प्रकास 18 - चितवनिया थारुबेबिलोन सहरवाक पतन 1 वकरपाछा मुइ स्वरगसे झरइकि दोसरे एगुडा स्वरगदुत देखलहिँ। वकर जबड अधिकार रहलइ हसे वकर तेजसे धरतिया इजोर भेलइ। 2 उअ जबड माहे यसके कहके चिलेलिय, “पतन भेलइ! महान सहरवा बेबिलोन नास भेलिय। उअ महान सहरवा भुतसभ रहना, जम्मे खलिक दुस्टा-आत्मा, जम्मे खलिक असुद्ध चेरइसभ रहन ठउरि भेल बडिय। 3 केहकेकि जम्मे जतियाक मन्सावाह मोद पियले नहिँया यापन खराब इछा लागल चिजु करके परमेस्वरके आराधना हइने करसइ। संसारक रजवाह वकरसाङे धुचुड करले बडइ हसे संसारक व्यपरियवाह वकर हइने मेटइना भोग-विलासक कारन धनि भेल बडइ।” 4 तब मुइ स्वरगसे यसके कहइकि दोसरे स्वर सुनलहिँ, “अरे मोर मन्सावाह, उअ सहरवासे निकड यउह, नत वकर पापसभमा तोहरा सहभागि हखबह हसे वकर पवलि सजाय तोहरा फेनि पउबह। 5 केहकेकि उअ सहरवाक पापसभ स्वरगलइ किहो चिजु थहुरा लागल नहिँया बडइ हसे परमेस्वर वकर दुस्ट कमवा समझले बडसि। 6 उअ सहरवा तोहराके जसके व्यबहार करले रहलिय, तोहरा वकरेके वसने व्यबहार करिह। उअ तोहार तहिँया जसके काम करले बडिय, वकर दु गुना फिरादिह। उअ सहरवा दोसरि मन्सावानिके दुःख देले नहिँया, तोहर वकरेके दु गुना दुःख दिह। 7 उअ जतुरा मान-सम्मान पउले हसे सुख-विलास करले रहलिय, उतुरे वकरेके सोक तके कस्ट दिह, केहकेकि उअ मनवामा कहसिय, ‘मुइ त महरानि भके बेठल बडहिँ, मुइ विधुवा हइने, मोर कबहुँ फेनि सोक करे नाहिँ परतइ।’ 8 उहेसे एके दिनमा वकरमा, रोग, यनिकाल जम्मे विपति यतइ। यगिया वकरेके भस्म पारबिय, केहकेकि वकर न्याय करलहरा प्रभु परमेस्वर सक्तिसालि बडसि।” धरतियामा बेबिलोनक तहिँया विलाप 9 वकरसाङे धुचुड करलाहर हसे सुख-विलासमा रहलहरा धरतियाक रजवाह उअ सहरवाक जरइकि यगियाक धुववा देखके कनतइ तके विलाप करतइ। 10 वकर दुःखवा देखके हुनुका खाँ डेरेसे तनाउ ठडियाके यसके कहतइ, “धिकार! धिकार! तुइ जबडि सहरवा, सक्तिसालि बेबिलोन! एकिघर तुइ सजाय पउलहि।” 11 धरतियाक व्यपरियवाह वकर तहिँया कनतइ हसे विलाप करतइ, केहकेकि कुनहुँ फेनि हुनुकर व्यपारक मालसमान फेरि कबहुँ नाहिँ किनतइ। 12 कुनहुँ फेनि हुनुकर सोन, चाँनि, रत्न, मोति हसे मलमलक लुगा, जामुक रंङक लुगा, रेसमक लुगा, लाल रङक लुगा तके जम्मे खलिक बसान काठ, हाथिक दाँतसे बनल चिजु, बहुत मोल परना काठ, पितरिक चिजु, लोह हसे सिङमरमर नाहिँ किनतइ। 