प्रकास 2 - चितवनिया थारुएफिससक मन्डलियाके समाद 1 “एफिसस सहरवामा भेलि मन्डलियाक हेरचाह करलहरा दुतवाके इअ बतवा लिखसि: सात गो तरगन यापन दहिनि हथवामा लेके हसे सात गो सोनक डिबरि धरनाक बिचा बुललहरा मन्सावा यसके कहससि। 2 तोर मेहनतसे करलि कमवा हसे तोर सहसान मोर थाह बडइ। तुइ दुस्ट मन्सावानिके सहे हइने सकसहिँ कहके फेनि मोर थाह बडइ। प्रेरित हइने भेले ताफेनि प्रेरितसभ हखहुँ कहलहरानिके तुइ जाँचके हुनुकर झुठा बात पाता लगोले बडहिँ कहके फेनि मोर थाह बडइ। 3 तोहरा सहसान रखसह हसे मोर नाउँक खातिर कस्ट सहते गेलह तके कमजोर हइने भेलह। 4 बाकि तोहार विरोधमा मुइ इअ कहेके बडइ कि, तोहरा मोरके पहिला करल नहिँया प्रेम यखनि करेके छडले बडह। 5 तुइ कतेक गिरल बडहि, उअ सोचहि। पछताप करहि हसे तोहरा पहिला करलि कमवा करह। यगर तोहरा याके पछताप नाहिँ करबह जउँ, मुइ तोहार लघिना यबहिँ हसे डिबरिया धरनावा उअ ठउरियासे होटा देबहि। 6 बाकि तोहारमा एगुडा यसल गुन बडइ कि, मोर घिना करलि निकोलाइटस कहलि मन्सावानिक कमवाके तोहरा फेनि घिना करसह। 7 जाकर कान बडइ, पवितर-आत्मा मन्डलियानिके कहलि बतवा सुनिह। जुने दुस्टक सक्तिके जितसइ, वकरेके मुइ परमेस्वरक बगिचवामा भेलि जिवन देना फरक गाछसे खाए देबहिँ। स्मुरनाक मन्डलियाके समाद 8 “स्मुरना सहरवामा भेलि मन्डलियाक हेरचाह करलहरा दुतवाके इअ बतवा लिखसि। जुने सुरु हसे यन्त हखसि, हुने मरलसि तके फेरि जिउतलसि, हुने यसके कहससि। 9 मोर तोर कस्ट थाह बडइ हसे तुइ गरिब बडहिँ कहके फेनि मोर थाह बडइ। बाकि वास्तवमा तुइ परमेस्वरक लजरियामा धनि बडहिँ! हुनुका तोहराके कतेक बदनाम करसइ मोर थाह बडइ। मुइ हुनुकाके चिनसहिँ, जुने यपनहिँके यहुदि हखहुँ त कहसइ, बाकि वास्तवमा हुनुका हइने हखइ। हुनुका त सइतानक दाफाक मन्से हखइ। 10 तोहारमा जथि कस्ट यावेके बडइ वकरसे झिन डेरइह। तोहार विस्वास जाँचेके तहिँया सइतनवा तोहारमधे कतेक जनके झ्यालखानामा घालदेबिय। यसनेकरके दस दिनलइ कस्ट भोगे परतइ। मरे परले ताफेनि मोरमा विस्वास करेके झिन छडसि हसे मुइ तोहराके जिवनक मकुट देबहिँ। 11 जाकर कान बडइ, पवितर-आत्मा मन्डलियानिके कहलि बतवा सुनिह। जुने दुस्टक सक्तिके जितसइ, वकरेके दोसरो मृत्यु किहो हानि नाहिँ करबिय। परगामम मन्डलियाके समाद 12 “परगामम सहरवामा भेलि मन्डलियाक हेरचाह करलहरा दुतवाके इअ बतवा लिखसि: जाकरसाङे तधार दु गो धार भेल तरवार बडइ, हुने यसके कहससि। 13 मोर थाह बडइ, तोहरा सइतनवाक सासन करनवा ठउरियामा बास करसह, ताफेनि तोहरा मोर नाउँमा डटके रहसह। मोर विस्वस्थ साछि एन्टिपासके सइतनवाक सासन करना ठउरियामा मारइकि फेनि तोहरा मोरमा विस्वास करेके हइने छडलह। 