प्रकास 7 - चितवनिया थारु

एक लाख चवालिस हजार जनमा छाप

¹ वकरपाछा मुइ धरतिया, समुनदर कि कुनहुँ गछवामा बयार झिन लगइ कहके चार जन स्‍वरगदुतसभ धरतियाक चारिवरक बयरवाके रोकके धरतियाक चारु कोनहरवामा ठडियाइल देखलहिँ।

² मुइ एक जन स्‍वरगदुतके जिउते परमेस्‍वरक छाप लेके पुरवेसे वपरावरि यवइकि देखलहिँ। उअ धरतिया हसे समुनदरवाके हानि करेके अधिकार पावल चार गो स्‍वरगदुतवानिके जबड स्‍वरमा यसके कहलिय,

³ “हमरा यापन परमेस्‍वरक सेवकसभक लिलरवामा छाप नाहिँ लगोइलइ धरतिया कि समुनदरवा कि गछवानिके झिन बिगडोइह।”

⁴ तब कुनहुँ मोरके छाप लगोलि इस्राएलि मन्‍सावानिक हरेक कुलसे मिलाके एक लाख चवालिस हजार जन भेल बडइ कहके कहलइ।

⁵ यहुदाक कुलसे बारह हजार जनक छाप लगेलइ, रुबेनक कुलसे बारह हजार जनक, गादक कुलसे बारह हजार जनक,

⁶ आसेरक कुलसे बारह हजार जनक, नप्‍तालिक कुलसे बारह हजार जनक, मनस्‍सेक कुलसे बारह हजार जनक,

⁷ सिमियोनक कुलसे बारह हजार जनक, लेविक कुलसे बारह हजार जनक, इस्‍साखारक कुलसे बारह हजार जनक,

⁸ जबलुनक कुलसे बारह हजार जनक, योसेफक कुलसे बारह हजार जनक, बेन्यामिनक कुलसे बारह हजार जनक छाप लगेलइ।

गोरहर लुगा पेहरल जबड भिड

⁹ वकरपाछा मुइ हेरलहिँ हसे कुनहुँ फेनि गाने हइने सकना एगुडा जबड मन्‍सेसभक भिड देखलहिँ। हुनुका हरेक जाति, कुल, देस हसे भासाक मन्‍से रहलइ। हुनुका गोरहर लुगा पेहरके हथवामा खजुरक डार लेके सिंहासन हसे पठवाक यागा ठडियाइल रहलइ।

¹⁰ हुनुका जबड स्‍वरमा यसके कहलइ: “उद्धार त सिंहासनमा बेठलहरा हमार परमेस्‍वर हसे पठवासे यसइ।”

¹¹ वहवाँ जम्‍मे स्‍वरगदुतवाह चार गो जिउते प्रानिसभ, सिंहासन हसे यगुवासभक चारिवर ठडियाइल रहलइ। हुनुका सिंहासनक यागा घोप्‍टे परके यसके कहके परमेस्‍वरक जयजयकार करलइ,

¹² “आमेन! प्रसंसा, सम्‍मान ग्‍यान-बुद्धि, धन्‍यवाद, यादर, अधिकार हसे सक्‍ति सबदिन हमार परमेस्‍वरक हखइ। आमेन!”

¹³ वकरपाछा एक जन यगुवा मोरके पुछलिय, “इअ गोरहर लुगा पेहरल कुने हखइ हसे कहवाँसे याइल हखइ?”

¹⁴ मुइ वकरेके कहलहिँ, “मोर हइने थाह बडइ, यपनहुँ कहहुँ।” उअ मोरके कहलिय, “हुनुका त जबड सतावट सहके याइल बडइ हसे हुनुका यापन-यापन लुगवा पठवाक रकतावासे धोके गोरहर बनोले बडइ।

¹⁵ उहेसे, हुनुका परमेस्‍वरक सिंहासनक यागा बडइ हसे दिन-रात हुनेक मन्‍दिरवामा हुनेक सेवा करतइ, तके सिंहासनमा बेठलाहर हुनुकरसाङे बइठके हुनुकाके रछा करबसि।

¹⁶ हुनुकर कबहुँ नाहिँ भुख लगतइ हसे प्‍यास नाहिँ लगतइ। हुनुकाके कुनहुँ चरचरवा घमवा नाहिँ डहोबिय।

¹⁷ उहेसे सिंहासनक बिचा हखलहरा पठवा हुनुकर भेडहार हखबसि, हसे हुनुकाके डोर्‍योते जिवन देना पानिक म्‍वाकामा लिगबसि तके परमेस्‍वर हुनुकर यखियासे जम्‍मे रोरवा पोछ देबसि।”