प्रकास 3 - चितवनिया थारुसारडिसक मन्डलियाके समाद 1 “सारडिस सहरवामा भेलि मन्डलियाक हेरचाह करलहरा दुतवाके इअ बतवा लिखसि: जाकरसाङे सात गो तरगन हसे सात गो परमेस्वरक आत्मा बडइ, हुने यसके कहससि, तोर काम मोर थाह बडइ, तोहरा विस्वासमा जिउते बडहिँ कहके नाउँ चलल बडइ, बाकि वास्तवमा तोहरा आत्मामा मरल बडह। 2 उहेसे चेतले रहिह हसे तोहार मरे लगइकि विस्वासके बरियार बनोइह, केहकेकि परमेस्वरक लजरियामा मुइ तोहार काम सिद्ध भेल हइने पउलहिँ। 3 उहेसे तुइ जथि सिछा सुनले हसे सिखले बडहिँ उअ सम्झसि। उअ बतवा मनसि हसे पछताप करसि। यगर तोहरा चेतले नाहिँ रहबह जउँ, मुइ तोहार लघिना चोर नहिँया कखनि यबहिँ, उअ तोहरा थाह नाहिँ पउबह। 4 सारडियसक कतेक जन विस्वासिसभ बडह। परमेस्वरक लजरियामा विस्वासयोग्य बडइ, हुनुका घिन लगना काम हइने करले बडइ। हुनुका गोरहर लुगा पेहरके मोरसाङे बुलतइ, केहकेकि हुनुका योग्यक बडइ। 5 जुने दुस्टक सक्तिके जितसइ, उअ यसनुक गोरहर लुगा पेहरबिय, मुइ वकर नाउँ जिवनक कितबवासे कबहुँ नाहिँ मेटा देबहिँ। मुइ वकरेके मोर मन्से हखिय कहके यापन पिता हसे हुनेक स्वरगदुतवानिक यागा स्विकार करबहिँ। 6 जाकर कान बडइ, पवितर-आत्मा मन्डलियानिके कहलि बतवा सुनिह। फिलाडेल्फियाक मन्डलियाके समाद 7 “फिलाडेल्फिया सहरवामा भेलि मन्डलियाक हेरचाह करलहरा दुतवाके इअ बतवा लिखसि: जुने पवितर हसे सत्य बडसि तके दाउद रजवाक राजमा जाकर अधिकार बडइ, हुने टटिया खोलबसि जउँ, कुनहुँ बन्द करे नाहिँ सकतइ हसे टटिया बन्द करबसि जउँ, कुनहुँ फेनि खोले नाहिँ सकतइ। हुने यसके कहलसि 8 तोर काम मोर थाह बडइ। मुइ तोर यागा टटिया खुल्ला राखदेले बडहिँ, उअ कुनहुँ फेनि बन्द करे नाहिँ सकतइ। तोरसाङे मोरके सेवा करेके बहुत सक्ति हइने भेले, ताफेनि मोर कहलि बतवा पालन करले बडहिँ हसे मोर नाउँ इन्कार हइने करले बडहिँ। 9 हेरह, हमरा यहुदि हखहुँ कहके झुठा फदकेलहरा यहवाँ बडइ। हुनुका सइतानक दाफाक हखइ। हुनुकाके मुइ तोर टङवामा ढोगे लगोबहिँ हसे मुइ तोरके प्रेम करसहिँ कहके हुनुका जनतइ। 10 धरतियाक जम्मे जतियानिके जाँच करेके इअ संसारमा यइना दुःख-कस्टसभसे फेनि मुइ तोहराके बचोबहिँ, केहकेकि तोहरा बहुत बात सहके मोर आग्या पालन करले बडह। 11 मुइ हलहालि यवइ बडहिँ। तोरमा भेलि विस्वास बचाके रखसि हसे कुनहुँ फेनि तोर जितक मकुट निछुरके नाहिँ लिगतइ। 12 जुने दुस्टक सक्तिके जितसइ, वकरेके मुइ मोर परमेस्वरक मन्दिरवाक एगुडा खामा बनोबहिँ हसे वहवाँसे उअ कबहुँ फेनि नाहिँ निकडबिय। मुइ वकरमा मोर परमेस्वरक नाउँ हसे स्वरगक मोर परमेस्वरसे तर यइना हुनेक लउठा सहर यरुसलेमक नाउँ लिखबहिँ तके वकरमा मोर यापन लउठा नाउँ फेनि लिखबहिँ। 13 जाकर कान बडइ, पवितर-आत्मा मन्डलियानिके कहलि बतवा सुनिह। लाउडिकियाक मन्डलियाके समाद 14 “लाउडिकिया सहरवामा भेलि मन्डलियाक हेरचाह करलहरा दुतवाके इअ बतवा लिखसि: इअ बतवा आमेन हखइ, हुनेक साछि विस्वासयोग्य हसे सत्य बडइ तके हुने परमेस्वरक सिरिस्टि करलि जम्मे चिजुक स्रोत हखसि। 15 तोहार काम मोर थाह बडइ। तोहरा नत जुड न धिकल बडह। तोहरा जुड कि धिकल हतह त डउल हतिय। 16 उहेसे मुइ यापन मुहवासे तोहराके उगिल देबहि, केहकेकि तोहरा नत धिकल न जुड बडह, बाकि सुमसुम बडह। 17 मुइ धनि बडहिँ बहुत धन-सम्पति बडइ हसे मोर किहो चिजुक कमि हइने बडइ कहके तुइ कहसहि, बाकि तोर दासा कतुरा खराब, सोगलगना, कङगाल, यान्हर हसे नङटे बडहिँ कहके तोर हइने थाह बडइ। 18 मुइ तोरके इअ सल्लाह देबहिँ, सबदिन धनि हखेके तहिँया यागिसे खरावल सोन हसे यापन लाज झापेके तहिँया गोरहर लुगा तके तुइ देखाह हखेके तहिँया मोरसे मलहम किनके लगोसि। 19 जकरेके मुइ माया करसहिँ, वकरेके मुइ डटसहि हसे अनुसासनमा रखसहि। उहेसे उत्साहित हखहि हसे पछताप करहि। 20 सुनह, मुइ दुवरियामा ठडियाके ढकढकोबहिँ। कुनहुँ मोर स्वर सुनके दुवरिया खोल देबिय जउँ, मुइ वकर लघिना भितरा यबहिँ हसे वकरसाङे जेउना खेबहिँ तके उअ मोरसाङे खेबिय। 21 जुने दुस्टक सक्तिके जितसइ, मुइ वकरेके मोर सिंहासनमा मोरसाङे बेठेके अधिकार देबहिँ, जसने मुइ जितलेसे मोर पितासाङे हुनेक सिंहासनमा बेठल बडहिँ। 22 जाकर कान बडइ, पवितर-आत्मा मन्डलियानिके कहलि बतवा सुनिह।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.