14 बाकि तोर विरोधमा मोर किहो कहना बात बडइ। तोहार बिचा कतेक जन बालामक सिछा मनलाहरसभ बडइ। बालाम मुरतियानिके चढोलि चिजुवा खाएके हसे धुचुड करके इस्राएलि मन्सावानिके पापमा फसावेके बालाक रजवाके सिखोले रहलिय। 15 वसने करके निकोलाइटस कहल मन्सेसभक सिछा मनलाहरसभ फेनि तोहार बिचा बडइ। 16 उहेसे पछताप करिह, नत मुइ तोर लघिना हलहालि यबहिँ हसे मोर मुहवासे निकडलि वचनवाक तरवरवासे उअ दुस्ट काम करलहरानिक विरोधमा लडाइ करबहिँ। 17 जाकर कान बडइ, पवितर-आत्मा मन्डलियानिके कहलि बतवा सुनिह। जुने दुस्टक सक्तिके जितसइ, वकरेके मुइ गुप्तमा रखाइल किहो खइना चिजु देबहिँ, जकरेके मन्ना कहसइ। मुइ हुनुकाके एगुडा गोरहर पत्थरा फेनि देबहि, जाकरमा एगुडा लउठा नाउँ लिखाइल हतइ। इअ गोरहरि पत्थरवा पउलहरा मतरे उअ नउवा जनतइ। थियाटारियाक मन्डलियाके समाद 18 “थियाटारिया सहरवामा भेलि मन्डलियाक हेरचाह करलहरा दुतवाके इअ बतवा लिखसि: यागि नहिँया बरना याखि हसे खराके कास नहिँया टल्काह टाङ भेल परमेस्वरक पुतर यसके कहससि, 19 मुइ तोहार काम, तोहार प्रेम, विस्वाससाथ करल सेवाकाइ हसे तोहार सहसान मोर थाह बडइ। तोहरा पहिलासे यखनि बहुत सेवाक काम करइबडह कहके फेनि मोर थाह बडइ। 20 बाकि तोर विरोधमा मुइ एगुडा बात कहेके बडइ। तुइ इजबेल कहल जनियानिक कहलि बतवा सुनसहि। उअ यपनहिँके अगमवादिनि कहसिय हसे यापन सिछासे मोर सेवकके भरममा पारके धुचुड करेके तके मुरतियाके चढोलि खइनवा चिजुवा खाए सिखोसिय। 21 मुइ वकरेके पछताप करेके समय देले बडहिँ, बाकि उअ यापन धुचुड कामसे फिरहिँ हइने चाहसिय। 22 हेरह, मुइ वकरेके रोगसे थाला पारदेबहिँ हसे वकरसाङे धुचुड काम करलहराह खाँ दुःख तके कस्ट पउतइ। हुनुका पछताप करके उअ दुस्ट कमवा नाहिँ छडतइ जउँ, मुइ हुनुकाके यसनुक सजाय देबहि। 23 वकरपाछा लगलहरा जम्मे जनके मुइ नास पारबहिँ हसे जम्मे जनक हृदय तके मनवा जनलाहर मोहिँ हखहि कहके जम्मे मन्डलियानिक थाह हतइ। तोहरा हरेक जनके यापन-यापन काम यनुसारक मुइ इनाम देबहिँ। 24 बाकि तोहारमधे कतेक जन वहवाँ थियाटिरायामा भके फेनि उअ हइने डउल सिछा हइने सुनले बडह हसे जकरेके सइतानक गहिर सिछा फेनि कहेसइ, वसनुक सिछा फेनि हइने सिखले बडह, उहेसे तोहराके याको बहुत बात पालन करेके मुइ नाहिँ कहबहिँ। 25 बाकि मुइ नाहिँ यवइलइ मोरमा तोहार विस्वास बरियार बनोइह। 26 जुने दुस्टक सक्तिके जितसइ हसे यखिरलइ मोर इछा पुरा करइरहसइ, वकरेके मुइ संसारक जम्मे जाति-जाति वपरा सासन करेके अधिकार देबहिँ। 27 वकरपाछा तोहरा हुनुकरमा लोहक लाठिसे सासन करबह हसे हुनुकाके माटिक भडिया नहिँया खाडा-खाडा बनोबह। 28 मुइ मोर पितासे पउलि अधिकार हुनुकाके देबहिँ। मुइ वकरेके बिहनाक तरगन फेनि देबहिँ। 29 जाकर कान बडइ, पवितर-आत्मा मन्डलियानिके कहलि बतवा सुनिह।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.