रोमि 1 - चितवनिया थारु1 मुइ पावल, येसु ख्रिस्टक दास इअ चिठिया लिखले हखहि। परमेस्वर मोरके प्रेरित हखेके बलोलसि हसे हुनेक सुसमाचार परचार करना कामक तहिँया यलग करलसि। 2 बहुत बरस पहिला परमेस्वर इअ सुसमाचार देबहि कहके प्रतिग्या करलसि। इहे प्रतिग्याक बारेमा अगमवक्तावाह पवितर धरमसास्तरवामा लिखले रहलइ। 3 इअ सुसमाचार परमेस्वरक पुतरक बारेमा हखइ। हुने मन्से भके राजा दाउदक वंससे जरमलसि। 4 पवितर-आत्माक सक्तिसे येसु ख्रिस्ट परमेस्वरक पुतर ठहरलसि, केहकेकि हुने मरलिसे जिउतेलसि। हुने हमार प्रभु हखसि। 5 हमार प्रभु येसु ख्रिस्टसे परमेस्वर हमराके दाया देखाके प्रेरित बनोलसि हसे जम्मे जातिक मन्सावाह विस्वास करइ तके हुनेक कहलि बतवा मनइ कहके हुनेक नाउँमा मोरके पठोले हखसि। 6 तोहरा रोममा हखलहराह फेनि याको जनसाङे येसु ख्रिस्टक मन्सेसभ हखेके तहिँया परमेस्वर बलोले बडसि। 7 रोम सहरवामा भेलि तोहरा जम्मे जनके मुइ इअ चिठिया लिखइ बडहिँ। परमेस्वर तोहरा जम्मे जनके प्रेम करइ बडसि हसे हुनेक पवितर जन हखेके तहिँया बलावल बडह। हमार पिता परमेस्वर हसे प्रभु येसु ख्रिस्ट तोहराके दाया देखोइय तके सान्ति दिय। रोममा जायके पावलक खाँ इछा 8 सबसे पहिला, मुइ हमार परमेस्वरके तोहार जम्मे जनक तहिँया येसु ख्रिस्टसे धन्यवाद देबहिँ, केहकेकि ख्रिस्टमा भेलि तोहार विस्वासक बारेमा जम्मे ठउरियामा फइलल बडइ। 9 मुइ हृदयसे परमेस्वरक पुतरक बारेमा सुसमाचार परचार करके हुनेक सेवा करसहिँ। मुइ परथाना करइकि तोहराके सबदिन सम्झसहिँ कहलि बतवाक साछि परमेस्वर बडसि। 10 परमेस्वरक इछा हतइ जउँ, कसहुँकरके याखिरमा भेले फेनि तोहार लघिना भेटे यावे सकहि कहके मुइ सबदिन परथाना करसहिँ। 11 केहकेकि तोहराके आत्मिक रुपमा बरियार बनावे सकुँ कहके मुइ तोहराके भेटेके खाँ इछा बडइ। 12 यसने मोर विस्वास तोहराके हसे तोहार विस्वास मोरके उत्साह दिय कहके मोर इछा बडइ। 13 प्रियसभ, तोहार थाह हखइ कहके मुइ चाहसहिँ कि, मुइ बहुत पारि तोहार लघिना यावे खोजलहिँ, बाकि कुनहुँ न कुनहुँ कारनसे यखनिलइ यावे हइने सकलहि। मुइ याको ठउरियाक अयहुदि मन्सावानिक बिचा काम करले नहिँया तोहार बिचा फेनि काम करेके मोर इछा बडइ। 14 केहकेकि सिछित हसे असिछित, बुद्धियार तके निरबुद्धि जम्मे जनके सुसमाचार सुनावेके मोर कर लागल बडइ। 15 उहेसे तोहरा रोम सहरवामा भेलि मन्सावानिके फेनि सुसमाचार परचार करेके मोर खाँ इछा बडइ। 16 मुइ सुसमाचार सुनावेके हइने लजेसहिँ, केहकेकि विस्वास करलहरा जम्मे मन्सावानिक तहिँया इअ सुसमाचार मुक्ति देना परमेस्वरक सक्ति हखइ। विस्वास करेके मउका पहिला यहुदि मन्सावाह पउलइ, याबे अयहुदि मन्सावाह फेनि पउले बडइ। 