसि, हुनुका वसके हइने चाहलइ। 4 ख्रिस्ट व्यवस्थामा लिखइलि जम्मे बतवा पुरा करेलेसे हुनेमा विस्वास करलहरा जम्मे जन ठिक ठहरतइ। 5 मोसा परमेस्वरक लजरियामा ठिक ठहरेके बारेमा यसके लिखसिय, “व्यवस्था पालन करलहरा मन्सावा वकरेसे जियबिय।” 6 बाकि विस्वाससे परमेस्वरक यागा ठिक ठहरेके बारेमा धरमसास्तरवा यसके कहसिय, “तुइ हृदयमा यसके झिन कहसि, ‘ख्रिस्टके तर यानेके कुने स्वरग वपरा जेबिय’?” 7 कि यापन हृदयमा यसके झिन कहिह, “मरलिनसभसे ख्रिस्टके वपरा यानेके कुने पताल तर जेबिय?” 8 बाकि धरमसास्तरवा यसके कहसिय, “परमेस्वरक वचन तोर लजिके बडइ, तोर मुहवा हसे तोर हृदयमा बडइ।” हमार परचार करलि विस्वासक बारेमा यसल समादक बात इहे हखइ कि, 9 यगर तुइ यापन मुहवासे येसुजिके प्रभु कहके स्विकार करबहि हसे परमेस्वर हुनेके मरलिसे जिउतोलसि कहके यापन हृदयमा विस्वास करबहिँ जउँ, तुइ मुक्ति पउबहि। 10 केहकेकि मन्सावा यापन हृदयसे विस्वास करसिय हसे उअ परमेस्वरक लजरियामा ठिक ठहरसिय तके यापन मुहवासे स्विकार करसिय हसे उअ मुक्ति पउसिय। 11 जसने धरमसास्तरवा कहसिय, “ख्रिस्टमा विस्वास करलहरा मन्सावाह कुनहुँ फेनि लजियामा नाहिँ परतइ।” 12 केहकेकि यहुदि हसे अयहुदि जातिमा कुनहुँ फेनि झिनिक जबड हइने बडइ। उहे एगुडा प्रभु जम्मे जनक प्रभु हखसि हसे हुनेके पुकार करलहरानिके हुने प्रसस्त आसिस देससि। 13 जसने धरमसास्तरवामा लिखाइल बडइ, “प्रभुक नाउँ पुकार करलहरा हरेक जन मुक्ति पउतइ।” 14 बाकि हुनेमा विस्वास नाहिँ करके कस्के हुनेके पुकारेके? हुनेक बारेमा नाहिँ सुनके कस्के हुनेमा विस्वास करेके? हुनेक बारेमा कुनहुँ नाहिँ परचार करके कस्के सुनके? 15 हसे ककरहुँके परचार करे नाहिँ पठाके कस्के हुनुका परचार करतइ त? धरमसास्तरवामा यसके लिखाइल बडइ, “खुसिक समाद परचार करलहरा यवइकि कतुरा आनन्दक बात हखइ।” 16 बाकि इस्राएलक जम्मे मन्सावाह खुसिक समाद स्विकार हइने करलइ, केहकेकि यसइया अगमवक्तावा कहले बडिय, “हे प्रभु, हमार कहलि बतवा कुने विस्वास करले बडिय जे?” 17 उहेसे विस्वास कहले सुसमाचार सुनके यसइ हसे मन्सावाह सुसमाचार तब सुनसइ, जब कुनहुँ हुनुकाके ख्रिस्टक बारेमा सुनोसइ। 18 बाकि मुइ कहबहिँ, कथि हुनुका हइने सुनले बडइ त? सदियो हुनुका सुनले बडइ। जसने धरमसास्तरवामा लिखाइल बडइ, “हुनुकर स्वर धरतियाक जम्मे ठउरियामा पुगल बडइ। हुनुकर कहलि बतवा संसारक कोनहरवा-कोनहरवालइ पुगल बडइ।” 19 मुइ फेरि कहबहिँ, कथि इस्राएलि मन्सावाह यसल समाद हइने बुझलइ? बुझेके त बुझलइ बाकि हइने मनलइ। पहिला बात त परमेस्वर मोसासे हुनुकाके कहले रहलसि, “जुने एगुडा जाति हइने हखइ, मुइ हुनुकाके आसिस देलेसे तोहरा हुनुकाके डाह करबह, एगुडा मुरुख जातिके मुक्ति देके मुइ तोहराके खाँ खिस उठोबहि।” 20 तब यसइया अगमवक्ता परमेस्वरक कहलि बतवा हइने डेराके कहसिय, “जुने मोरके खोजबे हइने करलइ, हुनुका मोरके पउले बडइ, जुने मोर बारेमा पुछबे हइने करलइ, उअ मन्सावानिक यागा मुइ देखा परलहिँ।” 21 बाकि इस्राएलि मन्सावानिक बारेमा परमेस्वर यसके कहससि, “मुइ दिन भर मोर हथवा हुनुकर तहिँया पसरोलहिँ, बाकि हुनुका मोर बतवा हइने मनलइ हसे मोर विरोधमा उठलइ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.