13 हुनुका दालचिनि, जम्मे खलिक मसाला, बसान धुप, मुरर हसे गोरहर धुप, मोद तके जइतुनक तेल, मइदा हसे गोहुँ, गाइ-भइसि तके भेडासभ, घोडासभ हसे रथ, कमारा-कमारिसभ फेनि नाहिँ किनतइ। 14 व्यपरियवाह वकरेके कहतइ, “तोर मनवाक चाहलि यसल चिजुसभ तोरसे गेल बडइ। तोर धन-सम्पति हसे यसआराम जम्मे नास भेलइ तके उअ कबहुँ फेरि नाहिँ पउबहि।” 15 उअ सहरवाक मन्सावानिसाङे व्यपार करके धनि भेलि व्यपरियवाह वकरमा यइलि दुःखवा देखके तनावे ठडियाके यसके कहते जबड माहे कनतइ हसे सोक करतइ। 16 “इअ सहरवाक तहिँया कसनुक डर लगना जुन यलइ! इअ मलमलक यसल लुगा, जामुक रङक लुगा हसे चहकार लाल लुगा पेहरके सोन, रत्न तके मोतिसभसे कछाइल रहलिय। 17 एकिघर वकर जम्मे धन-सम्पतिया वरेलइ।” जम्मे पानि जहजवाक कप्तनवाह, जहजवामा यातरा करलहरासभ, जहजवा चलोलरासभ, समुनदरवामा काम करके यापन पेट पाललहरा तनावे ठडियलइ। 18 उअ जबडि सहरवासे जरके निकडलि धुववा देखके यसके कहते चिलेलइ, “इअ सहरवा नहिँया जबड सहर त कुनहुँ फेनि हइने रहलइ?” 19 हुनुका यापन मुडियामा धुर गहते कनते हसे विलाप करते यसके कहलइ, “धिकार, धिकार जबडि सहरवा जाकर धन-सम्पतियासे पानि जहजवाक मालिकवाह धनि भेल रहलइ। एकिघर उअ नास भेलइ। 20 “तब मुइ स्वरगसे यसके कहइकि सुनलहिँ, हे स्वरगमा रहलहराह, वकर नास भेलेसे खुसि हखह, परमेस्वरक जनसभ, प्रेरित हसे अगमवक्तावासभ खुसि हखह, तोहराके करलि अन्यायक तहिँया परमेस्वर वकर न्याय करले बडसि।” बेबिलोनक अन्तिम विनास 21 वकरपाछा एगुडा सक्तिसालि स्वरगदुत जबड जाँत नहिँया एगुडा पत्थरा उठाके यसके कहके समुनदरवामा फकलिय, “इअ जबडि सहरवा बेबिलोन यसने फकेबिय हसे उअ फेरि कबहुँ नाहिँ देखा परबिय। 22 विडा, बाँसि, धुतुहाक यवाज हसे गित गवलहरानिक स्वर याबेसे तोरमा कबहुँ नाहिँ सुनेतइ। कुनहुँ खलिक सिप भेल मन्सेसभ कबहुँ नाहिँ पवेतइ। जाँत चलावलक यवाज कबहुँ नाहिँ सुनेतइ। 23 डिबरिक इजोर तोरमा फेरि कबहुँ नाहिँ देखेतइ, याबेसे तोरमा दुलहा हसे दुलहिक स्वर फेरि कबहुँ नाहिँ सुनेतइ। केहकेकि तोर व्यपरियवाह धरतियाक जम्मे धनि-धनि मन्सेसभ रहलइ, तोर मन्तरसे धरतियाक जम्मे मन्सावाह ठगाइल रहलइ।” 24 बेबिलोन सहरवा सजाय पउले बडिय, केहकेकि धरतियाक अगमवक्तावाह हसे परमेस्वरक पवितर जनसभके मारले बडिय। उअ सहरवा जम्मे धरतियाक मारलि मन्सावानिक दोसि बडिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.