17 केहकेकि सुसमाचार हमराके परमेस्वर यापन लजरियामा कस्के ठिक बनोससि कहके देखोसिय। हुनेक लजरियामा ठिक ठहरेके विस्वाससे मतरे हतइ। जसने धरमसास्तरवामा लिखाइल बडइ, “विस्वाससे परमेस्वरक लजरियामा ठिक ठहरोलि मन्सावाह जिवन पउसइ।” मन्सेक जातिमा परमेस्वरक खिस 18 परमेस्वरक खिस उअ मन्सावानिक पाप हसे दुस्ट कामक विरोधमा स्वरगसे देखा परल बडइ, जुने यापन दुस्ट कामसे सत्य बातके दबाके धरले बडइ। 19 परमेस्वरक बारेमा जाने परना बात हुनुकर थाहे बडइ, केहकेकि हुने यपनहिँ हुनुकाके उअ बतवा प्रस्ट करदेले बडसि। 20 संसारक सिरिस्टि हखलिसे हुनेक बनोलि चिजुवासे मन्सावाह परमेस्वरके जाने सकतइ। परमेस्वरक सबदिन रहना सक्ति हसे इस्वरिय स्वभाव जसने हइने देखार हखना गुनसभ फेनि हुनुका डउलसे बुझे सकतइ। उहेसे हुनुका किहो लाथ लगावे नाहिँ सकतइ। 21 हुनुका परमेस्वरके चिनके फेनि हुनेके देवे परना यादर हइने देलइ, न त हुनुका हुनेके धन्यवाद देलइ, बाकि हुनुकर विचार काम हइने लगना भेलइ हसे हुनुकर मुरुख हृदय यन्हार भेलइ। 22 हुनुका यपनहिँके बुद्धियार कहके कहले ताफेनि हुनुका मुरुख भेलइ, 23 हसे हुनुका नास हइने हखलाहर परमेस्वरक आराधना करेके सटहा नास हखना मन्से, पसुसभ, चेरइसभ हसे घिसियाके बुलना प्रानिसभक मुरतिके पुजा करलइ। 24 उहेसे हुनुकर हृदयक खोजल नहिँया घिन लगना काम करेके परमेस्वर हुनुकाके छाडदेलसि हसे हुनुका एक-दोसरि जनसाङे लाजमरना काम करके यापन देहियाके असुद्ध बनोलइ। 25 हुनुका परमेस्वरक सत्यताके झुठासे साटफेर करलइ। सिरिस्टि करलाहर हसे सबदिन यादर पउलाहर परमेस्वरके हइने, बाकि हुनेक सिरिस्टि करलि चिजुके हुनुका पुजा हसे आराधना करलइ। 26 उहेसे परमेस्वर हुनुकाके घिन लगना काम करेके तहिँया छाडदेलसि। हुनुकर जनिनियाह यापन मरदवानिसाङे हइने सुतके जनिनिया-जनिनियासाङे घिन लगना काम करलइ। 27 वसने करके मरदनवा यापन जनियावासाङे हइने सुतके, बाकि एक-दोसरि जनक कामवासनाक तहिँया याको मरदनवानिसाङे घिन लगना काम करलइ हसे हुनुका यापन देहियाक करलि घिन लगना कामक तहिँया उचित दन्ड पउलइ। 28 हुनुका परमेस्वरके देवे परना मानसम्मान देवेके छडलइ। उहेसे हुने मन्सावानिके भ्रस्ट काम करइ कहके हुनुकाके हइने डउल इछामा छाडदेलसि। 29 हुनुका जम्मे खलिक खराब हसे दुस्ट चिजुसे भरल बडइ। हुनुका लोभ हसे घिरिना करसइ, याको जनके डाह हसे हत्या करसइ। हुनुका झगडा करसइ, छल करसइ, झुठा फदकसइ हसे चुगलि लगोसइ, 30 हसे याको जनक निना करसइ। हुनुका परमेस्वरके फेनि घिरिना करसइ, ककरहुँके फेनि यादर हइने करसइ, बाकि यपनहिँ घमन्डसे फुलसइ, जबड-जबड बात करसइ। हुनुका खराब काम करेके जुक्ति लगोसइ हसे दाओ-बाबाक कहलि बतवा हइने मनसइ। 31 हुनुका मुरुख बडइ हसे करबहिँ कहलि बतवा हइने करसइ। हुनुका दोसरे जनके दाया हसे प्रेम हइने करसइ। 32 यसनुक काम करलाहर मन्सेसभ मृत्युक योग्य बडइ कहके परमेस्वरक धारमिक नियम जनते-जनते फेनि हुनुका इअ काम करइरहसइ। यतुरा मतरे हइने, यसनुक काम करलहरानिसाङे सहमति फेनि हसइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.